Ãwĩ kareta eremikusiwarerà tapemogeta enu. Evo teve pejẽ Janejare'e koty rewarà kõ rõmõ peiko. Pejimosãsãi peiko mãe kõ tè pejẽ. Ãmõ ãmõ tena rupi pejimosãsãi pejimoena peiko mãe kõ tè pejẽ. Ãmõ wãnà kõ pyterà rupi peiko mã'ẽ tè pejẽ.^a

Owarĩ põ peiko? a'e pejẽ imono.

2 Eretãrã kõ, waypete ipe penekoa remẽ ikõ tapenory jẽ kõrijõ peiko ipi nẽ. Ãmõ, pejimomorijau ipe remẽ tapenory jẽ peiko ipi. 3 Pejimomorijaua rupi pejimokasi jẽtà Jesu rè pejirovija peiko. Napepoi tite'ãi iwyi. Pejipytaso jẽtà ee peiko. Pejipykãtã jẽtà ee. 4 A'evo peiko remẽ tè ikatutà Janejare'e pè. Napejimoja'y'ãi ijupe ãmẽ. Ãmẽ tè kee ne'i'ãi pejẽ: “Napejimo'yive ere ajamã'ẽ”, ne'i'ãi peupe ipi.

5 Napetekokuwa ywe'eive ivo tekoua rè remẽ, Janejare'e ayvu rupi remẽ, tapeporanu ijupe. Pemotekokuwavaytà ãmẽ, peporanu ijupe remẽ. “Emosuru sõ pekupa”, ne'i'ãi janeupe japoranu ijupe remẽ ipi. Opota katu janemotekokuwa ipi.^b 6 Ãmẽ peporanu ijupe remẽ, “Aje a'evotà erereko”, tapejẽ pepy'a pupe. Kee tapejẽ tite e'ã: “A'evotà sipõ erereko?” tapejẽ e'ã. Ãmõ, “Maevo Janejare'e emotekokuwatà. Maevo ãnĩ”, tapejẽ e'ã teve ipi. “Ma'e remẽ teipõ”, pejẽ tite sõ Janejare'e pè remẽ, kee mã'ẽ votà tè pejẽ peiko. Ãwitõ yvytu pãranã omopipo erojivy jivy mã'ẽ. A'evo 'ejẽtà ãmẽ peiko, “aje ywete” napejẽi remẽ. 7-8 Apijarà noãrõ'ãi Janejare'e remime'ẽ rã ãmẽ. Nojipãtavõoka'ãi ijupe. [Maevo jane kõ ayvu kõrijõ sõ wenu kupa ipi remẽ, nojimomãatã'ãi ãmẽ kupa.] Pãranã jirojivy jivy vo 'ejẽ ekoi ãmẽ ky'y. Ajawyi a'evo sõ peiko remẽ, Janerõvijã ywete napepãtavõ'ãi ãmẽ ipi.

9 Ãmẽ peporijau sõ remẽ, Janejare'e peporijauesatà. A'e rè tapenory peiko ãmẽ. 10 Ãmõ, pemoma'e ywete sõ remẽ, pemoma'e kõ rè ywesõ rõwã tapenory. Aje Janejare'e rekoa rè kõrijõ tè tapenory ipi, japa mãe rã tè jane ipi rewarà mõ. 11 Ãwitõ temitã mõ ipoty katuay remẽ, ajaire kwaray omii remẽ, osupa ipotyry ipi. Ãwĩvotà imoma'e ywete mãe kõ kãramõ. Omoma'e kõ revejẽ opatà kupa.^c

12 Jajimomorijauvay ipe remẽ, tijajipytaso jẽ Janejare'e rè jajitãrõ gatu ipi. Tijajipykĩ ee jaiko. Ãmẽ si janeroryvaytà ãmẽ ky'y. Janejimomorijaua awyjepa ky'y remẽ, awyje Janejare'e janemoigo karuarutà opyri ãmẽ ky'y. Jajipytaso jẽ ee maekwerà repy rõmõ a'evo janererekotà. Aepo e'ipa Janejare'e pirujẽ wauparà kõ pewarà mõ. 13 Ãmẽ ava mõ sõ pepõ'õ mewarà mõ sõ nivoi kytywarà rõmõ ekoi remẽ, kee te'i e'ã: “Janejare'e tè rõwã põkõ emoaioka agyvo taiko”, te'i e'ã oupe. Ãwitõ Janejare'e nojimoaiokai ipi, ãwĩvo ve noporomoaiokai ipi. 14 Ovote a'evo ekoi mãe kõ ojimoai ipi. Wemimota ai rupi tè ekoi kupa, ojãvijõ kõ jẽ. 15 Ajawyi nivoi tekoua rè tè sõ pejitupi ipi remẽ, a'e rè pejipokuwatà ãmẽ. Ajaate peaipatà peiko ãmẽ ky'y, nivoi mã'ẽ rè tè pejitupi rewarà mõ. A'evo nivoi tè peiko sõ remẽ, peity ywe'e titetà Jesu rekoa ãmẽ ky'y. Janejare'e reruparà rõwã peikotà ãmẽ ky'y. 16 Ajawyi ajare, “Tapejimoripe ywe'e tite e'ã ikenẽ”, a'e pejẽ, eretãrã eremiau kõ.

17 Janejare'e remime'ẽ kõ pirujẽ ikatu. Pirujẽ ikatukwerà kõ, poromokasioka mãe kõ tè Janejare'e ome'ẽ. Yva pewarà tè ome'ẽ. Poroyapea reinõgarerà tè Janejare'e. A'e niteei mã'ẽ tè. Niteei 'eteay mã'ẽ tè. Ikatukwerà ome'ẽ janeupe ipi mã'ẽ tè. Kõ'ẽ jawe jawe a'evo janerereko ipi. 18 Ovote wemikuwa rupi janerereko, wãkarã kõ rõmõ ipi. Wayvu katu aje ywete mã'ẽ Jesu Kiristu rewarà omuroka janeupe ky'y, ãwisõ ijayvu rupi tijaiko ky'y. Jane ywesõ emiau kõ mõ jaiko ipi.

19 Kee jaa mã'ẽ rè tapeja'a, eretãrã kõ. Tijajapyaka katu rã'ĩ enutà. Tijaporegeta tuve e'ã. Ãmõ, tijajimõarõ tuve rã'ĩ e'ã. Aepo jaa pekuwapa. 20 Jajimõarõ amãtejẽ sõ ipi remẽ, Janejare'e remimota rupi rõwã jaiko ywe'e titetà ãmẽ ipi. 21 Ajawyi pirujẽ peaiwererà tapeitypypyipa. [Ayvu teitetea. Wari waria kõ. Jitupia kõ. Wãi wãisõ oo...] Janejare'e 'Ãg, “Nivoi neiko”, e'i nepy'a pè remẽ, “Aje ywete nivoi aiko”, tapejẽ ãmẽ ijupe. “Ajawyi awyje taiko awi Janejare'e ayvu rupi”, tapejẽ ky'y. “Aje ywete wayvu oinõ janepy'a pè mã'ẽ. A'e rupi taiko ky'y”, tapejẽ. Ãmẽ si Janejare'e penereko katutà, ijayvu rupi katu tapeiko ipi.

22 Ajawyi petekokuwa ikõ ãwĩvoa rè nẽ, a'e pejẽ. Tapejimoripeoka ywe'e tite e'ã ee. Aje ywete Janejare'e ayvu tapeenu e'e, upi tapeiko, a'e pejẽ. Ni'ei peenu kõrijõ tè sõ remẽ, ajamã'ẽ upi napeikoi remẽ. A'evo mãe kõ ojimoripe tè ipi. “Janejare'e ory teipõ ere”, e'i oupe tite kupa. 23 Apijarà kõ wenu ipe ijayvu. Ajamã'ẽ upi noikoi kupa. Ijaiwererà ojikuwa ijupe kõ paire, earaipa iwyi kupa. [“Aje, nivoi aiko”, ne'i kupa. “Tajimotee ajawyi”, ne'i oupe kupa.] Ãwitõ ava mõ omã'ẽ gatu ipe warua rupi oova rè remẽ. 24 Omã'ẽ kõrijõ tè oova rè warua rupi. Ãmẽ ajaire ojisyry oo remẽ, noja'ai 'ete oova rè ky'y. Ãwĩvo 'ejẽ Janejare'e ayvu rè noja'ai ywe'e tite mãe kõ, nojapyaka katui ee mãe kõ. Wenu rã'ĩ paire kuise'ẽ earaipa iwyi kupa. Ajamã'ẽ aekwery vo jẽ ekoi kupa. 25 Warua vo 'ejẽ Janejare'e ayvu janeupe. Ãwitõ warua janerova ky'aa omojikuwaoka janeupe, ãwĩvo ve Janejare'e ayvu ivo tekoua rewarà janeaiwererà omojikuwaoka janeupe ipi. Wayvu rupi teve Janejare'e janemomoioka janeaiwererà wyi ipi, ipyri tijaiko karuaru ky'y. Manyvo opota tijaiko mã'ẽ omojikuwaoka teve janeupe ipi. Tapejapyaka katu ikõ ijayvu rè ajawyi ipi nẽ. Tapejimotekokuwavay ikõ peja'a ee nẽ. Tapenearai e'ã iwyi. Aje ywete upi tapeiko ipi. Ãwĩvo peiko ipi remẽ, ãmẽ si ikatuay Janejare'e penerekotà ãmẽ ky'y.

26 Peitypypyipa peayvu teitetea, a'e pejẽ. Nisiityi remẽ, manyvo jaa rõmõ rõwãtà kee ja'e: “Janejare'e rè ajirovija Erõvijã rõmõ”, ja'e tite. Janevote jajimoripe tè jaiko, janeayvu teitete jẽ sõ jaiko remẽ. Ajawyi Janejare'e, “Ererovija rã'ãga mã'ẽ tè ãwĩ”, e'ità kõrijõ jane.

27 Kee jaiko remẽ tè ikatu Janeruwasu pè: Ojimomorijau mãe kõ rè jaja'a katu ipi remẽ. Ja'yry tuu okãjã iwyi mãe kõ rè jaja'a katu ipi remẽ. Ãmõ, ijy okãjã iwyi mãe kõ rè jaja'a katu ipi remẽ. Ãmõ, terekwarerà kõ rè jaja'a katu ipi remẽ. A'evo jaiko remẽ ikatuay Janejare'e pè jaiko. Ãmõ, jajireko katu nivoi mã'ẽ wyi remẽ. A'e a'evoa rupi jaiko remẽ tè, “Aje ywete ojirovija ere mã'ẽ tè ãwĩ”, e'ità Janejare'e janeupe ãmẽ.