2 Kee a'e pejẽ. Tãmõ Moisesi remikusiwarerà ivo tekoua rupi katu peiko rewarà mõ rõwã Janejare'e o'Ãg oinõ pepy'a pupe! a'e pejẽ. Aje, Jesu Kiristu rè pejirovija rewarà mõ tè oinõ pepy'a pupe. 3 I'Ãg kasia rupi tè peiko mijã. Pekasia rã'ãga rupi tè sipõ pepota peiko ky'y? “Evote amorytà Janejare'e”, pejẽ ywe'e tite sipõ peiko! Aje, napetekokuwai peiko rewarà mõ aepo pejẽ ywe'e tite peiko ipi!

4 Pejimomorijau itõkõ Jesu rè pejirovija peiko rewarà mõ mijã. A'evo remẽ itõkõ napeityi ee pejirovijaa mijã. Aekwery vo jẽ kuwasi peiko mijã. Manyvoa rã rõmõ rõwã aekwerà, age'e ywe'e pekasia rè penako'i peiko ky'y remẽ! 5 Pemã'ẽ! Janejare'e o'Ãg ome'ẽ pejẽ remẽ, tãmõ Moisesi remikusiwarerà rupi katu peiko rewarà mõ rõwã ome'ẽ pejẽ! A'evo peiko rewarà mõ rõwã teve okasia omojisaoka pepyterà rupi iko. Ãnĩ! A'evo rewarà mõ rõwã! O'Ãg ome'ẽ takatu tè pejẽ! Ijayvu peenu remẽ itõkõ, kee pejẽ: “Aje ywete Jesu Kiristu rè ajirovijatà aiko”, pejẽ mijã. Aja paire tè aje pejirovija ee peiko mijã. Ajawyi tè Janejare'e o'Ãg ome'ẽ maevo pejẽ.

6 Pejapyaka katu ikõ eayvu rè nẽ! Kee e'i ojikusiwa Janejare'e kareta rè tãmõ Aparão rewarà rè: “Janejare'e, ‘Kee oroerekotà’, e'i ijupe remẽ, Aparão, ‘Aje ywete a'evotà’, e'i ojirovija ee. Ajawyi Janejare'e, ‘Ivo katu mã'ẽ tè ãwĩ’, e'i ijupewarà mõ”, e'i ikusiwa maekwerà.^a 7 Ajawyi tãmõ Aparão reruparà mõ tijaiko ipi. Janejare'e rè tijajirovija ywete jaiko. A'evo jaiko remẽ tè Janejare'e, “Aparão jeapyrere'e rõmõ pejẽ”, e'ità jane ãmẽ. Juteu rõwã mãe kõ pè ve aepo e'ità ãmẽ. A'evoa tapekuwa ky'y.

8 Ajawyi Juteu rõwã mãe kõ ojirovija ee weako'i rõmõ remẽ, Janejare'e ivo katuay mãe kõ rõmõ tè wereko kõ ipi ky'y. Ojikuwapa amãtejẽ a'evoa emikusiwarerà rupi. Ajare tãmõ Aparão pè kee e'i amãtejẽ karamoe remeve: “Pirujẽ yvy wãnà kõ aauvaytà ereko kõ nerupi tè”, e'i amãtejẽ tãmõ Aparão pè karamoe remeve.^b 9 Aepo jaa renu remẽ itõkõ tãmõ Aparão, “Aje ywete, a'evotà”, e'i. Ajawyi tè Janejare'e owaray Aparão wereko ipi. A'evo ve pirujẽ ojirovija ee weako'i rõmõ mãe kõ owaray wereko kõ ipi. Ãwitõ Aparão a'evo wereko, ãwĩvo ve janerereko ipi.

10 Ãmõ kõ kee e'i ywe'e tite joupe: “Ije evote ivo katu aiko, Moisesi remikusiwarerà rupi katu aiko ipi rewarà mõ”, e'i ywe'e tite kupa ipi. Ajamã'ẽ aepo e'i tite mãe kõ, nivoi mãe kõ tè Janejare'e pè. Temiemavo rõmõ sikaepo ekoità kupa. A'evoa rè Janejare'e kee e'i ikusiwaokapa: “Ava mõ sõ pirujẽ eayvu Moisesi pè akusiwaoka maekwerà rupi katu noikoi remẽ, nivoi mãe kõ rõmõtà tè eupewarà mõ ekoi. Ajawyi, ‘Temiemavoarà tè ene’, a'età ijupewarà mõ ãmẽ”, e'ipa ikusiwaoka maekwerà.^c 11 Aje, Moisesi remikusiwarerà rupi jaiko mã'ẽ rupi rõwã Janejare'e janerereko ivo mãe kõ rõmõ ipi. Manyvo upi katu nijaiko'ãi kuwa ipi. “Upi katu taiko”, ja'e ipe remẽ, jajavy jẽtà jaiko ãmẽ. Kee e'i ojikusiwa Janejare'e kareta rè: “Ojirovija ee weako'i rõmõ iko mãe kõ tè Janejare'e wereko ivo mãe kõ rõmõ ipi”, e'i maekwerà.^d Aje, ojirovija ee mãe kõ pè kõrijõ tè “ivo mã'ẽ” e'ità ipi. A'evoa sikuwapa.

12 Na'evoi Moisesi remikusiwarerà rè janerako'i remẽ. Upi tijaiko ikenẽ ãmẽ. Nojavyi 'ete mã'ẽ pè kõrijõ tè “ivo mã'ẽ” eu kuwa mijã. Aje, kee e'i Janejare'e a'evoa rè: “Eayvukwerà Moisesi pè akusiwaoka maekwerà wyry pè peikotà remẽ, upi katu tapeiko ikenẽ”, e'i maekwerà.^e

13 Ajamã'ẽ ava mõ tãmõ Moisesi remikusiwarerà rupi katu noikoi sire'egà ipi. Ajawyi a'e rè sõ janerako'i remẽ, “Temiemavo tè ene”, e'i kuwa Janejare'e janeupe ãmẽ mijã. Ajamã'ẽ Kiristu omo'y janeaiwererà wee remẽ, a'e tè temiemavo rõmõ omãnõ janerekovijarerà rõmõ. Kee e'i Janejare'e kareta rè maekwerà rupi katu a'evo: “Ava mõ sõ yvyra jipokana rè omãnõ remẽ, ‘Temiemavoarà tẽ tesõ ene’, eu ijupe”, e'i maekwerà rupi katu.^f Ajawyi “temiemavo” naoty'ãi janeupe ãmẽ ky'y, Kiristu rè jajirovija janerako'i rõmõ jaiko remẽ.

14 Aje ywete Kiristu Jesu mãnõa rupi Janejare'e janerereko katu oupewarà rã rõmõ ky'y. Ãwisõ Juteu rõwã mãe kõ teipe pejẽ remẽ. Ajamã'ẽ ivo mãe kõ rõmõ penereko ky'y. Ãwitõ Janejare'e owaray tãmõ Aparão wereko ojirovija ee remẽ, ãwĩvo yveve janerereko ky'y. Ajawyi o'Ãg ome'ẽma janeupe, e'ipa maekwerà rupi katu, Kiristu rè jajirovija janerako'i rõmõ jaiko remẽ.

15 Eretãrãgwerà kõ, poromotekokuwa jẽtà Janejare'e wayvu tãmõ Aparão pè ome'ẽma maekwerà rè. Kee e'i maekwerà rã: “Aã yvy ame'ẽtà neupe. Nejeapyry rã pè teve”, e'ipa maekwerà rè. Aepo e'i paire, nomotee'ãi wayvukwerà, e'ipa rewarà mõ. Kee a'e tarà mijẽ ijã'ã ikewarà rupi pejẽ, tapetekokuwa sa'u peiko ipi. Mõrijõ rõmõ mirà kõ remẽ, a'e kõ ojiayvume'ẽtà tokusiwa kareta rè kupa. Werà kõ okusiwa kareta rè, “Aje ywete aepo a'e”, e'i mã'ẽ mojikuwaparà rõmõ. Werà okusiwa paire, awyje a'evotà ekoi. Ava nomoje'o'ãi imotee erà kõ iwyi ãmẽ ky'y. Nomokãjã'ãi werà kupa ky'y. Noinõ sa'u'ãi teve ijapyrasa emikusiwarerà kupa ipi. 16 A'evo ve Janejare'e wayvu ome'ẽma tãmõ Aparão pè remẽ. “Nejeapyry rã pè aepo a'e teve”, e'ipa amãtejẽ. Peenu rã'ĩ esa! “Pirujẽ nejeapyrerà rã kõ pè”, ne'i. “Nejeapyry rã pè”, e'i tè. Pe'ĩ jane mã'ẽ pè tè aepo e'i. Aparão jeapyry rã rõmõ Kiristu isakytà ojimojane. Ajawyi a'e pè tè aepo e'ipa amãtejẽ.^g

17 Apota kee jaa rè ywesõ poromotekokuwa aiko. Janejare'e wayvu ome'ẽ tãmõ Aparão pè remẽ, aje ywete Aparão ojirovija ee. “Aje ywete, Janejare'e wayvu ome'ẽma ije maekwerà rupi katu ekoità”, e'i Aparão. Tãmõ Moisesi remikusiwarerà rupi ekoi rewarà mõ rõwã Janejare'e wayvu ome'ẽ tãmõ Aparão pè! Nisakyi ve tãmõ Moisesi, a'evo ekoi remẽ. Tãmõ Aparão ypy ekoi. 430 kwaray paire tẽ tesõ Janejare'e wayvu ome'ẽ tãmõ Moisesi pè ikusiwaoka.^h Aepo e'i paire nomoteei wayvukwerà, tãmõ Aparão pè e'i maekwerà. Tãmõ Moisesi pè wayvu okusiwaoka remẽ, kee ne'i ijupe: “Eayvukwerà Aparão pè a'e maekwerà, a'e rupi naiko'ãi ky'y”, ne'i. Aepo e'i sõ remẽ, wayvu omotee mã'ẽ vo tè kuwa mijã. 18 Janejare'e remime'ẽ epy rè rõwã japyy ipi! Opota tè poroereko katua rõmõ, okatuaya rupi tè ekoi ipi rewarà mõ. Peja'a katu tãmõ Aparão rè. A'e pè Janejare'e ojiayvume'ẽ remẽ, aje ywete wayvu rupi katuay ekoi ajaire. Kee ne'i rã'ĩ ijupe: “Eayvu rupi katu tapeiko ypy rã'ĩ”, ne'i ijupe. Ajawyi tãmõ Aparão omoa'u jẽ wereko katua. “Aje ywete a'evo ererekotà, e'ipa rewarà mõ”, e'i imoa'u upa. Ajawyi jakuwa a'evo jaiko remẽ, Janejare'e remime'ẽ japyytà, janerereko katua rõmõ. Ajawyi kee taoty e'ã: “Tãmõ Moisesi remikusiwarerà rupi katu jaiko remẽ tè katu Janejare'e janerereko katu kuwa ipi, ãwisõ ipyri tijaiko”, taoty e'ã.

19 Ava mõ kee e'i kuwa eupe ãmẽ: “Manyvoa rã rõmõ põ kãramõ sa'u Janejare'e ome'ẽ wayvu ikusiwaoka tãmõ Moisesi pè ãmẽ”? e'i kuwa. Aepo jaa pè kee a'e kuwa: “Janejare'e opota jane kõ tokuwa waiwererà kõ reitypypyipa tè, jaa tè okusiwaoka rã'ĩ”, a'e kuwa. Moisesi remikusiwarerà wyry pè jaiko jẽ jaiko ajaate Jesu uu. Tãmõ Aparão jeapyrerà tè Jesu. A'e pewarà mõ Janejare'e oporegeta amãtejẽ wayvu ome'ẽ tãmõ Aparão pè karamoe remeve. Ãmẽ a'e paire sitõ Janejare'e wemikusiwarerà ome'ẽ wemĩgwai yvapewarà kõ rupi tãmõ Moisesi pè ky'y, tokusiwa imojisaoka mirà kõ pè, ãwisõ upi toiko kupa ky'y. 20 Ãmẽ tãmõ Aparão pè Janejare'e ywete wayvu ome'ẽtà remẽ, wemĩgwai yvapewarà rupi rõwã ome'ẽ. A'e ywete ome'ẽ Aparão pè. Pe'ĩte.

21 Ava mõ kee e'i kuwa ije mijã: “Manyvore põ Janejare'e wayvu ome'ẽma tãmõ Aparão pe paire, wayvu jikusiwarerà ome'ẽ tãmõ Moisesi pè, ivo tekoua rewarà?” e'i kuwa ije mijã. “Ojipy'amogeta motee sipõ?” e'i kuwa ije mijã. Aepo jaa pè kee a'e kuwa: Ãnĩ. Nojipy'amogeta moteei. Tãmõ Moisesi remikusiwarerà rè sõ janerako'i remẽ, nijajimokatuoka'ãi kuwa jaiko ipi. Nijanepija'ãi kuwa janejimomorijaua rã wyi. A'e rupi katu ekoia sõ nivoi mãe kõ py'a omokatu remẽ, Janejare'e ãmõ nomuu'ãi kuwa janerereko katuarà mõ mijã. [A'e Janerõvijã ywete rã.] Ajamã'ẽ nijaiko'ãi sire'e ijayvu rupi ipi.

22 A'evoa rè kee e'i Janejare'e ikusiwaoka: “Pirujẽ mirà kõ nivoi mã'ẽ kasia pè tui”, e'i. Ajawyi japota ipe ivo jaikoa ipi remẽ, nivoi jẽ jaiko ipi. Nijanekasi janeaiwererà reitypypyia rè jaiko. Ikasiay janeupe iko. Ajawyi Jesu Kiristu rè jajirovija janerako'i rõmõ remẽ tè katu janerekyità nivoi mã'ẽ kasia po pe wyi ipi, kee e'i maekwerà rupi katu tè: “Epyri tekou pyau ame'ẽtà”, e'i maekwerà rupi katu tè a'evo janerereko ipi.

23 Janejare'e nomojikuwaokaive wayvu e'eay Jesu rewarà jane kõ pè remẽ, ijayvukwerà Moisesi pè ome'ẽ maekwerà janererekoarà rõmõ ekoi. A'e rupi ivo tekoua jakuwa, upi tijaiko sa'u ãmẽ. A'evo janerereko ajaate Jesu Kiristu rè jajirovija kuwa jaiko ky'y. 24 Ja'yry rerekoa rè tè poromosã'ãgatà pemotekokuwa rõmõ ãmẽ. Ãwitõ ja'yry kõ nomãrãkuwai iko ipi. Ajawyi jareko kõ janepyri imotekokuwa kõ ipi. Nãwĩvoi sõ remẽ, notekokuwa'ãi kuwa iko kupa. Nomãrãkuwa'ãi kuwa teve ãmẽ kupa. Ãwĩvo ve jane jaiko. Nomãrãkuwai mã'ẽ vo 'ejẽ Janejare'e pè jaiko ipi. Ajawyi wayvu ivo tekoua rewarà ome'ẽ rã'ĩ janererekoarà rõmõ. A'evo Janejare'e janerereko, ajaate janerereko katuarà ovãema ky'y. A'e Kiristu, janerereko katuarà rõmõ ekoi. A'e rè jajirovija remẽ tè katu Janejare'e janeporijauesa ky'y, ãwisõ kee te'i janeupe: “Ivo mã'ẽ tè ãwĩ. Ajawyi epyri toiko karuaru iko”, te'i janeupe ipi. 25 Janejare'e omojikuwaokapa wayvu katu jane age'e ky'y, Kiristu rè jajirovija mã'ẽ rewarà. A'evo Moisesi remikusiwarerà janererekoarà rõwã ky'y, Kiristu ovãema rewarà mõ.

26 Ajawyi kee a'e pejẽ. Kiristu Jesu rè pejirovija ky'y rewarà mõ sitõ, age'e remẽ Janejare'e ãkarãgwerà rõmõ pirujẽ peiko ky'y. 27 Pejimojãmorĩ remẽ, kee jaa tè a'evoa: “Kiristu reve kõrijõ tè aikotà ky'y”, jaa tè pemojãmorĩa. Janejare'e pemojimo'ypa ee, eevejẽ tapeiko ky'y. Ajawyi awyje ijupewarà kõ rõmõ tapejikuwa peiko ky'y. Ivo jẽ tapeiko ky'y. 28 Aje, pe'ĩypyte rõmõ jaiko Jesu Kiristu koty rewarà kõ rõmõ ipi. Kee ne'i Janejare'e: “Juteu tè ãwĩ kõ” ne'i janere omãjã. Ãmõ, kee ne'i Janejare'e omãjã: “Ãmõ kõ tè ãwĩ kõ. Juteu rõwã mãe kõ tè ãwĩ kõ”, ne'i teve. [Ojevo jẽ jaiko Janejare'e pè ky'y, Kiristu Jesu rè jajirovija mãe kõ rõmõ.] Ãmõ, “Temĩgwai kõ tè ãwĩ kõ” ne'i. Ãmõ, “Ovote ekoi mãe kõ tè ãwĩ kõ”, ne'i teve. Ãmõ, “Kwaima'e kõ tè ãwĩ kõ. Ãmõ, wãivĩgwerà kõ tè ãwĩ kõ”, ne'i teve. Ojevo jẽ jaiko ijupe, Kiristu Jesu revejẽ jaiko mãe kõ rõmõ jaiko ky'y rewarà mõ. 29 Kiristu revejẽ peiko remẽ, aje ywete tãmõ Aparão jeapyrerà kõ rõmõ tè pejẽ peiko ky'y. Ajawyi Janejare'e ikatuay penerekotà, tãmõ Aparão pè e'i maekwerà rupi katu.