Pauru oposikoa rè oporegeta remẽwarà
2
Apota pekuwa aposiko ywete peupewarà mõ mã'ẽ. Ãmõ, Rautiseja taa wãnà kõ pewarà mõ aposiko ywete mã'ẽ. Ãmõ, pirujẽ nomã'ẽive ere mãe kõ pewarà mõ mã'ẽ. 2 Janejare'e pè kee a'e peupewarà mõ: “Tojipy'amokasiay neayvu rupi iko kupa”, a'e peupewarà mõ. Ãmõ, “Tojiauvay ojeeve iko kupa”, a'e. Ãmõ, “Tojimotekokuwavay Kiristu rè, nemojikuwapa mã'ẽ rè teve”, a'e peupewarà mõ Janejare'e pè ipi. 3 Kiristu rupi tè Janejare'e omojikuwaoka wekoa janeupe. Nomojikuwaokai 'ete weewarà mijã. 4 Aepo jaa amome'u pejẽ, ãwisõ “aje ipõ” tapejẽ ywe'e tite e'ã poromo'e rã'ãga mãe kõ ayvukwerà pè peiko. A'e kõ otekokuwa maevo sõ tite iko. Ajamã'ẽ tapejimoripeoka e'ã ijupe kõ, a'e pejẽ. 5 Age'e nijamã'ẽi ojee, [jimopã'ãga pupe aju rewarà mõ]. Ajamã'ẽ e'ãg peneve ekoi, ãwisõ kuipe'e teipe aju pewyi remẽ. Ajipy'amogeta jẽ pene aiko. Kee jaa penewarà aenu: “Ojimokasiay Kiristu rè ojirovija ojeeve iko kupa ipi. Nopoi 'ete Janejare'e ayvu e'eay wyi kupa”, e'i mã'ẽ aenu. Eroryvay aepo jaa aenu remẽ.“Janejare'e ojikuwapa joupe ky'y”, e'i mã'ẽ
6 Pejirovijapa Kiristu Jesu rè, Penõvijã ywete rõmõ. Aekwerà ve jẽ tapeiko, a'e pejẽ. 7 Eevejẽ ikõ tapeiko nẽ. Tapejimokasi jẽ ikõ pejirovija jẽ ee peiko nẽ. Tapejimo'yvay ikõ ee nẽ. Ãwitõ Parasi pemotekokuwa jypy remẽ Janejare'e ayvu rè, a'e rupi tapeiko jẽ. Ãmõ, penereko katua rè penory mã'ẽ tapemome'u Janejare'e pè ipi.
8 Ãmõ, pejapyaka rã'ĩ ikõ kee a'e pejẽ mã'ẽ rè nẽ. Tapejimoripeoka e'ã ikõ poromo'e rã'ãga mãe kõ pè nẽ. Kiristu rõwã omo'e kõ. Wekoa rupi tè poromo'e rã'ãga iko kupa ipi. Ija rã'ãga mãe kõ ve omotekokuwa rã'ãga kõ, toporomo'e rã'ãga kupa ipi. Ajawyi tapejapyaka e'ã ikõ ijayvu kõ rè peiko ipi nẽ, a'e pejẽ. 9 Kee rewarà mõ aepo a'e. Kiristu ojimojane yvy kyty uu remẽ, Janejare'e tẽ tesõ janepyterà rupi ekoi. A'evo ojikuwa janeupe. 10 Ajawyi, Kiristu revejẽ peiko remẽ, o'Ãg tẽ tesõ pepy'a pupe oinõ ãmẽ. A'e ywesõ ikasiay iko mã'ẽ. Pirujẽ ikasiay mãe kõ 'arà kytywarà rõmõ ekoi, nomã'ẽytyi mãe kõ 'arà kytywarà rõmõ tesõ. Pirujẽ ija mãe kõ 'arà kytywarà rõmõ tesõ ekoi.
Janejare'e poropy'amotee mã'ẽ rewarà
11 Juteu kõ ojiemosĩpire'o Janejare'e koty rewarà kõ mojikuwaparà rõmõ iko ipi. Ajamã'ẽ a'evoa noekyi janeaiwererà janepy'a pupe wyi ipi. Kiristu ãmẽ wekyipa peaiwererà pepy'a pupe wyi. Pemomoioka peaiwererà kasia wyi, eevejẽ peiko remẽ. 12 Pejimojãmorĩoka Kiristu ayvu rupi remẽ, Kiristu revejẽ pemãnõ maevo sõ tite peiko ãmẽ ky'y.a Yvy pupe pejeaty rã'ĩ maevo sõ tite ãmẽ peiko. Ãmõ, ãwitõ Janejare'e omomoera Kiristu okasia rupi toiko mijẽ, ãwĩvo ve penereko Kiristu revejẽ peiko mãe kõ rõmõ. Pemomoerapa mã'ẽ maevo sõ tite peiko ky'y, awyje pepoerapa ipyau mã'ẽ vo tapeiko ky'y, penako'i ikasia rè peiko remẽ.
13 Jypy remẽ itõkõ nivoi tekoua rupi kõrijõ tè peiko ipi mijã. Ajawyi, “Teãgwerà vo tè kupa”, e'i Janejare'e peupewarà mõ ãmẽ mijã. Eevejẽ rõwã peiko mijã, Juteu rõwã mãe kõ rõmõ. Ajamã'ẽ age'e, Kiristu revejẽ peiko ky'y. Ajawyi mãerã peiko karuarutà ipyri peiko ky'y. Janejare'e pirujẽ peaiwererà omoje'opa pewyi ãmẽ ky'y.b 14 Janevote nijamoje'o kuwa'ãi janeaiwererà janewyi ipi. Jajimomorijau 'atà tè epy rõmõ jaiko mijã. Ajamã'ẽ Kiristu omoje'opa a'evoa omãnõa rupi, yvyra jipokana rè omãnõ remẽ.c 15 A'evoa rupi teve ãjãgai rõvijã nomokasiokai mã'ẽ omojikuwaoka. Emĩgwai kõ kasia ve nomokasiokai. Ãmõ, pirujẽ ijayvukasi mãe kõ nomokasiokai. Kiristu omãnõ mã'ẽ rupi a'evo ekoi. A'e ywesõ ikasiay wete. A'evoa Kiristu omojikuwaokapa janeupe ky'y. Ajawyi, kee ja'e: “Haa! Nikasi miti ãjãgai rõvijã Kiristu rovake ky'y!” ja'e ipi.
Poromo'e rã'ãga mãe kõ ayvu rewarà
16 Ajawyi tapejapyaka e'ã poromo'e rã'ãga mãe kõ rè ipi. Kee e'i tite kupa: “Napejikoakui sõ remẽ, nivoi peiko”, e'i tite kupa ipi. “A'e ja'u ipi. A'e nija'ui ipi”, e'i tite kupa ipi. Moma'eyvary pewarà mõ teve aepo e'i kupa. Kee e'i teve kupa: “Janejare'e moetea 'arà rè jaja'a ipi”, e'i kupa. “Ãmõ, jay pyau remẽ jaja'a ee ipi. Ãmõ, jimoava 'arà remẽ teve jaja'a ee ipi”, e'i kupa ipi. “A'evo 'evo tijaiko ikenẽ”, e'i tite kupa ipi.d 17 Aepo e'i kupa remẽ, Janejare'e rekoa rupi katu ywe'e rõwã aepo e'i ajamã'ẽ kupa. A'evoa rupi rõwã Janejare'e janerereko katu ipi. Aje ywete Kiristu rè jajirovija remẽ tè janerereko katu ipi. [Ajawyi aepo e'i kupa remẽ, taperovija ywe'e tite e'ã ikõ ijayvu kõ nẽ, a'e pejẽ.]
18 Kee e'i teve kupa. Nojimoe'ei rã'ãga iko kupa. Ãmõ, yvapewarà kõ omoe'e rã'ãga kupa ipi. “Epouvaiawerà rupi ãwĩvoa akuwa”, e'i tite kupa ipi. “Emã'ẽ! Ore ywesõ orokuwa. Ãwitõ yvapewarà kõ oromoe'e ipi, ãwĩvo ve pejẽ tapemoe'e kõ teve”, e'i tite teve kupa ipi. Aepo e'i epe penerõarõ kupa. Ajamã'ẽ “aje ipõ” tapejẽ ywe'e tite e'ã ijupewarà kõ mõ. 19 A'e kõ nojirovijai Kiristu rè oõvijã rõmõ kupa. Nojimo'yi ee kupa. Jane ãmẽ jajimo'ypa ee mãe kõ rõmõ jaiko. Kiristu pè kõrijõ, “Orerõvijã ywete Ene”, ja'e ipi. Ajawyi pe'ĩypyte eeve jaiko ipi. A'e tè janemokasi ipi. A'e tè janemotekokuwa teve ipi. A'evo Janejare'e opota tijaiko ipi, pe'ĩypyte rõmõ.
Otekokuwa maevo sõ tite mã'ẽ rewarà
20 Janejare'e pemojimo'ypa Kiristu rè tapeiko ky'y. Imãnõa rupi omãnõ mã'ẽ vo jẽ pejẽ peiko eevejẽ. Omãnõa rupi pemomoioka ãjãgai rõvijã po pe wyi. Nikasi 'ete pejẽ ky'y, Kiristu kasia rupi peiko remẽ. Ija mãe kõ ve nikasi pejẽ. Pirujẽ ikasiay mãe kõ nomã'ẽytyi mãe kõ ve nikasi pejẽ. Ajawyi poromo'e rã'ãga mãe kõ ayvu rè tapejapyaka e'ã peiko ky'y. 21 Kee e'i tite kupa mã'ẽ: “Aã tapeporu e'ã. Ãmõ, aã tape'u e'ã. Ãmõ, aã tapepyy e'ã”, e'i tite kupa mã'ẽ rè tapeja'a e'ã ky'y. 22 Moma'e rã rõmõ rõwã aepo jaa. Ovote aepo e'i kupa. Janejare'e rõwã aepo jaa rè omo'eoka kõ ipi. 23 A'evo poromo'e rã'ãga mãe kõ ekoi ipi. Otekokuwa maevo sõ tite tè kupa. Nojimoe'ei rã'ãga teve kupa. Ojikoaku teve temi'õ iteetejẽ mã'ẽ wyi iko kupa ipi. Kee e'i tite kupa: “Janejare'e orytà ere, ãwĩvo aiko remẽ”, e'i tite kupa ipi. Otekokuwaa rã'ãga rupi tè a'evo ekoi kupa. Moma'e rã rõmõ rõwã a'evoa ajamã'ẽ. Nijanepy'amotee kuwa'ãi a'evoa ipi. Nijanemokasi'ãi teve janeaiwererà reitypypyia rè. Ajawyi kee taoty a'evo mã'ẽ pè: “Otekokuwavay maevo sõ tite tè ãwĩ”, taoty.