2 Kee e'i tite mãe kõ ayvu taperovija e'ã:

– Napejiemosĩpire'oi sõ remẽ, Janejare'e napepota'ãi wãkarãgwerà kõ rõmõ tapeiko. Janejare'e ãkarãgwerà jikuwaparà tè a'evoa, e'i tite ãmõ kõ.

Aepo e'i kupa remẽ, taperovija ywe'e tite e'ã ijayvu kõ ãmẽ ipi.

3 A'evo ekoi mã'ẽ rõwã Janejare'e wãkarãgwerà kõ rõmõ oinõ ipi. Janejare'e ãkarãgwerà kõ mojikuwaparà rõwã jiemosĩpire'oa. Nijanerako'i a'evoa rè jaiko ipi. Jane ywete Janejare'e ãkarãgwerà kõ rõmõ jaiko. Kee jajikuwa ijãkarãgwerà kõ rõmõ jaiko. I'Ãg tè janepy'a pè tui. A'e janepãtavõ aje ywete tijamoe'e jaiko ipi. Ãmõ, Kiristu Jesu revejẽ jaiko mã'ẽ rè janerory teve jaiko. A'evo jaiko remẽ, jajikuwa ijãkarãgwerà kõ rõmõ. Ajawyi janerekokwerà rè nijaja'ai jaiko ky'y.

4 Ajawyi aepo e'i sõ pejẽ kupa remẽ ikõ, taperovija e'ã ikõ ijayvu kõ ãmẽ ipi nẽ. Ije ywesõ aapyrasa kõ a'evoa rè aiko mijã. Kee jaa kõ rè aja'a aiko ipi mijã.

5 [Janerekoa rupi taiko Isaeu jeapyrerà kõ rõmõ, a'e tite mijã.] Esaky remẽ, 8 'arà rõmõ arokwapa remẽ itõkõ, eremosĩpire'o kupa, Janejare'e upewarà jikuwaparà rõmõ taiko ãmẽ. Juteu rõmõ tè esaky. Ajawyi a'evo erereko kupa. Ãwitõ Isaeu jeapyrerà tè eruu, ãwĩvo ve emãmã. Tãmõ Pejãmĩ jeapyrerà mõ tè ije. Isaeu kõ erãmõi kõ pawete. Ajawyi Juteu jeapyrerà e'e tè ije. Epereu e'e tè ije.^a A'evo 'evo aiko maekwerà rè erako'i aiko ipi mijã. “Juteu kõ ywesõ Janejare'e opota ipi”, a'e tite mijã. Ajimokasiay Juteu kõ rekoa rupi katu aiko mijã, Pariseu atyry mõ tè ije rewarà mõ. 6 Ajimokasiay we'e tite Janejare'e remimotarà rã'ãga rupi aiko ipi mijã. Ajawyi amomorijau tesõ Jesu koty rewarà kõ ipi mijã. Kee a'e tite: “Ãwĩvo aiko remẽ tè Janejare'e orytà ere”, a'e tite eupe ikuwa e'ã. Ajireko katu Juteu kõ rekoa rupi aiko ipi mijã. Ajawyi nimanyvoi maevo sõ tite aiko jane kõ rovake aiko ipi mijã. Ije ywesõ aapyrasa eretãrãgwerà kõ a'evoa rè aiko mijã. A'evo 'evoa rè ywesõ ajirovija ipi mijã.^b

7 Age'e remẽ nerako'i a'e a'evoa rè aiko ky'y. Kiristu rè kõrijõ tè ajirovija erako'i rõmõ ky'y. 8 Erõvijã Kiristu Jesu revejẽ aiko ky'y. A'e rè ywesõ ikatuay eupe ky'y. A'e rè ywesõ ajirovija ky'y. A'e ywesõ apota katu ky'y. A'e rõmõ'ĩte ky'y. Ajawyi erako'i ee maekwerà kõ rè naja'ai 'ete ky'y. Aitypypyipa aekwerà kõ ky'y. Ãwitõ janema'e kõ ijupa remẽ, jamopopopa ipi. Jaitypypyipa ipi. A'evo 'ejẽ aiko. Erako'i ee maekwerà kõ aity e'e ky'y. Aje ywete Kiristu Jesu kõrijõ tè ikatuay wete eupe ky'y. A'e naity'ãi ãmẽ. 9 A'e reve kõrijõ tè aikotà ky'y. Jypy remẽ kee a'e tite ajipy'amogeta ipi: “Juteu kõ rekoa rupi aiko ipi remẽ, ‘Ivo mã'ẽ tè ene’, e'ità Janejare'e eupe”, a'e tite mijã. Age'e akuwapa janevote rõwã ivo jaiko Janejare'e pè ipi. Janejare'e tè ivo janemoigooka ipi, Kiristu rè jajirovija remẽ tè. 10 Ajawyi Kiristu revejẽ aiko mã'ẽ tè apota. A'e omãnõ maire opoera mijẽ oẽ oo. Aekwery vo ekoi mijẽ Uu pyri ky'y. Ajawyi ikasiay wete Kiristu, a'e eupe ipi. Ikasia rupi aiko mã'ẽ ywesõ apota. Ãwitõ Kiristu “hoõ” e'i ojimomorijau janeupewarà mõ, ãwĩvo ve “hoõ” a'e ajimomorijau ijupewarà mõ remẽ ipi. A'e itõkõ omãnõ janeaiwererà reitypypyipaoka janewyi. Ãwitõ nojipiraui 'ete ivo e'ãa pè, ãwĩvo ve taiko teve ije, a'e. 11 Amãnõ remẽ, Janejare'e emomoeraokatà tè taiko karuaru aiko ky'y. Ipyri aatà mãe rã aãrõ gatu aiko.

12-13 Kee a'e teve, eretãrãgwerà kõ. Jypy remẽ Kiristu Jesu erereko okoty rewarà rõmõ, ekoa rupi katu taiko. Kee na'ei ajamã'ẽ: “Najavyi 'ete ekoa ipi. Emimota rupi katu aiko ky'y”, na'ei. “Ekoa rupi katu aiko ijãkarãgwerà rõmõ aiko ipi”, na'ei, ajavy jẽ rewarà mõ. Ajamã'ẽ ajimokasi jẽ upi katu taiko, a'e pejẽ. A'evoa rõmõ Kiristu erereko katu. Erekoawerà rè naja'ai ajamã'ẽ aiko. Erekoa rã rè kõrijõ tè aja'a aiko ky'y. 14 Janejare'e epyteporopa Kiristu Jesu rè tajirovija, opyri taiko karuaru aiko. A'evoa rã rè kõrijõ tè aja'a aiko ky'y. Ajawyi ajimokasiay wete emimota rupi katu taiko ãmẽ.

15 Jajimotekokuwa ekoa rè remẽ, jatekokuwa ee ipi. Ajamã'ẽ ava mõ pepytery rupi nomãrãmoa'ui remẽ, Janejare'e omotekokuwa jẽtà Jesu rekoa rè, a'e rupi katu toiko ky'y. 16 Manyvo jaiko remẽ, ekoa rupi jaiko maekwerà vo jẽsi tijaiko ipi.

17 Kee a'e pejẽ, eretãrãgwerà kõ. Ãwitõ ajimokasiay ywete Jesu remimota rupi aiko, tãwĩvo ve tapeiko. Pepyterà rupi a'evo ekoi mãe kõ reruparà mõ tapeiko teve.

18 Oiko jane kõ kee e'i ywe'e tite mãe kõ: “Kiristu omãnõma yvyra jipokana rè, eaiwererà repykarà mõ. Ajawyi eremimotarà rupi aiko jẽ remẽ, nimanyvoi, ‘awyjepa’ e'ipa eaiwererà pè rewarà mõ”, e'i ywe'e tite oupe mãe kõ. A'e kõ kee ne'i ywe'ei tite: “Kiristu remimota rupi jẽsi taiko”, ne'i ywe'ei tite kupa. Uve ijaty jane kõ aepo e'i ywe'e tite oupe mãe kõ. A'e kõ rewarà akusiwa remẽ, emoãgyo tesõ erereko. Aja'o tesõ aiko, aja'a ee kõ remẽ. 19 A'e kõ wemimotarà rè ywesõ oja'a iko ipi. Ojimorya rè ywesõ teve oja'a iko kupa ipi. Ojimosĩoka kuwasi kupa mijã! Ajamã'ẽ ojimoe'e kõrijõ tè kupa! Wekoa ikewarà rè ywesõ oja'a py'yi ywe'e tite kupa ipi. Ajawyi jimomorijau wasua rena pupe tè ootà kupa ky'y.

20 Jane ãmẽ janerena rã rè jaja'aray wete jaiko, Janejare'e rena rè. A'e kyty jaẽtà jaa, awyje mãerã tijaiko karuaru. Janerõvijã Jesu Kiristu tè owyjytà uu janepijarà mõ janereraa wena kyty, janerereko katuarà rõmõ. Ajawyi simoa'u katu ivãea. 21 Ikasiay Janerõvijã ywete. Pirujẽ jane kõ pè ojimojõvijã wasutà, pirujẽ weminõgwerà kõ pè, okasia rupi. Janepirà kõ omoteetà okasia rupi. Janepirà age'ewarà nikasi. Omãnõtà mãe rã tè. Na'evo'ãi janepirà wekovijanõ remẽ. Ãwitõ Jesu pirà owaray mãerã tè, ãwĩvotà wereko janepirà rã okasia rupi kãramõ.