“Jesu vãea rã tapemoa'u jẽ”, e'i mã'ẽ
5
Ãmõ, kee a'e pejẽ, eretãrãgwerà kõ. Nakusiwa'ãi Janerõvijã ywete vãea rã 'arà rewarà, manyvo remẽ põ, mape kwaray remẽ põ, nijakuwai rewarà mõ. 2 Kee a'e pejẽ. Ivãea 'arà nijakuwa amãtejẽ'ãi. Ãwitõ imona mã'ẽ py'awarà mõ pya ovãe ipi, ãwĩvotà Janerõvijã ywete ovãe remẽ.a 3 Kee e'i tite kupa akatu ovãetà:– Owaray jaiko ky'y! Nijanemarama'ãi jaiko ky'y! Nijakyje'ãi teve, e'i titetà mã'ẽ akatu ovãetà Jesu.
Ajapape wyive jimomorijau wasua poroapy'atà ky'y. Ãwitõ wãivĩ nimemyray pukui remẽ imemy'a kuise'ẽ jẽ, ãwĩvo vetà ivãea 'arà. Jane kõ nojava'ãi iwyi a'evo remẽ. Naiko'ãi mape kyty jajavatà nou mã'ẽ ky'y rewarà mõ nojava'ãi kupa. Janerõvijã ywete ayvu noerovijai mãe kõ wapy'a ywetetà ivãea 'arà.
4 Na'evo'ãi pejẽ, eretãrãgwerà kõ. Napenapy'a'ãi Janerõvijã ywete vãea 'arà rã, pemoa'u jẽ peiko rewarà mõ. Ja'ave rõwã tapeiko e'ã. Oke mãe kõ vo tapeiko e'ã. Omã'ẽ jẽ iko mãe kõ vo tapeiko. 5 Aje ywete Janejare'e ayvu pekuwa mãe kõ tè pejẽ, pirujẽ. Ivo tekoua rupi peiko ipi. Nivoi tekoua rupi ekoi mãe kõ rõwã jane. [Ajawyi jajimotekokuwapa katu ivãea rã rè, noerovijai mãe kõ vo rõwã.] 6 A'e kõ noja'a ywe'ei tite ivãea 'arà rè. Oke mãe kõ vo 'ejẽ ekoi kupa. Ta'evo e'ã ikõ jane ajamã'ẽ nẽ. Simoa'u jẽ ivãea, ikoty rewarà kõ rõmõ. 7 Janerõvijã ywete noerovijai mãe kõ ãmẽ nomoa'u ywe'ei tite ivãea 'arà kupa. Pãtõnusu rupi ekoi maevo sõ tite kupa. Oke kupa. Oka'u kupa. Notekokuwai kupa.
8 Jane ãmẽ aryvo rupi jaiko mãe kõ tè. Janejare'e ayvu sikuwapa. Ajawyi simoa'u jẽ ivãea 'arà jaiko ky'y. Tijaja'a ywete jẽ Janejare'e ayvu rè jaiko ipi. Tijajireko katu janemoaia kõ wyi jaiko, sota vo tijaiko. Ãwitõ sota kõ opijaa oinõ wee ipi. Ãmõ, sapeu ãtã mã'ẽ opypy ipi, ojimokasia mõ ojireko katu ãpã kõ wyi. Ãwĩvo ve tijajimokasi ãjãgai rõvijã wyi jaiko ipi. Kee jaiko. Janejare'e rè jajirovija remẽ, janekasi ãjãgai rõvijã wyi ipi. Ãmõ, Janejare'e jaauvay remẽ. Ãmõ, Janejare'e pyri jaiko karuarua jamoa'u jẽ remẽ janekasi teve ipi.b
9 Janejare'e janepyteporo remẽ, janemomorijaua rõmõ rõwã a'evo janerereko ipi. Aje ywete wemireko katuarà kõ rõmõ janepyteporo janerereko. Janerõvijã Jesu Kiristu mãnõa rupi a'evo janerereko, awyje ipyri tijaiko. 10 Janerekovijarerà rõmõ omãnõ, ãwisõ tijaiko karuaru ipyri. Nimanyvo'ãi jamãnõma ipe remẽ ovãe remẽ. 11 Ajawyi tapejimokasi jẽ pejipãtavõ. Ãwitõ age'e, ãwĩvo ve jẽ tapeiko.
Kareta moawyjepaa
12 Kee oro'e tè pejẽ ky'y, oreretãrã kõ. Penõvijã kõ ikõ tapemomojy ipi nẽ. Janerõvijã ywete opyteporo kõ penerekoarà kõ rõmõ toiko kupa. Ãmõ, pemotekokuwaarà kõ rõmõ toiko kupa. 13 Oposiko ywete pepyterà rupi iko kupa. Ajawyi ikõ tapeau kõ imomojy kõ ipi nẽ, a'e pejẽ. Ãmõ, tapejimory katu teve ikõ ojee ipi nẽ.
14 Ãmõ, kee tapejẽ nijeweri mãe kõ pè ipi:
– Tapeposiko katu ikõ peupe ipi nẽ, tapejẽ ijupe kõ.
Ãmõ, okyje mãe kõ tapemokasi ereko kõ. Ijãgyo mãe kõ tapemopyte'u imokasi kõ ipi. Ãmõ, Jesu rè ojirovija a'u tè mãe kõ tapepãtavõ imokasi teve. A'evo poropãtavõ peiko remẽ, mewe tè ojimotee mãe kõ rè tapejikõtevẽ e'ã. Mewe tè ojimoteetà kupa ajawyi. 15 Ãmõ, ava mõ sõ pemoai penereko remẽ, tapeovaja e'ã ereko ipi. Pirujẽ jane kõ tapereko katu, manyvo jẽ ekoi kupa remẽ. A'evo kõrijõ tè tapeiko ipi.
16 Kee ikõ peiko teve ipi nẽ. Tapepy'aory peiko ipi. 17 Ãmõ, tapeporegeta py'yi Janejare'e pè peiko ipi. 18 Penereko katua rè, “Nekatuay wete”, tapejẽ py'yi Janejare'e pè ipi. Manyvo jẽ peiko remẽ ikõ a'evo tapeiko ipi nẽ. A'evoa Janejare'e opota tapeiko ipi, Kiristu Jesu revejẽ peiko mãe kõ rõmõ.
19 Ãmõ, Janejare'e 'Ãg oporegeta pepy'a pè remẽ, taperovija katu ikõ ipi nẽ. Ãmẽ tè nopi'ãi penereko katua wyi. 20 Ava mõ Janejare'e 'Ãg kasia rupi pemogeta remẽ, tapejikõ'õ ywe'e tite e'ã ijayvu renu tare'ã mõ. 21 “A'evo sipõ?” tapejẽ kõrijõ ãmẽ ipi. Peã'ã rã'ĩ ikuwa katu ãmẽ ijupe esa. Ãmẽ, aje ywete Janejare'e 'Ãg kasia rupi aepo e'i remẽ, taperovija ijayvu ãmẽ ky'y. 22 Tapejireko katu ivo e'ãa wyi, iteetejẽ, upi tapeiko ywe'e tite e'ã peiko ipi.
23 Janepy'amopiryvypy katu mã'ẽ tè Janejare'e. A'e pè oroporegeta remẽ, kee oro'e peupewarà mõ ipi:
– Epãtavõ Tesaronika taa wãnà kõ imokasi kõ jẽ, aje ywete nekoty rewarà kõ rõmõ toiko kupa ipi, oro'e. Epy'amokasi kõ teve ipi. Ekoa kõ teremoterẽ gatu ikõ ijupe kõ ipi nẽ. Ãmẽ tè ojireko katutà neremimota rupi iko kupa ipi. Ãwĩvo ekoi kupa remẽ tè, nojavy'ãi nerekoa kupa, oro'e. Ãmẽ tè Janerõvijã Jesu Kiristu ovãe mijẽ remẽ, noereko pe'ĩ'ãi ivo e'ãa, oro'e peupewarà mõ ijupe ipi.
24 Janejare'e pepyteporo oupewarà kõ rõmõ tapeiko ipi. Temirovija tè Janejare'e. Ajawyi aje ywete pemokasiaytà a'evoa rupi tapeiko.
25 Kee a'e teve pejẽ, eretãrãgwerà kõ. Tapeporegeta ikõ Janejare'e pè oreupewarà mõ teve ipi nẽ.
26 Ãmõ, pejirovãe remẽ upi upi, tapejimory katu ikõ ojee Jesu koty rewarà kõ rõmõ ipi nẽ.
27 Aã eremikusiwarerà ikõ tapemogeta pirujẽ Jesu rè ojirovija mãe kõ pè nẽ, Janerõvijã ywete ayvu rupi akusiwa ajupa pejẽ rewarà mõ.
28 Janerõvijã Jesu Kiristu ikõ tapenereko katu ikõ okatuaya rupi nẽ.
[Awyjepa ãmẽ eremikusiwarerà ky'y.]