“Opoera mã'ẽ vo 'ejẽ jaiko Janejare'e kasia rupi ky'y”, e'i mã'ẽ
2
Jypy remẽ itõkõ teãgwerà vo 'ejẽ peiko mijã. Peaiwererà rewarà mõ a'evo peiko mijã. Janejare'e rekoa rupi napeikoi rewarà mõ a'evo peiko mijã. 2 Peaiwererà rupi kõrijõ tè peiko ipi mijã. Ãwitõ age'e remẽwarà Janejare'e rekoa rupi noikoi mãe kõ, ãwĩvo pejẽ peiko mijã. Ãjãgai rõvijã rekoa rupi kõrijõ tè peiko mijã. Ãwitõ pirujẽ ija mãe kõ 'arà kyty ãjãgai rõvijã ekoi, ãwĩvo ve Janejare'e rekoa noerovijai mãe kõ 'arà kyty ekoi. 3 Ãwĩ kõ voay wete jaiko mijã. Pirujẽ a'evo jaiko teãmã. Janereko aiwerà rupi kõrijõ tè jaiko mijã. Janeremimota aiwerà rupi kõrijõ teve jaiko mijã. Janejipy'amogeta ai kõ rupi jaiko mijã. Ajawyi Janejare'e remimomorijau rã rõmõ teãmã jaiko mijã.4 Ajamã'ẽ a'evo ipe jaiko remẽ, Janejare'e janerauvay jẽ janerereko. Janeporijauesa ywete jẽ teve janerereko. 5 Ajawyi janerekoa ipyau mã'ẽ ome'ẽ janeupe ky'y. Janemojimo'yoka Kiristu rè janerereko ky'y. Ajawyi ãwitõ jamãnõ mã'ẽ vo 'ejẽ Janejare'e pè janeaiwererà rewarà mõ jaiko mijã. Aekwery vo rõwã jaiko ky'y. Japoerapa ky'y, Kiristu revejẽ jaiko mãe kõ rõmõ. A'evo Janejare'e janerereko katu ky'y, janerauvay rewarà mõ.a 6 Awyje katu Janejare'e omomoera Kiristu remẽ, eevejẽ janemomoera ky'y. Ãwitõ Kiristu Jesu yva pè tui upa age'e, ãwĩvo ve jane eevejẽ jaiko maevo sõ tite ky'y. 7 Janejare'e opota janeporijauesa ywetea mojikuwaoka amãtejẽ janeupe, ãwisõ nisikuwapa'ãi imomewa remẽ. Kiristu Jesu rupi janerauvaya omojisaoka janeupe ipi.
8-9 Manyvo nijareko kuwa'ãi janevote jajireko katu rõmõ. Janejare'e tè okatuaya rupi janerereko katu, Jesu Kiristu rè jajirovija jaiko remẽ. Janejare'e remime'ẽgwerà tè janerereko katua, ãwisõ kee taoty e'ã: “Ivo katu aiko rewarà mõ tè erereko katu”, taoty e'ã. 10 Janejare'e reminõgwerà tè jane. Kiristu Jesu revejẽ janerereko, wemimota rupi katu tijaiko, Janejare'e “ta'evo” e'ipa amãtejẽ maekwerà rupi katu tijaiko.
“Pe'ĩypyte rõmõ jaiko Kiristu koty rewarà kõ rõmõ ky'y”, e'i mã'ẽ
11 Kee a'e pejẽ. Ore Juteu kõ rõmõ oroiko teãmã, a'e rã mõ teãmã oresaky rewarà mõ. Pejẽ ãmẽ Juteu rõwã mãe kõ tè pejẽ ãmẽ. Ajawyi nijajimoryi ojee jaiko mijã. “Ãmõ kõ” oro'e tè pejẽ mijã. “Nojiemosĩpire'oi mãe kõ tè ãwĩ kõ”, oro'e pejẽ mijã. “Janejare'e ãkarãgwerà kõ rõwã ãwĩ kõ”, jaa tè aepo oro'e pejẽ mijã.b Ajawyi kee a'e pejẽ. Tapenearaipa e'ã manyvo peiko maekwerà wyi, a'e pejẽ. [Kee tapejẽ ywe'e tite e'ã: “Ekatua rupi tè itõkõ Janejare'e erereko katu”, tapejẽ ywe'e tite e'ã.] 12 Aje itõkõ Kiristu reve napeikoi mijã. Janejare'e remipyteporokwerà rõmõ rõwã peiko mijã, Isaeu jeapyrerà kõ rõwã tè pejẽ rewarà mõ. Orerãmõi kõ pè tè itõkõ wayvu omojikuwaokapa karamoe remẽ. Kee e'i itõkõ orerãmõi kõ pè: “Ekoty rewarà rã kõ tè pejẽ. Ajawyi epyri poroereko katutà”, e'i. Isaeu kõ pè kõrijõ tè aepo e'i mijã. Aepo ne'i pejẽ mijã. Ajawyi Janejare'e pyri napeiko kuwa'ãi mijã. Napekuwai Janejare'e opota penereko katu mijã. Ajawyi sitõ Janejare'e e'ãte peiko mijã, Isaeu kõ rõwã tè pejẽ rewarà mõ.
13 A'evo ke'ĩrõwã peiko maevo sõ tite Janejare'e wyi mijã. Ajamã'ẽ Kiristu Jesu peneru Janejare'e pyri'ĩje'ẽ tapeiko ky'y. Omãnõa rupi a'evo penereko, pejirovija ee remẽ. 14 Kiristu tè janemoaty pirujẽ Janejare'e pewarà kõ rõmõ tijaiko ky'y. Ãwitõ Juteu kõ, ãwĩvo ve Juteu rõwã mãe kõ ky'y. Karamoe remẽ oreremisa tare'ã rõmõ tè peiko ipi mijã, Juteu kõ rõwã tè pejẽ rewarà mõ. Pejẽ teve noreresa tari pekupa ipi mijã. Ajamã'ẽ Kiristu a'evo maekwerà omoje'opa janewyi ky'y. Ajawyi age'e remẽ, jajimory katu ojee ky'y, ojirovija ee mãe kõ rõmõ, pe'ĩypyte mã'ẽ rõmõ janemoaty opyri rewarà mõ.
15 Nikasi orerãmõi kõ rekoawerà oreupe ky'y, kee eu mã'ẽ: “Juteu kõ nojimoryi ãmõ kõ rè ipi”, eu mã'ẽ nikasi oreupe ky'y. Aepo jaa rupi nijaikoi ky'y, Kiristu omãnõa rupi omoje'opa ãwĩ rapijarà ky'y rewarà mõ. Pe'ĩypyte rõmõ janereinõ ky'y, okoty rewarà kõ rõmõ tijaiko. Ajawyi “ãmõ tè ãwĩ” nija'ei ojiupe ky'y. “Eretãrã” ja'e ojiupe ky'y.c 16 Yvyra jipokana rè Kiristu omãnõ mã'ẽ rupi janererojivy Janejare'e kyty, opyri tijaiko ky'y. Ãwitõ orereru Juteu kõ rõmõ, ãwĩvo ve peneru Juteu rõwã mãe kõ rõmõ. A'evo remẽ janemojimoryoka jẽ ojee ky'y, Kiristu koty rewarà kõ rõmõ. Pe'ĩypyte rõmõ jaiko ky'y.d 17 A'evoa rõmõ Kiristu uu ike yvy kyty ojimojane. Kee e'i imojenu: “Janejare'e penerekotà opyri ky'y”, e'i imojenu. Peupe aepo e'i, ke'ĩrõwã Janejare'e wyi peiko mãe kõ rõmõ. Oreupe teve e'i, ipyri sa'u oroiko mãe kõ pè ve. 18 Ojevo jẽ janererojivy Janejare'e pyri'ĩje'ẽ tijaiko ky'y. Janejare'e 'Ãg pe'ĩte. A'e rupi javãe kuwa Janejare'e pyri ky'y.
“Janejare'e 'Ãg rena rõmõ jaiko ky'y”, e'i mã'ẽ
19 Ajawyi Janejare'e pyriwarà kõ tè pejẽ ky'y. “Ãmõ kõ tè” ne'i pejẽ ky'y. “Eãkarã kõ tè” e'i pejẽ ky'y. 20 Pe'ĩypyte rõmõ jaiko ãmẽ ky'y, Janejare'e koty rewarà kõ rõmõ jaiko. Tetã rè tè poromosã'ãgatà tapekuwa sa'u. Kytaypy vo Kiristu Jesu. A'e ywesõ janemokasi Janejare'e pyriwarà kõ rõmõ. A'e kõrijõ tè rõwã janemokasi ajamã'ẽ. Kiristu remimonokwerà kõ ve janemokasi. A'e kõ ãmẽ tetã yta kõ vo. A'e kõ mãrãkuwaa rè janemotekokuwa janemokasi wemikusiwarerà rupi. Kiristu rè jirovija mã'ẽ rè janemokasi. Ãmõ, Janejare'e ayvu mojenuarerà kõ teve a'evo ekoi. Ijyta kõ vo teve.e Kiristu ywesõ janemotekokuwa janemokasi ajamã'ẽ. Jane ãmẽ ijãrokã kõ vo. Oviro vo teve jane jaiko. 21-22 Kiristu tè janemoaty janemomãatã pe'ĩypyte rõmõ tijaiko, Janejare'e pewarà kõ rõmõ. Ãwitõ tetã jamõ'ã remẽ, ãwĩvo pe'ĩ tetã mã'ẽ vo janereinõ. Ojeeve Janejare'e moe'ea retã vo janereinõ janerereko, i'Ãg rena rõmõ tijaiko.