2 Ãmõ, kee a'e jẽ pejẽ. Tapeporegeta py'yi jẽ ikõ Janejare'e pè ipi nẽ. Tapemoa'u jẽ peporegeta ijupe remẽ ipi. Ãmõ, emime'ẽgwerà kõ wyi tapenearai e'ã ipi. Ee kõ penorya tapemome'u Janejare'e pè ipi. 3 Ãmẽ 'arà peve orerewarà tapemome'u ijupe ipi. Oropota Kiristu rekoa oromome'u jẽ nokuwaive mãe kõ pè, ike jimopã'ãga pupe oroju remẽ. Oromojenu rewarà mõ itõkõ oremopã'ã kupa mijã. Ajawyi a'evoa rè ikõ peporegeta Janejare'e pè nẽ, a'e pejẽ. 4 Kee tapejẽ eupewarà mõ: “Emokasi Pauru neayvu mojenua rè, ivo katu tomojenu”, tapejẽ Janejare'e pè eupewarà mõ ipi. Manyvo Janejare'e opota tamojenu mã'ẽ rupi katu tamojenu aiko.

5 Tapetekokuwa manyvo tapereko noerovijai mãe kõ imotekokuwa Janejare'e ayvu rè. Peporegeta ijupe kõ remẽ, Kiristu rekoa ywesõ tapemome'u ijupe kõ ipi.^a 6 Ikatusa rupi tapemotekokuwa kõ ipi. Tekokuwaa katu rupi peporegetatà ijupe kõ ãmẽ ipi, ijãvijõ kõ jẽ.

7-8 Eremikusiwarerà Tikiku rupi amonookatà pekoty. Oreremiauvay tè Tikiku. Orerevejẽ Janerõvijã remĩgwai rõmõ oposiko katuay wete ipi. A'e ovãe pepyri remẽ, manyvo aiko maekwerà omojenutà pejẽ pemokasia mõ ãmẽ ky'y.^b 9 Onesimu ve ãmõ oromonookatà upi. Penena wãnerà tè itõkõ a'e. Oreremiauvay teve a'e. Eretãrã vo mã'ẽ Jesu koty rewarà rõmõ. A'e kõ pirujẽ omojenutà pejẽ, tapekuwa manyvo aiko mã'ẽ.^c

10 Aritaku jimopã'ãga pupe epyri tui upa. A'e opota ojimory pene eremikusiwarerà rupi. Ãmõ, Maku ve opota ojimory pene. Panape mõmirĩ a'u a'e. Kõitokõ oo penesa remẽ, “Tapeja'a katu ikõ ee nẽ”, a'epa itõkõ pejẽ. A'e pewarà mõ a'e. ^d 11 Ãmõ, Josue, Jutu eu teve mã'ẽ. Mokopejõ opota ojimory pene eremikusiwarerà rupi. A'e kõ kee jaa mojenua rè oposiko ereve: “Janejare'e tapemoẽoka pe'arà kyty”, ejaa rè. Nuvei ãmõ Juteu kõ a'evo ereve oposiko mãe kõ. A'e kõ tè epãtavõ ywete emokasiay ipi.

12 Ãmõ, Parasi opota ojimory pene eremikusiwarerà rupi, pepytery pe wyi tè itõkõ uu orepãtavõ mã'ẽ. Kiristu Jesu remĩgwai e'eay teve a'e. Oporegeta ywete Janejare'e pè peatyry pewarà mõ ipi. Kee e'i peupewarà mõ ipi:

– Emokasi kõ tojimomãatã jẽ pene iko kupa. Pirujẽ neremimota rupi katu toiko kupa. Ojimotekokuwapa mãe kõ rõmõ a'evo toiko kupa. A'evoa rõmõ teremokasi kõ jẽ ipi, e'i Parasi Janejare'e pè peupewarà mõ ipi.^e

13 Aje ywete, oposiko ywete Parasi peupewarà mõ ipi, Janejare'e pè oporegeta mã'ẽ rupi. Ãmõ, Rautiseja taa wãnà kõ pewarà mõ teve oporegeta Janejare'e pè ipi. Ãmõ, Jerapori taa wãnà kõ pewarà mõ teve. Aenu oporegeta Janejare'e pè peupewarà mõ ipi remẽ.

14 Ãmõ, Rukasi ve opota ojimory pene eremikusiwarerà rupi. Poropõanõgarà tè Rukasi. Oreremiauvay teve a'e. Ãmõ, Temasi ve opota ojimory pene. Mokopejõ opota ojimory teve pene eremikusiwarerà rupi mãe kõ.^f

15 Aã rè oropota ojimory eremikusiwarerà rupi. Kiristu koty rewarà Rautiseja taa wãnà kõ rè. Ãmõ, orekõjã a'u Nĩpa rè. Ãmõ, etã wyry pè ojimoaty Janejare'e moe'e ipi mãe kõ rè ve. A'e a'e kõ rè oropota orojimory.

16 Pejẽ ypy eremikusiwarerà pemogeta. Pemogeta paire, tapemono Rautiseja taa wãnà Jesu koty rewarà kõ pè rã'ĩ, tomogeta ojimoaty kupa remẽ enu. Ãwĩvo ve a'e kõ pè akusiwa mã'ẽ tomonooka peupe, pejẽ ve tapemogeta pejimoaty remẽ enu. Ikatuaytà a'evo peiko remẽ.

17 Ãmõ, kee tapejẽ Akipu pè: “Janerõvijã ywete remĩgwai tè ene. Tereity e'ã ikõ neposikoa nẽ. Tereposiko jẽ, ajaate nemoawyjepa”, tapejẽ ijupe imokasia rõmõ.

18 Ije ywete aã Pauru rõmõ akusiwatà pejẽ ky'y, epo pè tè. Jimopã'ãga pupe wyi akusiwa ajupa imono pejẽ. Ajawyi tapenearai e'ã ewyi, a'e pejẽ. [Eupewarà mõ tapeporegeta jẽ Janejare'e pè ipi].

Janejare'e ikõ tapenereko katu okatuaya rupi ipi nẽ.

[Awyjepa eremikusiwarerà ãmẽ ky'y.]