“Ojevo jẽ toporoereko katu peiko ipi”, e'i mã'ẽ
2
Ãmõ, kee a'e pejẽ, eretãrãgwerà kõ. Ikatuay wete Janerõvijã Jesu Kiristu. A'e rè jajirovija Janerõvijã rõmõ mã'ẽ tè. Ajawyi kee tijaiko eruparà kõ rõmõ ipi. Jane kõ ojevo jẽ tijareko katu ipi. “A'e ywesõ” taoty e'ã jane kõ rè jaja'a remẽ. 2 Kee jaa rè tapemã'ẽ esa. Ma'e remẽ pejimoaty Jesu moe'ea rè pekupa remẽ jakatu, jane mõ sõ oike uu pekoty remẽ. Nimoma'e ywe'ei mã'ẽ tè a'e. A'e ãmẽ tyru jukwerà tè opypy eroike. Ãmẽ ãmõ teve oike. Imoma'e ywete mã'ẽ tè a'e. Yvy karakuri jinõgwerà tẽ tesõ opypy eroike opõ'ãgwa rõmõ. Ãmõ, tyru e'ekwerà tẽ tesõ opypy eroike. A'evo sõ remẽ imoma'e ywete mã'ẽ ywesõ pemoe'e ywete kuwa nimoma'ei mã'ẽ wyi. 3 Tyru e'ekwerà opypy mã'ẽ pè ãmẽ kee pejẽ kuwa: “Ike aã apyka e'e 'aryvo eapy”, pejẽ kuwa. Nimoma'ei mã'ẽ pè ãmẽ kee pejẽ kuwa: “Mokope kõrijõ epõ'ã ejupa”, pejẽ kõrijõ kuwa. Ma'e remẽ kee pejẽ kõrijõ kuwa ijupe teve: “Yvyu eapy”, pejẽ kõrijõ kuwa ijupe. 4 A'evo sõ pereko kõ remẽ, ojevo jẽ rõwã pereko kõ kuwa! Imoma'e ywete mã'ẽ kõrijõ pemoapy kuwa. Nimoma'ei mã'ẽ rè ãmẽ napeja'a'ãi. A'evo sõ peiko remẽ, pejipy'amogeta ai kuwa ãmẽ. Nivoi 'ete peiko kuwa Janejare'e pè ãmẽ ipi.5 Pejapyaka katu eayvu rè, eretãrã eremiau kõ. Ike yvy pè jane kõ werõarõ nimoma'ei mãe kõ ipi. Janejare'e ãmẽ opyteporo kõ, ãwisõ tojirovija ywete ee kupa. Ojirovija katu ee kupa remẽ, aje ywete Janejare'e owaray wereko kõtà wena pè, wemĩgwai e'eay kõ rõmõ. Ãwitõ pirujẽ wauparà kõ werekotà, ãwĩvo wereko kõtà, e'i. 6 A'evo ipe remẽ, nivoi pereko kõ ipi! [Ivo kuwasi pereko kõ mijã!] Emã'ẽ! A'e kõ rõwã pemomorijau penereko ipi! Imoma'e ywete mãe kõ tè pemomorijau penereko ipi. A'e kõ tè peneraa ivo tekoua kuwaparà kõ rovake pemomorijauoka ipi! 7 Ãmõ, Janerõvijã ywete tẽ tesõ werõarõ ywe'e tite kupa ipi. Ãwĩvo janererõarõ teve Janejare'e koty rewarà kõ rõmõ janerereko kupa ipi. A'evo imoma'e ywete mãe kõ ekoi ipi.
8 Janejare'e omojikuwapa manyvo tijaiko emĩgwai e'eay kõ rõmõ. Kee e'ipa ikusiwaoka karamoe remẽ: “Nevoarà kõ tereauvay ikõ ipi nẽ. Ãwitõ nejiauvay ipi, tãwĩvo ve eauvay kõ ereko”, e'ipa.a Ãwĩvo peiko remẽ tè, ikatutà ãmẽ peupe, a'e pejẽ. 9 Ajawyi imoma'e ywete mã'ẽ rè jẽ sõ pejimory nimoma'ei mã'ẽ wyi remẽ, pejavytà Janerõvijã ywete rekoa ãmẽ. “Nivoi tè ene neiko”, e'ità Janejare'e peupe ãmẽ. Penemavotà ãmẽ oo ky'y, naperovijai ijayvu remẽ. 10 Pirujẽ Janejare'e ayvu ivo tekoua rewarà rupi tijaiko ipi. Ijayvu rupi jaiko remẽ ikatuay ãmẽ. Ajamã'ẽ pirujẽ ijayvu rupi katu tijaiko. Ijayvukwerà pẽgwerà rupigà jaiko remẽ, nikatu'ãi ãmẽ. Kee e'ità janeupe ãmẽ: “Nivoi mã'ẽ tè ãwĩ. Eayvu ivo tekoua rewarà ojavy mã'ẽ tè ãwĩ”, e'ità janeupe ãmẽ. Ãwitõ ojavy javy tesõ mã'ẽ pè aepo e'i, ãwĩvo ve ojavy miti mã'ẽ pè e'i. 11 Ãwitõ Janejare'e kee e'i: “Tapejimomy'a e'ã ikenẽ. Pejireko remẽ a'e reve kõrijõ tè tapejapakyry awyje”, e'i mã'ẽ. Kee e'i teve: “Tapejuka e'ã ikõ mirà ipi nẽ”, e'i mã'ẽ.b
Janejare'e tè aepo e'i janeupe, ojevo jẽ. Ajawyi ojevo jẽ tijarovija. Kee a'età tapetekokuwavay. Porojuka maekwerà kee te'i e'ã ojimoe'e: “Ivo tè aiko. Emã'ẽ. Najimomy'ai ipi!” te'i e'ã oupe, ãwisõ porojuka maekwerà teipe mijã. Ojikuwapa ee. Nikatu'ãi ãmẽ Janejare'e pè, ijayvu pẽgwerà rupigà ekoi remẽ. 12 Pekuwa Janejare'e ayvu janemomoioka janeaiwererà wyi wemimota rupi tijaiko mã'ẽ. Wayvu rupi janemosã'ãgatà kãramõ. Ajawyi upi katu ekoi mãe kõ rõmõ tapeiko teãmã, a'e pejẽ. [Ivo tapeiko ipi. Ivo tapeporegeta teve ipi. Poroporijauesa mãe kõ rõmõ tapeiko ipi.] 13 Napeporijauesai jane kõ remẽ, ivo ve Janejare'e napeporijauesa'ãive poromoe'yia 'arà okwa remẽ. Ãwĩvo ve poroporijauesaa rupi peiko remẽ, peporijauesatà. Napenemavo'ãi peneity ãmẽ.
“Jajirovija Janejare'e rè remẽ, ijayvu rupi jaiko teãmã”, e'i mã'ẽ
14 Ãmõ, kee a'e pejẽ, eretãrãgwerà kõ. Aje ywete jajirovija Janejare'e rè remẽ, poroporijauesaa rupi jaiko teãmã. A'evoa rupi jajikuwapa jajirovija ee mãe kõ rõmõ jaiko. Ava mõ sõ noporoporijauesai remẽ, “aje” nija'e'ãi apijarà ayvu pè, “Janejare'e rè ajirovija”, e'i remẽ. Aepo e'i teywete. Apijarà Janejare'e noereko katu'ãi. 15 Kee mã'ẽ rè pemã'ẽ esa. Pejimoaty remẽ, pemã'ẽ erokwa. Uve põ pepytery pè iporijau mã'ẽ mõ? Uve põ nijyrui mã'ẽ mõ? Uve põ naemi'õi mã'ẽ mõ? Uve remẽ, tapeporijauesa ãmẽ. 16 Ni'ei kee pejẽ kõrijõ nanepãtavõi remẽ: “Janejare'e tè tanepãtavõ nẽ”, pejẽ kõrijõ ijupe remẽ. Japãtavõ apijarerà, Janejare'e koty rewarà kõ tè jane rewarà mõ. 17 Poroporijauesaa rupi jaiko remẽ tè aje ywete jajirovija Jesu rè mãe kõ rõmõ jaikotà. Jajirovija e'e Jesu rè mãe kõ rõmõ jaiko remẽ, jajikuwatà ivo jaikoa rupi ãmẽ. Na'evoi sõ jaiko remẽ, aje ywete rõwã Jesu rè jajirovija. Jajirovija rã'ãgagà tè kuwa a'evo jaiko remẽ ipi.
18 Aepo rè ava mõ kee e'i epe kuwa janeupe: “Jesu rè nejirovija mã'ẽ rõmõ neiko. Ije ãmẽ poroporijauesa mã'ẽ rõmõ aiko”, e'i epe kuwa. Ajamã'ẽ aepo e'i mã'ẽ pè kee a'e kuwa apijarà rovaja. Jesu rè jajirovija e'e remẽ, poroporijauesaa jaiko mã'ẽ rupi jajikuwa ee jajirovija e'e mã'ẽ rõmõ jaiko ipi, a'e tè kuwa ijupe. Jajirovija ee remẽ, japorijauesa teãmã jane kõ ipi. Nuvei 'ete noporoporijauesai epe mã'ẽ, ajamã'ẽ Jesu rè ojirovija e'e jẽ mã'ẽ. Neresa'ãi kuwa a'evo ekoi mã'ẽ! Ajamã'ẽ ivo aikoa rupi ajikuwatà Jesu rè ajirovija e'e mã'ẽ rõmõ, a'e kuwa ijayvu pè.
19 Kee pejẽ ipe kuwa: “Aje, uve pe'ĩte Janejare'e”, pejẽ ipe. Ãjãgai kõ ve tesõ ãwĩvo okuwa. Ajawyi okyje iwyi kupa. Ajamã'ẽ ijayvu rupi noikoi kupa ipi. 20 Napetekokuwai 'ete remẽ, kee pejẽ ipetà peiko: “Janejare'e rè ajirovija ipi”, pejẽ ipetà. Ajamã'ẽ ijayvu rupi napeikoi remẽ, manyvo jaa mõ rõwã aepo pejẽtà! 21 Tãmõ Aparão amyry rè pejipy'amogeta esa.c Kõitokõ Janejare'e kee e'i ijupe: “Nera'yry Isaki ejuka ime'ẽ ije.” Aepo e'i ijupe remẽ itõkõ, “hoõ” e'i tãmõ Aparão ãmẽ. Ajaire itõkõ oo ijayvu rupi ãmẽ. Wa'yry weraa ijukatà ijayvu rupi. Janejare'e pè temiapy rena 'aryvo oinõtà ijukatà mijã! A'e rupi itõkõ ojikuwa Janejare'e rè ojirovija mã'ẽ rõmõ. Ajawyi Janejare'e ory ee. “Ivo katu mã'ẽ tè ãwĩ” e'i ijupewarà mõ. 22 Peenu katu põkõ Aparão aepo jaa remẽ? Ojirovija e'e ee maekwerà ojevo jẽ ijayvu rupi ekoia reve. Ajawyi kee e'i Janejare'e ijupewarà mõ: “Aje ywete ojirovija katu ere”, e'i. 23 Ajawyi aje ywete Janejare'e ayvukwerà kee e'i maekwerà: “Aparão aje ywete Janejare'e rè ojirovija. Ajawyi Janejare'e ivo katu ekoi mã'ẽ rõmõ wereko”, e'i maekwerà.d A'evo tãmõ Aparão ekoi. Ajawyi tè “ejimorypa” e'i Janejare'e ijupe.
24 Peenu katu põkõ aepo a'e aporegeta pejẽ remẽ? Janejare'e ayvu rupi katu tè Aparão ekoi rewarà mõ, ivo mã'ẽ rõmõ Janejare'e wereko. Na'evo'ãi kuwa ijayvu rupi noikoi sõ remẽ, “Ajirovija katu ee”, e'i epe remẽ. Ijayvu rupi ekoi mã'ẽ pè tè “ejimorypa” e'ità. Aepo e'i tary ve janeupe jajirovija e'e ee remẽ.
25 Ãmõ, sa'i Raapi rè peja'a.e Ojirovija e'e ee mã'ẽ tè teve itõkõ sa'i Raapi. Karakuri repy rõmõ ojimomy'a maekwerà teipe itõkõ a'e. Kõitokõ karamoe remẽ Isaeu kõ opãsarõtà Kanaã yvy remẽ, kwaima'e kõ mõ oike vija rã'ĩ sa'i Raapi rena pè ee omãjã. A'evo remẽ itõkõ sa'i Raapi opãtavõ kõ. Wetã wyry pè itõkõ oinõ gatu kõ rã'ĩ, etãrã kõ tojuka e'ã. Aja paire itõkõ ãmõ pee rupi tè omoẽoka imono kõ. Aje Janejare'e rè ojirovija vija sikaepo rewarà mõ tè a'evo ekoi. Ajawyi tè ivo katu ekoi mã'ẽ rõmõ Janejare'e wereko, emimota rupi katu tè a'evo ekoi rewarà mõ.
26 Ãmõ, kee a'età. Janepirà rewarà rè tè poromosã'ãgatà tapekuwa sa'u. Aje ipe sõ janepirà janererekoarà mõ ekoi mijã. Ajamã'ẽ nuvei sõ jane'ãg remẽ, nijaiko'ãi kuwa ãmẽ. [Jamãnõ kõrijõ kuwa ãmẽ. Moma'e rã rõmõ rõwã kuwa janepirà, nuvei sõ jane'ãg remẽ ekoi.] Ãwĩvo ve Janejare'e pè jarovija ipe remẽ, ajamã'ẽ jane kõ nijareko katui remẽ. Nija'e'ãi mã'ẽ vo 'ejẽ kuwa jaiko.