Janejare'e 'Ãg remimojikuwaoka rewarà mijẽ
14
Ajawyi kee a'e pejẽ. Poroauvaya rupi ywesõ tapeiko. A'evoa ywesõ ikatuay janeupe. Ãmõ, tapepota katu Janejare'e 'Ãg remimojikuwaokakwerà. [A'e rupi Jesu koty rewarà kõ pemokasiokatà ipi.] Ajamã'ẽ tapepota katu Janejare'e ayvu rè poromotekokuwaa rõmõ peiko. Ãmõ, imojenuarà rõmõ peikoa tapepota katu. 2 Ava mõ, ayvu nojimo'ei ee mã'ẽ rupi oporegeta Janejare'e 'Ãg kasia rupi remẽ, a'e jane kõ pè rõwã oporegeta. Janejare'e pè tè oporegeta upa. A'e ayvu nijaenui mã'ẽ rè, ivo teipe Janejare'e 'Ãg kasia rupi oporegeta. Ajamã'ẽ ojapyaka ee mãe kõ nokuwai manyvo jaa tè oporegeta mijã. 3 Ajamã'ẽ Janejare'e ayvu mojenuarà oterẽ jẽ oporegeta jane kõ pè remẽ, pirujẽ sienu katu. Ajawyi jajimokasità Jesu rè jajirovija rõmõ jaiko. Ãmõ, jajipy'amokasità ijayvu rupi tijaiko jẽ teve. Ãmõ, janepãtavõ janeãgyo momia rè ipi, tijaneroryvay kõrijõ jaiko ãmẽ. 4 Nãwĩvoi ava mõ ayvu nijaenui mã'ẽ rupi oporegeta janereminu rõmõ remẽ. Oupe kõrijõ tè e'i ojimokasi ipi. Ajamã'ẽ nomokasi noenui ijayvu mãe kõ ipi. Ajamã'ẽ ava mõ jaenu mã'ẽ rupi tè omojenu Janejare'e ayvu remẽ, Jesu koty rewarà kõ ojimokasità enu ãmẽ. Pirujẽ ojimokasità enu ãmẽ kupa.5 Eupe ãmẽ ikatu peporegeta ayvu nijaenui mã'ẽ rupi Janejare'e 'Ãg remimojikuwa rupi. Ajamã'ẽ Janejare'e ayvu pemojenu remẽ ywesõ ikatu kuwa eupe mijã. A'evoa rupi ywesõ pemokasi kuwa ãmõ jane kõ ipi. Wenu remẽ tè kuwa ojimokasi kupa. Ajawyi ava mõ sõ ayvu nijaenui mã'ẽ rupi oporegeta remẽ, ava mõ tomome'u ajaire manyvo jaa tè aepo e'i mã'ẽ. Ãmẽ tè pirujẽ wenutà ojimokasi ãmẽ kupa ky'y.
6 [Kee aikotà, aa peneve aiko remẽ. Ãmõ wãnà kõ ayvu rupi rõwã aporegetatà pejẽ ipi. Peayvu rupi tè aporegetatà ipi.] Ãmõ wãnà kõ ayvu rupi sõ aporegeta remẽ, napejimokasi'ãi kuwa, napeenu'ãi kuwa eayvu rewarà mõ. Ajamã'ẽ aa penesa remẽ, aje apota poromokasi penereko. Ajawyi Janejare'e omojikuwaoka eupe mã'ẽ amome'utà pejẽ. Ãmõ, eremikuwa ve amome'utà pejẽ. Ãmõ, Janejare'e ayvu rè poromotekokuwatà aiko. Ãmõ, Janejare'e emotekokuwaa, a'e rè poromotekokuwatà aiko ãmẽ. Ãmẽ tè pejimokasità eayvu renu peiko.
7 Jimi'a je'ẽa rè tè poromosã'ãgatà pemotekokuwaa rõmõ. Ava mõ sõ ne'i katui epe remẽ, nijaenu'ãi kuwa ãmẽ jaiko. E'i katuay remẽ, a'e sõsi ojenutà katu janeupe ãmẽ ky'y. 8 Kee mã'ẽ vo teve. Sota mõ jimi'a puku jarà ikuwaa rè rõwã oopy remẽ, nojikuwa'ãi sota kõ pè ojapyaka ipe ee kupa remẽ. Ajawyi noerovija'ãi opõ'ã uu ikoty kupa. Oraparà kõ noeky ekyi'ãi teve kuwa eru ãmẽ kupa. Nojenu katui jimi'a puku je'ẽa ijupe kõ, ajawyi. 9 Ãwĩvo ve ayvu nijaenui mã'ẽ rupi kõrijõ tè peporegeta remẽ, peayvu noenu'ãi kupa. “Manyvo'i põ?” e'i titetà ãmẽ kupa, oterẽ jẽ napemotekokuwa kõi rewarà mõ. Ãwĩvo sõ peporegeta remẽ, okãjãma kõrijõtà peayvukwerà ãmẽ. 10 Aje janeayvu kõ iteetejẽ. Mõa'ãrõwã janeayvu kõ. Ojevo jẽ rõwã janeayvu kõ ipi. Ajamã'ẽ enuparà pè ayvu ojenu katu ipi. 11 Ava mõ ayvu nijaenui remẽ, oje'ẽ mã'ẽ vo 'ejẽ jaenu ipi. Ãwĩvo ve aporegeta ipe noenui mãe kõ pè remẽ, oje'ẽ mã'ẽ vo 'ejẽtà eayvu ijupe kõ ãmẽ. 12 Ajare Janejare'e 'Ãg remimojikuwa rã ywesõ pepota remẽ, “Jesu koty rewarà kõ mokasiarà kõ ywesõ apota aiko”, tapejẽ. A'evoa rupi ywesõ otekokuwavaytà Jesu rekoa rè kupa ky'y.
13 Ajawyi kee a'e ayvu nijaenui mã'ẽ rupi oporegeta mã'ẽ kuwaparà kõ pè. Tapeporegeta rã'ĩ Janejare'e pè peayvu tomojikuwaoka ava mõ pè, tomome'u manyvo jaa tè aepo pejẽ mã'ẽ, a'e pejẽ. A'evo remẽ tè Jesu koty rewarà kõ okuwatà manyvo jaa tè aepo ere mã'ẽ. Ojimokasità ãmẽ enu kupa ipi. 14 Ayvu nijaenui mã'ẽ rupi sõ aporegeta Janejare'e pè remẽ, etekokuwaa rupi rõwã aporegetatà ijupe. E'ãg tè oporegetatà ijupe, Janejare'e 'Ãg remimojikuwa rupi. Ajamã'ẽ nakuwa'ãi manyvo jaa tè a'e mã'ẽ a'evo aiko remẽ. Ajawyi, “Manyvo jaa põ?” a'e kõrijõ kuwa aiko ãmẽ. 15 Ajawyi kee a'età pejẽ. E'ãg rupi tè aporegetatà Janejare'e pè aiko. Etekokuwaa rupi teve aporegetatà ijupe aiko. Ãmõ, ajĩgatà ijupe etekokuwaa rupi aiko. E'ãg rupi teve ajĩgatà ijupe aiko.
16 Ãwĩvo ve pejimoatya pè, pe'ãg rupi kõrijõ tè peporegeta Janejare'e pè imoe'e remẽ, pepyriwarà kõ nokuwa'ãi manyvo rewarà mõ pemoe'e peiko. Noenu'ãi peayvu kupa ãmẽ. Ajawyi “aje” ne'i'ãi kuwa kupa. 17 Aje ipetà ivo peporegeta Janejare'e pè pe'ãg rupi. Ajamã'ẽ pepyriwarà kõ nojimokasi'ãi peayvu rupi iko ipi, noenui manyvo jaa tè kupa remẽ. 18 Ije ywesõ ayvu najimo'ei ee mã'ẽ rupi aporegeta Janejare'e 'Ãg kasia rupi pewyi ipi. A'evoa rè eroryvay Janejare'e rè aiko ipi. 19 Ajamã'ẽ Jesu koty rewarà kõ jimoatya pè aiko remẽ, ayvu nijaenui mã'ẽ rupi napotai aporegeta ipi. Aporegeta puku ipe kuwa mijã. Ajamã'ẽ aporegeta remẽ, noenu'ãi 'ete kupa. Ajamã'ẽ ayvu jaenu mã'ẽ rupi aporegeta remẽ tè kuwa wenutà eayvu kupa ãmẽ, aporegeta ke'ĩatu teipe remẽ. Ajawyi a'evoa ywesõ apota aiko.
20 Tapetekokuwavay ikõ eayvu rè nẽ. Ja'yrerà notekokuwai mã'ẽ vo 'ejẽ tapeiko e'ã. Nivoi tekoua wyi tapejireko katu peiko. Ajamã'ẽ tapetekokuwavay peiko ipi. Tapejimoja'y e'ã peiko. 21 Kee e'i itõkõ Janejare'e ikusiwaoka karamoe remeve:
“Ikewarà kõ amogeta tarepe aiko ipi.
Ãmõ yvy wãnà ayvu rupi jane kõ amotekokuwaoka kõ tarepe aiko ipi.
Ajamã'ẽ noenui sire'e eayvu kupa”, e'i ikusiwa karamoe remeve.a
Aekwerà rupi katu a'e pejẽ. 22 Janejare'e 'Ãg, ayvu nijaenui mã'ẽ rupi omomoregetaoka okoty rewarà kõ, okasia mojikuwaoka. A'evo omojikuwaoka wayvukasia noenu tari mãe kõ pè ipi. Ãwĩvo ve Janejare'e okasia rupi poromotekokuwaoka wayvu rè remẽ, okoty rewarà kõ mokasia rõmõ tè a'evo ekoi. Noenu tari mãe kõ mokasia rõmõ rõwã a'evo ekoi. 23 Jesu koty rewarà jimoatya pè ayvu nijajimo'ei ee mãe kõ rupi kõrijõ sõ peporegeta imojenu remẽ, noenui mãe kõ kee e'ità: “Eawyry mãe kõ tè ãwĩ kõ”, e'i kõrijõtà pejẽ kupa. Noerovijarive mãe kõ ve aepo e'ità pejẽ ãmẽ. 24 Na'evoi ayvu poromotekokuwa mã'ẽ wenu kupa remẽ. A'e wenu kupa remẽ, maevo ojimosĩokatà waiwererà rè ãmẽ kupa ky'y. “Janejare'e eremavotà ereity ãwĩvo aiko remẽ!” e'ità oupe kupa ky'y. 25 A'evo ijaiwererà ojikuwatà ijupe ãmẽ ky'y. Ãmẽ si ojimoenãpa'ãtà Janejare'e rovake ojiporijauesaoka ijupe kupa ky'y. “Ene ywesõ nekasiay pirujẽ orewyi mã'ẽ tè ene”, e'ità imoe'e rõmõ kupa. Ajaire, “Aje ywete Janejare'e pepytery pè ekoi”, e'ità pejẽ ãmẽ kupa.
“Kee tapeiko Janejare'e pè pejimoaty remẽ”, e'i mã'ẽ
26 Ãmõ, kee a'e teve pejẽ, eretãrãgwerà kõ. Janejare'e pè pejimoaty remẽ, tapejipãtavõ pejimokasi ojeeve ipi. Kee peiko. Janejare'e pè pejĩga imoe'e remẽ, ojevo jẽ tapejĩga ipi. Ãmõ, ava mõ pemotekokuwa upa remẽ, ojevo jẽ tapejapyaka ijayvu rè ipi. Ãmõ, Janejare'e remimojikuwa jamojenu remẽ, ojevo jẽ teve tapejapyaka katu ee. Ãmõ, ayvu nijajimo'ei ee mã'ẽ rupi jamojenu remẽ, ayvu nojimo'ei ee mã'ẽ rupi oporegeta mã'ẽ ypy tomojenu. Ajaire manyvo jaa tè a'e ayvu kuwaparà tomojenu manyvo jaa tè imojenuawerà. A'evo peiko remẽ tè pirujẽ pejimokasità ojevo jẽ Jesu koty rewarà kõ rõmõ enu ãmẽ. 27 Ãmẽ ayvu nijaenui mã'ẽ rupi peporegeta jimoatya pè remẽ, kee pejẽtà. Ãmõ oporegetatà rã'ĩ. Ajaire ava mõ tomome'u rã'ĩ oporegeta ypy mã'ẽ ayvukwerà, manyvo jaa tè e'i mã'ẽ. Ãmẽ tè ijayvukwerà ojenu katutà. Ajaire ãmõ oporegeta tarà mijẽ, aekwery vo jẽ. Mõrijõ tè kupa remẽ, ikatu. Ivo ve moapy sõ remẽ, ikatu teve. Ajaire awyjepa ky'y. Na'evo'ãi ky'y. 28 Ãmẽ pejimoaty remẽ, naikoi sõ a'e ayvu manyvo jaa tè e'i oporegeta ypy mã'ẽ remẽ, tapeporegeta e'ã jovake ayvu nijaenui mã'ẽ rupi ãmẽ. Pepy'a pè kõrijõ tè a'evo tapeporegeta Janejare'e pè peiko ãmẽ. Jovake rõwã tapeporegeta ijupe peiko ãmẽ.
29 Ãmõ, kee a'e teve pejẽ. Pejimoaty pekupa remẽ, maevo Janejare'e wayvu mõ omojikuwaokatà ava mõ pè tomojenu. Maevo pe'ĩ a'evotà. Maevo mõrijõ. Maevo moapy. A'evo remẽ ãmõ omome'utà. Ajaire ãmõ omome'utà. Ajaire ãmõ omome'utà. Ãmẽ ojapyaka ee mãe kõ tojipy'amogeta ywete tè weminuwerà rè kupa, “Aje ywete põ Janejare'e tè aepo e'i?” te'i ikuwa kupa. 30 Ãmõ, ma'e remẽ ava mõ oporegeta upa remẽ, Janejare'e wayvu omojikuwaokatà wapy upa mã'ẽ mõ pè, ojapyaka upa mã'ẽ mõ pè. A'evo sõ remẽ, oporegeta ypy mã'ẽ topi rã'ĩ oporegeta ãmẽ. Tojapyaka rã'ĩ Janejare'e wayvu omome'upa ijupe mã'ẽ omome'u jovake remẽ. 31 Pejẽ pirujẽ Janejare'e ayvu rè poromotekokuwa kuwa. Kee jaa remẽ teve. Pe'ĩpe'ĩ rã'ĩ oporegeta opi remẽ tè. Ãmẽ tè pirujẽ wenutà ojimokasi kupa. Jaenu katu tè ipi. 32 Ãmẽ Janejare'e ayvu mojenuarà mõ sõ opota oporegeta remẽ, tojikõtevẽ e'ã imojenua rè ipi. “Pepi rã'ĩ taporegeta”, te'i e'ã ãmõ kõ pè ipi. 33-34 Janejare'e nopotai jaiko teitete ipi, Jesu koty rewarà kõ rõmõ jajimoaty remẽ. Ivo katu jaiko remẽ tè ikatu ijupe ãmẽ ipi. Ãmõ, janepy'arõwã gatu remẽ teve jaenu ipi.
Ãmõ, kee a'e Jesu koty rewarà kõ pè, pirujẽ taa kõ pewarà kõ pè. Janejare'e moe'ea pè pejimoaty remẽ, wãivĩ kõ toporegeta e'ã ikenẽ jovake. [Tojapyaka katu kõrijõ poromotekokuwaa rè.] Ãmõ, wãivĩgwerà tojimojõvijã e'ã Janejare'e pè jimoatya pè, tãmõ Moisesi remikusiwarerà rupi katu. 35 Ãmõ, opota sõ manyvo okuwa remẽ, wetã wyry pè kõrijõ tè toporanu omẽnà pè ipi, manyvo jaa rè. Nikatui jimoatya pè oporegeta wãivĩgwerà remẽ.
36 Eayvu rupi napeiko ywe'ei tite. “Ore ywesõ orokuwa Janejare'e remimotarà Pauru wyi”, pejẽ ywe'e tite ipi. Pewyi rõwã Janejare'e ayvu uu. Peupe rõmõ'ĩte teve rõwã Janejare'e omuu wayvu. 37 Aje ywete Janerõvijã ywete ayvu rupi ãwĩvo akusiwa pemotekokuwa rõmõ aiko. Ajawyi ava mõ, “Janejare'e ayvu epy'a pupe tui”, e'i remẽ, “aje” e'i kuwa eayvu pè ãmẽ. Ãmõ, “Janejare'e 'Ãg wyi eremikuwa kõ areko”, e'i remẽ, “aje” e'i kuwa eayvu pè. 38 Ãmẽ ava mõ sõ, “aje ipo” ne'i eayvu pè remẽ, “aje ipo” tapejẽ e'ã ijayvu pè. Tapejapyaka e'ã ijayvu rè.
39 Ajawyi kee tapejẽ Janejare'e pè ipi: “Nekasia eme'ẽ ije, neayvu tamojenu jane kõ pè”, tapejẽ ijupe ipi. Ãmẽ ayvu nojimo'ei ee mã'ẽ rupi jane mõ sõ oporegetatà Janejare'e 'Ãg remimojikuwa rupi remẽ, kee tapejẽ e'ã ãmẽ ijupe: “Ãnĩ. Tapeporegeta e'ã a'e rupi”, tapejẽ e'ã ijupe. 40 Ajamã'ẽ Janejare'e pè pejimoaty remẽ, tapeiko teitete e'ã ãmẽ peiko. Ivo katu mã'ẽ rupi kõrijõ tè tapeiko.