Aã kareta Janejare'e 'Ãg omotekokuwaoka Pauru tokusiwa Piripu wãnà kõ pè maekwerà. Pauru oo taa taa rupi Janejare'e ayvu mojenu erokwa ipi. Jesu rekoawerà omojenu ipi. Piripu taa pè a'evo ekoi. A'evoa rupi Piripu wãnà kõ mõ ojimotee Jesu koty rewarà kõ rõmõ iko ky'y (J.K.R. 16.12-40). A'e kõ ajaire opãtavõ Pauru oo jẽ taa taa rupi poromotekokuwa remẽ. Okarakurinõ imono. Ãmẽ ijatyry kwaray paire, ojikõ'õ mãe kõ mõ omopã'ã Pauru. Jimopã'ãga pe wyi Pauru aã kareta okusiwa imono Piripu taa wãnà kõ pè. A'e kõ karakuri mõ omuroka ijupe. A'e rewarà rè okusiwa ijupe kõ. Pauru okuwa Piripu wãnà kõ ojipy'amogeta wete imopã'ãa rè. Ajawyi teve okusiwa ipy'amopiryvypy katu kõ. Omotekokuwa kõ teve, wemikusiwarerà rupi. Kee e'i teve: “Aje Kiristu revejẽ jaiko mãe kõ rõmõ jaiko. Ajawyi kee jaiko. Jajimokasi jaiko. Janepy'a piryvypy katu jaiko. Janejare'e 'Ãg tè janemojipy'amogetaoka wemimota rõmõ tijaiko, ãwisõ i'Ãg revejẽ tijajipy'amogeta ipi”, e'i (Prp. 2.1).