Jesu Kiristu rekoa rupi jaiko mã'ẽ rewarà
5
Janejare'e ãkarãgwerà kõ rõmõ peiko ky'y, emiau kõ rõmõ. Ajawyi eruparà mõ ikõ peiko ky'y nẽ, a'e pejẽ. 2 Poroauvaya rupi ikõ peiko ipi nẽ, a'e pejẽ. Ãwitõ Kiristu janerauvay, tãwĩvo peiko ipi. Kejavõigà rõwã janerauvaya. Kiristu ojijukaoka tẽ tesõ janeupewarà mõ janerauvaya rupi. Ajawyi Janejare'e oryvay ee.3 Janejare'e kee e'i pejẽ ky'y: “Eupewarà kõ tè ãwĩ kõ” e'i. Ajawyi kee tapeiko e'ã ky'y, a'e pejẽ. Tapejimomy'a e'ã ikenẽ, a'e pejẽ. Pirujẽ a'evoa wyi tapejireko katu. Tojimo'y e'ã pene nivoi mãe kõ. Ãmõ, tapejitupi e'ã ikõ ãmõ kõ moma'e rè pemãjã nẽ. Napeporegeta'ãi kuwasi a'evoa rè peiko mijã. Nivoi 'ete Janejare'e pewarà kõ rõmõ a'evo peiko remẽ. 4 Ãwĩvo ve ayvu jajimosĩoka enu mã'ẽ, nivoi teve. Ãmõ, ayvu ai, ayvu teitetea teve. Janejare'e moe'ea kõrijõ tè ikatu janeupe. Penorya tapemome'u teve Janejare'e pè imoe'e ipi. 5 Kee jaa aje ywete mã'ẽ. Nivoi ekoi mãe kõ Janejare'e noeraa'ãi wena pè opyri toiko karuaru. Ojimomy'a iko mãe kõ. Osĩay iko mãe kõ teve. Moma'e moatya rè ywesõ oja'a iko mãe kõ teve. Apijarerà omoma'e kõ rè ywesõ oja'a ipi. Janejare'e nomoẽokai o'arà kyty ãmẽ kupa ipi. Kiristu remĩgwai kõ rõwã apijarerà. Ajawyi nomoigeoka'ãi wena pè apijarerà kõ.
6 Ãmõ, kee a'e pejẽ. Janejare'e noerovijai mãe kõ kee e'ità maevo pejẽ: “Orevo tapeiko”, e'ità maevo pejẽ. A'evo remẽ, “hoõ” tapejẽ ywe'e tite e'ã ijupe kõ. Tapejimoripeoka e'ã ikõ ijupe kõ nẽ. Janejare'e omomorijautà apijarerà. A'evo werekotà noerovijai mãe kõ. 7 Ajawyi apijarerà kõ rekoa rupi ikõ tapeiko tite e'ã nẽ, a'e pejẽ. 8 A'e kõ vo itõkõ peiko mijã. Janerõvijã ywete rekoa rupi rõwã peiko ipi mijã. Pãtõnusu rupi peiko mãe kõ vo 'ejẽ peiko ipi mijã. Age'e ojisa katu mã'ẽ rupi peiko mã'ẽ vo peiko ipi ky'y. Ajawyi ikõ a'evo tapeiko nẽ, Janejare'e ãkarãgwerà kõ rõmõ, a'e pejẽ. 9 Aje ywete kee jaikotà Janejare'e rekoa janeroupa remẽ. Jaja'a katu jane kõ rè jaiko ipi. Ãmõ, ivo katu jaiko ipi. Aje ywete japoregeta jaiko ipi. A'evo 'evo jaiko ipi. 10 Pekuwa ikõ Janerõvijã ywete remimota nẽ. Upi ikõ peiko Janejare'e morya mõ ipi nẽ. 11 Tapejireko katu ikõ tekou aiwerà wyi ipi nẽ. Ãwitõ moma'e iky'a mã'ẽ janoẽ ojisa katu mã'ẽ pè remẽ, iky'a mã'ẽ ojikuwa ipi. Ãwĩvo tapemojikuwaoka nivoi mãe kõ aiwererà ivo peikoa rupi. 12 Tyvija rupi ywesõ nivoi mãe kõ ekoi ipi. Kee e'i tite oupe kupa: “Ava nomã'ẽ'ãi ere”, e'i tite oupe kupa ipi. “Tyvija pè tè agyvo aiko”, e'i tite oupe kupa ipi. Janõsĩ eko aiwererà kõ momewa. 13-14 [Janejare'e omojikuwaokapa manyvo opota tijaiko ipi mã'ẽ.] Nivoi mãe kõ pè Janejare'e remimota tijamojikuwaoka ãmẽ. Ãmẽ tè ijaiwererà ojikuwatà ijupe kõ. Maevo ojirovatà Janejare'e kytyre ãmẽ kupa ky'y. Ajare kee eu ipi:
“Oke mã'ẽ vo 'ejẽ mã'ẽ, emã'ẽ ky'y!” eu ijupe.
“Okãjã mã'ẽ vo 'ejẽ mã'ẽ, epoera mijẽ epõ'ã!” eu teve ijupe.
“Kiristu ojikuwatà neupe”, eu.
[“Manyvo neikoa omojikuwatà neupe, upi tereiko”, eu.]
15 Ajawyi sitõ tapejireko katu ikõ ivo tekoua rupi tapeiko ãmẽ nẽ, a'e pejẽ! Ijayvu karira mãe kõ vo tapeiko e'ã. Otekokuwavay mãe kõ rõmõ tapeiko ipi. 16 Tapeiko teitete e'ã ikõ pirujẽ nẽ, a'e pejẽ, nivoi mãe kõ mõa'ãrõwã rewarà mõ.a 17 Ojimoja'y mãe kõ rõmõ tapeiko e'ã. Tapetekokuwavay jome Janerõvijã ywete remimota rupi peiko ipi.
18 Pemãrãkuwaa tapemoyvypyoka e'ã ikõ peka'ua pupe nẽ. Peiko teitete ai ywe'e titetà peiko, peka'uay remẽ. Janejare'e 'Ãg pè tapejireko katuoka penerekoarà rõmõ. Ikatuay peikotà ãmẽ ky'y. 19 Tapejipy'amokasi Janerõvijã rè pejĩga imoe'e ipi. Janejare'e ayvu rupi tapejĩga imoe'e ipi. Ãmõ, Jesu tapemoe'e pejĩgarà rupi peiko ipi. Ãmõ, Janejare'e 'Ãg omojikuwaoka peupe mã'ẽ rupi tapejĩga imoe'e ipi. Pepy'a pupe pejĩga teve imoe'e ipi. Wãi wãisõ imoe'e peiko. 20 Janejare'e Jesu Kiristu Ruu janerereko katu ipi, manyvo jaiko remẽ ipi. Ajawyi penorya penerekoa rewarà pemome'u ijupe imoe'e ipi. Janerõvijã Jesu Kiristu ayvu rupi a'evo tapeiko ipi.b
Ojirekopa mãe kõ rewarà
21 Tapejirovija katu ikõ ojevo jẽ ipi nẽ. Kiristu pemomojy rewarà mõ a'evo tapeiko.
22 Imẽma mãe kõ pè kee a'e. Pemẽnà wyry kyty ikõ peiko nẽ, a'e pejẽ. Ãwitõ Janerõvijã ywete wyry kyty jaiko ipi, tãwĩvo peiko.c 23 Imẽnà werekwarà 'arà kyty tè ekoi rewarà mõ tãwĩvo peiko ipi. Ãwitõ Kiristu jane'arà kyty ekoi, tãwĩvo. Okoty rewarà kõ 'arà kyty ekoi. Janerereko katuarà rõmõ ekoi teve. Jane'y rõmõ tè ekoi. Jane ãmẽ jajimo'y ee mãe kõ rõmõ jaiko. 24 Ajawyi ãwĩvo ikõ tapeiko nẽ, erekwarà kõ rõmõ. Ãwitõ Kiristu ayvu rupi jaiko ikoty rewarà kõ rõmõ, tãwĩvo ve peiko.
25 Erekwapa mãe kõ pè teve kee a'e. Tapeauvay ikõ penerekwarà kõ ipi nẽ, a'e pejẽ. Ãwitõ Kiristu janerauvay okoty rewarà kõ rõmõ, tãwĩvo ve ikõ peiko nẽ. Emã'ẽ. Kiristu janerauvay rewarà mõ ojime'ẽ ojijukaoka janerekovijarerà rõmõ.d 26 Omãnõa rupi janemowaite Janejare'e koty rewarà kõ rõmõ tijaiko. Wayvu omojikuwaoka janeupe ipi, tijaneroupa janepy'aky'a'o. 27 A'evo janerereko ipi, ikatuay tijaiko ovake ky'y. Nuve pe'ĩ'ãi janeaiwererà ovake jaiko remẽ ãmẽ. Ivoay jaikotà ovake. Nuve'ãi 'ete nivoi mã'ẽ janere. 28 Janerauvay rewarà mõ a'evo janerereko ipi. Tãwĩvo ve ikõ erekwapa mãe kõ ekoi nẽ. Emã'ẽ. Ãwitõ jaja'a katu janepirà rè jajimokatu ipi, tãwĩvo ve erekwapa mãe kõ ekoi. Toja'a katu ikõ werekwarà kõ rè ipi nẽ. Werekwarà wauvay mã'ẽ ojiau teãmã. 29-30 Nuvei noja'ai wee mã'ẽ. Nuvei 'ete opirà rè noja'ai mã'ẽ. Jaja'a katu teãmã janepirà rè ipi. Jajimi'u katu. Jajikusu katu. Jajipõanõ gatu. Ãwĩvo ve erekwapa mãe kõ toja'a katu werekwarà kõ rè ereko katu kõ ipi. Ãwitõ Kiristu oja'a katu janere, ojimo'y ee mãe kõ rõmõ, tãwĩvo peiko. 31 Ajare kee e'i itõkõ Janejare'e ikusiwaoka wayvu rõmõ: “Kwaima'e opoità oõvijãgwerà wyi oo werekwaa mõ. Awyje jẽ oikotà ojeeve iko kupa. Pe'ĩypytepa ekoità kupa”, e'i ikusiwaoka maekwerà.e 32 Ãwĩvo ve Kiristu pe'ĩypytepa rõmõ ekoi janereve, okoty rewarà kõ rõmõ. 33 Ajawyi tapeauvay penerekwarà kõ, a'e pejẽ. Ãwitõ pejiauvay ipi, tãwĩvo ve. Imẽma mãe kõ teve, taperovija ikõ pemẽnà kõ imoe'e ipi nẽ, a'e teve pejẽ.