Aã kareta Janejare'e 'Ãg omotekokuwa Pauru tokusiwa Tesaronika wãnà kõ pè maekwerà. Pauru oo taa taa rupi Jesu rekoa rè poromotekokuwa remẽ, Tesaronika taa kyty ve oo. A'e pè Juteu rõwã mãe kõ omotekokuwa Janejare'e ayvu rè iko. A'e kõ ojirovija Jesu rè ãmẽ ky'y (J.K.R. 17.1-10). Ajamã'ẽ Juteu kõ ojikõ'õ Pauru rè, Juteu rõwã mãe kõ omotekokuwa rewarà mõ. Ajawyi Pauru nopyta pukui a'e taa pè upa. Ojisyry oo. Pereja taa kyty rã'ĩ oo. Ajaire Korĩtu taa kyty oo. A'e pè Jesu koty rewarà Tesaronika taa wãnà kõ rekoa ojenu ijupe. Timoteu oo esa kõ remẽ, ekoa kõ rè omã'ẽ. Ajaire omome'u Pauru pè. “Ojimokasi jẽ ojirovija Tesaronika wãnà kõ Jesu rè”, e'i. “Poroauvay teve kupa ipi”, e'i. Ajawyi Pauru kareta okusiwa imono ijupe kõ, ãmẽ ywesõ imokasia kõ rõmõ. Okusiwa ijupe kõ remẽ, “eretãrãgwerà kõ” e'i ijupe kõ. Manyvo ekoiawerà rè omoja'aoka kõtà okareta rupi. “Kãramõ Jesu uu mijẽ remẽ, ojirovija ee maekwerà kõ pirujẽ werutà oupi”, e'i teve kareta rupi imono ijupe kõ (1Tes. 4.14). Tesaronika wãnà kõ ojimomorijau upa rewarà mõ, aã kareta rupi Pauru omotekokuwa kõ imokasi kõ jẽ toiko kupa.