3
1-2 Jypy remẽ orojipy'amopirai pene, penewarà norokuwai mijã rewarà mõ. [Sirasi. Ãmõ, Timoteu. Ãmõ, ije. Mokopejõ a'evo oroiko mã'ẽ ore.] Werywete oretekorã a'evoa rè. Ajaate Timoteu oromonooka pekoty penesa ky'y. Ore ãmẽ oropyta ike Atena taa pè.a Timoteu kõrijõ tè oo. Oreretãrã vo mã'ẽ tè Timoteu. A'e oposiko orereve, Janejare'e ayvu e'eay Kiristu rewarà mojenuarà rõmõ. A'e oromono pekoty remẽ, kee oro'e imono:– Emokasi kõ jẽ ikõ Jesu rè tojirovija jẽ kupa nẽ. Emotekokuwa kõ teve ikõ ekoa kõ rè nẽ, oro'e ijupe. 3 Ãmẽ tè noity ywe'e tite'ãi Kiristu rè ojirovija kupa mã'ẽ, noerovijai mãe kõ omomorijau kõ ipe remẽ, oro'e ijupe.
Jajimomorijau teãmã Jesu koty rewarà kõ rõmõ jaiko ipi. Janejare'e remikuwa rupi tè a'evo jaiko. Pekuwa a'evoa. 4 Pepytery pè oroiko ipe remẽ itõkõ, kee oro'e py'yi amãtejẽ pejẽ ipi:
– Jesu rè nojirovijari mãe kõ janemojaiwe ipetà ajaire, oro'epa teãmã pejẽ.
Aekwerà rupi katu tè janemojaiwe ipe kupa ky'y. A'evoa pekuwapa. 5 Ajawyi tè Timoteu amonooka pekoty ky'y. Ajimonyi tesõ pene. Kee a'e eupe mijã: Ojirovija jẽ sipõ Jesu rè kupa? a'e eupe. Opoi tite sipõkõ iwyi kupa, ãjãgai rõvijã poroã'ã ojimokasi ijupe kõ remẽ? a'e eupe. A'evo sõ kupa remẽ, nikatu'ãi ãmẽ. Manyvo jaa rõmõ rõwã kuwa oreposikoawerà ãmẽ! a'e ajipy'amogeta mijã.
Timoteu remimojenuwerà penewarà
6 Ajaire Timoteu ojivy uu pekoty wyi remẽ,b penekokwerà omome'u erovãe oreupe. Ãmẽ tè oreroryvay, kee oroenu rewarà mõ:
– Ojirovija katu jẽ Janejare'e rè kupa. Ojiauvay jẽ ojeeve kupa, e'i toroenu rewarà mõ.
Kee e'i teve Timoteu ore penewarà mõ:
– “Manyvo remẽ põ Pauru kõ uu tarà mijẽ oreresa?” e'i pejẽ kupa, e'i. “Ikatuay orepyterà rupi ekoi kupa mijã”, e'i pejẽ kupa. Oja'a katu jẽ pene kupa. Ãwitõ pejẽ peekaray kõ, ãwĩvo ve penekaray ve kupa, e'i Timoteu ore penewarà mõ.
[Ãmẽ aepo oroenu remẽ, orepiryvypy katu ky'y.] 7 Ajawyi kee a'e pejẽ, eretãrãgwerà kõ. Orojimomorijau ipe remẽ, orojipy'amokasi jẽ ipi. Pene orojipy'amogeta ywete remẽ, orojimokasi ywete ãmẽ ipi. 8 Norojipy'amopirai pene ãmẽ oroiko ky'y, pejimokasi jẽ Janerõvijã ywete rè pejirovija rewarà mõ. Orepiryvypy katu ky'y. 9 Ajawyi oromoe'e ywete Janejare'e penewarà mõ ipi. Pene oreroryvaya oromome'u ijupe ipi. Ajawyi oromoe'e py'yi. 10 Orojimokasiay wete Janejare'e pè oroporegeta. Kee oro'e oroporegeta ijupe:
– Oremonooka mijẽ rejupa, toroo esa kõ, oro'e. Toromotekokuwa kõ imokasi kõ, oro'e. Ãmẽ ywesõ ojimokasità nere ojirovija ãmẽ kupa ky'y, oro'e py'yi Janejare'e pè.
Aryvo rupi, pya rupi aepo oro'e imogeta. 11 Aepo oro'e jẽ Janeruwasu pè, tomowaype e'ã oreoa rã pekoty oreupe. Janerõvijã Jesu pè aepo oro'e teve. 12 Kee oro'e teve peupewarà mõ:
– Emokasi kõ ikõ tojiauvay jẽ iko nekasia rupi kupa nẽ, oro'e ijupe. Age'e ywesõ a'evooka kõ jẽ ereko, oro'e ijupe. Ãwitõ oroauvay kõ, ãwĩvo toporoauvay kupa, ãwisõ pirujẽ jane kõ emiau kõ rõmõ toiko, oro'e ijupe. 13 Ãmõ, emokasi kõ ywete toiko nekoty rewarà kõ rõmõ iko kupa ipi, oro'e pejẽ. A'evo remẽ kee eretà ijupe kõ, Janerõvijã Jesu uu mijẽ pirujẽ oupewarà kõ reve remẽ: “Aje, epy'a rupi katuwarà kõ tè pejẽ”, eretà ijupe kõ. “Ivo katu mã'ẽ rõmõ tè pejẽ. Naikoi ivo e'ãa pene Janejare'e rovake ky'y”, eretà ijupe kõ, oro'e Janeruwasu pè peupewarà mõ.