“Pe'ĩypyte rõmõ jaiko”, e'i mã'ẽ
4
Temimopã'ãgwerà tè ije, Janerõvijã ywete ayvu amojenu erokwa ipi rewarà mõ. Kee a'e eayvukasi rõmõ pejẽ. Janejare'e pepyteporopa okoty rewarà kõ rõmõ tapeiko. Ajawyi emimota rupi ikõ tapeiko ipi nẽ, a'e pejẽ. Ãwitõ Janejare'e ikatuay ekoi, a'e reruparà mõ tapeiko. 2 Tapejimoe'e tite e'ã peiko ipi, a'e teve pejẽ. “Ije ywesõ”, tapejẽ ywe'e tite e'ã ojiupe ipi. Ikatusa rupi ikõ peiko ipi nẽ. Tapejikõtevẽ e'ã ikõ poromogeta remẽ nẽ, pevo rõwã ipe ekoi kupa remẽ. Ojevo jẽ ikõ tapejiauvay peiko ipi nẽ.a 3 Janejare'e 'Ãg tè pe'ĩypyte janereinõ. Ajawyi tapejimokasi jẽ ikõ ojee owaray tapeiko ipi nẽ. 4 Jane'y tè Jesu. Pe'ĩte ekoi. Ajawyi pe'ĩypyte rõmõ jaiko eeve. Janejare'e o'Ãg omuu janeupe, janepy'a pupe tojimoena ky'y. Pe'ĩte i'Ãg janepy'a pè ekoi mã'ẽ. Ãwĩvo ve janepyteporo ojevo jẽ janereraatà opyri tijaiko karuaru, ojevo jẽ. Pe'ĩte simoa'u jakupa mã'ẽ rõmõ jaiko. 5 Ãwĩvo ve Janerõvijã ywete pe'ĩte mã'ẽ tè ekoi. Pe'ĩypyte jane jaiko, jajirovija ee mãe kõ rõmõ jaiko. Pe'ĩte jajimojãmorĩoka ikoty rewarà kõ rõmõ jaiko. 6 Janereinõgarerà pe'ĩte teve, a'e Janejare'e tè. Janeruu rõmõ ekoi. Jane'arà kyty ekoi. Janepyterà rupi ekoi. Janepy'a pupe ekoi. Ajawyi owaray tapeiko ojeeve ipyri, a'e pejẽ.“Janeremikuwa kõ omojikuwaoka janeupe ipi”, e'i mã'ẽ
7 Kiristu iteetejẽ janereinõ. Janeposikoa omosãi janeupe. A'evoa rè otekokuwaa ome'ẽ janeupe okatuaya rupi. 8 Kee e'ipa amãtejẽ karamoe remeve: “Oẽ yva kyty oo remẽ, watyry temimokasi e'ã kõ weraa oupi. A'evo remẽ wemime'ẽgwerà kõ omosãi jane kõ pè”, e'ipa amãtejẽ ikusiwaoka karamoe remeve.b
9 [Kiristu pewarà mõ tè aepo e'i amãtejẽ.] Kee jaa jakuwa: “Oẽ yva kyty oo”, e'i remẽ, “Owyjy rã'ĩ tyvy pè”, ejaa tè aepo e'i. 10 Kiristu tè owyjy tyvy kyty uu paire yvate kyty oẽ mijẽ oo. Yva 'arà kyty oẽ oo Janerõvijã ywete rõmõ upa ky'y. Ajawyi age'e remẽ, mape jẽ rõwã naikoi. Naikoi 'eteay eko e'ãma.
11 A'evo ekoi mã'ẽ tè wemime'ẽ ikatuay wete mã'ẽ omosãi jane kõ pè, iteetejẽ janeremikuwa kõ rõmõ. Kee janerereko. Ãmõgwerà opyteporo wemimono kõ rõmõ toiko kupa, eewarà tomojenu erokwa kupa. Ãmõgwerà opyteporo imokasi okoty rewarà kõ pè wayvu mojenuarà kõ rõmõ toiko kupa. Ãmõgwerà opyteporo imono nokuwaive mãe kõ pè, ãmõ taa kõ gyty. [Omokasi kõ wayvu katu tomojenu noerovijaive mãe kõ pè kupa.] Ãmõgwerà opyteporo okoty rewarà kõ rõvijã kõ rõmõ toiko kupa, toja'a ee kõ kupa. Ãmõgwerà opyteporo wayvu rè poromotekokuwa mãe kõ rõmõ toiko kupa. A'evo 'evo janepyteporo janemotekokuwa.c 12 A'evo pirujẽ okoty rewarà kõ pè emikuwa kõ omosãi, toposiko katu iko kupa. Pe'ĩypyte rõmõ jajimokasi, Jesu rè jajimo'y mãe kõ rõmõ jaiko. 13 Ajaate pirujẽ jane ojevo jẽ jaikotà, Janejare'e Ra'yry rè jajirovija mãe kõ rõmõ jaikotà. Ajaate Janejare'e Ra'yry sikuwa katutà ky'y, ojevo jẽ. Ãmẽ ywesõ Kiristu reko janeroupatà ãmẽ ky'y, ajaate jajimovijapa mã'ẽ vo jaiko ky'y.
14 A'evo jaiko remẽ, ja'yry vo rõwãtà jaiko ky'y. Nijajimoja'yoka'ãi poromoripe mãe kõ pè ipi. “Aje ipõ” nija'e'ãi apijarà ayvu pè ipi. Ojimoja'yrĩ 'ejẽ mãe kõ tè “aje” e'i tite ojimoripea rõmõ. Na'evoi ãmẽ jaiko. Jajimomiratupa jane. 15 Aje, tijatekokuwavay Kiristu koty rewarà kõ rõmõ jaiko. Janejare'e ayvu aje ywete mã'ẽ rupi tijaiko. Poroauvaya rupi tijaiko. Ãmẽ ywesõ jane'y rõmõ tè ekoità.
16 Iteetejẽ janeremikuwa kõ Janejare'e omosãi janeupe, Kiristu koty rewarà kõ rõmõ, ãwisõ tijajimokasi ojeeve jajiauvay rõmõ jaiko. A'evo jaiko remẽ, ojevo jẽ jajirovija ywetetà Jesu rè jaiko. Ojevo jẽ simokasità ãmõ kõ tojirovija teve ee kupa. Janepirà rè tè poromosã'ãgatà tapekuwa sa'u. Kee. Iteetejẽ janekãgwerà. Pe'ĩpe'ĩte ikãgwerà iteetejẽ mãe kõ ojipy jipy ojee. A'evo Janejare'e janereinõ janemokasi. [Nijanekãgwekasakai sõ remẽ, nojipy kuwa'ãi ojee kupa. Ãwĩvo ve jane ojevo jẽ nijajipyi sõ Kiristu rè remẽ.]d
Janereko pyaukwerà rewarà
17 Ajawyi kee a'e pejẽ eayvukasi rõmõ, Janerõvijã ywete ayvu rupi. Kiristu rekoa rupi ikõ tapeiko nẽ. Noerovijai mãe kõ vo tapeiko e'ã ky'y. Ovo rupi teve a'e kõ jipy'amogetaa kõ. Manyvo jaa mõ rõwã a'evo ekoi kupa. 18 Notekokuwai 'eteay tesõ kupa rewarà mõ a'evo ekoi kupa. Ikuwa e'ãte a'evo ekoi kupa. Pãtõnusu rupi ekoi mã'ẽ vo 'ejẽ ekoi kupa. Nokuwai Janejare'e rekoa kupa. Nokuwa miti a'evoa kupa. Ojimoane'e jẽ kupa. Ajawyi “aje ipõ” ne'i kupa. 19 Ajawyi ipy'a ai wete kupa. Weko aiwerà règà oja'a iko kupa. Nojimosĩokai teve weko aiwerà rè iko kupa ipi. Nivoi oikoa rè ywesõ oja'a iko kupa.e Ojimosĩoka kuwasi weko aiwerà rè omãjã kupa mijã. Ojimoane'e jẽ waiwererà rè ajamã'ẽ kupa ipi. Janejare'e rekoa nokuwa tari kupa rewarà mõ a'evo ekoi teãmã kupa ipi.
20 A'evo rõwã ikõ tapeiko ipi nẽ, a'e pejẽ. Kiristu reruparà mõ ikõ peiko nẽ! Pejimotekokuwavay ikõ a'evoa rè peiko nẽ. 21 Akuwa Kiristu rekoa aje ywete mã'ẽ rè pejimo'e mã'ẽ pejimotekokuwaoka ijupe peiko. Pejimotekokuwa ee peiko. 22 Ajawyi peneko aiwerà tapeitypypyipa ikenẽ, a'epa pejẽ. Tapejirojivy e'ã aekwerà kyty. Tapejimoripeoka ywe'e tite e'ã ikõ penemimota aiwerà kõ pè nẽ, a'e pejẽ.f 23 Peneko pyaukwerà rupi tapeiko ky'y. Tapejipy'amomyauoka Janejare'e pè. 24 Janejare'e janereinõ weruparà kõ rõmõ tijaiko. A'evo ikõ tapeiko ãmẽ nẽ! Ãwitõ ivo ekoi, ãwĩvo ve tapeiko. A'evo peiko remẽ, pejikuwatà Janejare'e ayvu aje ywete mã'ẽ rupiwarà kõ rõmõ peiko. Ijupewarà kõ rõmõ pejikuwatà. A'evoa rõmõ peneinõ. Pekuwapa pirujẽ a'evoa, a'epa pejẽ rewarà mõ.g
25 Ajawyi kee a'e pejẽ. Tapewari e'ã ikõ ky'y nẽ, a'e pejẽ. Pevo mãe kõ pè peporegeta remẽ, aje ywete mã'ẽ kõrijõ tè tapemojenu ijupe kõ ipi. Ojevo jẽ Kiristu rè pejirovija mãe kõ rõmõ tè peiko. [Pe'ĩypyte peiko rewarà mõ.] 26 Pejimõarõ sõ ava mõ gyty remẽ, kuise'ẽ tapemomi pejimõarõa ikoty kõ. Tapejimoane'e jẽ e'ã pejimõarõa. Napepy'a pirai'ãi ãmẽ peiko ky'y. 27 [Pejimõarõ puku sõ remẽ, ãjãgai rõvijã pè tè pejimoaiokatà ãmẽ.] Ajawyi tapejimoãkwã'ã e'ã ikõ ãjãgai rõvijã pè nẽ, tojimoena e'ã pepy'a pè, a'e pejẽ.
28 Kee a'e teve pejẽ. Imona sikaepo maekwerà awyje timona e'ã ky'y, a'e pejẽ. Toposiko katu kõrijõ ikõ omoma'e kõ repy rã rè nẽ. Tijewe katu oposiko. Iposikoa repykwerà oytà tè imoma'e kõ repy rã rè ãmẽ. Ãmõ, pevo mã'ẽ mõ iporijau sõ remẽ, oytà teve ipãtavõa rè.
29 Kee a'e teve pejẽ. Peporegeta remẽ, ayvu poromoai mã'ẽ rupi rõwã tapeporegeta ipi. Ayvu e'eay rupi kõrijõ tè tapeporegeta ipi. Ãmẽ tè peporegeta mã'ẽ rupi pepy'amokasità peayvu wenu mãe kõ ipi. Ojimokasità Jesu rè ojirovija ãmẽ kupa ky'y. 30 Nivoi sõ peiko remẽ, Janejare'e 'Ãg tè ijãgyoaytà pene ãmẽ. Ome'ẽma rõwã sipõkõ Janejare'e o'Ãg janeupe, janepy'a pupe tojimoena? Janemosã'ãga rõwã sipõkõ o'Ãg pupe? O'Ãg rupi janerereko katu jẽ, ajaate kãramõ janereraatà tijaiko karuaru opyri. Ajawyi ikõ tapemoãgyo e'ã nẽ, a'e pejẽ.
31 Ãmõ, kee a'e teve pejẽ. Awyje tapejimõarõ puku e'ã koivo kõ pè ky'y, a'e pejẽ. Tapejimory mijẽ ikõ pejikõ'õ ee maekwerà kõ rè ipi nẽ, a'e pejẽ. Tapeayvu ai e'ã teve ikõ peiko ojiupe nẽ. Ikatusa rupi kõrijõ ikõ tapeporegeta ojiupe ipi nẽ. Tapemojaiwe e'ã ikõ penetãrã kõ ipi nẽ. 32 Tapejiauvay ikõ peiko ojee nẽ. Tapejiporijauesa ikõ peiko ojee ipi nẽ. Kiristu omãnõ peupewarà mõ, peaiwererà repykarà mõ. Ajawyi Janejare'e “awyjepa” e'ipa peaiwererà kõ rè. Ãwĩvo ve ava mõ pemoai tite sõ remẽ, “awyjepa” tapejẽ kõrijõ ijupe. [Tapejimory mijẽ kõrijõ ikõ ee nẽ.]h