2 Ava mõ sõ ojimomorijauvay iko remẽ, tapepãtavõ ikõ ereko ipi nẽ. Ãwitõ pãnakõ ipowyijay remẽ, japãtavõ imovya rè, ãwĩvo tapejipãtavõ gatu peiko ipi. Ãwĩvo peiko remẽ, napejavy'ãi Kiristu rekoa rupi tekoua ãmẽ. Upi katu peikotà ãmẽ ipi.

3 Kee e'i teywete avakwerà ipi: “Ha! Jõvijã vo tè ije. Ajawyi ije ywesõ ekatu ãmõ kõ wyi!” e'i tite oupewarà mõ ipi. Ajamã'ẽ aje rõwã aepo e'i mã'ẽ. Ovote ojimoripe iko. 4 Pevote penekoa tapemosã'ãga esa ereko, pejãvijõ jẽ. Ãmẽ ivo katu sikaepo peiko remẽ, tapeiko upi ãmẽ. Ãmẽ tè tapepy'a katu ivo peikoa rè peiko. A'evo remẽ tè ava mõ kee ne'i'ãi ojipy'amogeta: “Ije ywesõ ivo aiko ãmõ kõ wyi”, ne'i'ãi ãmẽ ipi. Ãmõ, “A'evo kuwasi aiko!” ne'i'ãi teve ipi. 5 Tapejireko katu Janejare'e rovake peiko, pejãvijõ jẽ, a'e pejẽ.

6 Ava mõ Kiristu rekoa rè ojimotekokuwa iko remẽ, tokãte'ã e'ã omotekokuwaarerà pè ipi. Toja'a katu ee ipi.

7 Ãmõ, kee a'e pejẽ. Janejare'e nojimoripeokai ipi. Janerekoa rupi katu janemoepy ipi. [Ava mõ wemimota aiwerà rupi kõrijõ tè ekoi ipi remẽ, Janejare'e noja'a'ãi ee ipi. O'Ãg remimota rupi ekoi mã'ẽ rè kõrijõ tè Janejare'e oja'atà ipi.] 8 Ãwitõ koo rè oposiko mã'ẽ wemitãgwerà'a tè opo'o ipi, oposikoa repykwerà rõmõ. Ãwĩvo ve Janejare'e 'Ãg kasia rupi poroereko katu mã'ẽ, Janejare'e remireko katu rõmõ ekoi. Ãwĩvo ve wemimota ai rè ywesõ oja'a mã'ẽ ojimomorijautà. 9 Ajawyi poroereko katua ikõ tijanererekoiva e'ã ipi nẽ. A'evo jaiko remẽ ikatukwerà sipyytà epykwerà rõmõ ajaire. Ãwitõ moma'eyva'a 'arà okwa remẽ, japo'o janeposikoa repykwerà rõmõ, ãwĩvo.

10 Ajawyi temiporijauesa kõ rè jamã'ẽ remẽ upi upi sipãtavõ kõ ipi. Tijanererekoiva e'ã a'evo jaikoa ipi. Jesu rè ojirovija mãe kõ ywesõ tijareko katu ipi.

11 Aã kareta ije epo pè ywete akusiwa ajupa ky'y. Mititirõwã tè eremikusiwarerà! 12 Kee a'e pejẽ. Poromo'e rã'ãga mãe kõ opota tè ojimojisaoka pejẽ. Ãmõ, ojimoe'eoka peupe kupa. Opota kasiay si penemosĩpire'ooka kupa. Nopotai kee javo kupa: “Kiristu rewarà mõ tè nomãnõ'ãi mãerã tè jane jaiko. Janeaiwererà repykarà mõ omãnõ yvyra jipokana rè”, javo. Okyje aepo javo Juteu kõ wyi. “Aje ipo” e'i sõ kupa remẽ, ojimomorijautà kuwa ãmẽ kupa mijã. 13 Ojiemosĩpire'o mãe kõ teipe a'e kõ Juteu kõ rõmõ ekoi. Ajamã'ẽ tãmõ Moisesi remikusiwarerà ojavy jẽ iko kupa, a'e rupi katu noikoi sire'e kupa rewarà mõ. A'evo ipe ekoi kupa remẽ, opota jẽ penemosĩpire'ooka kupa. Ajaire a'evo paire opota ojimoe'e penewarà mõ kupa. Ajawyi tè a'evo ekoi kupa. Opota tè kee javo mirà kõ reminu rõmõ: “Oreayvu wenu kupa rewarà mõ ojimojuteu iko kupa ky'y”, javo kupa.

14 Ije ãmẽ kee jaa rè kõrijõ tè ajimoe'e. Janerõvijã Jesu Kiristu mãnõa rupi erereko katua rè ajimoe'e aiko. Yvyra jipokana rè omãnõ maekwerà rè aja'a aiko. A'e rè kõrijõ tè aja'a aiko ipi, a'e rupi tè erekoa pyaukwerà ome'ẽ ije rewarà mõ. Ije napotai Jesu noerovijai mãe kõ remimotarà rupi aiko ky'y. Kiristu rè ajirovija kõrijõ tè apota. Ivo ve noerovijai mãe kõ nopotai teve eremirovija, Janejare'e epy'amoteeoka rewarà mõ.

15 Ajawyi kee a'e pejẽ. Nimanyvoi jajiemosĩpire'o remẽ. Nimanyvoi teve nijajiemosĩpire'oi remẽ. Jajipy'amotee ivo tekoua rupi jaiko mã'ẽ ywesõ ikatuay ipi. Ãwĩvo jaiko remẽ, janerekoa pyaukwerà rupi jaiko mã'ẽ tè jane. 16 Ajawyi kee a'e pirujẽ pejẽ, Jesu rekoa rupi peiko mãe kõ rõmõ. Janejare'e ikõ tapepy'a mopiryvypy katu penereko ipi nẽ, a'e pejẽ. Ãmõ, tapeporijauesa teve ikõ penereko ipi nẽ. Pirujẽ Janejare'e koty rewarà kõ reve teve ikõ ãwĩvo tapenereko nẽ.

17 Kee a'e pejẽ ky'y. Ava mõ temo'eai e'ã ky'y, jiemosĩpire'oa rewarà rè. Ije epirà rè ajikuwapa Jesu remĩgwai rõmõ aiko. Takuru pè ejapi japi mã'ẽ kwarerà rupi ajikuwapa. Ãmõ, enõpã nõpãawerà renawerà rupi ajikuwapa teve. Ãwĩvoa rè ãmõ kõ omã'ẽ remẽ sitõ okuwa Jesu remĩgwai e'e tè ije mã'ẽ kupa!

18 Janerõvijã Jesu Kiristu ikõ tapenereko katu okatuaya rupi ipi nẽ, a'e pejẽ, eretãrãgwerà kõ. [Awyjepa ky'y.]