Aã kareta Janejare'e 'Ãg omotekokuwa Pauru tokusiwa Jesu koty rewarà kõ Epesu taa wãnà kõ pè maekwerà. Pauru oo oo Janejare'e ayvu e'eay mojenu iko remẽ, Epesu taa pè teve omojenu erokwa. A'evo ekoi remẽ jane kõ mõ ojirovija ypy Jesu rè (J.K.R. 19–20). A'e taa pè Pauru opyta puku rã'ĩ imotekokuwa kõ iko. Ãmẽ ajaire ojisyry oo paire, omotekokuwa kõ jẽ imokasi kõ wemikusiwarerà rupi toiko. Jimopã'ãga pè tui remẽ tè kareta okusiwa ijupe kõ imonooka. Epesu wãnà kõ Janejare'e ayvu rupi katu ekoi ipi. Nojavyi kupa ipi. Nopoi teve iwyi kupa ipi. Na'evoi ãmõ taa wãnà kõ Jesu koty rewarà kõ ãmẽ. Ajawyi Pauru oryvay iko Epesu wãnà kõ rè ipi.

Kee e'i ikusiwa: “Janejare'e tè okatuaya rupi janerereko katu, Jesu Kiristu rè jajirovija jaiko remẽ. Janejare'e remime'ẽgwerà tè janerereko katua, ãwisõ kee taoty e'ã: ‘Ivo katu aiko rewarà mõ tè erereko katu’, taoty e'ã”, e'i (Eps. 2.8-9).

Ãmõ, “Ajawyi age'e remẽ, jajimory katu ojee ky'y, ojirovija ee mãe kõ rõmõ, pe'ĩypyte mã'ẽ rõmõ janemoaty opyri rewarà mõ”, e'i (Eps. 2.14).

Ãmõ, kee e'i: “Janerekoa ipyau mã'ẽ ome'ẽ janeupe ky'y. Janemojimo'yoka Kiristu rè janerereko ky'y. Ajawyi ãwitõ jamãnõ mã'ẽ vo 'ejẽ Janejare'e pè janeaiwererà rewarà mõ jaiko mijã. Aekwery vo rõwã jaiko ky'y”, e'i (Eps. 2.5).

Ãmõ, kee e'i: “Ãjãgai rõvijã opota tè janemoripe janereity ipi, Janerõvijã ywete tijarovija e'ã ipi”, e'i (Eps. 6.11). Ajawyi jajimokasi amãtejẽ Janejare'e remime'ẽgwerà pè janemokasia mõ ipi. Aepo e'i ikusiwa Pauru kareta rè imonooka.