“Tapejimokasi iko peiko tè peiko mã'ẽ rupi ky'y”, e'i mã'ẽ
5
Aje, Kiristu janerereko mã'ẽ nomowaypei jane ky'y. Tãmõ Moisesi remikusiwarerà kasia pupe rõwã jaiko ky'y. Ãwĩvoa kasia pupewarà rõmõ rõwã jaiko ky'y. Ajawyi jaiko tè jaiko ky'y. Ajawyi, tapejimokasi ikõ peiko ivo peiko mã'ẽ rè ky'y nẽ, a'e pejẽ. Moisesi remikusiwarerà rupi tekoua rè ikõ tapejipy'amogeta ywe'e tite e'ã peiko ky'y nẽ. “Ãmẽ tè janekatutà Janejare'e pè jaiko”, tapejẽ ywe'e tite e'ã peiko. Aepo pejẽ sõ remẽ, Moisesi remikusiwarerà kasia pupewarà vo 'ejẽtà pejẽ ãmẽ. Manyvo napereko kuwa'ãi Janejare'e mory, pejimokasiay ipe upi katu peikoa rè peiko remẽ!2 Pejapyaka ikõ eayvu rè ajawyi esa nẽ! Ije Pauru, kee a'età pejẽ. Poroemosĩpire'ooka mãe kõ perovija sõ pejiemosĩpire'o rõmõ remẽ, kee jaa tè a'evoa: “Nikasi Kiristu erereko katuarà rõmõ”, jaa tè a'evoa. [Aje, a'evo peikoa rupi napemory'ãi Janejare'e ãmẽ peiko.]
3 Aporegeta tarà mijẽ tapekuwa katu. Mã kwaima'e mõ pè ve a'e te'ĩtetà. Pejiemosĩpire'o sõ pejimojuteu remẽ, ikatu ipetà pejẽ. Ajamã'ẽ pirujẽ Moisesi remikusiwarerà rupi katu peiko remẽ kõrijõ tè ikatu kuwa pejẽ mijã. Napejavyi 'eteay remẽ tè ikatu kuwa. Ãmẽ naperovijai sire'e sikaepo remẽ, penako'i pãnẽtà ee peiko ãmẽ. 4 Kee pejẽ sõ remẽ, “Moisesi remikusiwarerà rupi aiko. Ajawyi ekatutà tè Janejare'e pè”, pejẽ sõ remẽ, pepoi ywe'e titetà Kiristu rè pejirovijaa wyi ãmẽ ky'y. Ivo pãnẽtà tè peiko ãmẽ ky'y. Kiristu reve rõwãtà peiko ãmẽ. Janejare'e napeporijauesa'ãi ãmẽ.
5 Na'evoi jaiko ajamã'ẽ. Jesu Kiristu rè janerako'i jaiko. Ajawyi Janejare'e janerereko katutà. Janerereko katua rã siãrõ jẽ jakupa remẽ, i'Ãg janemokasioka jẽ janerereko rã'ĩ, siãrõ puku pe'ĩ. 6 Kiristu Jesu revejẽ jaiko ipi remẽ, nimanyvoi jajiemosĩpire'o ipi remẽ. Ivo ve nijajiemosĩpire'oi remẽ, nimanyvoi teve. Kiristu rè janerako'i jaiko remẽ tè katu ikatu Janejare'e pè jaiko ipi. A'evo jaiko remẽ, jajiauvay teãmãtà jaiko. A'evo jajikuwatà Janejare'e rè jajirovija mãe kõ rõmõ jaiko.
7 Ajawyi kee a'e pejẽ. Pejimokasiay itõkõ Janejare'e rè peiko mijã! Ava ayvu rupi ywete põkõ ayvu aje ywete mã'ẽ wyi pepoi tite? 8 Janejare'e ayvu rupi rõwã a'evo ywe'e tite peiko! Janejare'e tè pepyteporo wãkarãgwerà kõ rõmõ penereko.
9 Kee a'e. Pão rè tè poromosã'ãgatà tapetekokuwa sa'u. Kejavõigà teipe jainõ pão jimovororo mã'ẽ moje'a je'a ipi, pão jainõtà remẽ. Ajamã'ẽ pirujẽ pão rã rupi ojimosãi, pão morurua rõmõ ipi. Ãwĩvo ve ivo e'ãa poroporakapa poroerokwa ipi. Ãwĩvo remẽ, ajaire jane kõ pirujẽ nivo'ãi ekoi ãmẽ ky'y.a 10 Ajamã'ẽ akuwa pejimo'y jẽtà Janerõvijã ywete rè pejirovija rõmõ peiko. Janejare'e pemokasità tapejirovija jẽ ee peiko. Ajamã'ẽ ava mõ sõ pemo'e rã'ãga Janejare'e ayvu rè remẽ, Janejare'e wemavotà ity oo ãmẽ apijarà. Aepo akuwapa.
11 Eretãrã kõ, ãmõ kõ kee e'i tite eupewarà mõ ipi: “Pauru mirà kõ wemosĩpire'ooka ipi”, e'i tite. Emomorijautarà kõ tè aepo e'i kupa. Aje rõwã aepo e'i kupa. Aje sõ remẽ, aã Juteu kõ nojikõ'õ'ãi kuwa ere mijã. Aje, kee a'e kõrijõ ipi: “Aje ywete Kiristu omãnõ yvyra jipokana rè janeaiwererà repykarà rõmõ. Ajawyi Janejare'e penereko katutà pejirovija ee remẽ”, a'e kõrijõ ipi. 12 Nikatui aepo e'i ije mãe kõ, a'e pejẽ. Ajamã'ẽ eupe kee ikatu kuwa. Ãwĩ pepijarĩ penereko mãe kõ ovote tojieta e'e amãtejẽ kupa, ajawyi! a'e pejẽ.
13 Ajawyi mokoi, eretãrãgwerà kõ, pejimoripeokapa maekwerà kõ! Janejare'e okasia ome'ẽma pejẽ, ãwisõ ayvukasia pupe rõwã tapeiko ky'y. Ajamã'ẽ tapetekokuwa jẽ ikõ peiko nẽ. Tapejimoripeoka e'ã ikõ peiko ipi nẽ! Kee taoty e'ã ipi: “Janejare'e okasia ome'ẽ ije, eremimotarà rupi taiko ipi”, taoty e'ã. Aepo pejẽ sõ remẽ, manyvo napereko'ãi penemimota ai wyi pepoi. Ajawyi aepo tapejẽ tite e'ã peiko ky'y. Tapejiauvay kõrijõ ojeeve peiko ky'y. Ãwĩvo remẽ teve, ojipo pè pejipãtavõtà pejimokasi jẽ rõmõ peiko ãmẽ. 14 Ajare kee e'i Janejare'e ikusiwaoka Moisesi pè: “Ãmõ kõ tapeauvay. Ãwitõ pejiauvay peiko, tãwĩvo ve tapeauvay kõ”, e'i maekwerà.b Ãmõ kõ peauvay remẽ, pirujẽ emikusiwarerà rupi katu tè peiko teãmãtà peiko ãmẽ. Ajawyi aepo a'e pejẽ.
15 Tapejimoemija e'ã ojee peiko ky'y, a'e pejẽ. Tapejimoane'e e'ã peayvu ai rè peiko. Oterẽ jẽ poroauvaya rupi tapeiko ky'y. Ãmẽ tè napejimoai'ãi ojee peiko.
“Janejare'e 'Ãg remimota janeremimota vo rõwã”, e'i mã'ẽ
16 Apota kee a'e pejẽ. Tapepota tè ikõ Janejare'e 'Ãg penerekoarà rõmõ nẽ, a'e pejẽ. “Hoõ” tapejẽ ãmẽ ijupe. I'Ãg pemotekokuwatà ãmẽ. Ãwĩvo peiko remẽ, penemimota ai rupi napeiko'ãi ãmẽ ky'y. 17 Janeremimotarà rupi katua rõwã Janejare'e 'Ãg remimota. Ovo rupi teve ojiwyi. Ajawyi ojimoãpã rõmõ maevo sõ tite ekoi kupa. Janeremimota. Janejare'e 'Ãg remimota. Ajawyi tapeiko e'ã ikõ penemimota rupi ky'y nẽ, a'e pejẽ.c 18 Janejare'e 'Ãg tè penerekoarà rõmõ ekoi ky'y. Ajawyi Moisesi remikusiwarerà kasia pupe napeikoi ky'y.
19 Agyvo wemimota aiwerà rupi ekoi mãe kõ ekoi ipi. Joe ojitupi iko kupa ipi. Nivoia rè oposiko iko ipi. Waiwererà rè nosĩytyi tesõ iko ipi. Ãmõ, joe oposiko iko ipi. 20 Ãmõ, ojarà rã'ãga jimoãtãgwerà rè ojimory iko ipi. Ãmõ, jimãrãerekoa rè oposiko iko ipi. Ãmõ, ãmõ kõ rè ojimoãpã iko ipi. Ãmõ, joe ojikõ'õ iko ipi. Ãmõ, ojimoa'u ojee iko ipi. Ãmõ, ojimõarõ ojikoty iko ipi. Ãmõ, “Ije rãgwe”, e'i ojipy'amogeta iko ipi. Ãmõ, ãmõ Jesu koty rewarà kõ wyi ojimowaite e'yi iko kupa ipi. 21 “Ije rõwã sõ”, e'i iko ipi. Ka'ua rè ywesõ oryvay iko ipi. Ãmõ, oka'ua pè remẽ ijawiay iko ipi. Wãi wãisõ wemimota aiwerà rupi ekoi mãe kõ ekoi ipi. Nomoẽokai Janejare'e o'arà kyty kupa ipi. Ajawyi kee a'e mijẽ pejẽ. Ãwĩvo tapeiko e'ã ikenẽ!
22 Aje, agyvo jaiko teãmã Janejare'e 'Ãg janererekoarà rõmõ ekoi remẽ. Jajiauvay teãmã ojeeve jaiko ipi. Janerory teãmã teve jaiko ipi. Ava mõ janemoai remẽ, “awyjepa ky'y”, ja'e kõrijõ jaiko ipi. Jajimory mijẽ ojee ajaire jaiko ipi. Ãmõ, jajimo'ãgatu teve jaiko ipi. Ãmõ, mirà kõ rè nijajikõtevẽi jaiko ipi. Japorijauesa kõ ereko ipi. A'evo ja'e katua ijupe. Ãmõ, poropopypy katuarà rõmõ jaiko ipi. Ãmõ, ivo tekoua rupi tijaiko ipi. Ãmõ, temirovija rõmõ jaiko ipi. 23 Ãmõ, ikatusa rupi jaiko teve ipi. Ãmõ, ivoa rupi jajireko katu teve ipi. Wãi wãisõ jaiko teãmã Janejare'e 'Ãg janererekoarà rõmõ ekoi remẽ. Okasia rupi i'Ãg janereinõ a'evo tijaiko teãmã jaiko. Ãwĩvoa rè naikoi 'ete ayvukasia mõ, “Ãwĩvo tapeiko e'ã”, e'i mã'ẽ ky'y.
24 Kiristu Jesu koty rewarà kõ i'Ãg kasia rupi oitypypyipa waiwererà ipi. Wemimota aiwerà wyive opoi kupa ipi. Ãwĩ rapijarerà rè jamãnõ mã'ẽ vo 'ejẽ jaiko.