5 Ajawyi kee tapeiko ky'y. Tapeja'a mijẽ e'ã ikõ peneko aiwerà rè ipi nẽ. Pemãnõ mã'ẽ vo 'ejẽ tapeiko, peneko aiwerà wyi ipi. Jimomy'aa wyi. Ãmõ, jitupia wyi. Ãmõ, jipy'amogeta ai wyi. Ãmõ, koivo kõ moma'e kõ rè jitupia wyi teve. “Ema'e rõmõ kuwasi mijã”, e'i mã'ẽ wemimotarà rè ywesõ oja'a Janejare'e wyi. 6 A'evoa rè oja'a mãe kõ noerovija'ãi Janejare'e ãmẽ ipi. Ajawyi Janejare'e omomorijau kõtà. 7 A'evo itõkõ peiko mijã. Penemimota ai rè ywesõ peja'a tite peiko ipi mijã. 8 Age'e a'evoa tapeitypypyipa ky'y. Ma'e. Tapejikõ'õ ai e'ã peiko ky'y. Ãmõ, tapejiapy'a e'ã pejikõ'õ rõmõ ipi. Ãmõ, toporomojaiwe e'ã teve peayvu rupi ipi. Ãmõ, ayvu teminu tare'ã rè tapeporegeta e'ã teve. 9 Ãmõ, tapewari e'ã teve ojiupe. Peneko ai ypykwerà opa.

10 Ãwitõ kamisa aiwerà jaekyi imomo ipi. Ipyau mã'ẽ tè japypy mijẽ. Ãwĩvo ve peiko ky'y. Peneko pyau rupi tè peiko ky'y. Ajawyi ivo mã'ẽ rè kõrijõ tè tapejipy'amogeta ky'y. Ajaate peneinõgarerà weruparà mõ penerekotà. Ajaate pemotekokuwavaytà wekoa rè.^a 11 Janereko pyau rupi jaiko remẽ, pe'ĩypyte mã'ẽ rõmõ jaiko ikoty rewarà kõ rõmõ. Ãwitõ Juteu kõ, ãwĩvo ve Juteu rõwã mãe kõ. Ajawyi “ãmõ tè” taoty e'ã Kiristu rè ojirovija mãe kõ pè ipi, ojevo jẽ pirujẽ Janejare'e pè jaiko rewarà mõ. Taa wasu pewarà kõ. Ãmõ, ka'a pè ojimoena mãe kõ teve. Temĩgwai ai kõ teve. Temĩgwai rõwã mãe kõ teve. Ojevo jẽ Janejare'e pè jaiko, Kiristu koty rewarà kõ rõmõ. Pe'ĩte janerõvijã mãe kõ rõmõ jaiko. Kiristu tè Janerõvijã rõmõ ekoi. A'e tè o'Ãg oinõ janepy'a pupe, janejãvijõ jẽ.

12 Pejẽ Janejare'e koty rewarà kõ rõmõ tè peiko. Emiauvay kõ rõmõ tè peiko ipi. Oupe pepyteporo maekwerà kõ tè pejẽ. Ajawyi ãwitõ Janejare'e janeporijauesa ipi. Oja'a katu janere ipi. Nijanererõarõi ipi. Ikatusa rupi janerereko ipi. Ãmõ, nijanemojikõtevẽi teve ipi. A'evo ve tapeiko eruparà mõ tapeiko. 13 Ava mõ sõ pemojaiwe remẽ, tapeovajarĩ e'ã ãmẽ. Ivo tapeiko jẽ peiko ãmẽ. Ãwitõ Kiristu “awyjepa” e'ipa peaiwererà pè, tãwĩvo ve pejẽ.^b 14 Ãmõ, poroauvaya rupi ywesõ tapeiko ipi. Ãmẽ sõsi pejimo'ãgatutà ojee peiko ky'y.

15 Janejare'e opota ikatuay peiko pe'ĩypyte rõmõ. Ajawyi manyvo peiko mã'ẽ rè peja'a peiko ipi remẽ, Kiristu tapepy'amopiryvypy katu penereko ipi. Ãmõ, penoryvaya ikatuay penerekooka mã'ẽ, a'e tapemome'u Janejare'e pè ipi. 16 Kiristu ayvu tapemojimoena pepy'a pupe ipi, a'e rupi katu tapeiko. Ijayvu tapemome'u ojiupe, ojevo jẽ tapekuwa ãmẽ peiko, ãmẽ ywesõ tapetekokuwavay peiko. Ãmõ, tapemoe'e Janejare'e pejĩgarà rupi peiko ipi. Janejare'e ayvu rè pejĩga mã'ẽ rupi. Ãmõ, Jesu moe'ea rè pejĩga mã'ẽ rupi. Ãmõ, Janejare'e 'Ãg rupi pejĩga mã'ẽ rupi. Wãi wãisõ pejĩga mã'ẽ rupi tapeiko ipi. Pejĩga remẽ, “Nekatuay wete oreupe, Papa”, tapejẽ pepy'a pupe ipi. 17 Ãmõ, Jõvijã Jesu koty rewarà e'eay rõmõ tapeiko ipi. Ikatuay tapeporegeta mirà kõ pè peiko ipi. Ikatuay mirà kõ tapereko ipi. Ãmõ, tapemoe'e Janejare'e Jõvijã Jesu rupi tè ipi.^c

18 Kee a'e tarà mijẽ pejẽ, manyvo tijaiko Kiristu koty rewarà kõ rõmõ ipi. Imẽma mãe kõ pè rã'ĩ a'età. A'e kõ pè kee a'e. Pemẽnà ayvu rupi ikõ tapeiko ipi nẽ, Janerõvijã ywete koty rewarà e'eay rõmõ, a'e pejẽ.^d

19 Ãmõ, erekwapa mãe kõ pè teve kee a'e. Penerekwarà kõ ikõ tapeauvay ipi nẽ, a'e. Tapemojaiwe e'ã ikõ penerekwarà ipi nẽ, a'e pejẽ.^e

20 Ãmõ, peãkarãgwerà kõ pè kee a'e. Pepapa ayvu rupi katu ikõ tapeiko ipi nẽ. Pemãmã ayvu rupi katu ikõ tapeiko teve nẽ, a'e pejẽ. Orytà Janejare'e ãmẽ pene ipi.^f

21 Ãmõ, kee a'e ipapa kõ pè. Imãmã kõ pè teve. Peãkarãgwerà kõ pemotekokuwa ipi remẽ ikõ ikatusa rupi tapemotekokuwa kõ ipi nẽ, a'e pejẽ. Ojimokasità peayvu rupi ãmẽ iko kupa.^g

22-23 Ãmõ, kee a'e teve temĩgwai kõ pè. Taperovija katu ikõ penõvijã ayvu ipi nẽ, a'e pejẽ. Pirujẽ e'i mã'ẽ rupi katu tapeiko. Ovake kõrijõ tè rõwã a'evo tapeiko. Eã'ã rupi ve taperovija katu peiko. Tapeposiko katu teãmã penõvijã pè. Kee tapejẽ pepy'a pupe: “Erõvijã ywete Kiristu orytà ere aposiko katu erõvijã pè remẽ”, tapejẽ pepy'a pupe. 24 Janerõvijã Kiristu tè Penõvijã e'e rõmõ. Ajawyi ikatu imorya rè ywesõ tapeja'a, penõvijã yvy pewarà kõ morya wyi, a'e tè kãramõ pemoepytà rewarà mõ. Pirujẽ wemĩgwai kõ omoepytà. Omokatupa amãtejẽ janerepy rã. A'evoa rè tapeja'a jẽ peiko. 25 Ãmõ, poromosã'ãga remẽ, nivoi mãe kõ omomorijautà, ijãvijõ kõ jẽ.^h