3 Oiko Jesu rekoa rè nivoi poromo'e mãe kõ. A'e kõ ovo rupi teve poromotekokuwa ipi. Janerõvijã Jesu Kiristu ayvu pè “aje ywete” ne'i kupa. Ãmõ, ivo katua moregeta mã'ẽ noenu tari kupa ipi. Upi noikoi kupa. 4 A'evo mãe kõ ojimoe'e ywe'e tite Jesu koty rewarà kõ rovake ipi. “Ije ywesõ atekokuwa Janejare'e rekoa rè”, e'i tite jane kõ pè kupa ipi. Ajamã'ẽ notekokuwai 'eteay mã'ẽ tè sikaepo aepo e'i mãe kõ. Opota ojiayvuvaja vaja kõrijõ tè iko kupa ipi. Ovoarà kõ reve ojiayvuvaja vaja kupa ipi. Ãwĩvo ve ãmõ kõ reve ojiayvuvaja vaja kupa ipi. Ãmõ, ojimõarõ ojikoty kupa ipi. Ãmõ, oporegeta teitete ojiupe kupa. Ãmõ, nivoi mã'ẽ omo'y teywete ojee teve kupa ipi, ãwisõ ãmõ kõ “aje” te'i tite teve kupa. “Nivoi nepy'a pewarà”, e'i teywete jane kõ pè ipi. 5 A'evo ekoi kupa, ãwisõ ojevo jẽ rõwã jane kõ toiko. Opota tè wayvumoaioka ijupe kõ rewarà mõ tè aepo e'i kupa. Ajaate ojimoe'y e'yi ojiwyi kupa ky'y. Nokuwai ayvu aje ywete mã'ẽ ãmẽ kupa ky'y. A'evo teãmã ekoi kupa. Ãmõ, kee e'i tite kupa: “Emoma'e ywetetà Janejare'e ayvu rupi aiko remẽ”, e'i tite kupa.

6 Aje ajamã'ẽ ava mõ Jesu ayvu rupi ekoi remẽ, oryvaytà. Imoma'e ywete mã'ẽ wyi wete orytà, [ikatuay wete Janejare'e oja'a janere ipi rewarà mõ]. 7 Emã'ẽ kee mã'ẽ rè. Janesaky remẽ, moma'e kõ nisirekoi ipi. Ãmõ, aje ywete jamãnõ remẽ, moma'e kõ nijaraa kuwa'ãi janerupi teve ipi. 8 Ajamã'ẽ kamisa jareko remẽ, janeremi'õ rã uve teve remẽ, tijanepy'a katu ee ipi. 9 Ajawyi Jesu koty rewarà kõ mõ omoma'e moatya règà oja'a tite. Moma'e pyya règà oja'a tite kupa. Nikatu'ãi ãmẽ ijupe kõ. A'evo ekoi kupa remẽ ywesõ moma'e kõ opota ywe'e titetà. Janerõvijã rè ãmẽ noja'a'ãi ywe'e tite kupa. Nivoi ekoità ãmẽ kupa, moma'e pyya rè ywesõ oja'a kupa remẽ. Ovote ojimoaiwetà iko ãmẽ kupa. 10 Ajawyi moma'e opota mã'ẽ ywesõ nivo'ãi ekoi ãmẽ. Oiko Jesu rekoa rupi ekoi maekwerà kõ, ivo ekoi paire opoi ywe'e tite Jesu rerovijaa wyi. Ajaire ijãgyo ywetetà kupa ky'y. “Moma'e rã sõpõkõ a'evo aiko!” e'i titetà oupe, moma'e kõ pyya rè ywesõ oja'a tite Jesu wyi kupa rewarà mõ.

11 Ajamã'ẽ ene nevo rupi teve, Timoteu. Janejare'e remĩgwai tè ene. Ajawyi mãerã ikõ terejimokasi Janejare'e remimota rupi neiko nẽ, a'e ene. Kee tereiko. Nivoi tekoua pe wyi ikõ ejisyry ipi nẽ. Ejimokasi ikõ Janejare'e rekoa rupi neiko nẽ. Mãerã tè Janejare'e rè terejirovija. Awyje toporoauvay neiko. Ãmõ, terejimomãatã jẽ Janejare'e rekoa rè, nejimomorijau ipe neiko remẽ. Ikatusa rupi tereja'a katu ãmõ kõ rè ipi. 12 Jesu rè nejirovija remẽ, terejimokasiay jẽ ijayvu rupi neiko. Ãmẽ tè mãerã neikotà ipyri, ãwisõ a'e rõmõ nepyteporo nemowaite. Kõitokõ aty wasu rovake kee ere: “Awyje Jesu Kiristu koty rewarà rõmõ aikotà”, ere ovake kõ. Aekwerà rupi tereiko jẽ.

13 Pirujẽ tekoua reinõgarà tè Janejare'e. A'e rovake eayvukasità. Kiristu Jesu rovake teve. A'e ojime'ẽ takatu omãnõtà remẽ itõkõ, Janejare'e ayvu e'e omojenu jẽ jõvijã Põsiu Piratu pè.^b A'e rovake tè eayvukasità ene. 14 Kee a'e ene. Ãwĩ pirujẽ akusiwa mã'ẽ rupi ikõ tereiko nẽ. Ajaate Janerõvijã Jesu Kiristu vãea 'arà mẽ a'evo tereiko jẽ. Ava mõ nivoi mã'ẽ nomo'y'ãi nere ãmẽ. Ava jẽ rõwã ijayvu aità nekoty ãmẽ. Ajawyi a'evo jẽ tereiko, a'e ene. 15 Janejare'e tè ivãea 'arà okuwa. Wemikuwa rupi tè a'evotà.

Ikatuay wete tè Janejare'e. A'e rõmõ'ĩte Jõvijã wasu rõmõ ekoi. A'e ywesõ ijayvukasiay wete pirujẽ yvy pewarà kõ jõvijã kõ wyi. 16 A'e rõmõ'ĩte nomãnõ'ãi 'ete mã'ẽ teve. Eny tesõ poroeakwaso mã'ẽ pupe tè ekoi. Ava jẽ rõwã ovote oo kuwa ipyri. Ava jẽ rõwã omã'ẽ ee ipi. Ava nomã'ẽ'ãi ee teve. Nomã'ẽ'ãi kuwa ee. A'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.

17 Kee ere teve imoma'e ywete mãe kõ pè: “Terejimoe'e e'ã [nimoma'ei mãe kõ rovake]. Tanerako'i e'ã ikõ nemoma'e kõ rè nẽ. Opa mãerã tè ãwĩ, nijanemokatu kuwa'ãi ãwĩ jimomorijaua wyi rewarà mõ. Janejare'e kõrijõ tè kuwa poromokatu. Nopai mã'ẽ tè Janejare'e. Temirovija teãmã mã'ẽ tè a'e. A'e rè kõrijõ tè terejirovija ajawyi. Aje a'e tè janemoma'enõ owaray tijaiko”, ere ijupe kõ. 18 Ãmõ, kee ere teve ijupe kõ: “Ivo ikõ toporoereko ipi nẽ. Poropãtavõarà rõmõ ikõ eiko nẽ. Tanerãkate'ã e'ã ikõ nemoma'e kõ rè ipi nẽ. Tereme'ẽ ikõ nema'e kõ mõ iporijau ee mãe kõ pè ipi nẽ”, ere imoma'e ywete mãe kõ pè. Aepo ere imogeta kõ.

19 A'evo poropãtavõ kupa ipi remẽ, aje Janejare'e emireko rã kõ omokatu amãtejẽtà yva pè, mãerã oiko karuarutà ima'e ijupe. A'e ywesõ epy wete mã'ẽ vo ijupe kõ rewarà mõ oryvaytà oiko karuarua rã rè iko kupa.

20 Janejare'e remimota rupi terejireko katu ipi, tuku. Ijayvu rupi tereiko ipi. Terejapyaka e'ã ijayvu teitete mãe kõ ayvu rè, ayvu aje ywete mã'ẽ rè rõwã. A'evoa pè ava kõ mõ, “Poromotekokuwa e'e mã'ẽ teipõ”, e'i tite. 21 A'e rupi ekoi ywe'e tite kupa. A'evo opoi ywe'e tite Jesu rekoa wyi kupa.

Janejare'e ikõ tapenereko katu okatuaya rupi nẽ.

[Awyjepa rã'ĩ aepo a'e ene eremikusiwarerà rupi.]