4 Ãmẽ tuu kõ pè, janey kõ pè, kee a'e teve. Tapereko katu ikõ peãkarãgwerà kõ ipi nẽ. Tapemotekokuwa kõ ikõ Janejare'e ayvu rè ipi nẽ, upi katu toiko kupa ipi. Ojavy kupa remẽ, tapemotekokuwa kõ jẽ ipi ãmẽ. Tapemojimõarõoka e'ã ikõ peãkarãgwerà kõ ajamã'ẽ nẽ, a'e pejẽ.^c

5 Temĩgwai kõ pè kee a'e teve. Tapemoja'y e'ã ikõ penõvijã ipi nẽ. Ijayvu rupi katu ikõ tapeiko ipi nẽ. Ãwitõ ovake “hoõ” pejẽ, tãwĩvo ve eã'ã rupi peiko. Ãwitõ Kiristu perovija katu ipi, tãwĩvo peiko. 6 Uve mirà kõ, oõvijã noerovija ywe'ei mãe kõ. A'e kõ oõvijã rovake kõrijõ tè werovija maevo sõ tite ipi, “temoe'e” e'i tite oõvijã pè ipi rewarà mõ. Apykyre kyty noerovijai ijayvukwerà ajamã'ẽ. A'e kõ vo rõwã tapeiko ikenẽ, a'e pejẽ. Aje ywete taperovija, pepy'a pupe. Janejare'e remimota rupi a'evo tapeiko ipi, Kiristu remĩgwai kõ rõmõ. 7 Tapenory katu ikõ peposiko ipi nẽ. Kee tapejẽ: “Ivo katu aposiko erõvijã pè remẽ, Erõvijã wasu Jesu oryvaytà ere ãmẽ, erõvijã yvy pewarà pè kõrijõ tè rõwã aposiko rewarà mõ”, tapejẽ. 8 Kee jaa rè tapeja'a. [Ivo katu japosiko janerõvijã yvy pewarà kõ pè remẽ, Janerõvijã ywete orytà janere ãmẽ ipi.] Aje ywete Janejare'e tè ikatu japosiko remẽ ikatukwerà sipyytà Janejare'e wyi epy rõmõ ipi. Temĩgwai kõ opyytà. Temĩgwai rõwã mãe kõ ve opyytà.^d

9 Ãmõ, jõvijã kõ pè kee a'e teve. Ãwitõ, “Ikatuay ikõ tapeiko penõvijã reve ipi nẽ”, a'e penemĩgwai kõ pè, ãwĩvo ve, “Ikatuay ikõ tapeiko penemĩgwai kõ reve ipi nẽ”, a'e pejẽ. Tapeje'ẽgãtã e'ã ikõ ijupe kõ ipi nẽ, a'e pejẽ. Kee jaa rè tapeja'a ipi. Pe'ĩte Janerõvijã ywete. Penõvijã ywete yvapewarà, penemĩgwai kõ Rõvijã ywete rõmõ ekoi teve. A'e poromosã'ãga remẽ, ojevo jẽ janemosã'ãga ipi, janerekoawerà rupi katu. Ajawyi ikatuay tapeiko amãtejẽ enoneve, a'e pejẽ.^e

10 Kee a'e jẽtà pejẽ tapeja'a ee. Ikasiay wete Janerõvijã ywete. Ajawyi tapejimokasioka Janerovijã kasia pè peiko ipi, a'e pejẽ. Ãmẽ tè pejimokasiaytà ipyri, ãjãgai rõvijã wyi. 11 Ãjãgai rõvijã opota tè janemoripe janereity ipi, Janerõvijã ywete tijarovija e'ã ipi. Ãwitõ ãpã kõ ojiapisità janere remẽ, agyvotè rõwã jaa ãpã kõ rõvaisĩ ipi. Raparà jaraa ipi. Kaparu jaraa teve ipi. Ãwĩvo ve ãjãgai rõvijã ojimokasità janere ipi remẽ, agyvotè rõwã jaõvaisĩtà. Janejare'e remime'ẽgwerà jiapisia rewarà tijaporu, janemokasia kõ rõmõ. Ajawyi pirujẽ emime'ẽgwerà kõ rupi tapejimokasioka, a'e pejẽ. 12 Mirà rõwã ãjãgai rõvijã, wemĩgwai kõ reve. Ovo rupi teve ekoi kupa. Kejõ ekoi kupa. Ija mãe kõ. Ãjãgaiwerà kõ. Uve teve ãjãg yvapewarà kõ, Janejare'e werõarõ tite mãe kõ. Wãisõ ekoi kupa. A'e kõ ojimokasiay wete jane kõ rè ipi, jõvijã ai kõ rõmõ. Oposiko ai wete age'e remẽ ivo e'ãa rè iko kupa ipi, ikasiay kupa rewarà mõ.^f 13 A'e kõ opota janererova Janejare'e wyi ipi. Janevote nijanekasi'ãi ijupe, emĩgwai kõ pè ve. Ajawyi jajimokasi amãtejẽ Janejare'e remime'ẽgwerà rè, janemokasia mõ. Pirujẽ poromokasi mãe kõ pupe jajimokasi ipi, a'e pejẽ. Tijajireko katu ikõ ãjãgai rõvijã kasia wyi ipi nẽ. A'evo jajimokasi Janejare'e kasia rupi jaiko remẽ, ãmẽ si jane ywesõ janekasità ãjãgai rõvijã wyi. Jiapisia vo mã'ẽ opi rã'ĩ remẽ, jane ywesõtà iwyi. Japõ'ã jẽtà jajimokasi.

14 Sota kõ ojiapisità remẽ, ojimokatu amãtejẽ ootà kupa ipi.^g Ãwĩvo ve jajimokatu amãtejẽ ãjãgai rõvijã renoneve. Janejare'e remime'ẽgwerà kõ rè tè jajimokasioka ipi. Kee ja'e jajimokasi rõmõ ipi. Ayvu aje ywete mã'ẽ rupi kõrijõ tè tijaporegeta ipi jajimokasi rõmõ. Ãmõ, ivo jaiko ipi. Janejare'e rekoa rupi katu kõrijõ tè jaiko ky'y. 15 Ãmõ, Janejare'e ayvu e'eay janepy'amopiryvypy katu mã'ẽ tè simojenu jenu ipi. 16 Ãmõ, ãjãgai rõvijã kee e'i epe jane: “Temirovija rõwã Janejare'e”, e'i epe. Aepo e'i jane remẽ, nijarovija'ãi ijayvu. Ãmẽ jaovaja ãmẽ. “Temirovija tè Janejare'e”, eu ovaja. 17 Ãmõ, kee ja'e teve janeremikuwa rõmõ ipi: “Janejare'e erereko katu ipi”, ja'e py'yi teve ipi. Aepo rè jaja'a py'yi remẽ, jajireko katutà ãjãgai rõvijã wyi. Ãmõ, Janejare'e 'Ãg wayvu ome'ẽ janeupe mã'ẽ tijamojenu [ãjãgai rõvijã rovake] toenu ipi. A'e ywesõ ikasi iwyi. 18 A'evo 'evo jaiko remeve, Janejare'e pè tijaporegeta jẽ janemokasia rõmõ ipi. Kee tija'e: “Epãtavõ rejupa nekasia rupi”, tija'e ijupe jaiko. Manyvo jaiko remẽ, tijaporegeta ijupe jaiko ipi. I'Ãg tè janemotekokuwatà tijaporegeta ijupe ipi. I'Ãg, “Ãwĩ pewarà mõ eporegeta”, e'i janeupe remẽ upi upi, tijaporegeta ijupe ipi. Ja'ave rõwã tijaiko e'ã. Tijaporegeta py'yi Janejare'e pè jaiko ipi. Pirujẽ Janejare'e koty rewarà kõ pewarà mõ tijaporegeta py'yi ijupe ipi.

19 Eupewarà mõ ve tapeporegeta teve ipi, Janejare'e temotekokuwa eayvu rã kõ rè aporegetatà remẽ. A'evo peiko remẽ, najimonyi'ãi Janejare'e ayvu e'eay Jesu rewarà amojenu noenuive mãe kõ pè remẽ ipi. 20 A'e mojenuarà rõmõ Jesu Kiristu emono. A'e rewarà mõ age'e jimopã'ãga pupe aju rã'ĩ. Ajawyi Janejare'e pè peporegeta remẽ, kee tapejẽ: “Pauru emokasi tojimonyi e'ã Jesu ayvu katu mojenua rè”, tapejẽ ijupe. I'ete najimonyi imojenua rè remẽ.

21 Janejimorypa katu Tikiku tè omome'utà manyvo aiko maekwerà pejẽ ky'y, tapekuwa manyvo aiko. Janeretãrã e'eay vo Tikiku. Janerõvijã ywete remĩgwai e'eay tè a'e. Orepãtavõ ywete mã'ẽ tè a'e.^h 22 A'e amonotà pekoty, manyvo oroiko maekwerà tomojenu pejẽ. Pejimokasità enu.ⁱ

23 Eretãrã kõ, kee a'e Janejare'e pè, Jesu Kiristu Ruu pè, peupewarà mõ: “Emokasioka kõ ipi, tipy'a piryvypy katu kupa ipi. Tojiauvay teve ojee kupa ipi. Tojirovija ywete jẽ nere kupa ipi”, a'e peupewarà mõ. Jõvijã Jesu Kiristu pè ve aepo a'e teve. 24 Janejare'e tè tapenereko katu okatuaya rupi, Janerõvijã Jesu Kiristu rauparà kõ rõmõ. Pirujẽ wauparà kõ toereko katu, nopi'ãi auvaya wyi mãe kõ.

[Awyjepa eremikusiwarerà ãmẽ ky'y.]