3 Ãmõ, kee a'e ene. Wãivĩ naetãrãi mã'ẽ mõ mẽnà omãnõ sõ remẽ, Jesu koty rewarà kõ toporijauesa jẽ ikõ ipi nẽ. Topãtavõ gatu jẽ, aje ywete ojimomorijau iko remẽ. 4 Uve imemyry mõ remẽ, ãmõ, uve ipary remẽ, a'e kõ tè toja'a katu ee. Janeja'yrĩ remẽ, janeruu janererekoarà rõmõ ekoi ipi. Janey ve janererekoarà rõmõ ekoi ipi. Ajawyi jajimovijapa remẽ, janeruu rerekoarà rõmõ tè jaiko ky'y. Janey rerekoarà rõmõ teve jaiko ky'y. A'evo ve janerãmõi rerekoarà rõmõtà jaiko. Janejaryi rerekoarà rõmõ teve jaiko. Jaja'a katu ee kõ remẽ, jajikuwa Janejare'e rekoa rupiwarà kõ rõmõ jaiko. Janejare'e py'a rupi katuwarà rõmõ jaiko ãmẽ.

5 Ãmẽ aje ywete terekwarerà naetãrãi mã'ẽ remẽ, taeako'i Janejare'e rè werekoarà rõmõ ipi. Ajawyi kee te'i Janejare'e pè ipi: “Papa. Epãtavõ rejupa. Emokatu rejupa”, te'i ijupe. Kõ'ẽ jawe jawe aepo te'i ijupe. Pya rupi te'i Janejare'e pè iko. Aryvo rupi ve aepo te'i ijupe iko. A'evo mãe kõ rè Jesu koty rewarà kõ toja'a ãmẽ ipi.

6 Na'evoi terekwarerà ojimoe'e rã'ãga ipi mã'ẽ. Wemimotarà rè kõrijõ tè oja'a mã'ẽ. [Janejare'e rè noja'ai 'ete ipi. Oiko teywete iko.] Ajawyi omãnõma maevo sõ tite Janejare'e rovake iko. Ajawyi a'evo ekoi mã'ẽ pè rõwã aepo a'e ene.

7 Aepo tere terekwarerà kõ pè imotekokuwa kõ, etãrãgwerà kõ revejẽ. Ãmẽ eayvu katu rupi ekoi kupa remẽ, ava nomo'y'ãi nivoi mã'ẽ ee kõ. 8 Pirujẽ Jesu koty rewarà kõ wetãrãgwerà kõ rè toja'a ipi. Na'evoi kupa remẽ, nikatu'ãi ãmẽ. Jesu noerovijai mãe kõ ve wetãrãgwerà kõ rè oja'a teãmã ipi. Ajawyi, Jesu koty rewarà mõ wetãrãgwerà kõ rè noja'ai sõ ipi remẽ nikatuive. Apijarerà kõ ywesõ nikatui noerovijai mãe kõ wyi. Jesu ayvu oitypypyipa ywe'e tite a'evo rõmõ kupa.

9 Ãmõ, terekwarerà mõ isa'imã ywete mã'ẽ Jesu koty rewarà kõ remĩgwai rõmõ ekoità remẽ, erà terekusiwa kareta rè tojikuwa ãmẽ, ãmõ terekwarerà kõ rerà revejẽ. A'e awyje Jesu koty rewarà kõ pãtavõarà rõmõ ekoità ãmẽ. Kee mã'ẽ rerà kõrijõ tè terekusiwa ajamã'ẽ. Isa'imã ywete mã'ẽ. Ojimoava katu teve omẽnà pè uve jẽ remẽ mã'ẽ. 10 Wãivĩ e'eay rõmõ ojikuwa mã'ẽ. Poropãtavõ mã'ẽ. Ikatuay omemyry kõ omovijapa mã'ẽ. Ãmõ, mõropãrà kõ rè oja'a katu mã'ẽ. Aje ywete Jesu koty rewarà kõ rè oja'a katu emĩgwai rõmõ mã'ẽ tè. Ãmõ, ojimomorijau mãe kõ rè oja'a mã'ẽ tè. Ivo katu ekoi mã'ẽ. A'evo mã'ẽ rerà tè terekusiwa kareta rè tojikuwa, Jesu koty rewarà kõ toja'a ee.

11-12 Ajamã'ẽ terekwarerà nisa'imãive remẽ, terekusiwa e'ã ãmẽ erà. Maevo omẽtarà wekatà rã'ĩ iko. Ajaire wesatà omẽtarà. Ajawyi noja'a'ãi joe ky'y. Noposiko'ãi Kiristu koty rewarà kõ remĩgwai rõmõ ãmẽ ky'y, “Awyje a'evoa rõmõ aikotà”, e'ipa Janejare'e rovake paire. 13 A'evoa 'aryvo kee terekwarerà a'evo remẽ ekoi. Omẽtarà rè ywesõ oja'a iko. Ajawyi nijeweri oposiko Jesu koty rewarà kõ pè ky'y. [Jesu koty rewarà kõ sõ ja'umã'ẽ ome'ẽ ijupe remẽ, ãmẽ ywesõ nijewe'ãi ky'y.] Ajawyi oo oo kõrijõtà tè omãjã iko ky'y. Poromogeta geta kõrijõtà iko ky'y. Oporegeta teitete ai kõrijõtà tè iko ky'y. 14 Ajawyi tè terekwarerà nisa'imãive remẽ, erà terekusiwa e'ã Jesu koty rewarà kõ remĩgwai rõmõ. Ikatu sa'u tè ojireko mijẽ remẽ. Timemy mijẽ. Wetãrãgwerà kõ rè toja'a. Omemyry kõ rè teve. A'evo ekoi remẽ, ava nijayvu ai'ãi ikoty. 15 Uve terekwarerà kõ Jesu rekoa oity ywe'e tite mãe kõ, Satanasi po pè oo mãe kõ. Ajawyi aepo a'e amãtejẽ ene.

16 Ajawyi kee a'e wãivĩgwerà kõ pè, Jesu koty rewarà kõ pè. Uve sõ penetãrã mõ terekwarerà rõmõ ojimomorijau remẽ, pejẽ ywe'e tapeja'a ee. “Jesu koty rewarà kõ atyry toja'a ee”, taoty e'ã ijupe. Pejẽ tè tapeja'a ee, penetãrã tè rewarà mõ. A'evo remẽ niwasu'ãi Jesu koty rewarà kõ pè ãmẽ. Terekwarerà naetãrãi mãe kõ kõrijõ tè opãtavõtà ãmẽ kupa ipi. Ãmẽ tè niwasu'ãi ijupe kõ ãmẽ, wãivĩgwerà kõ retãrã terekwarerà rè oja'a remẽ.

17-18 Age'e Jesu koty rewarà kõ rõvijã kõ pewarà mõ akusiwatà, jõvijã poromotekokuwa mãe kõ pewarà mõ.^a Jesu koty rewarà kõ oõvijã kõ rè toja'a katu, oposiko ywete Janejare'e ayvu mojenuarà rõmõ kupa rewarà mõ. Kee e'i Janejare'e ayvu ojikusiwa maekwerà rupi katu toereko kupa: “Nerima pui oposiko neupe rewarà mõ tereapoi katu. Epota tè to'u ãmẽ”, e'i maekwerà rupi katu. Ãmõ, kee ojikusiwa teve maekwerà rupi katu: “Neremĩgwai kõ oposiko katu remẽ, ivo katu teremoepy kõ”, e'i maekwerà rupi katu. A'evo ve Jesu koty rewarà kõ toja'a katu oõvijã kõ rè, oposiko ywete Janejare'e ayvu mojenua rè kupa rewarà mõ. Ãmõ, poromotekokuwa rè teve oposiko ywete kupa rewarà mõ.

19 Ãmõ oromotekokuwatà manyvo terereko ava mõ nivoi mã'ẽ omo'y sõ Jesu koty rewarà kõ rõvijã mõ rè remẽ. Terejapyaka e'ã rã'ĩ aepo jaa rè, pe'ĩte aepo e'i ene remẽ. Tererovija e'ã rã'ĩ ijayvu ai kõ rõmõ. Ajamã'ẽ mõrijõ rõmõ, moapy rõmõ tesõ aepo e'i mãe kõ ky'y remẽ, terejapyaka ee ky'y. Tereã'ã rã'ĩ esa ãmẽ ky'y, terekuwa. “Aje ywete sipõ e'i kupa?” tere enu ãmẽ. 20 Ãmẽ aje sikaepo jõvijã mõ nivoi ekoi remẽ, Jesu rekoa ojavy tesõ remẽ, ãmẽ si taneayvukasi imosĩoka. Jesu koty rewarà kõ rovake tesõ teremosĩoka ãmẽ. Ãmẽ tè ãmõ jõvijã kõ a'evoa rè omã'ẽ remẽ, ojimonyità omãjã ee kupa. Ojireko katutà waiwererà wyi ãmẽ kupa.

21 Eayvukwerà rupi katu tereiko, tuku. Eremikusiwarerà rupi katu teve. Janejare'e rovake tè aepo a'e ene ajupa. Kiristu Jesu rovakeve. Emĩgwai yvapewarà kõ rovake teve. Kee a'e ene nemogeta. Eayvu katu rupi kõrijõ tè tereiko ipi, a'e ene. Ãmõ, ojevo jẽ terereko Jesu koty rewarà kõ ipi, Janejare'e ayvu ojavy sõ remẽ. Nikatui nejimorypa kõrijõ neepy nivoia pe wyi remẽ. Ojevo jẽ teremogeta kõ.

22 Ãmẽ ava mõ Jesu koty rewarà kõ mõ nemojõvijãtà remẽ, eãrõ rã'ĩ imojõvijãtà. [Ekoa terekuwa katu rã'ĩ ãmẽ. Ekoa rè nemã'ẽ maire tè teremojõvijãoka ãmẽ ky'y.] Ãmẽ tè nepo neinõtà ijapyte 'aryvo Janejare'e pè neporegetatà ijupewarà mõ, tojimojõvijã. Nikatu'ãi ojimojõvijã maire tè eko aiwerà ojikuwa remẽ. Ãmẽ ãmõ kõ kee e'i kuwa neupewarà mõ: “Manyvo sipõ nivoi ekoi remẽ Timoteu omojõvijãoka sõ!” e'i kuwa kupa. Ajawyi ekuwa rã'ĩ esa, a'e ene. Ejireko katu ivoa rupi tereiko, a'e ene.

23 Age'e netekorãnà rè aporegetatà neupe. Yy kõrijõ tè rõwã tere'u ipi. Pe'ĩpe'ĩ tere'u uvary aisiriri mã'ẽ nejimi'u remẽ, [neray poã rõmõ,] neremi'õgwerà moyrya mõ, a'e ene.

24 Ãmõ, kee a'e ene. Jane kõ aiwererà rè aporegeta tarà mijẽ. Jõvijã rã nepyteporotà remẽ, tereã'ã rã'ĩ esa ipi. Oiko jane kõ ivo e'ãa ojikuwa katu mã'ẽ. Ãwĩ rapijarà rè nemã'ẽ remẽ, kuise'ẽ nekuwatà nivoi mã'ẽ tè ãwĩ. Ajamã'ẽ oiko teve ivo e'ãa rè nijamã'ẽi mã'ẽ tè. Nojikuwai apijarerà ipi. A'evo mã'ẽ neesatà remẽ waype sa'utà ãmẽ neupe. Age'e rõwã ivo e'ãa ojikuwatà. 25 Ãwĩvo ve oiko ivo katua ojikuwa katu mã'ẽ. Pirujẽ jane kõ pè ojikuwa katu ãmẽ, omã'ẽ ee kupa rewarà mõ. Oiko teve ivoa nojikuwai mã'ẽ, nijamã'ẽi ee mã'ẽ. Age'e rõwã ojikuwa mã'ẽ. Ajamã'ẽ aje ywete kãramõ ojikuwatà ivoa. A'evoa rè teretekokuwa, a'e neupe.