11
Ãwitõ Kiristu reruparà mõ aiko ipi, ãwĩvo ve tapeiko, evo jẽ, a'e pejẽ.a“Tijamojaiwe e'ã Janerõvijã ywete”, e'i mã'ẽ
2 Aje napenearai ewyi ipi. Eayvu wyi teve napenearai ipi. Pirujẽ poromotekokuwa ee maekwerà rupi katu peiko ipi. Ajawyi eroryvay pene aiko ipi. 3 Ajawyi kee jaa rè poromotekokuwa sa'u jẽtà aiko. Erekwapa mã'ẽ werekwarà rõvijã rõmõ tè ipi. A'evo ve Kiristu pirujẽ Janerõvijã rõmõ tè ekoi. Ivo ve, Janejare'e Kiristu rõvijã rõmõ teve ekoi. 4 Ajawyi pejimoaty Janejare'e pè peporegeta remẽ, ikatu kwaima'ekwerà tojeãkãõvã e'ã iko.b Nivoi kwaima'e ojeãkãõvã oporegeta Janejare'e pè pepytery pè iko remẽ ipi. Janejare'e ayvu omojenu remẽ teve. A'evo remẽ Kiristu tè omojaiwe kuwa ãmẽ kupa. 5 Ivo ve nivoi wãivĩ nojeãkãõvãi pejimoatya pè Janejare'e pè oporegeta iko remẽ. Ãmõ, Janejare'e ayvu omojenutà iko remẽ. A'evo sõ ekoi remẽ, “Emẽnà wyry kytywarà rõwã ije”, ejaa kuwa mijã. Omosĩoka kuwa omẽnà ereko ãmẽ mijã. Wãivĩ nojeãkãõvãi mã'ẽ a'evo ve jamoapituku tojimosĩoka mã'ẽ.c 6 Ãmẽ wãivĩ mõ nopotai sõ ojeãkãõvã remẽ, “Neapira jẽsi eeta ajawyi!” tapejẽ ijupe tojimosĩoka ãmẽ ky'y.d Ajawyi, wãivĩgwerà tojeãkãõvã kõrijõ pejimoatya pè iko ipi, a'e pejẽ. 7 Ajamã'ẽ kwaima'ekwerà tojeãkãõvã e'ã, a'e pejẽ. Janejare'e kwaima'e oinõ remẽ, okoty rewarà rõmõ tè oinõ. Wãivĩgwerà ãmẽ kwaima'e koty rewarà rõmõ tè oinõ.e 8 Janejare'e janereinõ ypy remẽ itõkõ wãivĩ pẽgwerà rõwã kwaima'e rõmõ oinõ. Kwaima'e pẽgwerà tè itõkõ oinõ wãivĩ rõmõ. 9 Wãivĩ pewarà mõ rõwã Janejare'e kwaima'e oinõ. Kwaima'e pewarà mõ tè wãivĩ oinõ.f 10 Ajawyi pejimoaty Janejare'e rè peja'a remẽ, wãivĩ kõ toeru wãkãõvãa ereko ipi, a'e pejẽ. Janejare'e remĩgwai yvapewarà kõ rewarà mõ ta'evo ekoi kupa. A'e kõ rovake ojikuwatà omẽnà wyry kytywarà rõmõ iko kupa.
11 Janerõvijã ywete koty rewarà tè jane. Ajawyi wãivĩgwerà ovote noiko'ãi kuwa kwaima'ekwerà e'ãte. A'evo ve kwaima'ekwerà noiko'ãi kuwa ve wãivĩgwerà e'ãte. 12 Ãwitõ jane ypy remẽ, Janejare'e kwaima'e ypy oinõ mã'ẽ pe wyi wãivĩ oinõ. A'evo ve, kwaima'ekwerà, wãivĩgwerà pupe wyi oẽ imemyry rõmõ ipi. Pirujẽ jane kõ Janejare'e wyi tè oẽ. Ajawyi aepo a'e pejẽ.
13 Pemã'ẽ. Kee rõwã põkõ. Pejimoatya pè peporegeta Janejare'e pè remẽ, ni'ei wãivĩ nojeãkãõvãi remẽ. Õ'õ rõwã põkõ? pejẽ pekuwa ãmẽ. 14 Ãmõ, kee a'e pejẽ. Ekoa tè rõwã kwaima'e ijapira voko mã'ẽ. Wãivĩ tè ijapira voko ipi. Ajawyi kwaima'e ijapira voko remẽ, wãivĩ rè tè ojisu'u kuwa peupe ãmẽ iko. A'evo remẽ ojimosĩoka kuwa iko ãmẽ.g 15 Wãivĩ ãmẽ ekoa teãmã a'evo ekoi. Ijapira voko teãmã wãivĩ iko ipi. Ikatuay a'evoa ijupe. Ijapira voko ijãkãõvã mã'ẽ vo ijupe. 16 Ajawyi pejimoatya pè wãivĩ nojeãkãõvãi sõ oporegeta Janejare'e pè iko remẽ, nivo'ãi ãmẽ. Na'evoi teãmã Jesu koty rewarà kõ rõmõ jaiko ipi.
“Janejare'e morya rõmõ tapeiko pejimoaty remẽ”, e'i mã'ẽ
17 Eretãrãgwerà kõ, kee jaa penewarà aenu. Janejare'e pè pejimoaty remẽ, jimorya rõmõ rõwã sõ peiko! A'evo peiko remẽ, napejipy'amokasi ojee peiko ipi. Manyvoa rã rõmõ rõwã pejimoaty ãmẽ, a'e pejẽ! 18 Kee jaa ojenu ije penewarà: “Korĩtu wãnà kõ ojimoe'y e'yi ojiwyi iko ky'y”, ejaa ojenu ije. “Nojesa tari iko kupa”, ejaa ojenu ije. Aje, mape remẽ a'evo peiko ipi. 19 Aje, ikatu pejimoe'yi peiko remẽ. Ãmẽ tè penewarà ojikuwatà, ava põ ivo katu ekoi mã'ẽ, ãmõ, ava põ nivoi ekoi mã'ẽ.
20 Ajamã'ẽ pejimoaty Janejare'e rè pekupa remẽ, pejimoaty te'ĩte peiko ipi. Janerõvijã ywete rekoa rè rõwã peja'a peiko ipi. Janerõvijã ywete mãnõawerà rè rõwã peja'a peiko ipi. Peja'a maevo sõ tite tè ee peiko ipi. [Pejimi'ua rè ywesõ tè pejimoaty peiko ipi! Manyvo wetesi a'evo peiko?] 21 Kee peiko ywe'e tite ipi mã'ẽ ojenu ije. Jimiwa pè pejimoaty peiko remẽ, waite ite penemi'õ rã peeru iwa ipi. Ojeeve rõwã pejimi'u peiko ipi. Ajawyi ãmõgwerà ijamyay iko. Ãmõgwerà oka'u tẽ tesõ iko. Aje rõwã sipõ a'evo peiko? 22 Ãwĩvo pejẽ pejimoaty remẽ, nivoi peiko ipi. Uve ipe penetã. Penetã wyry pe wyive pejimi'u amãtejẽ kuwa pejo ipi. Ãmõ, uvary pe'u amãtejẽ kuwa pejo ipi. A'evo peiko remẽ, pejirõarõ tè Janejare'e koty rewarà kõ rõmõ peiko ipi. Ãmõ, nuvei emi'õ rã mãe kõ pemosĩoka teve ereko ipi. “Pauru tijanemoe'e”, pejẽ ywe'e tite sipõ eupe peiko? Ãnĩ! Noporomoe'e'ãi aiko ky'y.
23 Janerõvijã ywete omojenu eupe mã'ẽ rè tè itõkõ poromotekokuwa. Imãnõawerà rè jaja'a mã'ẽ rewarà rè poromotekokuwa. Kee a'epa itõkõ pejẽ: Janerõvijã Jesu a'ey pya Jutasi ome'ẽtà ãpã kõ po pè remẽ itõkõ, Jesu ojimoaty wemimo'ekwerà kõ reve upa. Ãmẽ itõkõ kee Jesu wereko. Meju opyy. 24 Omoete rã'ĩ itõkõ Janejare'e ee. Aja paire itõkõ meju openo peno imosãi erokwa. Kee e'i ãmẽ ijupe kõ: “Aã pepyy iwa. Epirà ra'upa tè aã meju ame'ẽ tape'u, e'i. Amãnõtà peupewarà mõ ky'y. Agyvoa rupi emãnõawerà rè peja'atà”, e'i itõkõ ijupe kõ. 25 Ãwĩvo ve ojimi'upa kupa paire itõkõ, Jesu kaneku opyy, uvary aisiriri katu mã'ẽ rena. Kee e'i ijupe kõ: “Aã pe'u. Kee jaa tè agyvo. Aã rupi ojikuwatà Janejare'e rè jajimorya. Amãnõ remẽ eruwykwerà oẽtà opepeità peaiwererà repykarà mõ. Emãnõa rupi Janejare'e ayvu pyaukwerà aje ywete mã'ẽ ojiãparõtà penerekoarà rõmõ”, e'i. “Ajawyi aã pe'u remẽ, emãnõawerà rè peja'atà ãmẽ ipi. Awyje jẽ emãnõawerà rè tapeja'a peiko, ajaate avãe tarà mijẽ pepyri”, e'i Jesu.h
26 Ajawyi kee jaa rè tapeja'a ipi. Ãwĩvo peiko remẽ, Janerõvijã ywete mãnõawerà rè peja'a imojikuwa ipi, ajaate ovãe tarà mijẽ. Ajawyi a'evo jaiko ipi.
27 Ajawyi pejimoaty Janerõvijã ywete rè remẽ, uvary meju reve pe'u remẽ, ikatu kõrijõ tapeiko, aje tapejipy'amogeta imãnõawerà rè peiko. Nãwĩvoi sõ peiko remẽ, nivoi ywe'e titetà pejẽ ãmẽ peiko. Janerõvijã ywete mãnõawerà perõarõ ywe'e titetà ãmẽ. 28 Ajawyi kee tapeiko. Janerõvijã ywete rè meju uvary reve pe'utà remẽ upi upi tapejipy'amogeta rã'ĩ peiko. “Eaiwererà mõ põkõ nainõ gatui epy'a pè?” tapejẽ rã'ĩ peiko. [Ãmẽ oiko jẽ sikaepo peaiwererà mõ remẽ, pemome'u rã'ĩ Janejare'e pè tapepy'aky'a'o ãmẽ. A'evo paire tè Janerõvijã ywete mãnõawerà rè tapeja'a peiko ky'y.] 29 Nivoi peja'a rã'ãgagà peiko ee remẽ. A'evo remẽ perõarõ ywe'e titetà peiko ãmẽ. “Manyvoa rã rõmõ rõwã Jesu mãnõawerà”, pejẽ ywe'e titetà a'evo peiko rõmõ. 30 Ãwĩvo peiko ywe'e tite rewarà mõ, uve mõa'ãrõwã nipikasi mãe kõ pepytery pè iko. Ãmõgwerà itekorã iko. Ãmõgwerà okãjãma. 31 Ajamã'ẽ jajipy'amogeta rã'ĩ jaiko remẽ, nijajavy'ãi Jesu mãnõawerà rè jaja'a mã'ẽ rè ipi. Janejare'e nijanemago'ãi owyi ãmẽ. 32 Janemosã'ãga mã'ẽ teãmã Janejare'e. A'e tè janemomorijau rã'ĩ amãtejẽ janemoteea rõmõ ãmẽ. Nijanemoisyry'ãi ãmẽ, noerovijarive mãe kõ omoe'yi imoisyry owyi remẽ.
33 Ajawyi kee a'e pejẽ. Pejimoatytà Jesu mãnõawerà rè peja'a remẽ, ãmõ kõ vãea ikõ tapeãrõ rã'ĩ ipi nẽ. Ojevo jẽ tapeiko, a'e pejẽ. 34 Ava mõ ijamyay sikaepo remẽ, wetã mè tojimi'u amãtejẽ rã'ĩ ãmẽ. Ãwĩvo remẽ tè napejavy'ãi pejimoaty remẽ. Ãmẽ tè Janejare'e napenemavo'ãi peneity oo ãmẽ.
A'e a'e kõ rè noporomo'epaive aiko. Kãramõ aa pepytery pè avãe remẽ tè poromotekokuwa jẽtà aiko ky'y.