2 Age'e amogetatà rã'ĩ wãivĩ kõ mõ. Evotia eu mã'ẽ. Ãmõ, Sĩtiki eu mã'ẽ. A'e kõ amogetatà rã'ĩ. [Kee e'i mã'ẽ aenu penewarà: “Ijayvu teitete ojiupe iko kupa ipi”, e'i mã'ẽ.] Ajawyi eremikusiwarerà rupi kee a'e pemogeta. Janerõvijã ywete remĩgwai kõ tè rõwã sipõkõ pejẽ mijã? a'e peupe. Ajawyi awyje tapejimory mijẽ ojeeve, Janerõvijã rè pejirovija mãe kõ rõmõ. Tapejiauvay ojee peiko, a'e peupe.

3 Kee a'e teve evo oposiko pemotekokuwa mã'ẽ rõmõ mã'ẽ pè. Emojimoryoka ãwĩ wãivĩ kõ tojiauvay mijẽ iko kupa, a'e ene. Jypy remẽ itõkõ oposiko ywete epyri Janejare'e ayvu e'eay mojenua rè iko kupa mijã. Keremẽti pyri itõkõ oposiko janereve iko kupa mijã. Ãmõ kõ pyri ve oposiko janereve Janejare'e ayvu e'eay mojenua rè iko kupa mijã. Erà kõ ojikusiwapa Janejare'e kareta rè, ipyri oiko karuarutà mãe kõ rõmõ. Ajawyi emojimoryoka kõ mijẽ, a'e ene.

4 Kee a'e teve pejẽ, pirujẽ pejẽ. Tapenory py'yi ikõ peiko nẽ, Janerõvijã ywete revejẽ peiko mãe kõ rõmõ. Ajawyi tapenory ikõ peiko nẽ, a'e mijẽ pejẽ.

5 Sãtãmy ekoi mãe kõ rõmõ ikõ tapeiko nẽ, kuise'ẽ Janerõvijã ywete uutà rewarà mõ. Pirujẽ mirà kõ rovake sãtãmy mãe kõ rõmõ tapeiko ipi. 6 Tapejimopirai e'ã ikõ waypete penekoa remẽ nẽ. Janejare'e pè kõrijõ ikõ tapeporanu peiko nẽ. Emime'ẽgwerà kõ rè teve ikõ tapeja'a jẽ peporegeta ijupe remẽ nẽ. Penereko katua rè ikõ tapeja'a jẽ peiko nẽ. A'evoa rè penorya tapemome'u ijupe imoe'e ipi. 7 Janejare'e ywesõ poromo'ãgatu mã'ẽ tè. Manyvo nijareko'ãi janemo'ãgatua ikuwaa. A'evoa rupi janepy'a mopiryvypy janerereko ipi. Nijanemopirai teve janerereko. A'evo ikõ tapenereko, Kiristu Jesu revejẽ peiko mãe kõ rõmõ.

8 Age'e kee a'età pejẽ, eretãrãgwerà kõ. Ikatuay wete mã'ẽ simo'y joe ipi, Jesu koty rewarà kõ rõmõ. Ajawyi kee ja'età: Aje oporegeta mã'ẽ pãwĩ? ja'età. Temirovija tè pãwĩ? ja'età. Temimotekoe'e teve pãwĩ? Ivo mã'ẽ tè pãwĩ? Ãmõ, ojireko katu nivoi mã'ẽ wyi mã'ẽ tè pãwĩ? ja'età. Ojimory katu ãmõ kõ rè mã'ẽ tè pãwĩ? ja'età. Owaray oporegeta ipi mã'ẽ tè pãwĩ? Temimoe'e tè pãwĩ? ja'età. Aepo ywesõ ikatu ja'età Jesu koty rewarà kõ rõmõ ãmẽ. Aepo jaa rè tijajipy'amogeta jaiko ipi.

9 Eayvukwerà itõkõ peenu katu, poromotekokuwa pepyterà rupi aiko remẽ. Pemã'ẽ gatu teve itõkõ ere ipi, manyvo aiko remẽ. Ãwĩ ãwĩ kõ rè itõkõ pemã'ẽ. Ajawyi a'evo jẽ tapeiko. Tapenearai e'ã aekwerà wyi peiko. Janejare'e penevejẽ ekoità, pirujẽ janepy'a mopiryvypyarà rõmõ.

10 Ãmõ, kee a'e pejẽ. Karakuri penemimuurerà ovãema ije. Eroryvay ee aiko. Ãwitõ epãtavõ pekupa aposiko ypy pepyri remẽ, ãwĩvo mijẽ age'e peiko. Ajawyi eroryvay aiko. Aje, Janerõvijã revejẽ erory pene aiko, peja'a jẽ tesõ ere rewarà mõ. Kee na'ei ajamã'ẽ: “Manyvore sipõkõ nepãtavõi jypy remẽ kupa?” na'ei ajamã'ẽ, manyvo napejẽ'ãi epãtavõ pekupa mijã rewarà mõ. 11 Eporijau ywete rewarà mõ rõwã aepo a'e pejẽ ajamã'ẽ. Manyvo aiko remẽ, epy'a katu jẽ aiko ipi. Ajimo'epa a'evoa rè aiko ipi. 12 Ãmõ 'ary pè areko ywete sa'u ema'e kõ. Ãmõ 'ary pè eporijau ipe aiko. Ajamã'ẽ manyvo aiko remẽ, epiryvypy katu jẽ aiko. Eamyay ipe remẽ, epiryvypy katu jẽ teve aiko ipi. Ekasi katu remẽ, epiryvypy katu jẽ teve aiko. Naiko ywe'ei ema'e kõ eupe remẽ, epiryvypy katu jẽ ve aiko. Ãmõ, uve ema'e kõ remẽ, epiryvypy katu jẽ ve aiko. Manyvo nyvo aiko remẽ, epiryvypy katu jẽ aiko ipi, ajipokuwapa a'evoa rè aiko rewarà mõ. 13 Manyvo nyvo aiko remẽ, Jesu Kiristu kasia rupi aiko, aã kõ tainõ.

14 Ajamã'ẽ eroryvay epãtavõ pekupa age'e ky'y remẽ, ajimomorijau ajupa remẽ. 15 Jypy remẽ Janejare'e ayvu e'eay amojenu ypy pepyterà rupi aiko remẽ itõkõ, epãtavõ pekupa ipi. Ajaire Masetonia yvy pe wyi aa imojenu remẽ itõkõ, pejẽ rõmõ'ĩte itõkõ epãtavõ pekupa, Jesu koty rewarà kõ rõmõ. Pejẽ rõmõ'ĩte teve karakuri peme'ẽ ije epãtavõarà kõ rõmõ. Pekuwapa a'evoa. 16 Tesaronika taa pè eporijau aiko remẽ itõkõ, pemonooka jẽ karakuri ije. Karakuri pemono ypy. Ajaire itõkõ pemono mijẽ.^a 17 Kee na'ei ajamã'ẽ. “Epãtavõ ywete kuwasi kupa!” na'ei pejẽ. Najimo'eai aiko. Janejare'e owaray wereko epãtavõ mãe kõ ipi, nokãte'ãi eupe kupa remẽ, a'e kõrijõ tè ajipy'amogeta ipi.

18 Epapositu werupa penemimuurerà ije. Aã kareta akusiwa ipyya mojikuwaparà rõmõ ajupa. Areko ywete ema'e kõ age'e remẽ. Oyte ije ky'y. Eroryvay pene aiko ãmẽ. Janejare'e ve oryvay pene, epãtavõ pekupa rewarà mõ. Napekãte'ãi ije rewarà mõ.^b 19 Imoma'e ywete mã'ẽ rõmõ tè Janejare'e ekoi. A'e tè nokãte'ã'ãi 'ete pejẽ iko. Pirujẽ peporijau ee mãe kõ ome'ẽtà pejẽ ipi. Kiristu Jesu rè pejirovija katu rewarà mõ a'evotà penereko. 20 Janeruwasu tè Janejare'e. A'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.

21 Pirujẽ mokopewarà Kiristu Jesu koty rewarà kõ wyi nerearai aiko ipi. Epyriwarà kõ ve naearai pewyi iko ipi. 22 Pirujẽ Janejare'e koty rewarà kõ ikewarà kõ opota ojimory pene ekareta rupi. Romã pewarà rõvijã wasu Sesa retã wyry pewarà kõ ywesõ a'evo ekoi.

23 Jesu Kiristu tapenereko katu okatuaya rupi, Janerõvijã ywete rõmõ.

[Awyjepa aã ekareta ky'y.]