2 – Kovi kõ'ẽ tãmõ kõ rekoawerà moetea 'arà okwatà.^a A'evo remẽ jõvijãgwerà kõ ejukaokatà yvyra jipokana rè, e'i. A'evoa rõmõ Papa tè emuroka pepytery pè ajimojane mã'ẽ rõmõ taiko, e'i.

3 Aepo e'i Jesu remẽ jakatu, Juteu rõvijãgwerà kõ ojimoaty sikaepo upa. Kejõ. Janejare'e pè oporegeta mãe kõ rõvijã kõ. Ãmõ, Juteu rõvijã kõ mõ teve. Mokopejõ ojimoaty kupa. Jesu jukaa rã rè ojimogeta kupa upa. Kaipasi eu Janejare'e pè oporegeta mãe kõ rõvijã wasu pè. A'e retã wyry pè ojimoaty kupa upa.

4 – Manyvo ywe'età põkõ tyvija rupi Jesu sireko ipyy ijukaoka? e'i kupa. 5 Nikatui age'eve ajamã'ẽ, tãmõ kõ rekoawerà moetea rè jaja'a remẽ. Aty wasu kõ pytery pè tè Jesu ekoi. Ajawyi ijukaa rã okuwa sõ kupa remẽ, imiraità janere kupa, e'i ojiupe kupa.

6 Ãmẽ ajaire Jesu Petãnia taa pè tui, Simão retã mè. Ipisĩsĩma maekwerà tè Simão. A'e retã wyry pè Jesu tui. 7 Jesu ojitãrõ namesa 'aryvo ojimi'u upa. Ãmẽ wãivĩ mõ oike uu ikoty. Ipije mã'ẽ e'eay weru, epy wete mã'ẽ tè. Takuru sukyry tè ena. A'e pupe weru. Ãmẽ a'e ipije mã'ẽ ojoẽ Jesu ãkãg rè imogy upa. [Jesu rauvaya mojikuwaparà rõmõ a'evo wereko.]

8 Ãmẽ Jesu remimo'ekwerà kõ omã'ẽ ee remẽ, ojimõarõ ee kupa. Ajawyi kee e'i kupa:

– Ãwĩ wãivĩ ojimorara tesõ ipije mã'ẽ rè! 9 Karakuri repy rõmõ sõ ome'ẽ remẽ, opyy wete kuwa karakuri epykwerà rè mijã! Aekwerà omosãi kuwa iporijau mãe kõ pãtavõa rõmõ mijã! e'i kupa.

10 Ajamã'ẽ Jesu okuwapa aepo e'i kupa remẽ. Ajawyi e'i ijupe kõ:

– Teene. Pemopirai sõ wãivĩ. Tomogy nẽ ere. Ikatuay ãwĩvo erereko remẽ! e'i. 11 Iporijau mãe kõ oiko jẽtà pepyterà rupi, tapepãtavõ kõ, e'i.^b Ajamã'ẽ ije naiko puku'ãi pepytery pè, tapeja'a jẽ ere, e'i. 12 Ajawyi age'e jõ tè wãivĩ omogy ipije mã'ẽ eãkãg rè, e'i. [Ojiãparõ emãnõa rewarà mõ a'evo, e'i.] Ãwĩvo eryvy rã renone emokatu amãtejẽ, e'i.

13 E'i jẽ Jesu ijupe kõ:

– Kee ikõ tapeenu nẽ! Aje, kãramõ pirujẽ maipeve rupi Janejare'e ayvu e'eay jamojenu remẽ, aã wãivĩ rewarerà omojenu tevetà kupa. Agyvoa eewarà noje'o'ãi. Aje ywete aepo a'e pejẽ, e'i Jesu ijupe kõ.

14 Ãmẽ ajaire Jesu remimo'earà 12 mã'ẽ mõ oo sikaepo Janejare'e pè oporegeta mãe kõ rõvijã kõ pè oporegeta. Jutasi Sikarioti eu erà pè mã'ẽ a'evo ekoi. 15 Kee e'i:

– Mapejõ ywe'e põkõ karakuri peme'ẽtà ije, erõvijã ame'ẽ sõ pepo pè remẽ? e'i ijupe kõ.

Ãmẽ karakuri sĩ moeta tẽ tesõ ome'ẽ amãtejẽ ijupe kupa. 30 rõmõ tesõ ome'ẽ kupa.^c

16 A'evo paire Jutasi:

– Manyvotà pãwĩ areko ime'ẽ ipo kõ pè? e'i oupe upa.

Ajawyi wãrõ jẽ manyvo remẽ ywe'e ome'ẽtà.

17 Ãmẽ meju vororo e'ã wa 'arà okwa remẽ, Jesu remimo'earà kõ mõ uu ijupe javo.

– Mape kyty põ nepota oroo janejimiwa rã oromokatu tãmõ kõ jisyryawerà moetea 'arà renone? e'i kupa.

18 Ãmẽ Jesu omono kõ Jerusarẽ taa kyty kwaima'e mõ resa. E'i ijupe kõ imono:

– A'e kwaima'e peesa remẽ, kee tapejẽ ijupe: “Orerõvijã kee e'i imuu neupe: ‘E'arà ovãema ky'y’, e'i”, tapejẽ. “‘Neretã pupe tamoete tãmõ kõ rekoawerà eremimo'ekwerà kõ reve’, e'i jõvijã imuu”, pejẽ ijupe, e'i.

19 Oo ãmẽ kupa, Jesu ayvu rupi. Moetea 'arà renone oposiko kupa upa.

20 Ãmẽ pãtõma remẽ Jesu ovãema wemimo'ekwerà kõ reve, 12 mãe kõ reve. Ojitãrõ namesa 'aryvo ojimi'u kupa. 21 Ãmẽ ojimi'u kupa upa remẽ, e'i Jesu ijupe kõ:

– Aje kee a'e pejẽ. Ike janereve ekoi mã'ẽ mõ eme'ẽtà eãpã kõ po pè, e'i.

22 Ãmẽ aepo e'i Jesu remẽ, pirujẽ ijãgyoay kupa. Ãmẽ e'i ijupe kupa:

– Ije rõwã põkõ a'evo mã'ẽ rõmõtà aiko, jõvijã? e'i kupa, pirujẽ.

23 Ãmẽ Jesu e'i ijupe kõ:

– Eparapi pupe ojimi'u mã'ẽ a'evotà ekoi, e'i. 24 Pejapyaka katu. A'e rè tè kee a'e. Janejare'e Remimuurerà ajimojane mã'ẽ rõmõ tè ije. Amãnõ remẽ, Janejare'e okusiwaokapa amãtejẽ maekwerà rupi katu a'evotà emãnõa, e'i. Ajamã'ẽ ipojy aità tè eãpã kõ po pè eme'ẽtà mã'ẽ pè, e'i. Nisakyi remẽ ikatu kuwa ijupe mijã! e'i.

25 Ãmẽ Jutasi e'i rã'ãga Jesu pè:

– Eupewarà mõ rõwã põkõ aepo ere, jõvijã? e'i rã'ãga.

– Nevote nejimome'u ky'y! e'i ãmẽ Jesu ijupe.

26 Ãmẽ ojimi'u kupa upa remẽ, Jesu meju opyy. Omoe'e Janejare'e ee. Ajaire openo peno imosãi meju erokwa wemimo'ekwerà kõ pè, to'u kupa.

– Aã pepyy iwa. Epirà ra'upa tè aã meju ame'ẽ tape'u, e'i ijupe kõ.

[O'u ãmẽ kupa.]

27 Ajaire Jesu uvary aisiriri katu mã'ẽ rena opyy, kaneku. A'e rè omoe'e mijẽ Janejare'e. Ajaire omosãi erokwa ijupe kõ to'u kupa.

– Pe'u pirujẽ, e'i. 28 Eruwykwerà ra'upa tè aã uvary aisiriri katu mã'ẽ ame'ẽ tape'u. Kee jaa tè agyvoa. Ije amãnõtà penekovijarerà rõmõ. Eruwykwerà opeità. Emãnõa rupi mõa'ãrõwã mirà kõ aiwererà amoepypatà. Ajawyi Janejare'e “awyjepa” e'ità peaiwererà kõ pè ky'y. Ovo rupi teve Janejare'e penerekotà emãnõa rupi ky'y, e'i ijupe kõ.^d

29 E'i jẽ ijupe kõ:

– Awyje uvary aisiriri katu mã'ẽ na'u'ãi ky'y. Kãramõ tè a'u tarà mijẽ ipyau mã'ẽ peneve Janejare'e rena pè, emojõvijãoka emojikuwa remẽ, e'i.

30 A'evo paire Janejare'e pè ojĩga imoe'e kupa. Ojĩga kupa paire oo yvytyry kyty kupa, temitãgwerà ty kyty. Oriveiraty eu a'e temitãgwerà ty rerà pè mã'ẽ gyty oo kupa.

31 Ãmẽ Jesu e'i jẽ wemimo'ekwerà kõ pè:

– Age'e pya pejavatà ereity peo pekupa pemonyia rè, e'i. Ejukatarà kõ uu epyy remẽ, a'evo peikotà, e'i. A'evoa rã rè Janejare'e okusiwaokapa amãtejẽ karamoe remẽ. Aekwerà rupi katu tè a'evotà pejẽ, e'i. Kee e'i maekwerà rupi: “Kaneiru jarà ajukaokatà. Ãmẽ eimawerà kõ onurutà ojava oo. Ojimosãsãimatà ojava oo kupa”, e'i maekwerà rupi katu a'evotà peiko.^e

32 E'i jẽ ijupe kõ:

– Apoera tarà mijẽ, amãnõ maire. Aatà penenone, Karireja yvy kyty. [A'e pè poroãrõtà ajupa,] e'i.^f

33 Ãmẽ Peturu e'i:

– Ãnĩ! Ije noroity'ãi aa! e'i epe. Ãmõ kõ pirujẽ ojipirau nereity oo kupa remẽ, ije apyta jẽtà nepyri. Noroity'ãi! e'i tite mijã.

34 Ajawyi Jesu e'i ijupe:

– Aje aepo aporegeta! Age'e pya ereitytà neo rejupa! “Jesu nakuwai”, ere ã'ãtà eupewarà mõ, e'i. Moapy rõmõ tesõ aepo ere ã'ãtà, e'i. Masakara oje'ẽ e'ãve a'evotà. Oje'ẽ mijẽ remeve neja'atà eayvukwerà rè ky'y, e'i Jesu ijupe.

35 Peturu noerovijai tite ajamã'ẽ, aepo e'i Jesu remẽ.

– Noroity'ãi ije ãmẽ aa! e'i mijẽ. Nejuka sõ kupa remẽ, nerevejẽ tejuka ãmẽ kupa! e'i epe ijupe.

Jesu remimo'ekwerà kõ pirujẽ aepo e'i epe.

– Ije ve noroity'ãi aa, e'i tite kupa mijã.

36 Jesu oo oporegetatà Uu pè mã'ẽ pè ovãe. Jesemani eu a'e pè. A'e Oriveiraty yvytyry pè tui. Emimo'ekwerà kõ oo upi. Ovãema kupa remẽ, e'i Jesu ijupe kõ:

– Pepyta rã'ĩ peapy ike erãrõ pekupa, e'i. Wãime kyty sa'u aatà aporegeta Papa pè, e'i.

37 Opyta ãmẽ kupa. Peturu kõrijõ weraa oupi. Ãmõ, Semeneu ra'yry kõ. A'e Tiaku. Ãmõ, Juwão. Mokopejõ weraa kõ. A'evo remẽ ywesõ ijãgyoay wete Jesu.

38 Ãmẽ e'i Jesu a'e kõ pè:

– Ayay tesõ eãgyoa epy'a pupe. Amãnõtà 'ejẽ tesõ, e'i. Erãrõ rã'ĩ ike pekupa, e'i. Tapemãrãmoa'u jẽ ikõ ajamã'ẽ peiko, ereve nẽ, e'i.

39 Aepo e'i paire Jesu wãime sa'u oo. A'e rõmõ'ĩte oo ky'y. Ojimoenãpa'ã ojayvy yvy pè upa. Uu pè oporegeta upa. Kee e'i:

– Emomorijaua rã rè ajimopirai, Papa. Akuwa naikoi iwasu mã'ẽ neupe. Nepota manyvo terereko tajimomorijau e'ã remẽ, i'ete. Ajamã'ẽ manyvo nere tari terereko katu jimomorijaua wyi remẽ, i'e teve. Tajimomorijau ãmẽ, e'i. Neremimota rupi tè ta'evo aiko ãmẽ, e'i Jesu oporanu Uu pè.

40 Aepo e'i paire, ojivy rã'ĩ uu wemimo'earà kõ pyri, Peturu kõ pyri. Soõ, oke sikaepo kupa upa.

Ajawyi Jesu e'i ijupe kõ:

– “Tapemãrãmoa'u jẽ”, a'e itõkõ pejẽ! Napemã'ẽ kõ'ẽ'ãi sipõ evo ve! e'i. Naporegeta pukui Papa pè, e'i. 41 Age'e peke tite ky'y ne! Tapemãrãmoa'u jẽsi pekupa. Janejare'e pè peporegeta pejimokasi rõmõ. “Janejare'e, oremokasi rejupa, toroity tite e'ã”, pejẽ ikõ peporegeta nẽ. Aje, pepy'a pupe pepota pekasi jẽ. Ajamã'ẽ ajaire waypetetà peupe. Pevote napekasi'ãi. Ereity ywe'e titetà ejukatà kupa remẽ pekupa. Ajawyi ikõ tapejimokasioka Janejare'e pè nẽ, a'e pejẽ, e'i Jesu ijupe kõ.

42 Ajaire oo mijẽ Uu pè oporegeta.

– Napotai ajimomorijauvay amãnõ mijã, Papa! Ajamã'ẽ nepota ejuka kupa remẽ, tejuka ãmẽ kupa neayvu rupi, e'i.

43 Ajaire ojivy mijẽ uu wemimo'earà kõ pyri. Soõ, oke mijẽ sikaepo kupa upa, oke taray kupa rewarà mõ.

44 Ajaire oo mijẽ Uu pè oporegeta. Ji'i oporegeta maekwerà vo jẽ oporegeta mijẽ. Moapy rõmõ tesõ a'evo ekoi ky'y. 45 Ajaire uu mijẽ ikoty kõ. Oke mijẽ sikaepo kupa upa. Ãmẽ si e'i ijupe kõ:

– Peke mijẽ sipõ pekupa! Pemã'ẽ! Nivoi mãe kõ po pè emãnõa 'arà okwa ky'y! Ajawyi awyjepa rã'ĩ peke ky'y. 46 Pepõ'ã! Ja'e jẽsi! Eãpã kõ po pè eme'ẽtà mã'ẽ uu iko, e'i.

47 Jesu oporegeta jẽ ijupe kõ upa remeve, Jutasi ovãe ipyri. Jesu remimo'earà kõ 12 rõmõ mãe kõ mõ Jutasi mijã. Ijatyray kwaima'ekwerà kõ uu upi. A'e kõ imarija poko pawete iko. Ãmõ, jinõpãa pawete weru kupa. Janejare'e pè oporegeta mãe kõ rõvijã kõ ayvu rupi tè uu kupa. Ãmõ, Juteu rõvijã kõ ayvu rupi.

48 Ãmẽ Jutasi ji'ite kee e'ipa sikaepo ijupe kõ:

– Erõvijã aetoapemosu rã'ãgatà imojikuwaoka pejẽ, e'ipa. A'evo remẽ pepyy kuwa eraa, e'ipa ji'ite.

49 Ãmẽ oõvaisĩ Jesu remẽ, oo ipyri.

– Age'e tè, jõvijã! e'i rã'ãga ijupe.

Ajaire wetoapemosu rã'ãga.

50 Ãmẽ Jesu kee e'i ijupe:

– Ejimorypa, erepa maekwerà rupi jẽsi ere, e'i.

Ãmẽ Jutasi rupi uu mãe kõ uu Jesu pyy ipokwa kupa ky'y.

51 Ãmẽ Jesu remimo'earà mõ marija poko omopyso. A'e pupe temĩgwai mõ onamimopai. Janejare'e pè oporegeta mãe kõ rõvijã wasu remĩgwai mõ a'e.

52 Ãmẽ Jesu e'i a'evo wereko mã'ẽ pè:

– Teene! Emokatu ãwĩ nemarija poko, e'i. Ava mõ porojuka marija poko pupe remẽ, a'evo ve marija pupe omãnõtà, e'i. 53 Nerekuwai sipõ age'e ywete Papa pè sõ aporanu remẽ, py'awarà mõ kuwa wemĩgwai yvapewarà kõ omuu kuwa epãtavõarà rõmõ! Ijatyray kuwa omuu, e'i. 54 Ajamã'ẽ Papa omuu kõ sõ temokatu remẽ, “aje” naoty'ãi kuwa Janejare'e ayvu mojenuarà kõ remikusiwarerà eupewarà mijã, e'i.

55 Ãmẽ e'i Jesu aty wasu pè:

– Moma'e rã põ marija poko tẽ tesõ peeru? Ãmõ, jinõpãa kõ teve tesõ peeru? “Ojikõ'õ mãe kõ rõvijã” pejẽ põ ije? Emã'ẽ. Kõ'ẽ jawe jawe ipe itõkõ pemã'ẽ ere ipi. Age'e rõwã pepyterà rupi poromotekokuwa aiko. Janejare'e moe'ea retã ypy pè teipe a'evo aiko ipi, e'i. Manyvo põkõ ameve nepyyi pekupa? e'i. [Age'e tẽ tesõ epyy vijatà ereraa pekupa!]^g 56 Õ'õ aje! Janejare'e ayvu mojenuarà kõ ayvukwerà rupi katu tè ãwĩvo pejẽ peiko, e'i. Ãwĩvo remẽ tè “aje” eutà kãramõ, e'i ijupe kõ.

Ãmẽ a'evoa rè emimo'ekwerà kõ omã'ẽ remẽ, Jesu oity ojavapa oo okyje rõmõ iko kupa.

57 Ãmẽ ajaire opyy Jesu ipokwa eraa kupa, Janejare'e pè oporegeta mãe kõ rõvijã wasu retã gyty. Kaipasi eu ijupe mã'ẽ retã gyty weraa kupa. A'e pyri tãmõ Moisesi remikusiwarerà rè poromo'e mãe kõ uu amãtejẽ sikaepo ojimoaty. Ãmõ Juteu rõvijã kõ mõ teve uupa. A'e kõ rovake weraa Jesu kupa. [Tetã wyry pè weroike kupa.]

58 Ãmẽ Peturu oo Jesu rakypy rupi. Ipyri'ĩje'ẽ rõwã oo ajamã'ẽ. Kuipe'e sa'u oo. [Noikei tetã pupe ajamã'ẽ Peturu.] Tetã ypy pè wãrõ upa. Tetã rãrõarà kõ mõ pyri wapy upa. Opota okuwa manyvotà wereko Jesu kupa mã'ẽ.

59 Ãmẽ jakatu jõvijãgwerà kõ oporegeta Jesu jukaa rã rè upa, tetã wyry pè. Janejare'e pè oporegeta mãe kõ rõvijã kõ. Juteu rõvijãgwerà kõ atyry rõmõ ojatykapa kupa, pirujẽ.

– Manyvo ja'età põkõ kovenatu Piratu mogeta, Jesu tojukaoka? e'i kupa.

60 Ajamã'ẽ manyvo noereko'ãi ayvu ai mõ mo'y ee kupa, ãwisõ ijatyray mãe kõ nivoi mã'ẽ omo'y mo'y teywete ee kupa remẽ. Ojevo jevo jẽ rõwã iwaria kõ ajamã'ẽ. Ajawyi “aje” taoty e'ã. Ajaate ojevo jẽ e'i mãe kõ mõrijõ jẽ opõ'ã owari rõmõ Jesu pè kupa ky'y. 61 Kee e'i teywete kupa:

– Oroenu aã kwaima'e kee e'i tite remẽ: “Ije amoma kuwa Janejare'e moe'ea retã. Ajamã'ẽ ajaire moapy 'arà remeve kuwa ainõma ekovijarerà rõmõ etã wasu ijupe”, e'i owari rõmõ, e'i kupa.^h

62 Ãmẽ Janejare'e pè oporegeta mãe kõ rõvijã wasu aepo wenu remẽ, opõ'ã Jesu pè javo.

– Neenu põkõ aepo e'i neupe kupa remẽ? e'i ijupe. Ajawyi manyvo eretà põ nejipija rõmõ! e'i epe ijupe.

63 Nipui ãmẽ Jesu enu. Ajawyi e'i jẽ jõvijã wasu ijupe:

– Aje ywete põ Janejare'e Remimuurerà tè ene? e'i ijupe. Aje ywete põ Janejare'e Ra'yry wete ene? Eayvuapi rejupa. Newari sõ remẽ, Janejare'e nemomorijautà ãmẽ, e'i ywe'e tite Jesu pè jõvijã wasu.

64 Ãmẽ Jesu e'i ijupe:

– Õ'õ, aje. Aepo erepa. Janejare'e Remimuurerà ajimojane mã'ẽ rõmõ tè ajo pepytery pè mijã. Ajamã'ẽ kee mã'ẽ rè pemã'ẽtà kãramõ ere. Temimoe'e rõmõ tẽ tesõ ajotà kãramõ ky'y. Ekasia ve aerutà. Ãmẽ a'e 'arà mẽ Janejare'e ikasiay mã'ẽ pyri aapytà Jõvijã wasu rõmõ ajupa. I'ekatu kytyre aapytà ajupa. Ajaire yva rãtasĩ rupi awyjytà ajo mijẽ. A'evo aiko mã'ẽ rè pemã'ẽtà kãramõ! e'i Jesu.ⁱ

65 Ameve Janejare'e pè oporegeta mãe kõ rõvijã wasu aepo wenu remẽ, ojikõ'õ ai tè enu. Ajawyi ojiyruãvasĩsĩma tesõ ojimopirai rõmõ iko. E'i opyriwarà kõ pè:

– Peenupa itõ e'i Jesu mã'ẽ! Werõarõ ywe'e tite Janejare'e aepo e'i remẽ! Ovote nivoi mã'ẽ omo'y wee. Ajawyi nijaesa mijẽ'ãi ijayvu ai wenu mã'ẽ ky'y! 66 Manyvo pejẽtà põkõ aepo peenu mẽ? e'i.

– Wayvu rupi tè tomãnõ ajawyi! e'i ywe'e tite ijupe kupa.

– Hoõ! e'i ãmẽ kupa. Aje! e'i kupa.

67 Ãmẽ ajaire omojaiwe tesõ Jesu kupa ky'y. Otõmõ tõmõ tesõ ova rè kupa. Onõpã nõpã teve kupa. [Oovaõvã teve kamisa pupe kupa, tomã'ẽ e'ã.] Ajaire oovapete pete kupa. Ãmẽ e'i ijupe kupa:

68 – Ava põ nerovapete? e'i ijupe kupa. Emome'u oreupe! Aje Janejare'e Remimuurerà tè ene remẽ, nekuwa jẽtà ava põ nerovapete mã'ẽ! e'i ijai kupa.

69 Ãmẽ jakatu Peturu tetã ypy pè wapy jẽ upa, jane kõ pytery pè. Ãmẽ temĩgwai mõ uu javo ijupe. Ja'y kõjatãi mõ a'e temĩgwai. A'e e'i Peturu pè:

– Jesu Karireja yvy wãnà reve neiko mã'ẽ tè ene! e'i ijupe.

70 – Ãnĩ! A'e rõwã ije! e'i rã'ãga Peturu eminu kõ rõmõ. Nakuwai ava pewarà mõ põ aepo ere! e'i rã'ãga.

71 Aepo e'i paire opõ'ã oo tetã ypy pe wyi. Pari ape kyty oo. A'e pè ãmõ temĩgwai omã'ẽ mijẽ Peturu rè. Ja'y kõjatãi teve a'e. A'e e'i opyri tui mãe kõ pè:

– Jesu Nasare taa wãnà remimo'earà tè ãwĩ! e'i Peturu pewarà mõ.

72 Ãmẽ Peturu e'i:

– Ãnĩ! Nakuwai ije ãwĩ kwaima'e! e'i rã'ãga. Janejare'e reminu rõmõ aepo a'e! e'i tite owaria mokasia mõ.

73 Ãmẽ ajaire kwaima'e kõ mõ oo Peturu pè oporegeta.

– Aje si a'e pyriwarà tè ene! e'i ijupe kupa. Neporegetaa rupi tè nejikuwa! e'i ijupe kupa.

74 Ãmẽ Peturu e'i:

– Nakuwai ije ãwĩ kwaima'e! Janejare'e okuwa ewari rõwã a'e mã'ẽ! e'i rã'ãga. Janejare'e temomorijau ikõ ewari remẽ nẽ, e'i tite owari rõmõ.

Ãmẽ jakatu masakara oje'ẽ. 75 Ãmẽ tè tite Peturu oja'a Jesu ayvukwerà rè ky'y. “‘Nakuwai Jesu’, ere rã'ãgatà ije ajaire”, e'i amãtejẽ maekwerà rè oja'a. “Moapy rõmõ a'evotà, masakara oje'ẽ e'ãve”, e'i amãtejẽ Jesu maekwerà rè.

Ajawyi ijãgyoay ky'y. Ojisyry oo ojawa upa ky'y. Ojiãparõ wasu upa.