Janejare'e ayvu rè poromo'e rã'ãga mãe kõ rewarà
4
Kee e'ipa Janejare'e 'Ãg mã'ẽ ojikuwa: “Ke'ĩ Jesu uu tarà mijẽ remẽ Jesu koty rewarà kõ mõ werovija ywe'e titetà ãjãgai waria kõ ojimoripeoka”, e'i mã'ẽ. A'evo remẽ opoi ywe'e titetà Jesu rè ojirovija mã'ẽ wyi kupa. Ãjãgai waria rupi tè ekoi ywe'e titetà ãmẽ kupa ky'y. 2 Janejare'e ayvu rè poromo'e rã'ãga mãe kõ ayvukwerà rupi ojimoripeokatà kupa. Apijarà kee e'i rã'ãgatà: “Janejare'e ayvu rupi aiko”, e'i rã'ãgatà kupa. Ajamã'ẽ py'a mãrãkuwa katu rupi noo'ãi kupa. 3 Kee e'i rã'ãgatà kupa ipi: “Tapejireko e'ã. Janejare'e nopotai pejireko remẽ”, e'i rã'ãgatà kupa ipi. Ãmõ, kee e'ità kupa: “Uve ja'umã'ẽ rã'ãga mõ. A'e ve tape'u e'ã ipi. Janejare'e nopotari pe'u remẽ. A'e pe'u remẽ, napekatu'ãi ijupe”, e'i rã'ãgatà kupa ipi.Ajamã'ẽ iwarità tè aepo e'i kupa. Emã'ẽ. Janejare'e tè janeremi'õ rã pirujẽ oinõ. Pirujẽ oinõ janeremi'õ rõmõ. Ajawyi ava mõ Janejare'e rekoa okuwa katu erovija remẽ, tomoe'e rã'ĩ Janejare'e wemi'õ watà ipi. 4 Ja'umã'ẽ pirujẽ ikatu tè janeupe ipi, Janejare'e reminõgwerà kõ ikatu jome rewarà mõ. Ajawyi tijaity e'ã eminõgwerà kõ ipi. Ajamã'ẽ jajimi'utà remẽ, tijamoe'e rã'ĩ Janejare'e ipi, temi'õ watà. 5 Jamoe'e Janejare'e jajimi'utà remẽ, kee e'ità ãmẽ jane: “Õ'õ, e'u”, e'ità ãmẽ jane.
“Kee Jesu remĩgwai e'eay rõmõ tijaiko”, e'i mã'ẽ
6 Aã eremikusiwarerà rè Jesu koty rewarà kõ nemotekokuwa remẽ, Kiristu Jesu remĩgwai e'e rõmõtà neiko ãmẽ. Janejare'e ayvu rupi nejimokasità remẽ, Jesu rè nejirovija ywetetà ãmẽ. Aje ywete mã'ẽ rè netekokuwavaytà ãmẽ. Ajawyi eremikusiwarerà rupi eiko, a'e neupe. 7 Ajamã'ẽ ava mõ sõ kee e'i neupe remẽ, terejapyaka e'ã ijayvu rè: “Tãmõ kõ rekoa rupi tapeiko jẽ”, e'i sõ neupe remẽ, tereenu e'ã ijayvu. Ayvu karamoewarà tereenu e'ã. Janejare'e ayvu kõrijõ tè tereenu. Terejimokasiay, ijayvu rupi katu neiko. 8 Ma'e a'età teretekokuwa sa'u. Japosiko ywete remẽ, janeewe katu ipi. Janepikasi katu ãmẽ. Ajamã'ẽ ke'ĩatu tè janepikasi katu. Ajamã'ẽ Janejare'e rekoa rè ywesõ jajimokasi remẽ, janekasi karuarutà ãmẽ ky'y. 9 Aepo jaa aje ywete mã'ẽ tè. Ajawyi “aje ywete” taoty ijupe ipi. 10 Ajawyi aepo mojenua rè japosiko ywete ipi. Aje ywete, oiko karuaru oiko mã'ẽ tè Janejare'e. A'e rè tè jajirovija ee mã'ẽ. Aje a'e janerereko katu jimomorijau wasua wyi, Jesu rè jajirovija mãe kõ rõmõ. Ajawyi jajimokasi ywete ijayvukwerà mojenua rè ipi.
11 Ajawyi teremojenu eayvukwerà Jesu koty rewarà kõ pè imotekokuwaa kõ rõmõ. Ãmẽ jẽ ipõ eayvukwerà rupi katu ekoità kupa. 12 Nekõnomĩokyry remeve itõkõ Jesu koty rewarà kõ rõvijã rõmõ neiko. Ajawyi maevo ava mõ neayvu noerovija'ãi. Kee e'ità maevo neupewarà mõ: “Ja'yry tè ene. Neretekokuwa ywe'eive neiko”, e'i titetà neupewarà mõ kupa. Ajamã'ẽ kee a'e ene. Aje, nekõnomĩoky ipe. Ajamã'ẽ netekokuwavay neiko. Ajawyi ikatu tè jõvijã rõmõ neiko remẽ. Ajamã'ẽ neayvu noenu tari sõ kupa remẽ, teremogeta kõ jẽ ãmẽ ipi. Ãmõ, ivoa rupi tereiko. Ãmõ, toporoauvay neiko. Ãmõ, terejirovija katu Jesu rè neiko. Ãmõ, terejireko katu nivoi tekoua wyi neiko. A'evo neiko remẽ, nereruparà mõtà ãmẽ ekoi kupa. Jesu rè ojirovija katu mãe kõ rõmõ ekoità ãmẽ kupa.a 13 Ãmẽ naaive nekoty remẽ, ejimokasi jẽ ikõ Janejare'e ayvukwerà rè poromotekokuwaa rè nẽ. Ojimoaty kupa remẽ ikõ, ijayvukwerà wayvo emogeta nẽ, toenu kupa ipi. Emotekokuwavay kõ ikõ ee ipi nẽ, manyvo tijaiko Jesu Kiristu rupi tekoua rè. 14 Janejare'e kasia rupi tè tereposiko ipi. Kõitokõ jypy remẽ jõvijã kõ opo oinõ neapyte 'aryvo nemokasioka Janejare'e pè. Ãmẽ itõkõ Janejare'e o'Ãg rupi neremikuwa ome'ẽ neupe ãmẽ. Ajawyi aã age'e Janejare'e kasia rupi tereposiko jẽ, a'e neupe. Tanerearai e'ã Janejare'e kasia wyi ãmẽ. 15 Jõvijã rõmõ Jesu koty rewarà kõ rè neposiko rewarà mõ, a'evoa rè taneewe katu jẽ neiko ipi. Ãmẽ tè nejikuwatà netekokuwavay mã'ẽ rõmõ neiko.
16 Terejireko katu ikõ Jesu koty rewarà kõ rõvijã rõmõ neiko nẽ. Ivo ikõ tereiko ipi nẽ. Poromotekokuwa neiko remẽ ikõ Janejare'e ayvu e'e rè kõrijõ toporomo'e ipi nẽ, aje ywete mã'ẽ rè. A'evo tereiko jẽ ipi. Ãmẽ tè ene kõrijõ tè rõwã neiko karuarutà Janejare'e pyri. Neremimotekokuwawerà kõ ve a'evotà ekoi.