Aã kareta akusiwa imonooka pejẽ, Tesaronika taa wãnà kõ pè. Janejare'e, Janeruu e'e koty rewarà kõ atyry tè pejẽ. Janerõvijã Jesu Kiristu koty rewarà kõ atyry teve pejẽ.

Janejare'e ikõ tapenereko katu okatuaya rupi nẽ. Tapepy'amopiryvypy katu teve ikõ nẽ.

2 [Ojenu penewarà ike ije, kee e'i oreupe kupa remẽ: “A'e kõ ivo katu tè ekoi”, e'i omojenu penewarà oreupe. Ajawyi orokuwa penewarà.] Ajawyi oroporegeta peupewarà mõ Janejare'e pè ipi. 3 Kee oro'e ijupe peupewarà mõ ipi: “Ojirovija katu nere kupa ipi”, oro'e. “Nerau katu kupa ipi. Ajawyi poropãtavõ gatu kupa ipi”, oro'e. “[Nopi neayvu mojenua wyi kupa ipi. Ojimokasiay wete imojenua rè kupa.] Okuwa katu Janerõvijã Jesu Kiristu ovãe tarà mijẽ kãramõ mã'ẽ kupa. Ajawyi nopoi'ãi nere ojirovija mã'ẽ wyi kupa ipi”, oro'e Janejare'e pè peupewarà mõ ipi.

4 Aje ywete Janejare'e remiau kõ tè pejẽ, eretãrãgwerà kõ. Pepyteporopa wãkarãgwerà kõ rõmõ penereko. 5 Janejare'e ayvu e'eay Jesu rewarà oromojenu ypy pejẽ remeve itõkõ peenu katu peiko. Aje ywete Jesu rekoa oromojenu maekwerà. Pekuwa oreayvu rupi rõwã poromotekokuwa oroiko ipi. Janejare'e kasia rupi tè poromotekokuwa oroiko ipi. I'Ãg kasia rupi tè poromotekokuwa oroiko ipi. Pepyterà rupi oroiko remẽ itõkõ, Janejare'e ayvu rupi katu oroiko ipi. Norojavyi 'ete itõkõ Janejare'e rekoa pepyri oroiko remẽ. A'evo oroiko remẽ, pekuwapa manyvo tekoua ky'y. A'e rupi jẽsi peiko ky'y. 6 Ajawyi ãwitõ Janejare'e ayvu rupi katu oroiko, ãwĩvo ve pejẽ peiko ãmẽ ky'y. Ãwitõ Janerõvijã ywete Uu ayvu rupi katu ekoi ipi, werovija katu Uu, ãwĩvo ve pejẽ peiko ky'y. Ajawyi penory katu peiko ky'y. “Awyje Jesu rekoa rupi tijaiko ky'y”, pejẽ rewarà mõ penory peiko. Janejare'e 'Ãg tè pemoryoka. Ajawyi, ãmõ kõ pemoai epe remẽ, “Ãnĩ, norojivy'ãi mijẽ oreaiwererà kyty ky'y”, pejẽ ijupe kõ ipi. Penory jẽ Jesu ayvu rupi peiko ky'y.^b 7-8 Ajawyi poromotekokuwa mãe kõ rõmõ peiko ky'y. Janejare'e ayvu rè poromotekokuwa mãe kõ rõmõ peiko ky'y. Ajawyi Masetonia yvy wãnà kõ pè penewarà ojenu remẽ, “Jane ve Jesu remĩgwai kõ rõmõ jaikotà”, e'i ãmẽ kupa. Ãmõ, Akaja yvy wãnà kõ ve aepo e'i. Pevo jẽ ekoi kupa ky'y. Ãmõ yvy yvy wãnà kõ ve a'evo ekoi. Ajawyi, “Aje ywete põ Janejare'e rè ojirovija jẽ kupa?” noro'ei peupewarà mõ ky'y, aje pejikuwapa rewarà mõ. 9 A'e taa taa wãnà kõ tè manyvo peiko mã'ẽ omojenu oreupe ipi. Kee e'i kupa:

– Tesaronika taa pè peo ypy Janejare'e ayvu e'eay mojenu remẽ itõkõ penereko katuay kupa! Janejare'e ayvu e'eay wenu kupa remẽ itõkõ opoi ojarà rã'ãga jimoãtãgwerà kõ wyi kupa ky'y, e'i. Janejare'e oiko teãmã mã'ẽ tè omoe'e kupa ky'y. Ijayvu rupi katu ekoi kupa ipi, e'i. 10 Aje Janejare'e Ra'yry Jesu rè ojirovija katu kupa ipi. Janerereko katu jẽ janerereko jimomorijau wasua wyi mã'ẽ rè ojirovija kupa. Janejare'e omomoera eraa wena kyty yva pupe maekwerà rè ojirovija kupa. “Aje Jesu uu tarà mijẽ”, e'i Tesaronika wãnà kõ. Ivãea wãrõ jẽ kupa ipi, ikoty rewarà kõ rõmõ, e'i peupewarà mõ oreupe kupa.

Ajawyi orokuwa penewarà.