“Juteu rõwã mãe kõ pewarà mõ aposiko”, e'i mã'ẽ
3
Aje ywete Janejare'e pe'ĩypyte rõmõ janereinõ. Ajawyi aporegeta Janejare'e pè peupewarà mõ aiko ipi, ike jimopã'ãga pupe aju remẽ. Kiristu Jesu ayvu amojenu peupe rewarà mõ emopã'ã kupa. 2 Janejare'e itõkõ epyteporo emono wayvu tamojenu peupe, Juteu rõwã mãe kõ rõmõ. Okatuaya rupi epyteporo emono peupewarà mõ taposiko. 3 [Ãwisõ Juteu rõwã mãe kõ teipe pejẽ remẽ. Ajamã'ẽ Janejare'e penereko jẽ oupewarà kõ rõmõ Kiristu rè pejirovija remẽ.] A'evoa Janejare'e nomojikuwaokaive mijã. Age'e remẽ tè katu omojikuwaoka janeupe ky'y. Eupe tè omojikuwapa, ãwisõ toporomotekokuwa ee aiko ky'y. 4 A'evoa pe'ĩpe'ĩ akusiwapa peupe ajupa. Pemogeta eremikusiwarerà remẽ, pekuwatà Kiristu rewarà eupe omojikuwaoka maekwerà. 5 A'evoa rewarà nojikuwaive karamoe remẽ mijã. Tãmõ kõ ve nokuwaive mijã. Age'e tè katu Janejare'e omojikuwaokapa jane kõ pè ky'y, o'Ãg rupi. Jesu remimonokwerà kõ pè teãmã omojikuwaoka tomojenu kupa. Ãmõ, wayvu mojenuarà kõ pè ve omojikuwaoka. 6 Kee jaa omojikuwaoka ijupe kõ wayvu katuay tomojenu kupa: Ãwitõ Janejare'e orerereko katu Juteu kõ rõmõ, Kiristu Jesu rè orojirovija oroiko remẽ. Ãwĩvo ve penereko katu ky'y, Kiristu Jesu rè pejirovija peiko remẽ. Pe'ĩypyte rõmõ janereinõ, ojiẽtarã kõ rõmõ tijaiko ky'y. Kee e'ipa Janejare'e amãtejẽ: “Owaray arekotà Kiristu Jesu koty rewarà kõ”, e'ipa. Aekwerà rupi katu janererekotà ãmẽ. Ojevo jẽ janererekotà. Aepo jaa nojikuwai mijã. Age'e remẽ tè ojikuwa janeupe ky'y.a7 Janejare'e tè itõkõ epyteporo wemĩgwai rõmõ. “Ekwa Jesu Kiristu rewarà mojenu Juteu rõwã mãe kõ pè erokwa”, e'i itõkõ ije. A'evoa rõmõ emokasi okasia rupi emono. Ivo katu aiko rewarà mõ rõwã epyteporo emono. [Nivoi aiko ipe remẽ epyteporo jẽ emono]. Okatuaya rupi tè epyteporo emono. 8 “Janejare'e koty rewarà kõ wyry kytygà aiko, pirujẽ”, a'e ajipy'amogeta ipi. Ajamã'ẽ Janejare'e epyteporo jẽ tesõ emono okatuaya rupi. Ajawyi amojenu jenu Kiristu katuay wetea Juteu rõwã mãe kõ pè erokwa ipi, ãwisõ nisikuwapa'ãi ikatuay wetea imomewa remẽ. 9 Ãmõ, janererekoa Janejare'e nomojikuwaokari jane kõ pè mijã maekwerà amojenu jenu imojikuwa erokwa ky'y.
Janereinõgarerà tè aepo mojenuarà rõmõ emono. Pirujẽ moma'e kõ reinõgarerà tè a'e. Wekoa rã nomojikuwaokaive karamoe remẽ mijã. 10 Age'e remẽ tè katu omojikuwaoka jane kõ pè ky'y. Ãwĩvo Jesu koty rewarà kõ ojiẽtarã rõmõ ekoi ky'y. Jesu Kiristu rupi tè a'evo jaiko ky'y. Ajawyi janemoatya rè yvapewarà kõ omã'ẽ remẽ, Janejare'e omoe'e ywetetà janere omãjã kupa.
– Haa! Otekokuwavay Janejare'e, e'ità yvapewarà kõ janere omãjã. Iteetejẽ itekokuwaa! e'ità kupa.
Yvapewarà kõ rõvijã kõ ve aepo e'ità.
11 Janejare'e a'evoa rã rè oja'apa amãtejẽ karamoe remeve. Wayvu rupi katu a'evo ekoi. Janerõvijã Kiristu Jesu rupi a'evo janerereko. 12 Ajawyi Janejare'e reve jaiko ky'y. Kiristu tè janereraa Uu pyri okoty rewarà kõ rõmõ tijaiko, jajirovija ee remẽ. Ajawyi Janejare'e ipiryvypy katu janere ky'y. Opota katu japoregeta ijupe ipi. Tijasĩ e'ã japoregeta ijupe ãmẽ ipi. Tijakyje e'ã teve iwyi ipi.
13 Ajawyi kee a'e pejẽ. Tapejimopirai e'ã ikõ emopã'ã kupa remẽ nẽ, a'e pejẽ. Kee tapejẽ e'ã: “Janerewarà mõ ojimomorijau upa”, tapejẽ e'ã ikõ pejimopirai rõmõ ije nẽ. Tapejimokasi jẽ ãmẽ peiko, poroauvay aiko rewarà mõ. Ajawyi Janejare'e tapemoe'e jẽ agyvo erereko kupa remẽ.
“Janerauvay Jesu Kiristu”, e'i mã'ẽ
14 Ajawyi ajimoenãpa'ã Janejare'e rovake aporegeta peupewarà mõ ipi. 15 A'e tè janererà oinõ janere mã'ẽ rõmõ ekoi. Pirujẽ yvapewarà kõ ve weenõ. Yvy pewarà kõ ve weenõ. A'e rovake ajimoenãpa'ã aporegeta peupewarà mõ ipi. 16 Kee a'e ijupe:
– Papa! Ikatuay orerereko mã'ẽ tè ene! Nekatuay mã'ẽ tè ene! Ne'Ãg rupi epy'amokasi Epesu wãnà kõ, neupewarà kõ rõmõ. Ãmẽ ywesõ tojimomãatã jẽ nere ojirovija nekasia rupi kupa, a'e ijupe peupewarà mõ. 17 Ãmõ, Kiristu topy'aporakapa kõ okasia rupi ereko kõ ojirovija ee kõ rõmõ, a'e peupewarà mõ ipi. Ãmõ, toporoauvay ikõ iko kupa nẽ, a'e peupewarà mõ Janejare'e pè.
18 Aje, Kiristu janerauvay ipi. Nijamosã'ãgapa'ãi 'ete janerauvaya ipi. Ajawyi aepo a'e ijupe peupewarà mõ ipi. Ãmõ, kee a'e teve ijupe peupewarà mõ ipi. Peupewarà mõ kõrijõ tè rõwã ajamã'ẽ a'e ipi. Pirujẽ Janejare'e pyriwarà kõ pewarà mõ teve kee a'e ijupe:
– Emotekokuwa kõ tokuwa wauvaya mosã'ãga kupa, ãwisõ nokuwapa'ãi kupa remẽ. A'evo remẽ, kee te'i kupa: “Haa! Kiristu nopi'ãi erauvaya wyi ipi”, te'i kupa, a'e ijupe. 19 Norokuwapa'ãi epe orerauvaya ipi. Ajamã'ẽ Epesu wãnà kõ tokuwa jẽ wauvaya, a'e ijupe. Kee e'ità ãmẽ kupa: “Haa! Imorya rõmõ taiko ajawyi! Ãwitõ Janejare'e ikatuay wete, tãwĩvo ve aiko”, e'ità ãmẽ kupa, a'e Janejare'e pè peupewarà mõ ipi.
20 Janerereko katua rè japoregeta ijupe ipi remẽ, ja'e mã'ẽ wyi wete janerereko katuay wete ipi. Okasia rupi tè a'evo janerereko ipi. 21 Ajawyi a'e ywesõ ikõ simoe'e ipi nẽ, Jesu koty rewarà kõ atyry rõmõ ipi nẽ! a'e ijupe. Kiristu Jesu revejẽ simoe'e ywete ipi. Õ'õ, awyje katu ãwĩvo jamoe'e karuaru ipi, tija'e.