Janeruwasu ikõ tapenereko katu okatuaya rupi penereko ipi nẽ. Tapepy'amopiryvypy katu ikõ penereko nẽ.

3 Janejare'e pè oroporegeta peupewarà mõ ipi, Janerõvijã Jesu Kiristu Ruu pè. Oreroryvay pene rewarà mõ oroporegeta peupewarà mõ ijupe ipi. 4 Kee jaa penewarà oroenu: “Ojirovija katu Kiristu Jesu rè kupa”, jaa oroenu. “Pirujẽ Janejare'e koty rewarà kõ wauvay kupa ipi”, jaa oroenu teve. Oreroryvay aepo jaa renu ãmẽ.

5 Aje ywete Janejare'e ayvu e'eay Jesu rewarà. A'e peenu ypy remẽ itõkõ, Janejare'e pyri jaiko karuaru mã'ẽ pekuwapa. Ajaate peãrõ ywete ipyri peikoa rã ky'y. A'evoa rè oromoe'e Janejare'e oroiko ipi. 6 “Janejare'e poroauvay okatuaya rupi ipi”, jaa peenu ypy remẽ, kee pejẽ: “Aje ywete a'evo”, pejẽ enu ipi. Aepo jaa peenu remẽ itõkõ Janejare'e pepy'amoteeoka. Ijayvu pepy'a oporakapa. Ãwitõ a'evo peiko Janejare'e ayvu peenu remẽ, ãwĩvo ve ãmõ kõ age'e remẽ wenu kupa remẽ. Ãmõ taa taa wãnà kõ wenu remẽ, a'evo ekoi teve kupa ipi. Ajaire pirujẽ yvy wãnà kõ a'evoa wenu remẽ, a'evo tevetà ekoi kupa.

7 Parasi ypy itõkõ a'evoa omojenu pejẽ jypy remẽ. Oreremiauvay rõmõ Parasi ekoi. Kiristu remĩgwai e'e rõmõ tè a'e ekoi, orevo. A'e oromono pekoty Janejare'e ayvu tomojenu pejẽ remẽ itõkõ Janejare'e ayvukwerà rupi katu omojenu pejẽ.^a 8 Ãmẽ ajaire ojivy uu orekoty remẽ, kee jaa omome'u oreupe:

– Janejare'e 'Ãg rupi Korosu wãnà kõ poroauvay iko ipi, e'i oreupe.

9 Ajawyi Janejare'e pè oroporegeta peupewarà mõ oroiko ipi. Penewarà oroenu ypy reme wyive oroporegeta peupewarà mõ ijupe ipi, ajaate mãerã rõmõ ky'y. Kee oro'e ijupe peupewarà mõ ipi: “Papa, emotekokuwa kõ ne'Ãg rupi, neremimota tokuwa kupa”, oro'e. “Pirujẽ neremimota rè emotekokuwa kõ”, oro'e ijupe peupewarà mõ ipi.

10 Janejare'e tekokuwaa rupi peiko remẽ, pekuwatà emimota rupi peiko. Imorya rupi peikotà ãmẽ. Ivoa rupi peiko tevetà. Ãmõ, pejimotekokuwaokatà Janejare'e pè. Ajaate pejimotekokuwavaytà ee ãmẽ peiko. 11 Kee oro'e teve ijupe peupewarà mõ:

– Epy'amokasiay kõ ywete nekasiay wetea rupi, tojirovija jẽ iko imomãatã nere kupa, ojimomorijau ipe kupa remẽ. Taory jẽ iko kupa, ojimomorijau ipe kupa remẽ, oro'e ijupe peupewarà mõ.

12 Janejare'e kee e'ipa peupewarà mõ: “I'ete oike erena pè eupewarà kõ rõmõ kupa, awyje epyri toiko kupa”, e'ipa peupewarà mõ. Ajawyi ikõ tapemoe'e penereko katua rè peiko ipi nẽ, a'e pejẽ. 13 Janejare'e tè janerekyipa nivoi tekoua pe wyi janerereko, ãjãgai rõvijã po pe wyi. Janereraa Wa'yry remĩgwai kõ rõmõ, eevejẽ tijaiko. Wauvay Wa'yry ereko. 14 Aje ywete Jesu remĩgwai tè jane ky'y. A'e tè omãnõ janerekovijarerà rõmõ. Janeaiwererà oitypypyiokapa janewyi omãnõa rupi. Ajawyi Janejare'e nomo'y'ãi janeaiwererà janere ky'y.^b

15 Nomã'ẽytyi ee mã'ẽ tè Janejare'e. Nojisaokari iko mã'ẽ tè Janejare'e. Ajamã'ẽ Kiristu rè jamã'ẽ remẽ, Janejare'e rè ivo teve jamã'ẽ kuwa. Uu vo ywete Ta'yry ekoi. Nuveive Janejare'e reminõgwerà mõ remeve, uvepa teãmã Kiristu. A'e pirujẽ Janejare'e reminõgwerà kõ 'arà kytywarà rõmõ ekoi. 16 Janejare'e pirujẽ oinõoka remẽ, Kiristu tè oinõ kõ. Yva pewarà kõ oinõ. Ãmõ, yvy pewarà kõ teve oinõ. Ãwitõ ojisa mãe kõ oinõ erokwa, ãwĩvo ve nojisai mãe kõ oinõ erokwa. Janejare'e remĩgwai yvapewarà kõ ve oinõ erokwa. Ãmõ, ija mãe kõ oinõ teve.^c Pirujẽ ikasiay mãe kõ nomã'ẽytyi mãe kõ ve oinõ teve. Wãi wãisõ oinõ erokwa. Pirujẽ uve mãe kõ Kiristu tè oinõ. Kiristu pewarà mõ Janejare'e oinõoka kõ pirujẽ.

17 Pirujẽ age'e uve mãe kõ reko e'ãve, Kiristu ekoipa teãmã. Age'e pirujẽ uve mãe kõ wereko jẽ okasia rupi ereko. Pirujẽ wenanõma kõ erokwa, tatui kupa upa. Ajaate wereko kõ jẽ ereko. 18 Janerõvijã wasu rõmõ ekoi ipi, jajirovija ee remẽ. Jane'y rõmõ ekoi. Ãwitõ yvyra rãkã o'y rè ojipy remẽ tè katu ekoi. Nijui ãmẽ. Ãwĩvo ve jane jaiko Kiristu rè jajipy jaiko remẽ tè katu jaiko. Ajawyi i'Ãg rupi jaiko ipi. Poroãparõ mã'ẽ teve a'e. Ãmõ, a'e ypy opoera omãnõ maire. [A'e ywesõ ikasiay mãnõa wyi ãmẽ iko.] Ajawyi pirujẽ weminõgwerà kõ 'arà kytywarà rõmõ ekoi ky'y.^d 19 Ãwitõ Janejare'e oiko teãmã, ãwĩvo ve Ta'yry ekoi. Ojevo jẽ Uu reve ekoi. Janejare'e remimota rupi katu tè a'evo ekoi. 20 A'e rupi jajimory kuwa Janejare'e rè jaiko ky'y. Janejare'e nisirovijai 'ete mijã. Ãmẽ Janejare'e e'i oupe:

– Era'yry mãnõa rupi mirà kõ arojivyokatà ekoty, tojimory mijẽ ere kupa ky'y, e'i.

A'evo wereko ãmẽ. A'e rupi teve pirujẽ weminõgwerà kõ werojivyoka okoty. Ãwitõ yvy pewarà kõ, ãwĩvo ve yvapewarà kõ. Jesu Kiristu yvyra jipokana rè omãnõ maekwerà rupi Janejare'e “awyjepa” e'i janeaiwererà kõ pè ky'y.^e

21 Jypy remẽ itõkõ waite peiko Janejare'e wyi peiko mijã. Ijãpã rõmõ tè itõkõ pejẽ peiko mijã, nivoi teãmã peiko rewarà mõ. Nivoi mã'ẽ rè kõrijõ tè itõkõ peja'a peiko ipi mijã. Ajawyi napejimoryi 'ete Janejare'e rè peiko ipi mijã. 22 Ajamã'ẽ Janejare'e penerojivyoka okoty rewarà kõ rõmõ tapeiko ky'y. Pemojimoryoka wee penereko ky'y. Wa'yry mãnõa rupi a'evo penereko ipi. Ajawyi peneraatà wena kyty opyri tapeiko karuaru ky'y. Ivo katu mãe kõ rõmõ peneraatà opyri. Ava jẽ rõwã kuwa omo'y nivoi mã'ẽ pene ãmẽ ky'y. [Ava jẽ rõwã wesatà nivoi tekoua a'e pè.] 23 Janejare'e ayvu e'eay Jesu rewarà ojenu peupe remẽ wyive itõkõ pejirovija ee peiko. Peãrõ ipyri peikoa rã. Ajawyi tapejirovija jẽ ikõ ee peiko nẽ, a'e pejẽ. Tapejimokasi jẽ ikõ ee peiko nẽ. Jesu rekoa tapeity e'ã ãmẽ peiko. Ãwitõ peupe Janejare'e ayvu e'eay ojenu, ãwĩvo ve pirujẽ mirà kõ pè ojenu jenu okwa ipi. Yvy popy kyty Jesu koty rewarà kõ omojenu jenu erokwa. Ije ve, Pauru, amojenu jenu teve erokwa ipi, Jesu remĩgwai rõmõ.

24 Kiristu ayvu katu amojenu erokwa ipi. Ajawyi emomorijau erereko kupa. Peupewarà mõ ajimomorijauoka ajupa. Kee e'ipa Janejare'e eupe: “Nejimomorijau remẽ tè katu eayvu katu ojenutà Juteu rõwã mãe kõ pè okwa”, e'i. Ajawyi erory jẽ aiko, ajimomorijau ipe aiko remẽ. Apota Kiristu koty rewarà kõ mokasi tojirovija jẽ ee kupa, ajawyi. 25 Kee e'i Janejare'e ije: “Emokasi Kiristu koty rewarà kõ, ãmẽ ywesõ tojirovija ywete ere iko kupa”, e'i. “Emotekokuwa Juteu rõwã mãe kõ eayvu rè. Pirujẽ eayvu rè emotekokuwa kõ, tokuwa kupa”, e'i ije.

Ajawyi ijayvu rupi ãwĩvo aposiko peupewarà mõ aiko ipi. [Eremikusiwarerà rupi ve poromotekokuwa ajupa ipi.] 26 Karamoe remẽ Janejare'e kee e'ipa oupe: “Juteu rõwã mãe kõ ve arojivytà epyri toiko karuaru kupa”, e'ipa oupe. Ajamã'ẽ a'evoa nomojikuwaokaive mirà kõ pè mijã. Age'e remẽ tè katu omojikuwaoka Kiristu koty rewarà kõ pè ky'y. 27 Kee jaa Janejare'e remikuwa, oupewarà kõ pè omojikuwaoka mã'ẽ: Pepy'a pupe Kiristu 'Ãg ekoi, pejirovija ee remẽ. Ajawyi ikatuay wete penekoa rã, Janejare'e pyri peiko karuarua rã. Aepo jaa omojikuwaokapa oupewarà kõ pè ky'y. Ikatuay wete ijayvukwerà peupewarà mõ.

28 Ajawyi Kiristu rekoa oromojenu jenu pirujẽ mirà kõ pè erokwa ipi, tojirovija ee kupa ky'y. Pirujẽ oromotekokuwa, oterẽ jẽ tokuwa Janejare'e ayvu kupa. Ãmõ, oromokasi kõ jẽ tojireko katu ivo tekoua rupi toiko kupa. Orojimokasiay Kiristu tekokuwaa rupi imotekokuwa kõ, ãwisõ ivo katuay wete toiko kupa. 29 A'evoa rè aposiko ywete aiko ipi. Kiristu kasia rupi aposiko eewarà mojenu jenu erokwa, emokasiay wetea rupi.