3 Janeruwasu ikõ tapenereko katu okatuaya rupi nẽ. Tapepy'amopiryvypy katu penereko ipi. Ãmõ, Janerõvijã Jesu Kiristu teve ikõ a'evo tapenereko nẽ, a'e pejẽ.

4 Kiristu itõkõ omãnõ yvyra jipokana rè janeaiwererà repykarà rõmõ. Omãnõ mãe rã teãmã uu janeaiwererà repykarà rõmõ. A'evo janemomoioka janeaiwererà kasia pe wyi, janeremimota ai kasia pe wyi. Janeruwasu ayvu rupi a'evo Jesu janerereko, Uu remimota rupi tè. 5 Janejare'e ywesõ ikatuay wete iko. Ajawyi tisimoe'e py'yi jaiko ipi. Õ'õ, awyje katu ãwĩvo jamoe'e karuaru jaiko ipi.

6 Kee a'e pejẽ. Ajimonyi tesõ pene aiko! Pepyteporoarerà wyi kuise'ẽay wete pepoipa ywe'e tite, ãwisõ Janejare'e penauvay ipe remẽ! Penauvay wyi Kiristu omuu ipe penekovijarerà rõmõ tomãnõ, peaiwererà repykarà rõmõ! Kuise'ẽay pepoi ywe'e tite Janejare'e morya wyi ajamã'ẽ! Ãmõ kõ ayvu ywesõ peenu katu ywe'e tite peiko, Janerõvijã ayvu katu wyi! [A'e kõ itõkõ kee e'i tite: “Tapejimojuteu rã'ĩ ajamã'ẽ!” e'i tite kupa.^a Aepo jaa peenu remẽ, “aje” pejẽ ywe'e tite enu. Pejimojuteu ywe'e tite peiko ãmẽ ky'y.] Ajawyi ajimopirai 'ete aepo renu penewarà rè.

7 [Kee pejẽ tite sipõ peiko? “Oiko ipõ ãmõ ayvu, a'e ywesõ Janerõvijã Kiristu ayvu wyi”, pejẽ tite si peiko? “Ivo põkõ Pauru janemotekokuwa mijã?” pejẽ teve rõwã põkõ peiko? Ãnĩ!] Aje, oiko pe'ĩte Kiristu. A'e rupi rõmõ'ĩte jajimory kuwa Janejare'e rè jaiko ipi. Ãmõ, aje ywete, Kiristu ayvu rõmõ'ĩte poromotekokuwa mã'ẽ. Aje, naikoi ãmõ upi tijaiko mã'ẽ. Ajamã'ẽ pejẽ, ãmõ kõ ayvu rupi pevote peiko teitete peiko ky'y. Ãmõ rupi teve Kiristu rekoa omojenu rã'ãga peupe kupa ipi. Ovo rupi teve oreayvu poromotekokuwa remẽ ajamã'ẽ.

8 Ivo katu itõkõ oromojenu Janejare'e ayvukwerà pejẽ. Ajawyi kee a'e pejẽ. Ava mõ sõ ãmõ rupi tè omome'u, oromojenu maekwerà vo rõwã remẽ, Janejare'e ikõ tomomorijau nẽ! a'e pejẽ ãmẽ. Nivoi mãe kõ momorijaua rena pè ikõ tomomorijau nẽ, a'e. Janejare'e remĩgwai yvapewarà teipe teve sõ ãmõ rupi tè omotee tite ijayvu imojenu remẽ, Janejare'e ikõ tomomorijau teve ikenẽ. Ore ve sõ nivoi oromojenu tite remẽ, ore ve Janejare'e toremomorijau ve ãmẽ! Ajawyi aepo a'e eayvukasi rõmõ pejẽ. 9 Aepo oro'e tarà mijẽ pejẽ, tapetekokuwa ee. Ipojy Jesu ayvu rè poromo'e rã'ãga mãe kõ remimojenuwerà! Ajawyi oreayvu vo rõwã sõ emimojenu kõ remẽ, Janejare'e tomomorijau kõ! oro'e pejẽ.

10 Pemorya rõmõ rõwã eayvukasi imono pejẽ! Janejare'e morya rõmõ tè a'evo aiko. Aje ywete mã'ẽ rè tè kõrijõ tè poromo'e aiko. Ajawyi aepo a'e imono pejẽ. “Emoe'e kuwasi kupa!” na'ei pejẽ ajamã'ẽ. Janejare'e morya ywesõ aãrõ mirà kõ morya wyi ipi. Nãwĩvoi sõ aiko remẽ, Kiristu remĩgwai e'e rõmõ rõwã kuwa ije ãmẽ aiko mijã.

11 Kee a'età pejẽ, eretãrãgwerà kõ. Eayvu Jesu Kiristu rè poromotekokuwa mã'ẽ aje ywete ipi. Mirà kõ rõwã emotekokuwa Kiristu rè. 12 Aje Jesu Kiristu tẽ tesõ emotekokuwa wee erereko, omojikuwaoka wayvu ije remẽ. Mirà rõwã emotekokuwa erereko. Ajawyi eremimojenu Kiristu rewarà aje ywete ipi, ãwisõ Kiristu tè emotekokuwa remẽ.

13 Erekoawerà pekuwapa. Jypy remẽ itõkõ amomorijau tesõ Jesu koty rewarà kõ aiko maekwerà pekuwapa. Orerãmõi Juteu kõ ayvu rupi jẽ aiko remẽ itõkõ, a'evo aiko ipi mijã. Aa aa itõkõ Jesu koty rewarà kõ reka imojaiwe kõ ipi mijã. Apota itõkõ pirujẽ imoma kõ tite ipi mijã. Naporijauesa kõi wete mijã! [Kee a'e tite mijã: “Janejare'e opota a'evo taiko ipi”, a'e tite mijã.]^b 14 Ajimokasiay ipe itõkõ Janejare'e morya rè ipi mijã. Ije ywesõ kõ a'evo aiko ipi mijã mã'ẽ, eakatuarà kõ wyi. Ije ywesõ tãmõ kõ rekoawerà rupi katu aiko ipi mijã, Juteu e'eay rõmõ. “Janejare'e morya rõmõ aiko”, a'e tite mijã. Ajawyi a'evo aiko ipi mijã. Najavyi tite itõkõ tãmõ kõ rekoawerà ipi mijã.^c

15-16 Ajamã'ẽ Janejare'e epyteporopa teãmã sikaepo wemĩgwai rõmõ taiko. A'evo aiko rewarà mõ rõwã epyteporopa. Erereko katu okatuaya rupi rewarà mõ tè epyteporo. Nesakyi remeve epyteporo teãmã erereko. Aja paire kõ Janejare'e Wa'yry omojikuwaoka ije. Opota rewarà mõ tè a'evo erereko. Emoteeoka ãmẽ ky'y. Ejipy'amogetaa omotee teve. Ajaire emono Juteu rõwã mãe kõ pè, tamotekokuwa kõ ijayvu e'eay Jesu Kiristu rewarà rè, ãwisõ tojirovija ee kupa. A'evo remẽ naporanui rã'ĩ mirà kõ pè temotekokuwa rã'ĩ Jesu rekoa rè, taa Juteu rõwã mãe kõ motekokuwaarà rõmõ aiko.^d 17 Ãmõ, Jerusarẽ taa pè naai rã'ĩ teve aporegeta Jesu remimono ypykwerà kõ pè. “Mirà kõ temotekokuwa rã'ĩ”, na'ei. Oterẽ jẽ kõrijõ aa Arapia yvy kyty. Janejare'e rõmõ'ĩte emotekokuwa a'e pè aiko remẽ, ãwisõ Juteu rõwã mãe kõ rena pè aju remẽ. Aja paire ajivy aa Tamasiku taa kyty ky'y.^e

18 Aja paire tè kõ aa Jerusarẽ taa kyty Peturu pè aporegeta ky'y. Moapy kwaray paire tè a'evo aiko. Ãmẽ, a'e pè 15 'arà rõmõ kõrijõ tè aiko rã'ĩ aporegeta eeve.^f 19 Namã'ẽive Jesu remimonokwerà kõ mõ rè mijã, Peturu vo mã'ẽ rè. Ãmõ, Tiaku rè amã'ẽ a'e pè aiko remẽ. A'e Janerõvijã ywete mõmirĩgwerà tè. A'e kõ rè rõmõ'ĩte amã'ẽ. 20 Ajawyi Janejare'e kõrijõ tè emotekokuwaarerà, a'e pejẽ. Aje ywete aepo a'e aporegeta Janejare'e rovake. Ajawyi ãwĩ eremikusiwarerà pè “aje” taoty mãjã ipi. A'evoa Janejare'e okuwapa.

21 Aja paire Jerusarẽ pe wyi Sirija yvy kyty aa, Juteu rõwã mãe kõ yvy kyty. Ãmõ, Sirisi yvy kyty aa. A'e pè teve taa taa kõ rupi aa aa aiko. Juteu rõwã mãe kõ pyterà rupi ywesõ akwa ãmẽ. 22 Ajawyi Kiristu koty rewarà kõ Juteja yvy rupi ojimoaty mãe kõ nekuwai mijã, a'evo aiko remẽ. 23 Ãmõ kõ ayvukwerà rupi kõrijõ tè erekoa okuwa kupa ipi, kee e'i kupa mã'ẽ rupi: “Ãwĩ Pauru mirà kõ omomorijauvay maekwerà tè, age'e ojimoteepa ky'y. Awyje Jesu ayvu rupi tekoua rè poromotekokuwa e'e iko ky'y! Ãwĩ itõkõ jypy remẽ opota Jesu rè ojirovija mãe kõ moma tite maekwerà tè!” e'i mã'ẽ. Aepo jaa rupi tè ekuwa kupa.

24 Ãmẽ aepo jaa wenu kupa remẽ, kee e'i Janejare'e pè imoe'e erewarà mõ kupa: “Janejare'e, nekatuay wetea rupi Pauru nepyteporo neremĩgwai rõmõ imotekokuwa ky'y!” e'i kupa. [Ajawyi “aje ywete” tapejẽ ije ky'y.]