Peupewarà mõ akusiwa ajupa, pirujẽ Kiristu Jesu koty rewarà kõ Piripu taa wãnà kõ pè. Penõvijã kõ pè ve akusiwa aã kareta ajupa. Jõvijã poromo'e mãe kõ pè.^a Ãmõ, jõvijã poropãtavõ mãe kõ pè teve.^b Mokopejõ akusiwa ijupe kõ ajupa.

2 Janeruwasu ikõ tapenereko katu okatuaya rupi nẽ. Tapepy'amopiryvypy ikõ ipi nẽ. Janerõvijã Jesu Kiristu ve a'evo tapenereko.

3 Aporegeta Janejare'e pè remẽ, kee a'e ipi: “Ikatuay nekoty rewarà kõ Piripu taa pè”, a'e ipi. “Ikatuay neinõ kõ neãkarãgwerà kõ rõmõ toiko kupa”, a'e ijupe ipi. 4 Eroryvay aporegeta Janejare'e pè peupewarà mõ ipi. 5 Epãtavõ pekupa ipi rewarà mõ erory aiko. Poromotekokuwa ypy penena pè remẽ itõkõ, peja'a katu ere peiko ipi. Janejare'e ayvu amojenu ãmõ kõ pè aiko remẽ itõkõ, peja'a jẽ ere peiko ipi. Jesu rè pejirovija ypy remẽ itõkõ, peja'a ere maekwerà vo jẽ pejẽ age'e peiko. Ajawyi eroryvay Janejare'e pè aporegeta peupewarà mõ remẽ ipi. 6 Pejirovija ypy Jesu rè remẽ itõkõ, Janejare'e kasia rupi a'evo peiko. Age'e remẽ pemokasi jẽ wemimota rupi tapeiko. A'evo jẽtà, ajaate Kiristu Jesu owyjy mijẽ uu remẽ. Akuwa a'evo penereko katutà mã'ẽ. 7 Ije ve poroauvay aiko ipi. Ke'ĩrõwã ipe aiko remẽ, aja'a ywete jẽ pene aiko ipi. I'ete poroauvay aiko ipi remẽ, peja'a katu ere peiko ipi rewarà mõ. Nemopã'ãive kupa remẽ itõkõ, taa taa kõ rupi akwa Janejare'e ayvu e'eay Jesu rekoa mojenu jane kõ pè erokwa ipi. Oterẽ jẽ amojenu ijupe kõ tokuwa kupa, Jesu rekoa rupi toiko kupa ipi. A'evo aiko remẽ itõkõ, epãtavõ eposikoa rè pekupa ipi. Karakuri itõkõ peme'ẽ ije, eporijau ee mãe kõ tapyy eupe ipi. Age'e jimopã'ãga pupe aju remẽ, epãtavõ jẽ pekupa. Kõitokõ akwa taa taa kõ rupi Janejare'e ayvu mojenu remẽ, epãtavõ pekupa, ãwĩvo jẽ peiko. Ajawyi poroauvay penereko. 8 Ãwitõ Kiristu Jesu penauvay, ãwĩvo ve ije poroauvay penereko. Jesu tè penauoka eupe. Janejare'e okuwa aje ywete aporegeta remẽ.

9 Ajawyi aporegeta Janejare'e pè remẽ, kee a'e peupewarà mõ ipi:

– Emokasi kõ, tojiauvay iko kupa ipi, ãmẽ ywesõ tojiau iko kupa. Tokuwa katu teve neayvu kupa. Tojimotekokuwavay nere tekoua rè kupa, nivoi tekoua wyi tojireko katu kupa. 10 Emotekokuwa kõ tokuwa manyvo ywesõ nepota toiko kupa mã'ẽ. Tokuwa manyvo ywesõ ikatu tekoua, a'e mã'ẽ ipi.

Aepo a'e peupewarà mõ Janejare'e pè ipi. A'evo peiko remẽ tè, napejavy ekojẽ'ãi Jesu rekoa ipi. Ivo katu peikotà ãmẽ ky'y. Ãmẽ tè Kiristu uu mijẽ remẽ, napejimosĩoka'ãi iwyi uu remẽ. Penory kõrijõtà ovãe remẽ. 11 A'evo peiko remẽ, ivo peikotà ãmẽ. Jesu Kiristu tè a'evookatà penerekooka tapeiko. Ãmẽ ãmõ kõ omã'ẽ pene remẽ, Janejare'e omoe'e ywetetà peupewarà mõ kupa ãmẽ.

12 Apota katu manyvo aiko mã'ẽ tapekuwa, eretãrãgwerà kõ. Juteu rõvijã kõ itõkõ emopã'ã jimopã'ãga pupe, Jesu rekoa amojenu erokwa rewarà mõ. Ajamã'ẽ amojenu jẽ ike jimopã'ãga pupe wyi ajupa! Nemopã'ãi sõ kupa remẽ, namojenu kuwa'ãi Janejare'e ayvu ikewarà kõ pè mijã. 13 Aã sota erãrõ upa mãe kõ pè amojenu ajupa. Ajawyi pirujẽ ikewarà kõ pè ojenupa ky'y. Jõvijã wasu Sesa retã rãrõarà kõ pè tẽ tesõ amojenu. A'evoa rõmõ tè maevo ajimopã'ãoka. Ajawyi pirujẽ okuwa Kiristu remĩgwai rõmõ tè ije rewarà mõ emopã'ã kupa.^c 14 Ajawyi Janerõvijã ywete koty rewarà kõ erewarà wenu remẽ, ojimokasi iko kupa.

[– Haa! Nojipirau ekojẽi tesõ Pauru, jimopã'ãga pupe ipe tui remẽ! e'i kupa.]

Ãmẽ ywesõ omojenu jenu ywete Janejare'e ayvu Jesu rewarà kupa ky'y. Nojipiraui tesõ jõvijã kõ wyi kupa ky'y. “Aje ywete Janerõvijã ywete poropãtavõ ipi”, e'i kupa rewarà mõ a'evo ekoi kupa ky'y. 15-16 Ajawyi Kiristu rekoa mojenuarà kõ kee e'i ojiupe:

– Ja'e Kiristu rekoa mojenu, Pauru vo, e'i kupa.

Aje, opota Kiristu rekoa rewarà mõ, omojenu jenu kupa. Erau kupa rewarà mõ teve a'evo ekoi kupa. Okuwa Janejare'e tè emonooka Jesu rekoa tamojenu jenu aiko, eposikoa rõmõ. Eayvumokasi teve ãmõ kõ “aje” te'i eremimojenuwerà pè. Ajawyi ajimopã'ãoka remẽ, omojenu jenu jẽ erekovija pè kupa.

Ajamã'ẽ oiko teve ere ojimõarõ mãe kõ. Opota tite ererõarõ kupa. Kee e'i kupa:

– Ije ywesõ aapyrasatà Pauru, Kiristu rekoa mojenua rè, jimopã'ãga pupe tui remẽ, e'i tite oupe kupa.

Ajawyi omojenu jenu tite kupa mijã. 17 A'e kõ kee ne'i:

– Apota Erõvijã rõmõ Kiristu rewarà mõ amojenutà, ne'i kupa. Ije ywesõ imojenuarà rõmõ aikotà Pauru wyi, e'i ojimoe'e tite iko kupa. Ãmẽ ywesõ Pauru ojimopiraità jimopã'ãga pupe tui upa, e'i tite oupe kupa.

18 Najimõarõi ajamã'ẽ aepo e'i kupa remẽ. Najimopirai teve aepo renu. Erory jẽ ajupa. Kiristu rekoa ojenu jẽ rewarà mõ erory jẽ ajupa. Imojenuarà kõ omojenu Janejare'e ayvu imoe'e remẽ, ikatuay eupe. Ãwĩvo ve e'i teitete mãe kõ omojenu ijayvu remẽ, ikatu jẽ teve eupe ãmẽ. Kiristu rekoa ojenu jẽ rewarà mõ ikatu jẽ. Ajawyi tè erory jẽ ajupa. Nopa'ãi erorya. 19 Akuwa Janejare'e emoẽokatà ajaire. Ajawyi teve erory jẽ ajupa. Peporegeta Janejare'e pè eupewarà mõ rewarà mõ, “Aje, emoẽokatà jimopã'ãga pupe wyi”, a'e ajupa. “Jesu Kiristu 'Ãg tè emoẽokatà”, a'e ajupa. Ajawyi nopa'ãi erorya. 20 Apota katu Kiristu rekoa rupi aiko ipi. Napota ekojẽi ajavy. Apota ajimokasioka a'e rupi taiko ipi. Napotai akyje noerovijai mãe kõ rovake aiko. Ajawyi manyvo aiko remẽ, amoe'eokatà Jesu Kiristu ãmõ kõ pè ereko ipi. Aiko jẽ aiko remẽ, omoe'età Kiristu kupa erewarà mõ. Ãwĩvo ve amãnõ remẽ, omoe'e jẽtà iko erewarà mõ kupa. 21 Aã aiko jẽ aiko remẽ, Kiristu rekoa rè aiko jẽ ipi. A'e rè ywesõ aposiko aiko ipi. Amãnõ remẽ ywesõ ikatutà eupe ajamã'ẽ, [ipyri aiko karuarutà aiko rewarà mõ]. 22-23 Ajamã'ẽ age'e remẽ aposiko ywete jẽ aiko ijupe ipi. Mõrijõ jẽ aja'a ee mã'ẽ ajamã'ẽ. Nakuwai mã ywesõ apota. Aiko jẽ aiko remẽ, amojenu jenutà ijayvu. Ajamã'ẽ amãnõ remẽ, kuise'ẽ aiko karuarutà Kiristu pyri aiko. Ajawyi a'e ywesõ ikatuay eupe. 24 Ajamã'ẽ aiko jẽ aiko remẽ, a'e ywesõ ikatutà peupe ãmẽ, poromotekokuwa jẽtà pemokasi penereko rewarà mõ. 25 Ajawyi kee a'età Janejare'e pè: “Apota aiko puku nekoty rewarà kõ pyri aiko, imokasiarà kõ rõmõ taiko”, a'età Janejare'e pè. Akuwa a'e ywesõ apota penewarà mõ. Akuwa aiko jẽtà pemokasiarà rõmõ aiko, tapejirovija ekojẽ Jesu Kiristu rè peiko, tapenoryvay pejirovijaa rè peiko. 26 Ãmẽ aa mijẽ pekoty remẽ, pemoe'e ywetetà Kiristu Jesu jimopã'ãga pupe wyi emoẽoka rewarà mõ.

27 Manyvo jẽ sõ aiko remẽ, Kiristu rekoa rupi katu jẽ ikõ tapeiko nẽ. Ãmẽ manyvo peikoa ojenu eupe remẽ, epy'a katutà ãmẽ aiko. Aa penesa remẽ, amã'ẽtà manyvo peikoa rè ikuwa. Ajamã'ẽ naaive remẽ, akuwa jẽtà. Ojenu jẽtà penewarà eupe ãmẽ. Akuwatà teve ojevo jẽ pejimokasi Kiristu rè pejirovija remẽ. Ojevo jẽ pemojenu jenu Janejare'e ayvu e'eay nokuwaive mãe kõ pè remẽ akuwatà ãmẽ. 28 Kee a'e pejẽ. Tapejipirau e'ã ikõ pemoaiarà kõ wyi peiko ipi nẽ. Tapejimokasi jẽ ikõ ovake kõ peiko nẽ. A'evo peiko remẽ, pejẽ ywesõtà iwyi kõ ãmẽ. Nikasi'ãi ãmẽ peupe kupa. Janejare'e tè pemokasità, pejẽ ywesõ i'arà kõ gyty tapeiko. A'evoa ojikuwatà pemoaiarà kõ pè. Ojimosĩokatà ãmẽ kupa.

29 Kee e'ipa Janejare'e peupewarà mõ: “Toerovija Kiristu kupa”, e'ipa Janejare'e peupewarà mõ. “Ojimomorijautà Kiristu koty rewarà kõ rõmõ iko kupa”, e'ipa teve. “A'evoa rõmõ tè apyteporo kõ”, e'ipa teve peupewarà mõ.

Okatuaya rupi pepyteporo a'evo tapeiko. Ajawyi tapejipirau e'ã a'evo peiko remẽ ipi. 30 Ãwitõ ije najipiraui emomorijau kupa remẽ, ãwĩvo ve tapeiko ãmẽ ipi. Pemã'ẽ ere aposiko ywete Jesu Kiristu rekoawerà mojenua rè, ãwisõ jane kõ “aje” te'i erovija. Age'e pekuwapa ekareta rupi a'evo jẽ aiko, jimopã'ãga pupe aiko ipe remẽ. Ãwitõ ajimomorijau ajupa, ãwĩvo ve pejẽ age'e peiko.^d