3-4 Janejare'e opota ivo katu tapeiko, okoty rewarà kõ rõmõ. Nopotai nivoi tekoua rupi peiko. Ãmõ, nopotai pejimomy'aa rupi peiko. A'evoa wyi opota tapejireko katu, pirujẽ. Ãmõ, penerekwarà kõ tapereko katu ikenẽ. Tapepy'aory katu ikõ ojeeve peiko nẽ. Janejare'e orytà ãmẽ pene. 5 Naory'ãi pene pejitupi ãmõ wãivĩ kõ rè peiko remẽ ipi. Janejare'e nokuwai mãe kõ tè a'evo ekoi ipi. A'evoa rupi tapeiko e'ã ky'y. 6 Ãmõ, kee a'e pejẽ. Tapemoai e'ã pevoarà kõ ipi. Tapemoripe kõ e'ã ipi. A'e rè itõkõ oreayvukasipa pejẽ, jypy remeve. Apijarà kõ omomorijautà Janerõvijã ywete kãramõ, oro'epa itõkõ pejẽ. 7 Ãwĩvoa rõmõ rõwã Janejare'e janemuu okoty. Aje ivo katu mãe kõ rõmõ tè janemuu mijã, okoty rewarà kõ rõmõ tè. 8 A'evoa rè kee a'e pejẽ. Ava mõ sõ ojimoape kõrijõ eayvu renu tare'ã remẽ, Janejare'e ayvu renu tare'ã tè a'evo ywe'e titetà. Janejare'e ayvu wyi tesi ojipe'apa ywe'e titetà ãmẽ ky'y. O'Ãg ome'ẽ jane kõ pè mã'ẽ wyi tè ojipe'a ywe'e titetà ãmẽ ky'y.

9 Ajamã'ẽ noroporegeta mijẽ'ãi a'evoa rè, pekuwapa a'evoa rewarà mõ. Ivopa peiko, pejiauvay mãe kõ rõmõ. Janejare'e tè pemotekokuwapa a'evoa rè tapeiko. 10 Aje ywete pejiauvay peiko ky'y. Pirujẽ Jesu koty rewarà kõ Masetonia yvy wãnà kõ peauvay ereko kõ ipi. Ajamã'ẽ poromokasi jẽtà, age'e ywesõ tapejiauvay peiko. 11 Ãmõ, kee oro'epa teve pejẽ mã'ẽ. Torya rupi katu tapeiko. Ãmõ, tapemã'ẽ tè ojee peiko. Ãmõ, tapeposiko katu ikõ peiko ipi nẽ. 12 Ãmẽ tè Jesu noerovijaive mãe kõ pemoe'età, ikatuay ipyterà kõ rupi peiko rewarà mõ. Ãmẽ tè napenako'i'ãi joe, oro'epa teve pejẽ.

13 Ãmõ, kee a'e jẽtà pejẽ, eretãrãgwerà kõ. Oropota aje ywete mã'ẽ tapekuwa okãjã maekwerà kõ rewarà. [Jesu uu mijẽ remẽ, pemã'ẽ tarà mijẽ ojee.] Ajawyi tapeãgyo e'ã ee kõ. Jesu rè nojirovijari mãe kõ ijãgyoay ywete wetãrã kãjãma rè ipi. Manyvo noereko'ãi ãmẽ kupa ky'y. Ajawyi ijãgyoay wete kupa. Pejẽ ãmẽ tapenory jẽ peiko, peãgyo rã'ĩ epe peiko remẽ. [“Kãramõ teipõ jamã'ẽ tarà mijẽ ojee”, tapejẽ kõrijõ ãmẽ.] Okãjãma ipe kupa remẽ, oke mã'ẽ vo tè ajamã'ẽ kupa, ajawyi. 14 Kee rewarà mõ. Aje Jesu omãnõ maire, Janejare'e omomoera mijẽ imopõ'ã. Ãwĩvo ve aje ywete okãjã mãe kõ omomoera tarà mijẽ imopõ'ã. Kãramõ Jesu uu mijẽ remẽ, ojirovija ee maekwerà kõ pirujẽ werutà oupi. A'evo mã'ẽ pè “aje ywete” taoty.

15 Janerõvijã jypy remẽ oremotekokuwapa ovãea 'arà rã rewarà rè. Kee e'ipa: “Nokãjãive mãe kõ ypy rõwã ootà erõvaisĩ okãjãma maekwerà kõ wyi, yva pè”, e'i. 16 Keetà Janerõvijã ywete uu yva pe wyi remẽ. Iporegeta ojenutà, ijayvukasia. Wayvo ojenutà. Ãmõ, emĩgwai yvapewarà kõ rõvijã poregeta ojenu tevetà. Jimi'a puku ojenu tevetà, Janejare'e jimi'a puku. A'evoa remeve Janerõvijã ywete uutà ky'y. Ãmẽ sõsi Kiristu koty rewarà kõ okãjãma maekwerà kõ opoeratà opõ'ã ky'y. 17 Ajaire jane nokãjãive mãe kõ Janerõvijã janemonotà okoty ky'y. Yva rãtasĩ rupi janemonotà. A'e pè rã'ĩ janemoatytà aty wasu rõmõ. A'e pè Janerõvijã ywete siõvaisĩtà ky'y. Awyje ipyri jaiko karuarutà ãmẽ ky'y.^a 18 Aepo a'e pejẽ pepy'amokasia mõ. Tapejimokasi jẽ awi ojee peiko, a'e pejẽ.