2 Eremikusiwarerà amonotà ene, Timoteu. Era'yre'e vo ene, eayvu rupi tè Jesu rè nejirovija rewarà mõ.

Janejare'e ikõ tanerereko katu okatuaya rupi ipi nẽ. Taneporijauesa teve ikõ ipi nẽ. Tanepy'amopiryvypy katu teve ikõ ipi nẽ. Janerõvijã Kiristu Jesu ve ta'evo ikõ nerereko nẽ.

3 Jypy remẽ aatà Masetonia yvy kyty remẽ itõkõ kee a'e ene:

– Ike Epesu taa pè terepyta jẽ poromotekokuwa, a'e ene.

Ajaire itõkõ oroity aa Masetonia yvy kyty. Ajawyi age'e terepyta jẽ a'e taa pè, a'e neupe. Kee rewarà mõ. Oiko Janejare'e ayvu rè poromo'e rã'ãga mãe kõ mõ a'e taa pè rewarà mõ. A'e kõ pè taneayvukasi, a'e ene. Kee tere ijupe kõ:

– Tapepoi penãmõi kõ werovija maekwerà wyi ky'y. A'evoa rè tapemo'e e'ã ãmõ kõ ky'y, ere ijupe kõ. 4 Penõvijãgwerà karamoe remẽwarà kõ rekoa rè sõ pejimogeta tite ipi! A'evoa rè pejimogeta tite rewarà mõ, napejimokasiokai Janejare'e rè pejirovijaa rè! Tapepoi ikõ a'evoa wyi nẽ, ere ijupe kõ. Janejare'e rekoa ywesõ ikasiay penõvijãgwerà rekoawerà wyi, pejimogeta ee mã'ẽ wyi. Ajawyi ekoa rupi kõrijõ tè tapeiko ky'y, tere ijupe kõ.

5 Aepo ere mã'ẽ rupi ekoi kupa remẽ, aje ywete ojiauvaytà ojee kupa, Jesu koty rewarà kõ rõmõ. Wayvu rupi kõrijõ tè rõwã ojiauvaytà ojee kupa. Opy'a pupe tè ojiauvaytà ojee kupa. Ãmõ, ivo tekoua okuwatà kupa. A'e rupi kõrijõ tè ekoità ãmẽ kupa ky'y. Ãmõ, aje ywete Jesu rè ojirovijatà ãmẽ kupa. Ajawyi aepo a'e neupe teremojenu ijupe kõ.

6 Na'evoi jane kõ mõ pepytery pè ekoi ajamã'ẽ. A'e kõ ne'i katu ywe'ei tite Jesu rerovijaa rè kupa. Oporegeta teitete teve ojiupe kupa ipi. 7 Opota ipe tãmõ Moisesi remikusiwarerà rè poromo'e kupa. Ajamã'ẽ poromo'e teywete kupa. Otekokuwa e'ãa rupi tè poromo'e iko kupa, ãwisõ “Orokuwa katu” e'i epe ojimoe'e rõmõ kupa remẽ.

8 Kee mã'ẽ jakuwa. Ikatuay wete Janejare'e ayvu ivo tekoua rewarà, tãmõ Moisesi pè okusiwaoka maekwerà. A'e rupi tè janeaiwererà ojikuwa janeupe. 9 Ivo teãmã sõ jaiko remẽ, Janejare'e nokusiwaoka'ãi kuwa tãmõ Moisesi pè mijã. Nivoi jaiko rewarà mõ tè okusiwaoka. Kee ekoi mãe kõ pè ywesõ okusiwa. Oõvijã ayvu rupi noikoi tite mã'ẽ pewarà mõ. Tekoua katu rupi noikoi mã'ẽ pewarà mõ. Oiko teywete iko mã'ẽ pewarà mõ. A'e a'e kõ pewarà mõ okusiwa. Ãmõ, Janejare'e 'Ãg omojaiwe mã'ẽ pewarà mõ. Janejare'e rè noja'a tari mã'ẽ pewarà mõ. A'e a'e kõ pewarà mõ teve okusiwa. Ãmõ, oõvijãgwerà kõ ojuka mãe kõ pewarà mõ okusiwa. Porojuka mãe kõ pewarà mõ.^a A'e a'e kõ pewarà mõ teve okusiwa. 10 Ãmõ, ojimomy'a mãe kõ pewarà mõ. Ãmõ, kwaima'e ojiupiu a'evo ekoi mãe kõ pewarà mõ. Ãmõ, wãivĩ ojiupiu a'evo ekoi mãe kõ pewarà mõ teve. Ojimorara ai rupi tè oposiko ojee mãe kõ pewarà mõ. A'e a'e kõ pewarà mõ teve okusiwa. Ãmõ, mirà kõ rè imona mãe kõ pewarà mõ. Ãmõ, iwari wari mãe kõ pewarà mõ. Ãmõ, nivoi mã'ẽ omo'y teywete poromojaiwea rõmõ mãe kõ pewarà mõ.^b Wãisõ ojikwa age'e remẽ okwa. A'e a'e kõ pewarà mõ teve okusiwa. Ãmõ, Janejare'e rekoa rupi noikoi mãe kõ pewarà mõ. A'e a'e kõ pewarà mõ tè Janejare'e wayvu okusiwaoka [karamoe remẽ tãmõ Moisesi pè]. Ojimoape ijayvu renu tare'ã wyi mãe kõ pewarà mõ okusiwaoka.

11 Ajamã'ẽ owaray Janejare'e ekoi. Temimoe'eay teãmã ekoi Janejare'e. Ivo tekoua rè janemotekokuwa wayvu e'eay rupi ipi. [Ikatuay wete mã'ẽ tè ome'ẽ janeupe ipi. Wayvu e'eay tè omuroka janeupe ãmẽ ky'y. Ajawyi Wa'yry Jesu tẽ tesõ omuu jane kõ koty tomãnõ rã'ĩ janeaiwererà repykarà mõ ky'y.] A'e rè tè poromotekokuwa aiko ipi, Janejare'e ayvu e'eay rè tè.

– Ekwa eayvu e'eay rè poromotekokuwa eiko, e'i Janejare'e eupe rewarà mõ tè a'evo aiko.

12 Ajawyi, kee a'e Janerõvijã Kiristu Jesu pè aporegeta ijupe ipi remẽ: “Eroryvay nere, erereko katu tè jẽ rejupa ipi rewarà mõ. Emokasi katu tè jẽ rejupa ipi rewarà mõ eroryvay nere ipi. Ãmõ, epyteporo neremĩgwai rõmõ rejupa, ãwisõ neayvu e'e tamojenu erokwa. Neayvu rupi katu aiko ipi mã'ẽ rõmõ erereko rejupa rewarà mõ epyteporo rejupa. Ajawyi eroryvay nere”, a'e Jõvijã Jesu pè ipi.

13 Jypy remẽ Jesu rè aporegeta ai tite ikuwa e'ã ipi mijã. “Nikatui teipõ Jesu”, a'e tite ikuwa e'ã mijã. Ajawyi ojirovija ee mãe kõ aeka imomorijau kõ ipi mijã. Apyy kõ eraa imopã'ã kõ ipi mijã.^c Natekokuwaive ivo tekoua rè mijã. Nakuwai nivoi a'evo aiko mijã. A'evo ipe aiko remẽ, Janejare'e eporijauesa jẽ tesõ ãmẽ, ãwisõ najirovijaive ee remẽ. 14 Okatuaya rupi Janerõvijã ywete epyteporo jẽ erereko katu ky'y. Ikasiaya rupi ajirovija ee ky'y. Erereko katuay wete. Eporijauesa ky'y. Ojiauvayoka eupe ky'y. A'evo jaiko, Kiristu Jesu revejẽ jaiko ipi remẽ.

15 Kee jaa “aje ywete” taoty. Kiristu Jesu uu yvy kyty nivoi jaiko teãmã mãe kõ rereko katuarà rõmõ. Ije ywesõ nivoi aiko pirujẽ jane kõ wyi mijã. 16 Ajamã'ẽ eporijauesapa teãmã sikaepo erereko. Ajawyi kee taoty: “Haa! Pauru si Janejare'e oporijauesa! Ãwisõ nijaporijauesa kuwa'ãi mijã remẽ! Ajamã'ẽ oporijauesa jẽ tesõ Pauru!” taoty. “Ãwĩvo vetà eporijauesatà”, taoty. “Emã'ẽ! Nivoi 'ete ipe Pauru ekoi remẽ, Jesu Kiristu oporijauesa jẽ ãmẽ!” taoty. “Ãwitõ wãrõ puku Pauru jipy'amoteea rã, ãwĩvo ve rõwã põkõ janerãrõ ipi!” taoty teve ojirovijatà ee mãe kõ rõmõ. Ãmẽ tè jaiko karuarutà ky'y. A'evo Janejare'e eporijauesa, poroporijauesa ywetea jikuwaparà rõmõ. 17 Janerõvijã ywete Janejare'e, pe'ĩte mã'ẽ tè. Mãerã tè Jõvijã wasu rõmõ teãmã ekoi. Nomãnõ'ãi mãerã tè mã'ẽ teve. Nomã'ẽytyi ee mã'ẽ tè ajamã'ẽ. A'e tijamoe'e karuaru ywete ipi. Õ'õ, awyje katu ãwĩvo jamoe'e karuaru jaiko ipi.

18 Ejapyaka rã'ĩ ikõ eayvu rè nẽ, tuku. Jypy remẽ itõkõ Janejare'e ayvu mojenuarà mõ omojenu amãtejẽ nerewarà, Janejare'e 'Ãg kasia rupi. Kee e'i neupewarà mõ: “Janejare'e ayvu omojenu jenutà jane kõ pè erokwa”, e'i. Aekwerà rupi katu tè nemome'u age'e ereko.

Ajawyi e'i maekwerà wyi tanerearai e'ã. Terejimokasi jẽ ikõ Janejare'e ayvu e'e mojenua rè nẽ. Terepi e'ã iwyi neiko, a'e ene. 19 Jõvijã Jesu rè terejirovija jẽ neiko. Terepoi e'ã iwyi. Ãmõ, tereja'a katu nepy'a tekokuwaa rè ipi. Oiko opy'a tekokuwaa rè noja'ai ywe'e tite mãe kõ. A'e kõ opoi ywe'e tite Jesu rekoa wyi, noja'a katui opy'a tekokuwaa rè kupa rewarà mõ. Ajawyi nivoi tekoua rupi ekoi ywe'e tite kupa ky'y. 20 A'e kõ vo tereiko e'ã ikenẽ. Imeneu vo tereiko e'ã. Ãmõ, Aresãtiri vo tereiko e'ã. A'e kõ opoi ywe'e tite Jesu rekoa wyi. Noja'a ywe'ei tite ojipy'amotekokuwaa rè kupa rewarà mõ a'evo ekoi kupa. Ajawyi ame'ẽ kõ rã'ĩ ãjãgai rõvijã Satanasi po pè, ãwisõ tomomorijau kõ rã'ĩ. A'evo remẽ tè maevo ojivyrĩ tarà mijẽ Janerõvijã rè ojirovija rõmõ kupa. Noporegeta teitete'ãi Janejare'e rè ãmẽ kupa ky'y.