“Aje ywete Janejare'e remipyteporokwerà tè Pauru”, e'i kupa remẽwarà
2
Ijaty kwaray itõkõ naai mijẽ Jerusarẽ taa kyty. 14 kwaray rõmõ tesõ naai ajupa. Ajawyi, 14 kwaray paire tè aa mijẽ Jerusarẽ taa kyty ky'y. Panape araa erupi. Ãmõ, Titu araa. Mokopejõ araa. 2 Janejare'e tè omojikuwaoka eopa ije. Ajawyi tè aa Jesu koty rewarà kõ rõvijãgwerà resa ky'y. Ãmẽ orojimoaty a'e pè remẽ, amome'u ijupe kõ manyvo areko Juteu rõwã mãe kõ motekokuwa Kiristu rè jirovijaa rã rè. Jane kõ rovake rõwã a'evo aiko amome'u. Waiteve aporegeta eeve kõ. [Kee a'e aporegeta ijupe kõ: “‘Tapejimojuteu rã'ĩ’, na'ei Juteu rõwã mãe kõ pè ajamã'ẽ. ‘Tapejiemosĩpire'ooka rã'ĩ imojikuwaparà rõmõ’, na'ei teve. I'ete põ aepo a'e ijupe kõ?” a'e ijupe kõ. “Ivo katu põ amotekokuwa kõ?” a'e. “Nivoi põkõ ma'e reme amotekokuwa remẽ?” a'e ijupe kõ.] Nivoi amotekokuwa kõ sõ remẽ, manyvo jaa rõmõ rõwã kuwa eposikoa ãmẽ mijã. Ajawyi aepo a'e ijupe kõ. [Ãwijã pè kee e'i ije kupa: “Ivo katu tè nemotekokuwa kõ”, e'i ije kupa.] 3 Juteu rõwã teipe ejimorypa Titu. Kereku yvy wãnà teipe. Ajamã'ẽ Jesu koty rewarà rõvijãgwerà kõ noemosĩpire'ookai ajamã'ẽ. Nopotai sõ eposikoa kupa remẽ, wemosĩpire'ooka kuwa ãmẽ kupa mijã.4 Ajamã'ẽ Juteu kõ mõ opota rã'ãga tite Jesu remĩgwai rõmõ ekoi mijã. Jesu koty rewarà rõvijã kõ rõwã a'e kõ ajamã'ẽ. A'e kõ orerevejẽ ojimoaty kupa mijã. Opota tè oreayvu renu tè sikaepo kupa mijã. Kee e'i rã'ãga ore kupa: “Ore teve Jesu koty rewarà kõ rõmõ oroiko”, e'i rã'ãga ore kupa. Ajamã'ẽ ojimoaty orereve kupa remẽ, opota wãmõi kõ rekoawerà rupi toroiko kupa mijã.a Kee e'i epe ore kupa: “Manyvore põ Kiristu Jesu rè pejirovija ky'y remẽ, tãmõ kõ ayvukwerà rupi napeikoi sõ ky'y?” e'i kupa. Ãmõ, kee e'i epe teve ore kupa: “Tãmõ kõ ayvukwerà rupi jẽ peiko remẽ tè ikatutà oreupe”, e'i epe teve kupa. 5 Ajamã'ẽ “aje” noro'ei ijayvu kõ pè. Noropotai Jesu ayvu moteea, ajawyi. Oropota Jesu ayvukwerà aje ywete mã'ẽ mojenu pejẽ. Ajawyi “aje ywete” noro'ei ijupe kõ.
6 Jesu koty rewarà rõvijãgwerà kõ ãmẽ oreayvu wenu remẽ, “aje” e'i ore ãmẽ kupa. Ãwisõ jõvijã kõ teipe kupa remẽ, ajamã'ẽ najirokyje ekojẽi iwyi kõ. Janejare'e pè ojevo jẽ jaiko Jesu koty rewarà kõ rõmõ jaiko. Aje, janepy'a rè ywesõ omã'ẽ ipi. Ajawyi a'e kõ ywesõ rõwãtà Janejare'e pè ekoi, jõvijã kõ rõmõ teipe ekoi kupa remẽ. A'e kõ ve nomoteei oreayvu poromotekokuwa ee mã'ẽ, oroo esa kõ remẽ. Ãmõ rupi tè rõwã orereinõ kupa. 7 Ajamã'ẽ kee e'i jõvijã kõ ije: “Aje ywete Janejare'e tè nemonooka Juteu rõwã mãe kõ teremotekokuwa ijayvu e'eay Jesu Kiristu rewarà rè”, e'i kupa. “Ãwitõ Peturu Juteu kõ motekokuwaarà rõmõ ekoi, ãwĩvo ve ene, Juteu rõwã mãe kõ motekokuwaarà rõmõ neiko”, e'i kõrijõ ije kupa.
8 Aje ywete Janejare'e tè okasia rupi epyteporo emono Juteu rõwã mãe kõ motekokuwaarà rõmõ taiko. Ãwitõ Peturu omokasi imono Juteu kõ tomotekokuwa, a'evo ve emokasi emono Juteu rõwã mãe kõ tamotekokuwa. 9 Kejõ jõvijã kõ: Tiaku. Peturu. Juwão. Mokopejõ. A'e kõ kee e'i ore Janejare'e kasia rupi: “Aje ywete, orevo mã'ẽ tè pejẽ, Jesu remĩgwai kõ rõmõ”, e'i ore Panape reve kupa. Ajawyi kee e'i ore kupa: “Aje ywete, pejẽ Juteu rõwã mãe kõ motekokuwaarà tè. Orevo ve pejẽ. Juteu kõ motekokuwaarà rõmõ tè teve ore”, e'i ore. Ajawyi a'evoa rè orojiayvume'ẽ ojiupe. Ojimory katu orere kupa. 10 Ajamã'ẽ kee e'i kõrijõ ore kupa: “Uve ike rupi Jesu koty rewarà kõ, iporijau mãe kõ. A'e kõ tapepãtavõ ipi”, e'i. “Hoõ” a'e ãmẽ. Ãwĩvo aiko teãmã. Ãwĩvoa rè poromotekokuwa teãmã teve aiko.b
Pauru ijayvukasi Peturu pè remẽwarà
11 Ãmẽ ajaire Peturu uu Ãtiokia taa kyty, orekoty. Aekwery vo rõwã ekoi Peturu ãmẽ ky'y. Jesu koty rewarà kõ rõmõ teipe ore pirujẽ mijã. Ajamã'ẽ Peturu nojimory katui Juteu rõwã mãe kõ rè ky'y, ãwisõ Jesu koty rewarà kõ teve ipe kupa remẽ. Ãmõ kõ vo 'ejẽ wereko kõ ky'y. Ajawyi aporegeta kasi Peturu pè ky'y. 12 Kee ekoi ipi mijã. Juteu rõwã mãe kõ reve ojimi'u katu ipi mijã, Jesu koty rewarà kõ reve. Ajaire Juteu kõ mõ ve uu orekoty. Kee e'i kupa: “Tiaku oremuroka”, e'i kupa. Kee e'i tite kupa: “Tojimojuteu rã'ĩ kupa. Tojiemosĩpire'ooka kupa, Jesu koty rewarà mojikuwaparà rõmõ toiko kupa”, e'i tite kupa. Ãmẽ a'e kõ ovãe remeve, Peturu nojimi'ui Juteu rõwã mãe kõ reve ky'y. Waite ojimi'u ky'y. Juteu kõ reve kõrijõ tè ojimi'u ky'y. Okyje wetãrãgwerà kõ wyi. Nopotai kee e'i ijupe kupa: “Tãmõ Moisesi remikusiwarerà neity”, te'i ijupe kupa. Ajawyi a'evo ovake kõ ekoi. A'evo ekoi remẽ mõrijõ pee rupi oo mã'ẽ vo 'ejẽ ekoi.
13 Ajaate ãmõ Jesu koty rewarà kõ ve Peturu vo ve ekoi ky'y, Juteu kõ. Juteu rõwã mãe kõ pyri nojimi'ui ãmẽ kupa ky'y. Okyje Juteu kõ wayvunõa wyi, ajawyi. Panape ve tesõ itõkõ ojimoane'e jẽ tesõ a'evoa rè, Peturu vo jẽ.
14 Kee jaa okuwapa ipe kupa mijã: “Janejare'e janerereko opyri remẽ, Jesu rè jajirovija remẽ tè a'evo janerereko ipi. Jesu omãnõ janeupewarà mõ wyi tè a'evo janerereko”, jaa. Aepo jaa okuwa ipe kupa mijã. Ajamã'ẽ jimi'ua rè oja'a jẽ kupa ipi. Ajawyi Juteu kõ pyri kõrijõ tè ojimi'u tite kupa ky'y. Kee jaa tè a'evo ekoi kupa: “Juteu kõ kõrijõ tè Janejare'e wereko ipi”, jaa tè. Amã'ẽ ee kõ, a'evo ekoi kupa remẽ. Ajaate eayvukasi Peturu pè ky'y. Apõ'ã tesõ eayvukasi rõmõ ijupe. Kee a'e ijupe: “Ene Juteu e'e ywete! Ajamã'ẽ ike rupi neiko ypy remẽ, Juteu kõ rekoa rupi rõwã neiko ipi mijã. Juteu rõwã mãe kõ rekoa rupi tè neiko mijã. Age'e Juteu kõ rekoa rupi neiko ovake kõ ky'y. Kee jaa tè ãwĩvo neiko mã'ẽ: ‘Juteu rãmõi kõ rekoawerà rupi tè tapeiko ky'y, Jesu koty rewarà kõ rõmõ peiko remẽ’, jaa tè ãwĩvo neiko!” a'e Peturu pè. Pirujẽ teminu rõmõ aepo a'e.
“Tãmõ Moisesi remikusiwarerà rupi tekoua nijanemokatu kuwa'ãi”, e'i mã'ẽ
15 Aje ywete ore Juteu kõ tè, Juteu rõmõ tè oresaky rewarà mõ. Ajawyi tãmõ Moisesi remikusiwarerà ivo tekoua rewarà rupi oroiko teãmã ipi. Juteu rõwã mãe kõ rekoa rupi rõwã oroiko ipi. “Nivoi mãe kõ”, e'i teãmã Juteu kõ ãmõ kõ pewarà mõ ipi. Ajawyi ije ve aepo a'e ipi mijã. 16 Ajamã'ẽ kee orokuwa Juteu kõ rõmõ ky'y, Jesu Kiristu rè ojirovija mãe kõ rõmõ jaiko remẽ. Mirà kõ, pirujẽ nivoi ekoi mãe kõ tè. Ajamã'ẽ aje ywete Jesu Kiristu rè jajirovija remẽ tè katu kuwa Janejare'e opota tè kuwa janere ojimory! Ajamã'ẽ kee eu remẽ, awyje nivoi mã'ẽ rõmõ jaiko jẽtà ãmẽ: “Tãmõ Moisesi remikusiwarerà rupi tè taiko ikenẽ”, eu remẽ. Janejare'e omo'y jẽ janeaiwererà janere ãmẽ. Ajamã'ẽ Jesu Kiristu rè jajirovija remẽ, ivo katuay mã'ẽ rõmõ janerereko ky'y. Tãmõ Moisesi remikusiwarerà ivo tekoua rewarà rupi katu jaiko rewarà mõ rõwã a'evo janerereko. Aje ywete Kiristu Jesu rè jajirovija rewarà mõ tè a'evo janerereko ipi.c
Janejare'e rè jimorya rewarà
17 Ore, Juteu kõ rõmõ, oropota tè Janejare'e ivo katuay mã'ẽ rõmõ orerereko Kiristu revejẽ oroiko mãe kõ rõmõ. Ajawyi orokuwa nivoi mãe kõ rõmõ oroiko teãmã. Tãmõ kõ ayvu rupi noroikoi sire'e. Ãwĩvo oroiko remẽ, orojikuwaoka nivoi teãmã mãe kõ rõmõ tè ore. Ãwitõ pejẽ Juteu rõwã mãe kõ rõmõ nivoi mãe kõ rõmõ tè peiko teãmã, a'evo ve ore oroiko Juteu kõ rõmõ. Ajamã'ẽ kee taoty e'ã: “Kiristu janemoane'e nivoi tijaiko”, taoty e'ã. Ãnĩ! Janevote nivoi jaiko ipi!
18 Ajawyi nerako'i Moisesi remikusiwarerà rè ky'y. Kiristu rè tè erako'i aiko ky'y. Ajawyi manyvoa rã rõmõ rõwã kuwa ajirojivy erako'i mijẽ tãmõ Moisesi remikusiwarerà rè aiko. Erako'i pãnẽmusu kuwa ee, eaiwererà kõ ojimo'y jẽ kuwa ere rewarà mõ. 19 Amãnõ 'a tè kuwa tãmõ Moisesi remikusiwarerà rupi aiko remẽ. Ajawyi amãnõ maevo sõ tite tãmõ Moisesi remikusiwarerà rè aiko ky'y. Najimo'eai ee ky'y. Janejare'e remimota rupi taiko ky'y, a'e. Kiristu omãnõ eaiwererà repykarà rõmõ yvyra jipokana rè remẽ, ije ve amãnõ maevo sõ tite eevejẽ.
20 Ajawyi ije rõwã maevo sõ tite epirà pupe aiko ky'y. Kiristu tè epirà pupe ekoi mã'ẽ vo 'ejẽ ije aiko ky'y. A'e rè ajirovija aiko, ajuve jẽ aiko remẽ. Janejare'e Ra'yry rè tẽ tesõ ajirovija aiko. Erauvay wyi omãnõ eupewarà mõ mã'ẽ tè a'e.
21 Janejare'e pirujẽ opota poroereko katu okatuaya rupi ipi. Ajawyi kee na'e'ãi ijupe: “Napotai Kiristu mãnõa rupi erereko katua”, na'e'ãi ijupe. Ãmẽ ywesõ si napoi'ãi iwyi aiko. Ajamã'ẽ pejẽ, kee e'i mãe kõ vo tè pejẽ peiko, tãmõ Moisesi remikusiwarerà rè penako'i ywe'e tite peiko remẽ: “Napotai Kiristu mãnõa rupi erereko katua”, e'i mãe kõ vo tè peiko. “Manyvoa rã rõmõ rõwã kuwa Kiristu mãnõa”, jaa tè a'evo peiko mã'ẽ.