Pauru omome'u oposikoawerà
2
1-2 Norooive penena kyty oreposiko pepytery pè remẽ itõkõ Piripu taa pè rã'ĩ oroposiko oroiko. A'e pè oroiko remẽ itõkõ, oreayvu noerovija tari mãe kõ oremojaiweay orerereko. Ijayvu ai wete itõkõ oreupe kupa, Jesu ayvu e'eay teipe oromojenu remẽ. Ajamã'ẽ noropi imojenua wyi. Oromojenu jenu jẽ erokwa. Janejare'e oremokasi jẽ rewarà mõ a'evo oroiko. A'evo mijẽ penena pè. [Noerovijari mãe kõ oremojaiwe ipe remẽ itõkõ oromojenu jẽ itõkõ pejẽ ãmẽ. Noropoi ijayvu mojenua wyi penena pè oroiko.] Ajawyi tè mõa'ãrõwã pepyterà rupiwarà kõ ojirovija ee ky'y. Aje ywete noroposiko pãnẽi pene.a3 Aje, Jesu ayvukwerà mojenu tè orojo pekoty. Orewari rõmõ rõwã orojo. Pewãivĩ'y rewarà mõ rõwã teve orojo. “Ja'e si a'e kyty jajimoe'eoka ijupe kõ”, noro'ei teve. A'evo rõwã oroiko. Ayvu e'eay mojenua mõ kõrijõ tè orojo pekoty. 4 Janejare'e tè oremuroka toporomotekokuwa ayvu e'eay rè. Ajawyi ijayvu e'eay tè oromome'u pejẽ. Jane kõ morya mõ rõwã poromotekokuwa ipi. Aje Janejare'e morya rõmõ tè oroiko. Janejare'e okuwa a'evo oroiko ipi, janepy'a pewarà okuwa mã'ẽ tè a'e rewarà mõ.
5 Poromory rã'ãga rõwã itõkõ pepyterà rupi oroiko remẽ ipi. Aje ywete poromory oroiko ipi. “Mire'eay kupa”, noro'e teywetei peupewarà mõ pemorya rõmõ oroiko ipi. Pekuwapa a'evo rõwã oroiko mã'ẽ. Mõrijõ tekoua mã'ẽ rupi rõwã poromotekokuwa oroiko ipi. Janejare'e ayvu pejavy tite remẽ, “Aje pejavy”, oro'e itõkõ pejẽ ipi. Janejare'e okuwa a'evo oroiko mã'ẽ. 6 Kee noro'ei teve pepyterà rupi oroiko remẽ: “Jane kõ oremoe'e kuwasi!” noro'ei ipi. A'evo ve ãmõ kõ pyterà rupi oroposiko remẽ, aepo noro'ei. Jimoe'ea rè rõwã oroposiko ipi.
Kiristu remimonokwerà kõ rõmõ oroposiko pepyterà rupi oroiko. [Penõvijã kõ rõmõ teipe oroiko.] Ajamã'ẽ norojimomojyi pekoty oroiko. “Karakuri tapeme'ẽ oreupe orema'e kõ repy rõmõ”, noro'ei itõkõ peupe. Oro'e kuwa mijã. 7 Ajamã'ẽ ikatusa rupi kõrijõ poroereko ipi. Ãwitõ wãivĩ omemyry wereko katu, ãwĩvo tè oroiko ipi. 8 “Orojime'ẽ kuwasi ipo kõ pè”, oro'e tesõ peupewarà mõ, Jesu rekoa katu oromome'u pejẽ remẽ. Kõ'ẽ jawe jawe itõkõ poropãtavõ ipi. Poroauvay rewarà mõ a'evo poroereko ipi.
9 Kee a'e teve pejẽ, tapeja'a jẽ ee, eretãrãgwerà kõ. Mape remẽ norerako'i pene orema'e rã kõ rè, Jesu rekoa katu rè poromotekokuwa penena pè remẽ. Oroposiko ywete itõkõ orema'e rã kõ repy rõmõ ipi.b Aryvo oroposiko ipi. Pya rupi teve. “Tiwaype e'ã Tesaronika wãnà kõ pè”, oro'e rewarà mõ a'evo oroiko ipi.
10 Ivo katuay itõkõ oroiko pepyterà rupi Jesu rè orojirovija mãe kõ rõmõ. Ivo katu teve poroereko oroposiko pepyryvo remẽ. Norojavyi pe'ĩ tekoua katu mõ ipi. Kõ'ẽ jawe jawe pemã'ẽ orere, a'evo oroiko remẽ. Ajawyi pekuwa ãwĩvo oroiko mã'ẽ. Janejare'e ve okuwa katu orerewarà. 11 Ãwitõ janeruu janerereko katu ipi, ãwĩvo itõkõ poroereko katu ipi. 12 Poropy'amokasi jẽ itõkõ poroereko ipi. “Janejare'e remimota rupi jẽsi tapeiko”, oro'e itõkõ pejẽ. “Pejo emoẽoka pe'arà kyty pekupa”, e'ipa Janejare'e janeupe. “Poroeraatà erena ikatuay wete mã'ẽ kyty epyri tapeiko karuaru”, e'ipa jane. A'evoa rè itõkõ poropy'amokasi poroereko ipi, pepyterà rupi oroiko remẽ.
13 Ãmõ, Janejare'e ayvu e'eay oromojenu peupe remẽ itõkõ, pejirovija katu Jesu rè ky'y. Kee pejẽ ãmẽ enu: “Jane kõ tekokuwaa rõwã oroenu. Janejare'e remikuwa tè oroenu”, pejẽ itõkõ enu ipi. Aje ywete Janejare'e remikuwa tè oromojenu. A'evoa pekuwa katu, Janejare'e pemotekokuwa wayvu e'eay rè rewarà mõ. Ajawyi oroporegeta Janejare'e pè remẽ, “Nekatuay wete”, oro'e peupewarà mõ ipi.
14 Kee a'e teve pejẽ, eretãrãgwerà kõ. Tapeãgyo e'ã ikõ penetãrã kõ pemomorijau ipe remẽ nẽ. Pejẽ rõmõ'ĩte rõwã a'evo peiko. Juteja yvy wãnà kõ ve a'evo ekoi. Etãrã kõ omomorijau kõ teve, Kiristu Jesu rè ojirovija kupa rewarà mõ.c 15 Karamoe remeve a'evo Juteu kõ ekoi. Janejare'e ayvu omojenu maekwerà kõ wapisi pisi jẽ iko kupa ipi. Eruparà kõ rõmõ ijeapyrerà kõ age'e remẽ a'evo ekoi. Janerõvijã Jesu ve tesõ ojuka kupa. Ajawyi Janejare'e naory ekojẽi tesõ ee kõ omãjã ky'y. Ãmõ, pirujẽ jane kõ rè ojikõ'õ kupa.d 16 A'e kõ nopotai Janejare'e ayvu e'eay oromojenu Juteu rõwã mãe kõ pè, ãwisõ Janejare'e toereko katu kõ teve ereko ipi. Ajawyi tè opota ipe oremomoioka kupa mijã. Ãwĩvo remẽ ywesõ waperõ perõ jẽtà waiwererà wee ãmẽ kupa, ãwisõ Janejare'e pè ojimomorijauvayokatà tẽ tesõ ãmẽ kupa ky'y.
“Apota aa mijẽ penesa”, e'i mã'ẽ
17 Eretãrã kõ, pepyterà rupi oroiko remẽ itõkõ a'e kõ oremojava oremono penena pe wyi.e A'evo paireve poroekaray ipi. Oroja'a ywete jẽ pene. Kõ'ẽ jawe jawe orojipy'amogeta jẽ pene, ke'ĩrõwã ipe oroiko remẽ.
– Manyvotà põ Tesaronika wãnà kõ sireko esa mijẽ? oro'e tite ojiupe ipi.
18 Oroo tarepe penesa mijã. Ãmõ 'ary pè ije rõmõ'ĩte aa tarepe mijã. Ãmõ remẽ aa taray ipe ipi mijã. Ajamã'ẽ Satanasi noremonookari ipi. 19 Ajawyi tè naai penesa ipi. Poroekaray ipe ajamã'ẽ. Oremoryarà kõ tè pejẽ, Jesu rekoa rupi katu peiko ipi rewarà mõ. Penewarà mõ tè oromoe'e ywetetà Janerõvijã Jesu, uu mijẽ ojikuwa Jõvijã wasu rõmõ remẽ. Kee oro'età peupewarà mõ ijupe:
– Emã'ẽ Tesaronika taa wãnà kõ rè! Nerekoa rupi katu ekoi kupa ipi! Aje noroposiko pãnẽi ipyterà kõ rupi oroiko. Ajawyi oreroryvay oroiko, oro'età Janejare'e pè ãmẽ.
20 Aje ywete, penewarà mõ tè oreroryvay oroiko ipi. Orojimoe'e pene oroiko ipi.