Aã kareta Janejare'e 'Ãg omotekokuwa Pauru tokusiwa mijẽ Tesaronika wãnà kõ pè maekwerà. A'e taa pè Pauru ekoi remẽ, omotekokuwa kõ ipi. A'e wãnà kõ mõ ojirovija Jesu rè. Oõvijã wasu rõmõ wereko kupa ky'y (J.K.R. 17.1-10). A'e kõ ajaire Pauru omotekokuwa jẽ wemikusiwarerà ypykwerà rupi toiko kupa. Jesu vãea rã rè omotekokuwa, aje ywete mã'ẽ tokuwa kupa. Ajamã'ẽ kee e'i tite ãmõgwerà: “Ovãema sikaepo Janerõvijã ywete!” e'i tite kupa. Ãmõgwerà, “‘Janejare'e tè ije!’ e'i rã'ãgatà kupa. A'evo ojimoe'eoka rã'ãgatà kupa. Janerõvijã vãe e'ãve a'evotà kupa.” A'evoa ojenu Pauru pè remẽ, okusiwa mijẽ kareta imonooka ijupe kõ imotekokuwaa kõ rõmõ. Ma'e okusiwa: “Janejare'e ãpã nojisa'ãive, nomojisaokai mã'ẽ uve jẽ rewarà mõ. A'e Janejare'e wekyi remẽ tè katu ojisatà ky'y. Aja paire tè Janerõvijã Jesu owyjytà yva pe wyi uu ky'y”, e'i ikusiwa kareta pupe imono ijupe kõ (2Tes. 2.7-8).