Jesu koty rewarà kõ rõvijã rã kõ pyteporoa rewarà
3
[Age'e oromotekokuwatà Jesu koty rewarà kõ rõvijã kõ pyteporoa rè.] Jõvijã poromo'e mãe rã kõ terepyteporo. Ava mõ opota a'evoa rõmõ ekoi remẽ, mosikoa ikatuay wete mã'ẽ opota. 2 Kee mã'ẽ terepyteporo Jesu koty rewarà kõ omo'e mãe kõ rõmõ toiko kupa.a Ivo teãmã ekoi mãe kõ terepyteporo. Nimovyvy ena'ãi mãe kõ tè. Pe'ĩte erekwa mãe kõ tè terepyteporo. Ojireko katu iko mã'ẽ tè. Mira katuay mã'ẽ teve i'ete jõvijã rõmõ. Mõropãrà kõ rè oja'a katu mã'ẽ teve. Otekokuwavay mã'ẽ teve. Poromotekokuwavay mã'ẽ teve. Okuwa katu poromo'e mã'ẽ teve. A'e a'evo ekoi mãe kõ tè terepyteporo jõvijã poromo'e mãe kõ rõmõ toiko kupa. 3 Kee ekoi mã'ẽ terepyteporo e'ã. Omãrãkuwaa omoyvypyoka oka'ua pupe iko mã'ẽ. Ãmõ, ojikõ'õ iko mã'ẽ. Ãmõ, joe opoko iko mã'ẽ tojimojõvijã e'ã. Ãmõ, karakuri moatya ywesõ opota iko mã'ẽ. A'evo 'evo ekoi mã'ẽ terepyteporo e'ã. Kee ekoi mã'ẽ tè terepyteporo. Ojimory katu mã'ẽ tè terepyteporo. Ikatusa rupi poroereko mã'ẽ tè. 4 Totekokuwavay opyriwarà kõ rerekoarà mõ. [Ma'e: Toja'a katu ee kõ. Ãmõ, toporoauvay iko. Ãmõ, tijewe katu teve joe oposiko.] Ãmõ, tojirovijaoka katu wãkarãgwerà kõ pè ipi. Ãmõ, tojimomojy jẽ wãkarãgwerà kõ pè. Apijarerà tè terepyteporo. 5 Kee rewarà mõ. Ava mõ ne'i katui opyriwarà kõ rerekoarà rõmõ iko remẽ, ne'i katu'ãi ãmẽ Janejare'e koty rewarà kõ rerekoarà rõmõ iko.6 Age'ewarà rõwã ojirovija ypy Janerõvijã Jesu rè mã'ẽ tè tojimojõvijã ipi. Age'e ywete wenu mã'ẽ tojimojõvijã e'ã ikenẽ. Ojimojõvijã amãtejẽ sõ remẽ, ojimoe'e ywe'e tite kuwa ãmẽ. “Ije ywesõ Jesu koty rewarà rõmõ aiko”, e'i ywe'e tite kuwa oupe. A'evo sõ ekoi remẽ, Janejare'e wemavotà ãmẽ ity oo. Ãwitõ karamoe remẽ ãjãgai rõvijã wemavo ity oo, ojimoe'e ywe'e tite remẽ. Kee e'i itõkõ: “Ije ywesõ ekasi Janejare'e wyi ipi”, e'i oupe ãjãgai rõvijã. Tãwĩvo e'ã ikõ jõvijãgwerà nẽ.
7 Ãmõ, jõvijã poromo'e mãe kõ pirujẽ jane kõ remimoe'e rõmõ toiko mãerã rõmõ. Jesu noerovijai mãe kõ remimoe'e rõmõ teve toiko. Ava nomo'y'ãi teywete nivoi mã'ẽ ee ãmẽ. Nãwĩvoi remẽ, ojirõarõoka kuwa ãmẽ ãjãgai rõvijã pè. Ãjãgai rõvijã ojavyoka teve kuwa ijupe ãmẽ. Ajawyi ikõ temimoe'e tè terepyteporo nẽ, Jesu koty rewarà kõ omo'e mãe rã kõ rõmõ toiko kupa.
Jõvijã poropãtavõ mãe rã kõ pyteporoa rewarà
8 [Age'e oromotekokuwatà jõvijã poropãtavõ mãe kõ pyteporoa rè.] Kee mã'ẽ terepyteporo Jesu koty rewarà kõ opãtavõ mãe kõ rõmõ toiko kupa.b Ivo teãmã mãe kõ tè terepyteporo. Ãwitõ jõvijã poromo'e mãe kõ, tãwĩvo jõvijã poropãtavõ mãe kõ ivo teãmã ekoi. Ãmẽ tè jane kõ omomojytà ãmẽ. Niwari mã'ẽ kõrijõ tè poropãtavõarà kõ rõmõ terepyteporo ipi. Ãmõ, omãrãkuwaa nomoyvypyokai oka'ua pupe iko mãe kõ tè. Ãmõ, karakuri moatyarà rè ywesõ noja'ai mãe kõ teve. Noporomoripei karakuri moatya rè mãe kõ teve. A'evo mãe kõ tè poropãtavõarà rõmõ toiko. 9 Janejare'e remikuwaoka Jesu rewarà wereko katu opy'a pupe mãe kõ tè jõvijã poropãtavõarà kõ rõmõ toiko. Janejare'e 'Ãg omojikuwaoka sõ ijaiwererà mõ ijupe remẽ, aje ywete e'i ity waiwererà mãe kõ. Nomoane'ei waiwererà opy'a pupe mãe kõ. Na'evoi sõ ekoi remẽ, nikatu'ãi poropãtavõ mãe kõ rõmõ ekoi.
10 Ava mõ jõvijã poropãtavõarà rõmõtà remẽ, Jesu koty rewarà kõ tojimoaty rã'ĩ ijã'ã esa. Ãmẽ, kee e'i kupa remẽ, i'ete. “Õ'õ, aje. Ivo katu tè oposiko ipi. Nijamã'ẽi nivoi mã'ẽ rè”, te'i ijupe kupa. “Opãtavõ gatu ojimomorijau mãe kõ ipi”, te'i ãmẽ kupa. Apijarerà tè poropãtavõarà rõmõ toiko. 11 A'evo ve poropãtavõarà rerekwarà ivo mã'ẽ rõmõ tojikuwa teve.c Kee. Jane kõ remimomojy rõmõ tè toiko. Nijayvu ai ãmõ kõ pè ipi mã'ẽ tè. Ãmõ, omãrãkuwaa nomoyvypyokai oka'ua pupe iko mã'ẽ tè. Ãmõ, otekokuwavay ikatusa rupi poroereko katua rè mã'ẽ tè. Aje ywe'e e'i mã'ẽ tè. Manyvo ekoi remẽ temirovija tè. Oterẽ jẽ a'evo erekwarà ekoi mã'ẽ kuwa jõvijã poropãtavõ mã'ẽ rõmõ ekoi. Ivo jẽ erekwarà mã'ẽ tè kuwa poropãtavõarà rõmõ ekoi. 12 Pe'ĩte erekwa mã'ẽ tè i'ete kuwa poropãtavõarà rõmõ ekoi. Ojimojõvijã gatu wãkarãgwerà kõ pè, opyriwarà kõ pè teve mã'ẽ tè. 13 Ava mõ oposiko katu jõvijã poropãtavõarà rõmõ remẽ, Jesu koty rewarà kõ remimomojy rõmõ ekoità ãmẽ. Kiristu Jesu rè jirovijaa rè oporegeta remẽ, nojipirau'ãi tesõ imomewa ipi. [Awyjepa rã'ĩ ãwĩvoa akusiwa jõvijã kõ pyteporoa rewarà.]
“Nojikuwai maekwerà sikuwa ky'y”, e'i mã'ẽ
14 Ãwĩvoa akusiwa neupe terejimotekokuwavay. Apota aa neresa. Nakuwaive manyvo remẽ aatà ajamã'ẽ. Ajawyi eremikusiwarerà tè rã'ĩ amonookatà neupe. 15 Ãmẽ tè kãramõ sa'u naai sikaepo nepyri remẽ, nekuwa jẽtà manyvo jaiko Janejare'e rè jajirovija mãe kõ rõmõ. Janejare'e oiko teãmã mã'ẽ koty rewarà kõ jaiko rewarà mõ aepo a'e ene. Ãmẽ tè eremikusiwarerà aje ywete mã'ẽ rupi janeikoa pekuwa jẽtà, Jesu koty rewarà kõ atyry rõmõ. Janejare'e janerereko katuoka wayvu e'e rupi tijaiko ipi. Pirujẽ ojirovija ee mãe kõ pewarà mõ aepo a'e. 16 Aje ikasiay wete Janejare'e remikuwaoka jane kõ pè ky'y. Nojikuwai 'eteay Janejare'e ayvukwerà janerereko katua rewarà mijã. Age'e tè katu jane kõ pè ojikuwa ky'y, kee e'i jane kõ pè mã'ẽ:
Jesu ojimojane yvy pè iko.
Ivo katua Janejare'e 'Ãg omojikuwaoka jane kõ pè, “Aje ywete Janejare'e Remimuurerà tè ãwĩ, Janerõvijã ywete rõmõ”, te'i kupa.
Janejare'e remĩgwai yvapewarà kõ pè ojisaoka.
Ojirovija ee mãe kõ omojenu jenu eewarà nokuwai mãe kõ pè erokwa,
pirujẽ ãmõ yvy rupiwarà kõ pè.
Ajaate ijatyray mirà kõ ojirovija ee, yvy yvy rupiwarà kõ.
Janejare'e omoẽ imono okoty imojõvijã wasu opyri.
Aepo jaa sikuwa katu ky'y.