Janejare'e 'Ãg remikuwaoka kõ rewarà
12
Age'e Janejare'e 'Ãg remime'ẽ kõ rè poromotekokuwatà, tapekuwa ky'y, eretãrãgwerà kõ. 2 Kiristu rè napejirovijaive remẽ itõkõ pejarà rã'ãga jimoãtãgwerà pemoe'e ipi mijã. Noporegetai mã'ẽgà pemoe'e ipi mijã, penõvijã rã'ãga rõmõ. 3 [Ajamã'ẽ age'e remẽ, ãmõ rupi tè peiko ky'y. Janejare'e 'Ãg rupi tè peiko ky'y. Ajawyi a'e rè poromotekokuwatà ky'y.] Kee a'e pejẽ. Janejare'e 'Ãg kasia rupi tè simoe'e Jesu ipi. Ajawyi ava mõ sõ omojaiwe Jesu remẽ, jakuwa Janejare'e 'Ãg rupi rõwã aepo e'i. Ãwĩvo ve ava mõ, “Erõvijã ywete tè Jesu”, e'i remẽ, Janejare'e 'Ãg rupi tè aepo e'i ãmẽ. Upi noikoi remẽ, aepo ne'i'ãi kuwa mijã.4 Janeremikuwa kõ iteetejẽ Janejare'e 'Ãg omosãi janeupe erokwa. Ajamã'ẽ pe'ĩte ipe i'Ãg ajamã'ẽ. 5 Ivo ve iteetejẽ janeposikoa Janerõvijã ywete ome'ẽ jane erokwa. Ajamã'ẽ Janerõvijã ywete pe'ĩte. 6 Ãwisõ janeposikoa iteetejẽ janeupe, Janejare'e 'Ãg kasia rupi tè a'evo janerereko, janejãvijõ jẽ.
7 Janejare'e 'Ãg janeremikuwa ome'ẽ janeupe, janejãvijõ jẽ ipi. Ajamã'ẽ kee taoty e'ã emime'ẽgwerà pè: “Eupewarà mõ eremikuwa” taoty e'ã. “Janeupewarà mõ” taoty ijupe. Emime'ẽgwerà rupi jajimokasi ojee jaiko ipi. 8 Kee Janejare'e 'Ãg janeremikuwa kõ omosãi erokwa. Ãmõgwerà otekokuwavay Janejare'e 'Ãg tekokuwaa rupi ekoi ipi. Ãmõgwerà e'i katuay Janejare'e ayvu rè poromotekokuwaarà rõmõ iko ipi. I'Ãg kasia rupi teve a'evo ekoi ipi. 9 Ãmõgwerà e'i katu poromokasi, ãwisõ tojirovija ywete Janejare'e rè iko kupa ipi. Ãmõgwerà, okuwa poromokatu Janejare'e 'Ãg kasia rupi ipi. A'evo pe'ĩte ipe Janejare'e 'Ãg. Ajamã'ẽ a'e tè iteetejẽ janeremikuwa kõ omosãi janeupe erokwa. 10 Ãmõgwerà mãrãnà jikuwa e'ãte oinõ Janejare'e 'Ãg kasia rupi iko ipi. Ãmõ, ijayvu mojenuarà rõmõ teãmã ekoi ipi. Ãmõ, temikuwa mosã'ãga kuwaparà rõmõ ekoi ipi. A'evo mãe kõ okuwa Janejare'e 'Ãg remikuwaoka e'e tè. Ãmõ, emikuwaoka rã'ãga tè okuwa teve. Ãmõgwerà, ãmõ kõ ayvu nojimo'ei ee mã'ẽ rupi oporegeta ipi. Ãmõgwerà, ãmõ ayvu nojimo'ei ee mã'ẽ mojenua kuwaparà rõmõ teve ekoi ipi. Wãisõ iteetejẽ a'evo ekoi Janejare'e 'Ãg kasia rupi kupa ipi. 11 A'evo pe'ĩte Janejare'e 'Ãg. Ajamã'ẽ iteetejẽ janeremikuwa kõ omosãi janeupe erokwa ipi. Wemimotarà rupi tè omosãi janeremikuwa erokwa ipi.a
Janepirà rè tè poromosã'ãga remẽwarà
12 Ojevo jẽ Janejare'e janemojimo'ypa Kiristu rè. Ajawyi pe'ĩypyte rõmõ jaiko ky'y, ãwisõ janeaty ipe remẽ. Ãwisõ iteetejẽ janereinõ remẽ.b 13 Iteetejẽ jane Jesu koty rewarà kõ rõmõ jaiko. Juteu kõ. Juteu rõwã mãe kõ teve. Temĩgwai ai kõ. Ãmõ, temĩgwai rõwã mãe kõ. Wãi wãisõ jaiko. Ajamã'ẽ janemojãmorĩ kupa remẽ, Janejare'e 'Ãg pe'ĩypyte rõmõ janereinõ, Jesu koty rewarà kõ rõmõ. Jajirovija Kiristu rè remẽ, o'Ãg ome'ẽ pirujẽ janepy'a kõ pupe toiko, okoty rewarà kõ py'a pupe. Kiristu pirà vo jaiko, pe'ĩypyte rõmõ ãmẽ ky'y. Ipirà rewarà kõ vo jaiko, janejãvijõ jẽ.
14 Epirà rè tè poromosã'ãgatà tapekuwa sa'u. Pe'ĩte ipe epirà oinõ Janejare'e mijã. Ajamã'ẽ epirà rewarà kõ iteetejẽ oinõ. [Epy. Epo. Erea. Enami. Wãi wãisõ oinõ imoaty epirà rõmõ.] 15 Ajawyi epy kee ne'i kuwa'ãi ije: “Nepo rõwã ije. Ajawyi waitewarà tè ije”, ne'i kuwa'ãi ije mijã. Aepo e'i epe remẽ, ajamã'ẽ epirà rewarà teãmã epy. 16 Ivo ve enami, kee ne'i kuwa'ãive ije: “Nerea rõwã ije. Ajawyi waitewarà tè ije”, ne'i'ãi kuwa mijã. “Nepirà rewarà rõwã ije”, e'i epe remẽ, ajamã'ẽ epirà rewarà rõmõ teãmã Janejare'e oinõ ere. 17 Erea rõmõ kõrijõ tè sõ epirà remẽ, manyvo nareko kuwa'ãi ãmẽ enu ãmẽ! Ivo ve enami rõmõ kõrijõ tè sõ remẽ, manyvo nareko kuwa'ãi teve etõ ãmẽ! 18 Ãwĩvo Janejare'e janereinõ. Iteetejẽ janepirà rewarà wemikuwa rupi tè oinõ imoaty janepirà rõmõ tojinõ. 19 Nuvei sõ janepirà rewarà kõ iteetejẽ remẽ, nuve'ãi kuwa ãmẽ janepirà mijã! 20 Ãwĩvo iteetejẽ ipe ee remẽ, ajamã'ẽ pe'ĩte janepirà.
21 Nojirõarõ'ãi kuwa Janejare'e reminõgwerà kõ janepirà rè. Ajawyi janerea kee ne'i'ãi kuwa janepo pè: “Manyvoa rã rõmõ rõwã ene”, ne'i'ãi kuwa janepo pè. Ãmõ, janeãkãg aepo ne'i kuwa'ãive janepy pè. Janejare'e reminõgwerà kõ pirujẽ tè janepirà rewarà kõ. 22 Ajawyi janepirà rewarà mõ sõ nikatu ywe'ei pe'ĩ remẽ, jakãte'ã jẽ ee. Nijaeta kuwa'ãi ity. Jajimomorijau kuwa ãmẽ ee mijã, janevote. Pirujẽ janepirà rewarà ikatu tè janeupe iko. 23-24 Uve janepirà rewarà jamojisaoka mã'ẽ. Ãmõ, nijamojisaokai mã'ẽ. A'e jamojisaoka sõ remẽ, jajimosĩoka kuwa ãmẽ mijã. Janõsĩ 'ejẽ imojisaoka ãmẽ. Ajamã'ẽ jakãte'ã jẽ ee. “Manyvoa rã rõmõ rõwã”, nija'ei nijamojisaokai mã'ẽ pè ipi. A'evo Janejare'e janepirà oinõ teãmã. [Ãwĩvo ve Janejare'e Jesu koty rewarà mõ pè, “Manyvoa rã rõmõ rõwã ene”, taoty e'ã. Pirujẽ rè Janejare'e okãte'ã.] 25 Ãwitõ janepirà rewarà kõ nojipe'a'ãi kuwa waitewarà rõmõ. Pe'ĩypytepa ekoi. Ajawyi ojeeve oposiko kupa ipi. Ãwĩvo ve tijajimoe'yi e'ã Jesu koty rewarà kõ rõmõ jaiko. Tijajiau kõrijõ ojevo jẽ jaiko ipi.
26 Ãmõ, kee a'e pejẽ. Pe'ĩte janepirà. Ajawyi jajipyso remẽ, ay jane pirujẽ janepirà rupi ipi. Pe'ĩypyte janepirà. Ajawyi a'evo janepirà. Ãwĩvo ve jaiko Jesu koty rewarà kõ rõmõ ipi. Pe'ĩ ojimomorijau remẽ, pirujẽ jajimomorijau tary ve jaiko, ivo ve. Ava mõ sõ ijãgyoay remẽ, janeãgyoay ãmẽ eeve jaiko. Ava mõ sõ oryvay remẽ, pirujẽ ve janeroryvaytà ãmẽ jaiko, ivo ve.
27 Pirujẽ jane Kiristu pirà vo jaiko, ãwisõ iteetejẽ jaiko remẽ. Pe'ĩypyte rõmõ jaiko. 28 Ajawyi tè Janejare'e janeremikuwa kõ omosãi janeupe ipi. Ãmõgwerà, wemimonokwerà kõ rõmõ oinõ. Ãmõgwerà, wayvu mojenuarà rõmõ oinõ. Ãmõgwerà, poromotekokuwaarà rõmõ oinõ. Ãmõgwerà, mãrãnà jikuwa e'ã reinõgarà rõmõ oinõ. Ãmõ, poromokatuarà rõmõ oinõ. Ãmõ, poropãtavõarà rõmõ oinõ. Ãmõ, Jesu koty rewarà kõ rõvijã rõmõ oinõ. Ãmõ, ayvu nojimo'ei ee mãe kõ kuwaparà rõmõ oinõ. Wãisõ iteetejẽ Janejare'e oinõ erokwa.c 29 Ajawyi tè wemimono kõ rõmõ kõrijõ rõwã janereinõ. Iteetejẽ janereinõ. Wayvu mojenuarà rõmõ teve janereinõ. Ãmõ, poromotekokuwaarà rõmõ teve janereinõ. Ãmõ, mãrãnà jikuwa e'ã wereko mã'ẽ rõmõ teve janereinõ. 30 Ãmõ, poromokatuarà kõ rõmõ janereinõ teve. Ãmõ, ayvu nojimo'ei ee mãe kõ kuwaparà rõmõ janereinõ teve. Ãmõ, ayvu rè nojimo'ei ee mãe kõ wenu mã'ẽ rõmõ janereinõ teve. Ãwĩvo Janejare'e iteetejẽ janeremikuwa kõ omosãi jane erokwa, janejãvijõ jẽ. 31 Ajawyi tisipota Janejare'e 'Ãg remime'ẽ ikatuay mã'ẽ sipyy.
Ajamã'ẽ itee mã'ẽ rè tè poromotekokuwatà age'e ky'y. Poroauvaya rè poromotekokuwatà ky'y. A'e ywesõ ikatuay wete jane.