“Jesu Kiristu reruparà mõ tijaiko ipi”, e'i mã'ẽ
2
Aje Kiristu revejẽ jaiko mãe kõ rõmõ jaiko. Ajawyi kee jaiko. Jajimokasi jaiko. Janepy'a piryvypy katu jaiko. Janejare'e 'Ãg tè janemojipy'amogetaoka wemimota rõmõ tijaiko, ãwisõ i'Ãg revejẽ tijajipy'amogeta ipi. Ãmõ, jajiauvay teve ojeeve jajiporijauesa. Kiristu revejẽ jaiko rewarà mõ a'evo jaiko ipi. 2 Ajawyi kee a'e pejẽ. Ojevo jẽ tapeiko. Janejare'e remimota rupi ojevo jẽ tapejipy'amogeta peiko. Tapejiauvay teve ojevo jẽ peiko. Janejare'e remimota rupi katu tapeiko teve ojevo jẽ. Janejare'e jipy'amogetaa rupi tapeiko teve ojevo jẽ. A'evo peiko remẽ eroryvaytà pene ãmẽ aiko ky'y. 3 Pene ywesõ tapeja'a e'ã ipi. Kee tapejẽ e'ã: “Emoe'e kuwasi kupa”, tapejẽ e'ã peiko ipi. “Ije ywesõ ekatuay”, tapejẽ e'ã teve peiko ipi. Ãmõ kõ rè tapeja'a katu teve ipi. 4 Penemimotarà rè kõrijõ tapeja'a e'ã teve peiko ipi. Koivo kõ remimotarà rè teve tapeja'a peiko. 5 Ãwitõ Kiristu Jesu pirujẽ janere oja'a, ãwĩvo ve eruparà mõ pirujẽ tapeja'a ãmõ kõ rè peiko ãmẽ ipi.6 Ekoa teãmã Jesu Kiristu Janejare'e rõmõ ekoi.
Ajamã'ẽ Uu pè kee ne'i: “Papa, napotai ajimojane”, ne'i.
“Apota nevo aiko jẽ, Jõvijã wasu rõmõ ajikuwa”, ne'i.
7 Ovote Jõvijã wasu rõmõ ekoia wyi opoi rã'ĩ uu ojimojane ike.
Temĩgwai rõmõ uu, [jane kõ rereko katuarà rõmõ uu].a
Ajawyi tè jane vo isaky.
8 Nojimoe'ei iko ipi. Nojimoe'eokari teve jane kõ pè iko ipi.
Uu werovija katu rewarà mõ a'evo ekoi.
Omãnõa peve tesõ werovija katu Uu.
Yvyra jipokana rè omãnõa peve tesõ werovija jẽ Uu.
9 Ajawyi sõsi Janejare'e omoe'eoka Jesu ky'y.
Jõvijã wasu rõmõ tẽ tesõ omojikuwaoka toiko ky'y.
Ajawyi a'e ywesõ jo'arà kytywarà rõmõ ekoi ky'y.
10 Ajawyi yvapewarà kõ ojimoenãpa'ãtà ovake imoe'e rõmõ.
Mirà kõ, yvy pewarà kõ ve, a'evotà ekoi.
Taywerà rena pewarerà kõ ve, a'evotà ekoi ãmẽ.
Pirujẽ ojimoenãpa'ãtà ovake imoe'e kãramõ kupa.
11 A'e kõ pirujẽ kee e'ità imoe'e ky'y:
“Aje ywete Jõvijã wasu tè Jesu Kiristu”, e'ità ãmẽ kupa ky'y.
A'evo omoe'e ywetetà, Janejare'e Ra'yry tè ãwĩ rewarà mõ kupa.b
“Jajimomorijau ipe remẽ, tijajimokasi jẽ jaiko”, e'i mã'ẽ
12 Ajawyi kee a'e pejẽ, ejimorypa kõ. Kõitokõ ererovija pekupa pepytery pè aiko remẽ, aekwery vo tererovija katu jẽ pekupa, pepyterà rupi naikoi remẽ, a'e pejẽ. Janejare'e penereko katu peaiwererà wyi. Ajawyi tapejimokasi jẽ ekoa rupi katu tapeiko ipi. Tapejireko katu nivoi tekoua wyi peiko ipi. Janejare'e tapemomojy jẽ peiko, a'evo peiko remẽ. 13 Janejare'e tè wemimotarà opotaoka janeupe ipi, “A'evo si!” tija'e ijupe ipi. A'e tè ojirovijaoka teve jane ipi. 14 Ajawyi kee a'e pejẽ. Manyvo peiko remẽ, tapejimõarõ e'ã peiko, a'e pejẽ. Tapejeaka e'ã teve peiko, a'e pejẽ. 15 Ivo katu peikotà ãmẽ. Ajawyi ava, “Nivoi mã'ẽ tè ãwĩ”, ne'i'ãi pejẽ ãmẽ. Moma'e jẽ rõwã omo'y kuwa pene ãmẽ kupa. Nivoi mãe kõ pytery pè peiko remẽ, nivoi mãe kõ vo rõwãtà peiko ovake kõ ãmẽ. Janejare'e votà tè peiko ijãkarãgwerà kõ rõmõ peiko ãmẽ ky'y.
Ãwitõ jaytata kõ ojikuwa pãtõnusu pè ipi, ãwĩvo ve pejikuwatà Janejare'e ãkarãgwerà rõmõ nivoi mãe kõ pyterà rupi peiko. 16 Janejare'e rekoa rupi jaiko mã'ẽ tapemojenu ijupe kõ ipi. A'evo tapeiko ipi. Ãmẽ tè Kiristu ovãe mijẽ remẽ, erorytà pene ovake ãmẽ. Ãmẽ kee a'età ijupe:
– Naposiko pãnẽ teywetei sikõ Piripu wãnà kõ pyterà rupi aiko! a'età ãmẽ ijupe.
17 Maevo Jesu noerovijai mãe kõ ejukatà, ekoa amojenu ipi rewarà mõ. Ejuka sõ kupa remẽ, nimanyvo'ãi eupe ãmẽ, Janejare'e po pè ajime'ẽma rewarà mõ. Erory jẽtà aiko, ijayvu mojenua rupi Janejare'e rè pejirovija katu rewarà mõ. Pejẽ ve awi tapenory jẽ ejuka tarà mẽ peiko. 18 Ãwĩvo ve erory jẽtà pene aiko. Ojevo jẽ ojee tijanerory jẽ jaiko ipi.
“Janejimorypa kõ amonotà pekoty”, e'i mã'ẽ
19 Apota Timoteu amonooka pekoty. Jõvijã Jesu opota remẽ, kuise'ẽ jẽ amonookatà. Manyvo aikoa omome'u katutà pejẽ, ãmẽ tapepy'a katu ere. Ãmẽ ajaire ojivy uu ekoty remẽ, manyvo peikoa omome'utà teve ije ãmẽ, tepy'a katu teve aiko. 20 A'e ywesõ erevejẽ ekoi ipi. A'e rõmõ'ĩte erevejẽ oja'a katu pene Janejare'e rovake ipi. Ajawyi tè amonookatà pekoty. 21 Na'evoi ãmõ kõ. Wee ywesõ oja'a kupa ipi. Jesu Kiristu rekoa rè oja'a a'ugà kõrijõ tè ee kupa ipi.
22 Pevote pekuwa Timoteu rewarà ajamã'ẽ. Ivoa teve pekuwa. Ãwitõ ta'yry mõ uu revejẽ oposiko ipi, ãwĩvo ve itõkõ Timoteu erevejẽ oposiko ywete pepyterà rupi iko, Janejare'e ayvu e'eay amojenu aiko remẽ ipi. Ajawyi pekuwa katu eewarà ipi. 23 Ajawyi tè apota amonooka pekoty. Ajamã'ẽ akuwatà rã'ĩ manyvotà põ aiko rõmõ. Akuwapa remẽ amonookatà pekoty tomojenu pejẽ ãmẽ. 24 Ajamã'ẽ apota kuise'ẽ aa ajaire pekoty. Ajawyi Janerõvijã pè, “Apota aa ikoty kõ”, a'e ipi.
25 Age'e ejimorypa katu Epapositu amojivytà rã'ĩ imono erenone rupi, too ãmẽ pekoty. Eretãrã e'e vo mã'ẽ a'e ekoi. Kõitokõ pemuroka ekoty tomojenu manyvo peiko maekwerà, ãmõ tepãtavõ. Epyri oposiko katu iko ipi. Epyri teve omojenu jenu Janejare'e ayvukwerà iko ipi, ãmõ kõ “aje ywete” te'i. Age'e amojivytà imono pekoty ky'y. 26 Peneka rewarà mõ amonookatà. Peenupa itekorã maekwerà. Ajawyi ojipy'amogeta ywete pene ky'y. Kee e'i peupewarà mõ: “Tojipy'amopirai e'ã etekorãnà rè kupa”, e'i peupewarà mõ ipi. 27 Aje itekorã ywete mijã. Omãnõ taray mijã. Janejare'e tè oporijauesa imomoeraoka. Ije ve eporijauesa teve Janejare'e. Epapositu sõ omãnõ ewyi remẽ, eãgyoay kuwa ee mijã. Ajamã'ẽ Janejare'e nemoãgyookari. 28 Ajawyi eroryvay janejimorypa katu amonookatà pekoty remẽ, tapemã'ẽ ee. Tapenory ee. A'evo remẽ epy'a katu sa'utà pene aiko. 29 Ajawyi ikõ tapenoryvay ovãe pepyri remẽ nẽ. Tapemomyta ikõ pepyri nẽ. A'evo sireko Janerõvijã Jesu koty rewarà kõ ipi. Epaposito oposiko katu Janerõvijã Jesu remĩgwai rõmõ ipi. A'evo mãe kõ tijamoe'e ipi. 30 Kõitokõ jypy remẽ manyvo napejẽ'ãi pejo peposiko epyri remẽ, Epapositu pemuu penekovijarerà rõmõ epãtavõarà rõmõ. Nojipiraui tesõ uu. Ajaire itekorã ywete ky'y. Werywete omãnõ epãtavõ iko remẽ, Kiristu rekoa rupi oposiko iko remẽ. A'evo mã'ẽ tè jamoe'e ipi.