Janejare'e ãkarãgwerà rõmõ jaiko ky'y remẽ
4
Ãmõ kee a'e sa'utà teve pejẽ pemotekokuwa rõmõ. Tuu sõ omãnõ remẽ, ima'ekwerà opyta ijãkarãgwerà kõ pè ipi. Ajamã'ẽ ija'yrĩ sõ ta'yry remẽ, nopyy'ãive uu ma'ekwerà. Kãramõ tè opyytà, ojimovijapa remẽ tè. Ajawyi nopyyive remẽ, temĩgwai vo 'ejẽ rã'ĩ ekoi ipi. Ajawyi uu moma'ekwerà jarà rõmõ ipe ta'yry remẽ, nojimovijapaive remẽ a'e rõmõ rõwã jẽ ekoi. 2 Ajamã'ẽ natui ky'y remẽ, ãmõ kõ po pè tè ojimovijapa rã'ĩ iko. Werekoarà ayvu rupi toiko teve iko ikenẽ, uu rekovijarerà rõmõ. Ãmõ, ta'yry movijaarerà tuu amyry moma'ekwerà rè omã'ẽ jẽ rã'ĩ teve, ta'yry ojimovija puku pè. Tuu ayvukwerà rupi ta'yry ojimovijapa pe'ĩ imoma'ekwerà rè omã'ẽ jẽtà rã'ĩ iko.3 Ãwĩvo jane, ta'yry vo 'ejẽ jaiko mijã. Yvy pewarà tekokuwaa rupi kõrijõ jaiko ipi mijã. Ãmõ, ãjãgai remimotarà rupi jaiko, nisirovija ywe'ei Janejare'e remẽ. 4 Ãmẽ okwapa sikaepo a'evoa 'arà ky'y remẽ, ãmẽ si Janejare'e omojisaoka Wa'yry ky'y. Omuu yvy pè tojimojane. Jane tè ijy mã'ẽ rõmõ omojisaoka tisaky. Juteu rõmõ teve omojisaoka tisaky. Ajawyi orerãmõi Moisesi remikusiwarerà wyry pè rã'ĩ ekoi. 5 Janejare'e opota wãkarãgwerà kõ rõmõ janerereko ky'y. Ajawyi Wa'yry omuu tijanerekyi Moisesi remikusiwarerà rerovijaa kasia wyry kyty wyi, ãwisõ temiemavo kõ rõwã tijaiko ky'y.
6 Janejare'e penereko wãkarãgwerà kõ rõmõ remẽ, Wa'yry 'Ãg tẽ tesõ omuu pepy'a pupe tojimoena. I'Ãg rupi tè jakuwa aje ywete Janejare'e ãkarãgwerà rõmõ jaiko. I'Ãg janemo'eoka “Papa!” tija'e Janejare'e pè ipi. 7 Ajawyi kee a'e pejẽ. Temĩgwai vo rõwã Janejare'e penereko ky'y. Wãkarãgwerà kõ rõmõ tè penereko ky'y. Ajawyi pirujẽ wãkarãgwerà kõ pè wemime'ẽ ãrã ome'ẽtà pejẽ.a
“Tapejirojivy ywe'e tite e'ã peiko”, e'i mã'ẽ
8 Pejẽ Juteu rõwã mãe kõ. Aje karamoe remẽ napekuwaive Janejare'e mijã. Pejarà rã'ãga kõ po pè peiko ywe'e tite ipi mijã. A'e kõ ayvu rupi peiko ywe'e tite ipi mijã. Nikasi mã'ẽ a'e kõ. Manyvoa rã rõmõ rõwã a'e kõ ekoi. 9 Age'e remẽ, pekuwa ipe Janejare'e ky'y. Janejare'e ve pekuwa teve. Ãwĩvoa ywesõ ikatu ipe pejẽ. Ajamã'ẽ pepota jẽ tesõ ity. Pejirojivy mijẽ ywe'e tite aekwerà kyty peiko! Napepota'ãi kuwasi ãjãg kõ rekoa rupi peiko mijã! Napepotai kuwasi ãjãg kõ remĩgwai rõmõ peiko mijẽ! 10 Kee pejẽ ywe'e tite: “Japota Janejare'e morya rè jaiko remẽ, Juteu kõ vo ywete tijaiko ikenẽ,” pejẽ ywe'e tite. “Jimoava 'arà remẽ upi upi jaja'a ee jaiko. Jay pyau upi upi teve jaja'a ee jaiko. Ãmõ, Juteu kõ remija'a kõ rè jaja'a teve jaiko. Wãisõ jaiko. A'evo jaiko remẽ tè Janejare'e orytà janere”, pejẽ ywe'e tite peiko. 11 A'evo sõ peiko ipi! Ajipy'amopirai ywete pene aiko! Ajawyi epy'a jikõtevẽ tesõ pene aiko. Poromotekokuwavay ipe aiko mijã. Poromotekokuwa pãnẽ tè sipõ penereko?
12 Apota katu evo jẽ peiko mijã, eretãrãgwerà kõ. Apota Kiristu rè pejirovijaa rupi katu kõrijõ tè tapeiko, penako'i rõmõ. Ãwitõ pevo aiko pepytery pè aiko remẽ, epota katu pekupa mijẽ. Tãwĩvo pejẽ age'e remẽ.b 13 Kee jaa wyi tapenearai e'ã peiko ky'y. Manyvo rewarà mõ rõwã Janejare'e ayvu amojenu ypy pejẽ maekwerà rè tapeja'a jẽ peiko! Etekorã itõkõ pepyri aju remẽ. Ajawyi tè itõkõ amojenu ijayvukwerà peupe ipi! 14 A'evo aiko remẽ itõkõ, nereityi tesõ pekupa mijã. Napemã'ẽ tei teve itõkõ ere! Ãwisõ ja'a katua rõmõ rõwã etekorã mijã remẽ, napejiwarui ewyi peiko. [Ãwĩvo ipe aiko remẽ, “Tutene upa”, napejẽi ije.] Aje, Janejare'e remĩgwai yvapewarà vo 'ejẽ tesõ erereko pekupa mijã. Ãwitõ Kiristu Jesu pereko katu kuwa, ãwĩvo tesõ itõkõ erereko katu pekupa mijã. 15 Penoryvay itõkõ ere mijã! Ije ãmẽ kee a'e peupewarà mõ: “Itekorã sõ erea kõ remẽ, wea rekyia okuwa sõ kupa remẽ, ojieaekyi kuwa erea rõmõ kupa mijã!” a'e peupewarà mõ mijã. Age'e pejimotee tesõ ky'y! 16 Ãwisõ peãpã rõmõ rõwã ipe ije remẽ, peãpã rõmõ jẽ erereko pekupa ky'y. Manyvore põ ãwĩvo erereko pekupa? Aje ywete mã'ẽ tè amome'u rewarà mõ sipõ ãwĩvo erereko pekupa ky'y? a'e pejẽ.
17 Aje ywete, ije poroauvay penereko ipi. Na'evoi pepytery pewarà kõ. A'e pemoe'e rã'ãga mãe kõ. A'e kõ penau maevo sõ tite tè kupa. Ajamã'ẽ nivoia rupi tè poromo'e rã'ãga iko kupa ipi. Opota tè ereityoka peupe kupa mijã. Opota ipe ãwitõ erau pekupa, ãwĩvo peau kõ mijã. 18 Apota ipe Janejare'e ayvu rupi katu peiko ipi mijã. Ije pepyri aiko remẽ kõrijõ rõwã a'evoa apota. Ke'ĩrõwã aiko pewyi remẽ teve apota ãwĩvo tapeiko.
19 Eremiau kõ tè pejẽ, eãkarãgwerà vo 'ejẽ pejẽ peiko. Kee a'e pejẽ. Ja'yry ray vo tesõ epy'a pè emomorijaua penewarà rõmõ. Ja'yry ray vo tesõ eray nopi'ãi teve, apota ywete Kiristu rè pejirovija ywete penako'i rõmõ peiko rewarà mõ. 20 Age'e apota ipe mokope aju pepyri mijã. Apota ipe ikatusa rupi aporegeta peneve mijã. Ajipy'amopirai tesõ pene aiko ipi.
Tãmõ Aparão ra'yry kõ rè tè poromosã'ãga mã'ẽ
21 Mokoi, Moisesi remikusiwarerà rè pepota ywe'e tite penako'i peiko! Aje rõwã, napekuwa ywe'ei Moisesi remikusiwarerà peiko! 22 Kee e'i ikusiwa: “Aparão mõrijõ rõmõ ta'yry kõ. Pe'ĩ emĩgwai ai memyry, Aga eu ijupe mã'ẽ memyry. Isimaeu eu erà pè mã'ẽ a'e. Aga emĩgwai teipe mijã. Ãmõ, erekware'e Sara memyry. Isaki eu erà pè mã'ẽ.” 23 Ãmẽ emĩgwai ai memyry jane e'e ra'yry rõmõ kõrijõ tè ekoi. [Aã jane age'e, ãwĩvo tè ekoi.] Ãmẽ erekware'e imemy remẽ, Janejare'e ayvu rupi tè imemy ky'y. Kee e'ipa amãtejẽ Janejare'e ijupe: “Nererekwarà isa'imã wete ipe remẽ, imemy jẽtà nera'yry rõmõ”, e'ipa.
24 A'evoa mojikuwaparà rõmõ tè kee a'e. Mõrijõ rõmõ wãivĩ kõ, ivo ve mõrijõ rõmõ Janejare'e wayvu ome'ẽ mã'ẽ vo 'ejẽ ekoi. Sinai yvytyrapyte 'aryvo tãmõ Moisesi pè wayvu ome'ẽ remẽ, “Pirujẽ neayvukwerà rupi katu oroikotà”, e'i epe ijupe kupa. A'e Moisesi remikusiwarerà rè eako'i mãe kõ, tãmõ Aparão remĩgwai ai memyry vo 'ejẽ ekoi. Aga memyry vo 'ejẽ ekoi kupa. Temĩgwai karuarua vo 'ejẽ ekoi kupa. 25 A'e Sinai yvytyry Arapia yvy pè tè tui. A'e rè jaja'a Aga rè jaja'a remẽ. Ajawyi age'e remẽ Moisesi remikusiwarerà rè eako'i mãe kõ, Aga memyry vo 'ejẽ ekoi kupa. Temĩgwai karuarua rõmõ ekoi kupa. A'e kõ vo 'ejẽ Juteu kõ ekoi, Jerusarẽ taa wãnà kõ. A'e kõ pawete temĩgwai karuarua rõmõ ekoi kupa.c
26 Ajamã'ẽ ãmõ tena uve, Jerusarẽ yva pewarà. A'e janerena e'e tè. A'e pè jaku maevo sõ tite jaiko, tãmõ Aparão rerekware'e memyry vo 'ejẽ jaiko remẽ. Janejare'e janerereko wãkarãgwerà kõ rõmõ. Janerereko takatua rupi janerereko ipi. Moisesi remikusiwarerà rupi jaiko rewarà mõ rõwã a'evo janerereko. Jajirovija ee ky'y janerako'i rõmõ jaiko rewarà mõ tè a'evo janerereko. Janeatyraytà Jerusarẽ yva pewarà pè jaiko.d 27 Kee e'i ojikusiwapa Janejare'e kareta rè aepo jaa rè:
“Ene, wãivĩ nimemy'ãi mã'ẽ vo teipe ene mijã.
Ãmõ, nimemy ray'ãive mã'ẽ vo teipe teve ene neiko mijã.
Temimoikwerà vo teve ipe ene neiko mijã.
Ajamã'ẽ taneroryvay neiko ky'y. Ene ywesõtà nerorytà neiko omẽnà revejẽ ekoi mã'ẽ wyi.
Ene ywesõtà neroryvaytà wãivĩ imemy ratyray mã'ẽ wyi neiko”, e'i amãtejẽ maekwerà rupi katu tè jaikotà.
28 Eretãrãgwerà kõ, kee a'e mã'ẽ rè peja'a. “Aje” tãmõ Aparão e'i Janejare'e ayvukwerà pè ipi. Ajawyi aekwerà rupi katu tãmõ Isaki isaky. Ajawyi Isaki vo 'ejẽ jane jaiko. Janejare'e 'Ãg wyive janesaky mã'ẽ vo 'ejẽ jaiko ijupewarà mõ, ijayvu katu rupi tè. 29 A'e jane wyi tè isaky maekwerà tè werõarõ Janejare'e 'Ãg kasia rupi isaky maekwerà. Ãwĩvo ywe'e age'e remẽ. Ajawyi mirà kõ ovote okasia rupiwarà kõ janererõarõtà iko. Omowasuoka ipetà jane kupa. 30 Ajamã'ẽ kee e'ipa Janejare'e tãmõ Aparão pè: “Neremĩgwai ai emoisyry, imemyry revejẽ. Ãwĩ memyry nemoma'ekwerà jarà rõmõ rõwãtà ekoi. Nererekware'e memyry tè ijarà rõmõtà ekoi”, e'ipa Janejare'e Aparão pè.e 31 Ajawyi kee a'e pejẽ, eretãrãgwerà kõ. Temĩgwai ai memyry vo 'ejẽ rõwã jaiko, tãmõ Moisesi remikusiwarerà rè nijanerako'i rewarà mõ. Erekware'e memyry vo 'ejẽ tè jaiko, “aje” ja'e Janejare'e ayvukwerà pè rewarà mõ. Jajirovija karuaru Janejare'e rè janerako'i rõmõ jaiko ipi.