Pirujẽ yvy yvy wãnà kõ ayvu rupi aporegeta ipe kuwa mijã. Janejare'e remĩgwai kõ yvapewarà ayvu rupi teve ipe kuwa aporegeta mijã. Ajamã'ẽ noporoaui sõ aiko remẽ, manyvo rõmõ rõwã aporegeta kuwa mijã.^a Aje'ẽ je'ẽ maevo sõ tite kuwa aporegeta, noporoaui sõ aiko remẽ.

2 Ãmõ, Janejare'e ayvu rupi teipe kuwa eremikuwa rupi ijayvu amojenu ãmõ kõ pè aiko mijã. Ma'e remẽ pirujẽ iteetejẽ otekokuwa mã'ẽ rõmõ teipe kuwa ije mijã. Ãmõ, Janejare'e ayvu waypete mã'ẽ kuwaparà rõmõ teve ipe aiko kuwa mijã. Ãmõ, Janejare'e rè ajirovijaa rupi yvytyry kõ amoisyry mã'ẽ rõmõ teipe kuwa aiko mijã. Ãwĩvo wĩvo ipe aiko remẽ, “aje ywete” ne'i'ãi kuwa Janejare'e erekoa rè omãjã, noporoaui sõ aiko remẽ.^b 3 Ãmõ, pirujẽ ema'e kõ amosãi kuwa ipe iporijau ee mãe kõ pè erokwa mijã. Ãmõ, nivoi mãe kõ ejukatà sõ Jesu koty rewarà rõmõ aiko rewarà mõ remẽ, kee a'e ipe kuwa mijã: “Nimanyvoi ejuka erapy kupa remẽ”, a'e ipe kuwa. Ajamã'ẽ noporoaui sõ aiko remẽ, “aje ywete” ne'i'ãi Janejare'e eupe ãmẽ.

4 Kee teãmã jaiko, poroauvay jaiko remẽ ipi:

Nijajikõtevẽ'ãi jane kõ rè jaiko ipi. Ikatusa rupi kõrijõ teãmã jareko kõ ipi. Ãmõ, nijajimõarõi teve ijupe kõ jaiko ipi. Nijajimoe'ei teve ovake kõ jaiko ipi. “Ije ywesõ ekatuay ãmõ kõ wyi”, nija'ei erõarõ kõ ipi.

5 Aje poroauvay jaiko remẽ, nijaaka kõi imosĩoka kõ ipi. Ãmõ, janeremimotarà rè ywesõ rõwã jaja'a jaiko ipi. Ãmõ, nijajimõarõ tuvei jaiko ipi. Ãmõ, nijaja'a pukui janemoaiwea rè jaiko ipi, jajiauvay jaiko remẽ.

6 Aje poroauvay jaiko remẽ, nijaneroryi nivoi mã'ẽ rè jamãjã ipi. Ivo mã'ẽ rè teãmã janerory jamãjã ipi.

7 Ãmõ, kee jaiko aje ywete poroauvay jaiko remẽ ipi. Nijajityi jaiko ipi, waypete ipe tekoua remẽ. Janemomorijau ipe kupa remẽ, Janejare'e rè jajimokasi jẽ jaiko ipi. “Aje, Janejare'e erereko katutà”, ja'e jẽ kõrijõ ãmẽ jaiko ipi. Jajimokasi jẽ ee imoa'u jẽ jaiko ipi. Nijajikõtevẽ'ãi imoa'u jaiko. Manyvo jaiko remẽ upi upi, a'evo jaiko poroauvay jaiko remẽ ipi.

8 Jajiau karuaru jaiko ipi. Awyje pewarà tè poroauvaya. Na'evoi ãmẽ Janejare'e ayvu omojikuwaoka janeupe tijamome'u mã'ẽ. Age'ewarà tè a'e. Ãwĩvo ve ayvu nijajimo'ei ee mã'ẽ rupi moregetaa. Age'ewarà teve a'e. Ãmõ, janetekokuwaa Janejare'e omojikuwaoka janeupe mã'ẽ. Age'ewarà teve a'e. A'e a'e kõ okwapatà ajaire. Jiauvaya sõsi awyje pewarà tè ãmẽ. 9 Age'e remẽ nisikuwapai ipi. Janejare'e nomojikuwaokai pirujẽ wemikuwa janeupe ipi. Ajawyi omojikuwaoka janeupe mã'ẽ kõrijõ tè jamome'u ipi.

10 Ajamã'ẽ Janejare'e reve jaiko ky'y remẽ, ãmẽ sõsi a'evoa ke'ĩatu tè mã'ẽ ãmẽ opatà.

11 Kee a'e pejẽ. Eja'yrĩ remẽ, ja'yry ayvu vo 'ejẽ eayvu mijã. Ja'yry jipy'amogetaa vo 'ejẽ teve ajipy'amogeta ipi mijã. Ajamã'ẽ ajimovijapa ky'y. Ajawyi najimoja'yi aporegeta aiko ky'y. Ãwĩvo ve Janejare'e reve jaiko ky'y remẽ, jajimovijapa mã'ẽ vo jaikotà ky'y.

12 Nijakuwa ywe'ei Janejare'e, nomã'ẽytyive ee rewarà mõ. Ãwitõ warua jukwerà rupi jamã'ẽ janerova rè remẽ, nojisa katui mã'ẽõ janerova rè ipi. Ãwĩvo 'ejẽ jamã'ẽ Janejare'e rè age'e remẽ jaiko. Kãramõ sõsi Janejare'e rova rè ywete jamã'ẽtà ky'y. Sikuwa katutà Janejare'e ãmẽ ky'y. Ãwitõ age'e remẽ Janejare'e janekuwa katu, a'evo tary ve sikuwatà ãmẽ.

13 Age'e remẽ jajirovija jẽ Janejare'e rè jaiko. Ivãea simoa'u jẽ jaiko. Poroauvay jẽ jaiko. Ikatuay a'evo jaiko remẽ. Ajamã'ẽ poroauvay jaiko mã'ẽ ywesõ ikatuay wete janeupe.