Janejare'e moe'ea rewarà
2
Manyvo Janejare'e pè japoregeta mã'ẽ rè oromotekokuwatà ky'y, Janejare'e rè jajimoaty jaja'a mã'ẽ rè. Kee jaiko. Pirujẽ jane kõ pewarà mõ tijaporegeta Janejare'e pè ipi. Ãmõ, janeporijau ma'e rè mã'ẽ tijamome'u teve ijupe. Ãmõ, Janejare'e pirujẽ jane kõ pãtavõa rè tijaporegeta teve ijupe, a'evo toporijauesa kõ. Janerorya janerereko katua rè tijamome'u teve Janejare'e pè imoe'e ipi. A'evo tijaiko Janejare'e pè japoregeta remẽ ipi. 2 Ãmõ, yvy pewarà jõvijã wasu kõ pewarà mõ tijamome'u Janejare'e pè ipi. Ãmõ, pirujẽ jane kõ rõvijã kõ pewarà mõ teve. Taa pewarà jõvijã kõ teve. Janejare'e tomotekokuwa kõ. Toporijauesa kõ teve. Ãmẽ tè naiko'ãi miraia kõ. Ãmẽ tè niwasu'ãi janerekoa ky'y. I'ete a'evo jaiko Janejare'e simomojy mãe kõ rõmõ jaiko ipi. 3 A'evo japoregeta Janejare'e pè remẽ, ikatuay wete ãmẽ. Oryvay a'evo japoregeta ijupe remẽ ipi, janerereko katuarà tè a'e rewarà mõ. 4 Opota pirujẽ jane kõ wereko katu jimomorijau wasua wyi janerereko, tijajimomorijau e'ã. Opota wayvu rè aje ywete mã'ẽ rè tijajimotekokuwavay ipi. A'evoa tè Janejare'e opota ipi.5 Pe'ĩte Janejare'e. Pe'ĩte teve janeaiwererà ky'a'oarà. Kiristu Jesu tè a'e. A'e tè ojimojane mã'ẽ. A'e rõmõ'ĩte poromoaty kuwa poroeraa Janejare'e pyri mã'ẽ. 6 A'e ojime'ẽ jane kõ aiwererà repy rõmõ omãnõ. A'evo janemomoipa janeaiwererà kasia wyi. Janejare'e tè Jesu mãnõa rã e'ipa amãtejẽ. “A'e 'ary pè katu Era'yry omãnõtà”, e'ipa amãtejẽ Tuu oupe. Jesu mãnõa rupi jakuwa Janejare'e opota janerereko opyri, janejãvijõ jẽ.
7 Aepo mojenuarà rõmõ epyteporo emono. Pirujẽ taa taa kõ rupi emono, Jesu rekoa tamojenu erokwa ipi. Juteu rõwã mãe kõ pè ywesõ emono wayvukwerà tamojenu erokwa. “Aje ywete Janejare'e ayvu poromo'e ee mã'ẽ”, a'e ijupe kõ ipi. “Ajawyi tapejirovija katu Jesu rè penõvijã rõmõ ky'y”, a'e ijupe kõ ipi. Aje ywete aepo a'e ene. Ewari rõwã a'e ene.
Kee tijaiko Janejare'e moe'ea pè remẽwarà
8 Kee Jesu koty rewarà kõ toiko, ojimoaty Janejare'e moe'ea pè kupa remẽ, pirujẽ taa kõ rupi ojimoaty kupa remẽ. Kwaima'e kõ tè toporegeta Janejare'e pè ipi. Kwaima'e ivo ekoi mãe kõ kõrijõ tè. Tojikõ'õ e'ã ojee kupa ipi. Tijayvu teitete e'ã ojiupe kupa ipi. A'evo apota Jesu koty rewarà kõ toiko, ojimoaty Janejare'e moe'ea pè kupa remẽ ipi.
9 Ãmõ, wãivĩgwerà kõ ootà Janejare'e moe'ea pè ojimoaty remẽ, jitupia rè rõwã ootà kupa. Oyru topypy te'ĩte eraa kupa. Ãmõ, moma'e epy wete mã'ẽ topypy e'ã eraa ojimogãtarõa rõmõ kupa. Tojimokatu te'ĩte kõrijõ jimoatya pè ootà kupa remẽ. 10 “Janejare'e koty rewarà tè ije”, e'i kupa remẽ, ivo toiko kupa ãmẽ. Toporopãtavõ iko kupa ipi. Ivo toporoereko kupa ipi. I'ete a'evo ekoi kupa remẽ.
11 Ãmẽ ojimoaty Janejare'e moe'ea pè kupa remẽ, wãivĩgwerà kõ tojapyaka katu ikenẽ Janejare'e ayvu rè poromo'e mãe kõ rè. Janejare'e koty rewarà kõ rõvijã kõ toerovija katu teve kupa. 12 Napotai wãivĩgwerà kõ tomotekokuwa kwaima'e kõ [jimoatya pè] ipi. Tojimojõvijãoka e'ã ikõ kwaima'e kõ 'arà kyty wãivĩgwerà nẽ. Tojapyaka katu kõrijõ jimoatya pè kupa ipi. Tipu e'ã enu kupa ipi. 13 Kee rewarà mõ. Karamoe remẽ itõkõ Janejare'e tãmõ Atão ypy oinõ. Ajaire tè sa'i Eva oinõ erekwarà rõmõ. 14 A'evo remẽ Atão rõwã ãjãgai rõvijã pè ojimoripeoka. Erekwarà tè itõkõ a'evo ekoi. Nivoi ekoi ãmẽ erekwarà ky'y. Janejare'e rekoa ojavy ypy ijãparõga mõ. Ajawyi tè wãivĩ tojimojõvijãoka e'ã kwaima'e 'arà kyty, a'e ene. 15 Ajamã'ẽ wãivĩ imemy remẽ, ayay ijupe ipi. Ajamã'ẽ kee ekoi remẽ nopa'ãi Janejare'e poroereko katua ijupe. Jesu rè ojirovija katu jẽ remẽ. Poroau jẽ remẽ. Ivo katu ekoi jẽ remẽ. Jitupia rè rõwã ekoi remẽ teve. A'evo ekoi mã'ẽ Janejare'e omoigo karuarutà opyri ereko ãmẽ.