Ayvukasia imoma'e ywete mãe kõ pewarà
5
Kee a'e imoma'e ywete mãe kõ pè eayvukasi rõmõ. Pejapyaka katu ikõ eayvu rè nẽ! [Age'e pemoma'e ywete ipe. Ajaire opa jẽtà pewyi.] Pejimomorijau kõrijõtà tè peiko ãmẽ ky'y. Ajawyi tapeja'o amãtejẽ pejimomorijaua rã renone, a'e pejẽ. 2 Pemoma'e ke'ĩ opatà pewyi. Penyru kõ ijupatà opa. Kupi'ĩ o'upatà penyru. 3 Pehujua o'upatà nekarakuri. Ãmẽ tè titetà Janejare'e ayvu aje ywete mã'ẽ rè peja'atà ky'y. “Aje ywete sikõ Janejare'e ayvu eupewarà mõ mijã”, pejẽ tarepe ky'y. Ãmẽ si yvy opa remẽ, tata poroapy mã'ẽ vo aytà pejimomorijaua pejẽ ky'y. Moma'e rõmõ rõwã age'e karakuri kõ moma'e kõ pemoaty wete ipe mã'ẽ.b 4 Nivoi pereko penemĩgwai kõ ipi. Ajawyi oja'o tesõ Janejare'e rovake kupa. Kee e'i imo'y pene ovake kupa: “Orerõvijã oremoripe tesõ!” e'i kupa. “Oreposikoawerà kõ ikatuay mã'ẽ nomoepyi ore ipi”, e'i kupa. Aepo e'i imo'y pene Janejare'e rovake kupa. Janejare'e a'e ywesõ ikasi mã'ẽ tè wenu ija'oa kõ, yva pe wyi.c 5 [Penemĩgwai kõ ojimomorijauvay upa remẽ,] pejẽ ãmẽ owaray peku pekupa ipi. Penemimota kõ pè kõrijõ pejimoe'eoka pekupa. Ãmõ, penoryvay kõrijõ peaiwererà rè. Ãwitõ janerima jamogyrau rã'ĩ iwatà. Ijupe ikatuay rã'ĩ, nijamoposikookai tikyrau rewarà mõ. Jaapoi katu kõrijõ tè tikyrau. [Ãwĩvo pejẽ. Napeposikoi. Pejimogyrau kõrijõ pè peiko. Ajamã'ẽ ãwĩvo paire, ovajarà rõmõ pejimomorijauvaytà ky'y, Janejare'e poromoe'yi 'arà mẽ.] 6 Pemomorijauoka kõrijõ tesõ ivo katuay ipe mãe kõ ijukaoka, manyvo ne'i'ãi epe pejẽ remẽ. Ajawyi a'evo Janejare'e penerekotà.“Simoa'u jẽsi Jesu vãea”, e'i mã'ẽ
7 Eretãrã kõ. Tapemoa'u jẽsi ikõ Janerõvijã ywete vãea nẽ. Tapejikõtevẽ e'ã ãrõa rè, a'e pejẽ. “Naãrõ'ãi maevo ky'y”, tapejẽ tite e'ã ipi. Ivãea tapeãrõ jẽ pekupa ipi. Ãwitõ koo jarà wãrõ jẽ wemitã ti'a ipi. Ãmõ, wãrõ jẽ teve ãmãnà temitã morya rõmõ. 8 Ãwĩvo tapeiko. Tapeãrõ jẽ Janerõvijã ywete vãea pekupa. Tapejimokasi jẽ, nikuipei ivãea ky'y rewarà mõ. 9 Eretãrã kõ, “Ãwĩ tè ãwĩvo ekoi”, tapejẽ e'ã ojiupe ipi. Tapeporegeta wete e'ã teve ojiupe ipi. Ãmẽ tè Janejare'e, “Nivoi mã'ẽ tè ene”, ne'i'ãi peupe. Ke'ĩma ovãe janemoe'yia 'arà ky'y, a'e ywesõ mã'ẽ. A'e rõmõ'ĩte nivoi mãe kõ omomorijauoka kuwa ipi.
10 Janerõvijã ywete ayvu mojenuarà kõ rekoawerà rè tapeja'a ipi, eretãrãgwerà kõ.d Nojikõtevẽi itõkõ ãrõa rè kupa ipi. Ãwisõ ojimomorijau ipe kupa remẽ, wãrõ jẽ ojimomorijaua rupi kupa ipi. “I'ete rã'ĩ aãrõ ky'y”, ne'i kupa. Ajawyi janemotekokuwa kupa wekoawerà rupi. Eruparà rõmõ tijaiko ajawyi. 11 Ivo katu Janerõvijã ywete ayvu werovija, ajaate omãnõa pe'ĩ kupa ipi. Ojimomorijauvay ipe kupa remẽ, ojipytaso jẽ ee ojitãrõ gatu kupa. Noityi kupa. Ãwitõ tãmõ Jo karamoe remẽ. Ojimomorijauvay ipe remẽ itõkõ, ojipytaso jẽ Janejare'e rè ojitãrõ gatu. Ajaate itõkõ Janejare'e owaray wereko ky'y. A'evo ve Janerõvijã ywete janerereko ipi. Okãte'ã ywete janere ipi, poroporijauesa ywete ipi rewarà mõ.e
12 Peenu katu eayvu, eretãrãgwerà kõ! Aje mã'ẽ rè kõrijõ tè tapeporegeta peiko ipi. Pejiayvume'ẽma ava mõ pè remẽ ikõ peayvukwerà rupi katu tapeiko ipi nẽ. [A'evo peiko remẽ, pejikuwatà aje ywete pejẽ mã'ẽ rõmõ peiko ipi. Napeeka'ãi peayvu mokasia mõ, jane kõ penerovijatà teãmã rewarà mõ.] Tapemovy e'ã ikõ yva rerà, peayvu mokasia rõmõ ipi nẽ. Ãmõ, yvy tapemovy e'ã teve. Tapemovy e'ã wete sikenẽ. Nikatui ãmẽ. “Hoõ” eu paire, nijamotee mijẽi. Ãwĩvo ve “ãnĩ” eu paire. Ajaire aepo pejẽ paire, peayvu rupi katu tapeiko ikenẽ. A'evo peiko remẽ, Janejare'e napenemavo'ãi peayvukwerà rewarà mõ kãramõ.f
Janejare'e rè penako'i remẽwarà
13 Pejimomorijau remẽ ikõ tapeporegeta Janejare'e pè ipi nẽ. Ãmõ, penory katu remẽ teve ikõ tapejĩga ijupe imoe'e nẽ, ikatuay wete rewarà mõ. 14 Ãmõ, ava mõ itekorã remẽ ikõ, Jesu koty rewarà rõvijã kõg pè tapeokwai imuu, toporegeta Janejare'e pè eewarà mõ, tikatupa ipi. Moma'eyva kawerà tomogy itekorã mãe kõ rè kupa, Janerõvijã ywete ayvu rupi.h 15 Ãmẽ oporegeta Janejare'e pè ijupewarà mõ kupa remẽ, “Aje ywete omokatupatà ãmẽ”, te'i kupa. Janerõvijã ywete rè tapenako'i aepo javo. “Awyjepa” e'ità teve ijaiwererà kõ pè. 16 Ãwĩvo ve, nivoi peiko remẽ, tapejimome'u Jesu koty rewarà kõ pè, eminu kõ rõmõ ipi. A'e kõ toporegeta Janejare'e pè peaiwererà rè peupewarà mõ ipi. [“Awyjepa” e'ità Janejare'e ãmẽ peupe.] Pemokatutà ãmẽ. A'evo tapeiko ipi Jesu koty rewarà kõ rõmõ peiko. Janejare'e ivo ekoi mãe kõ ayvu wenu ipi. Okasia ome'ẽtà ijupe kõ ipi.
17 Ãwitõ karamoe remẽ Janejare'e wayvu mojenuarà Eriasi ayvu wenu, ãwĩvo ve janeayvu wenu ipi.i Janevo mã'ẽ tãmõ Eriasi. A'e itõkõ oporegeta ywete Janejare'e pè, ãmãnà tomogyoka e'ã rã'ĩ Isaeu yvy rupi. Ãmẽ itõkõ Janejare'e nomogyokari rã'ĩ ãmãnà ijayvu rupi. Moapy kwaray rõmõ tesõ ãmãnà nokyi rã'ĩ ãmẽ. 18 Ãmẽ ajaire oporegeta mijẽ Janejare'e pè, ãmãnà toky ky'y.j Ãmẽ tè itõkõ omogyoka mijẽ ijayvu rupi, tãmõ Eriasi ayvu rupi. Ãmẽ yvy ojimokatu mijẽ. Ãmẽ moma'eyva kõ ejõi mijẽ okwa ky'y. Ory katu jome. [Ajawyi tãmõ Eriasi vo tapeiko, a'e pejẽ.]
19 Kee a'e teve pejẽ, eretãrãgwerà kõ. Pepõ'õmorà mõ sõ Janejare'e ayvu e'e wyi earai tite remẽ, a'e tapepãtavõ imokasi ipi, toerovija mijẽ. 20 A'evo peiko remẽ, pepijarĩtà eko aiwerà wyi erojivy Janejare'e kyty eru. Janejare'e omokatutà ãmẽ. “Awyjepa” e'ità ijaiwererà kõ pè ãmẽ. Mõa'ãrõwã ipe ijaiwererà eeve remẽ, “awyjepa” e'i jẽtà ijupe, peayvu rupi ojivy uu Janejare'e kyty rewarà mõ.k
[Awyjepa ekareta kusiwarerà ky'y.]