Kiristu poeraawerà rewarà
15
Ãmõ, kee a'e teve pejẽ, eretãrãgwerà kõ. Janejare'e ayvu e'eay Jesu rewarà rè itõkõ pemotekokuwavay pepytery pè aiko remẽ. A'e rè itõkõ pejirovija ypy ãmẽ. Age'e remeve pejirovija jẽ ee peiko. 2 A'evoa rupi Janejare'e penereko katu, aje ywete pejirovija katu jẽ ee remẽ. Ajamã'ẽ pepoi ywe'e tite sõ iwyi remẽ, manyvo jaa rõmõ rõwãtà pejirovija ee maekwerà ãmẽ ky'y.3 Aenu maekwerà tè itõkõ amome'u pejẽ, Kiristu rewarà ayvu. Kee jaa ywesõ itõkõ amome'u pejẽ ipi:
Kiristu omãnõ janerekovijarerà pè, janeaiwererà repykarà mõ. A'evoa rè Janejare'e okusiwaokapa teãmã. Aekwerà rupi katu ekoi.a 4 Ãmõ, tyvy rena pè eãgwerà omokatu kupa. Ajaire opoerapa, moapy 'arà paire. Janejare'e okusiwaoka maekwerà rupi katu teve a'evo ekoi.b
5 Opoera paire ojikuwa Peturu pè. Aja paire wemimonokwerà kõ pè ojikuwa mijẽ, 12 mãe kõ pè.c 6 Aja paire teve okoty rewarà kõ atyry pè ojikuwa mijẽ, ojimoaty kupa remẽ. 500 rõmõ mãe kõ pè ojikuwa ky'y. Werywete pirujẽ a'e kõ oiko jẽ age'e remẽ.d Nokãjãive kupa. Ajamã'ẽ ãmõgwerà okãjãma.
7 Ãmẽ ajaire Tiaku pè ojikuwa. Ajaire pirujẽ wemimonokwerà kõ pè ojikuwa ky'y.
8 Ajaate eupe ojikuwa ky'y, takypy rupiwarà rõmõ tè. Ãwitõ wãivĩ wyy opi ky'y paire imemy mijẽ remẽ, a'e ja'yry vo 'ejẽ ije aiko, Jesu resakarerà rõmõ.e 9 Ajawyi Jesu remimono ypykwerà kõ ywesõ ewyi jõvijã kõ rõmõ ekoi. Ije ãmẽ aja paire tè epyteporo emono jane kõ motekokuwaarà rõmõ taiko. Nekatui 'eteay itõkõ ije aiko mijã. Jesu koty rewarà kõ amomorijau mã'ẽ rõmõ tè ije aiko mijã. Aekwerà rè ajimosĩoka 'ejẽ aiko ipi. Ajawyi najimoe'e'ãi aiko.f 10 Ajamã'ẽ nivoi jẽ aiko ipe remẽ, Janejare'e eporijauesapa teãmã sikaepo erereko. Erereko katua rupi a'evo erereko. Ekatuay wyi rõwã aposiko wete ijupe. Epyteporo taposiko ijupe. Nepyteporo pãnẽi ajamã'ẽ. Emipyteporokwerà rõmõ manyvoa rã rõmõ rõwã ipe ije mijã. Ajamã'ẽ ije ywesõ aposiko ywete ijayvu mojenuarà rõmõ aiko, pirujẽ ijayvu mojenuarà kõ wyi. Ajamã'ẽ ekasia pè rõwã aposiko aiko. Kõ'ẽ jawe jawe Janejare'e emokasi erereko a'evo taiko. 11 Aepo ayvu katu rè tè poromotekokuwa aiko ipi. Ãmõ kõ ve evo ve ekoi. Ojevo jẽ Janejare'e ayvu e'eay oromojenu oroiko ipi. Ãwĩvo tè pejirovija Jesu rè ky'y.
“Okãjãma mãe kõ opoeratà”, e'i mã'ẽ
12 Kee jaa oromojenu poromotekokuwa rõmõ ipi: “Kiristu omãnõ maire Janejare'e omomoera”, jaa. Ajamã'ẽ peneirõarà kõ mõ, kee e'i tite: “Janejare'e noporomomoera'ãi”, e'i tite! 13 Aepo jaa pè kee a'e. Janejare'e noporomomoera kuwa'ãi sõ remẽ, nomomoera'ãi kuwa Kiristu omãnõ remẽ mijã! 14 Ãwĩvo Janejare'e nomomoerai sõ Kiristu remẽ, manyvo jaa rõmõ rõwã kuwa ayvu katu oromojenu pejẽ ãmẽ mijã! Pejirovija teywete kuwa Kiristu rè penõvijã wasu rõmõ ãmẽ peiko mijã! 15 Aje ywete rõwã sõ a'evoa remẽ, oreayvu nivo'ãi kuwa ãmẽ mijã. Orewari teywete kuwa ee ãmẽ mijã. Nivo'ãi kuwa Janejare'e rè pejirovija mijã, “Janejare'e omomoera Kiristu”, oro'e ipe pemotekokuwa remẽ. Aje sõ Janejare'e nomomoera'ãi jane kõ remẽ, nomomoera'ãive kuwa Kiristu mijã. 16 Kee rewarà mõ aepo a'e pejẽ. Nopoerai sõ omãnõ mãe kõ remẽ, nopoera kuwa'ãi kuwa Kiristu mijã. 17 Nopoerai sõ Kiristu remẽ, manyvo jaa rõmõ rõwã kuwa pejirovija ee ãmẽ mijã! Peaiwererà rè pereko jẽ kuwa peneve ãmẽ mijã. 18 Ãmõ, kee jaa teve kuwa, nopoerai sõ Kiristu remẽ. Ojirovija ee maekwerà kõ, a'e omãnõ maekwerà kõ, Janejare'e noereko katu'ãi kuwa mijã. Omãnõ te'ĩte kõrijõ tè kuwa ãmẽ kupa mijã. 19 Ãmõ, kee jaa teve kuwa. Kiristu rè jajirovija ke'ĩatu tè ike rupi tekoua rupi remẽ, jane ywesõ kuwa janeãgyo pirujẽ ijãgyo mãe kõ wyi jaiko mijã!
“Kiristu ypy mãnõa wyi opoera iko”, e'i mã'ẽ
20 Aje Janejare'e omomoerapa Kiristu ajamã'ẽ. A'e ypy omomoera mãnõa wyi. A'evoa rupi jakuwa omãnõ maekwerà kõ ve omomoeratà. 21 Janerãmõi ypykwerà okãjã karamoe remeve,g tãmõ Atão eu ijupe mã'ẽ. A'e rè ypy a'evoa ojiãparõma. Ajawyi ivo jẽ jakãjãma jaa jaiko. Age'e sõsi Kiristu kasia rupi japoeratà jaiko ky'y, jakãjã maire. A'e rè japoera mã'ẽ ojiãparõma imojikuwapa mõ ky'y. 22 Jane kõ pirujẽ opa mãerã kõ tè, tãmõ Atão jeapyrerà kõ rõmõ. Ãwĩvo ve Kiristu revejẽ jaiko remẽ, Janejare'e janemomoera tarà mijẽ ivokwery pè tijaiko. 23 Ajamã'ẽ Kiristu ypy opoerapa iko. Kãramõ uu tarà mijẽ. Ãmẽ tè Kiristu koty rewarà kõ opoeratà iko ky'y. 24 Yvy ojituruka remẽ a'evotà janerereko. A'e renone Kiristu wãpã kõ nomokasioka'ãi ky'y. Ãjãgai rõvijã. Ija mãe kõ. Ijayvukasi mãe kõ nomã'ẽytyi ee mãe kõ. Pirujẽ a'e a'e kõ nomokasioka'ãi ime'ẽ kõ Uu po pè, Janejare'e po pè. 25 Kiristu ãmẽ Jõvijã wasu rõmõ tè ekoi jẽtà, ajaate pirujẽ wãpã kõ owyry kyty oinõmatà Uu ayvukasia rupi.h 26 Ãmẽ si omomatà mãnõa ky'y.i Nijakãjã'ãi ãmẽ ky'y. 27 Ajare kee e'i Janejare'e ikusiwaokapa amãtejẽ:
“Kãramõ Eremimuu rã amojõvijã wasutà ereko.
Iwyry kyty pirujẽ ainõokatà ky'y”, e'i Janejare'e maekwerà.j
Janejare'e kõrijõ tè Jesu wyry kyty rõwã ekoità. 28 A'evo Janejare'e werekotà ãmẽ. Kiristu wyry kytywarà kõ rõmõ pirujẽ oinõokatà. Kiristu ãmẽ Uu wyry kyty ojinõtà. Ãmẽ si pe'ĩypyte ikewarà kõ Rõvijã wasu rõmõ Janejare'e ojikuwatà ky'y.k
29 Pejapyaka rã'ĩ eayvu rè, kee e'i mãe kõ pewarà: “Janejare'e noporomomoera'ãi”, e'i mãe kõ pè a'e mã'ẽ. Uve jane kõ mõ okãjãma mãe kõ rekovijarerà pè ojimojãmorĩoka mãe kõ.l Manyvoa rã rõmõ rõwã a'evo wereko kupa mijã, okãjãma mãe kõ nopoera'ãi sõ remẽ? 30 Aje okãjãma mãe kõ Janejare'e omomoeratà ereko. Nomomoera kõ'ãi sõ remẽ, manyvo jaa rõmõ rõwã kuwa orojimomaramaoka kõ'ẽ jawe jawe ijayvu mojenua rè mijã.
31 Kõ'ẽ jawe jawe aa remẽ emaramatà 'ejẽ aiko. Ajawyi ejukatarà amoa'u jẽ aiko ipi. Ajamã'ẽ pene tè ajimokasi jẽ aiko, eretãrãgwerà kõ. Janerõvijã Kiristu Jesu revejẽ peiko evo, ajawyi tè. 32 Ike, Epesu taa pè werywete ejuka kupa. [Ojikõ'õ mãe kõ eayvuvaja vaja.] Ãwitõ jawarà ka'aporà ojãrõ remẽ ojiapisi, ãwĩvo tesõ ere kupa ipi! [“Nikuipei'ãi emãnõa ky'y”, a'e ajipy'amogeta ipi. Ãwĩvo remẽ, nimanyvo'ãi ejuka kupa remẽ.] Ajamã'ẽ Janejare'e nomomoera'ãi sõ okãjãma mãe kõ remẽ, manyvoa rã rõmõ rõwã kuwa ejukatà kupa mijã. Kee eu mã'ẽ vo kõrijõ teve kuwa aiko mijã:
“Janemãnõa nikuipei ky'y.
Ajawyi jajimi'u jẽsi enoneve.
Jaka'u teve jẽsi”, eu mã'ẽ rupi tè kuwa aiko mijã.m
33 Ajawyi tapejimoripeoka e'ã ikenẽ. Jane nivoi mãe kõ reve jajimory remẽ, ivo tekoua wyi janemomoiokatà ãmẽ kupa. Nivoi tekoua mã'ẽ rupi jaiko ywe'e titetà ãmẽ jaiko. [Ajawyi, “Nimanyvoi nivoi mãe kõ janepytery pè ekoi remẽ”, tapejẽ tite e'ã!] 34 Oiko pepytery pè nokuwai Janejare'e mãe kõ mõ. Tapejimosĩoka ekojẽ aepo renu. Ajawyi kee a'età poromotekokuwa aiko. Peiko teitetea wyi tapepoi ikenẽ! Ivo tekoua rè ywesõ tapetekokuwa peiko ky'y! Ãmẽ tè napepy'a ky'a'ãi peiko, a'e pejẽ.
“Ãmõ rupi tètà janepirà ipyau mã'ẽ”, e'i mã'ẽ
35 Kee pepytery pewarà kõ mõ oporanu ije: “Manyvotà põ Janejare'e wereko okãjã mãe kõ imomoera? Manyvo tary ve põ janepirà wereko?” e'i ije kupa. 36 Aepo e'i mãe kõ notekokuwai mãe kõ vo ekoi. Moma'eyva rã'ãigwerà rè tè poromosã'ãgatà tapetekokuwa sa'u. Iteetejẽ moma'eyva rã'ãigwerà ipi. A'e mõ jaõtã remẽ tè katu ejõità. Itujupa rã'ĩ ipi. Omãnõ maevo sõ tite rã'ĩ ipi. Ajaire tè ejõi ipi. 37 I'y ojimovijapa mã'ẽ rõwã jaõtã ipi. Ã'ãigwerà tè jaõtã ipi. Aresi rã'ãigwerà jaõtã remẽ, aresi tè oẽ. Tiriku rã'ãigwerà jaõtã remẽ, tiriku tè oẽ. Avasi rã'ãigwerà jaõtã remẽ, avasi teve oẽ. Wãisõ a'evo ekoi ipi. 38 Jaõtã maire, ejõi ipi. Janejare'e tè omoejõioka wemimota rupi. Ojimovijapa remẽ, ã'ãigwerà vo rõwãtà ky'y. [Ãwĩvo ve ã'ãigwerà vo 'ejẽtà janepirà Janejare'e oinõ. Omãnõ mãe kõ rekovijarerà pè ipyau mã'ẽ rõmõ oinõtà.]
39 Moma'e ro'o rè tè poromosã'ãgatà. Ike yvy pewarà kõ ro'o iteetejẽ ekoi ipi. Janero'o ãmõ rupi teve. Mijarà ro'o ãmõ rupi teve. Wyrakwerà kõ ro'o ãmõ rupi teve. Pira ro'o ãmõ rupi teve. Ojevo jẽ rõwã ekoi.
40 Yva pewarà kõ rè tè poromosã'ãgatà. Kwaray. Jay. Jaytata kõ. Wãisõ iteetejẽ oo. Ikatuay kupa. Ivo ve yvy pewarà kõ. Ikatuay wete ve. Ajamã'ẽ ojevo jẽ rõwã ikatua kõ. 41 Kwaray ikatuay wete. Ãmõ, jay ikatuay wete. Ajamã'ẽ jay katua ãmõ rupi teve kwaray katua wyi. Ãmõ, jaytata katua ãmõ rupi teve kwaray katua wyi. Ãmõ, jay katua wyi teve. Ãmõ, jaytata kõ teve iteetejẽ. Ãmõ rupi teve ojiwyi kupa.
42 Ãwĩvo vetà Janejare'e janemomoera remẽ. Teãgwerà jaaty remẽ, itujupa mã'ẽ rõmõ teipe tui upa. Ajamã'ẽ Janejare'e janemomoera remẽ, nituju'ãi mãerã rõmõtà tè jaiko ky'y ãmẽ. Owaraytà ãmẽ jaiko ky'y. 43 Janereãgwerà jaaty remẽ, ijaiweray ipi. Nikasi. [Temija'arà rõwã ãmẽ.] Ajamã'ẽ japoerapa remẽ sõsi janekatuay wetetà ãmẽ jaiko ky'y. Janekasiay tevetà jaiko. [Temija'arà rõmõtà tè ãmẽ jaiko ky'y.] 44 Age'ewarà janepirà teãgwerà rõmõtà tè teãmã ekoi. Ajamã'ẽ japoerapa remẽ sõsi janepirà ãmõ rupi tevetà ekoi ky'y. Teãgwerà rõmõ rõwãtà a'e ãmẽ ky'y. Janejare'e 'Ãg omoigooka mãerã tè ky'y.
Aje ike yvy rupiwarà rõmõ jaiko remẽ, yvy rupiwarà rõmõ teve janepirà. Ajamã'ẽ Janejare'e janemomoera remẽ, janepirà ipyau mã'ẽ oinõtà jane imoigooka karuaru rõmõ. Ãmẽ sõsi yvapewarà rõmõtà tè jaikotà ky'y. Janekatuay rõmõtà tè ãmẽ jaiko ky'y! 45 A'evoa rè kee e'i Janejare'e ikusiwaokapa karamoe remeve: “Jane ypykwerà Janejare'e oinõ ike rupiwarà rõmõ toiko, Atão eu ijupe mã'ẽ”, e'i maekwerà.n [A'e ajaire okãjãma.]
Janeypykwerà ipyau mã'ẽ tè Jesu Kiristu ãmẽ ky'y. Tãmõ Atão rekovijarerà rõmõ Kiristu ekoi. A'e Janejare'e 'Ãg kasia rupi poromoigo karuaru mã'ẽ tè.
46 Ajamã'ẽ age'e remẽ janepirà ikewarà rõmõ tè rã'ĩ ekoi. A'e rupi tè yvy pewarà rõmõ jaiko rã'ĩ. Ajamã'ẽ kãramõ ãmõ rupi tevetà janepirà ipyau mã'ẽ, Janejare'e oinõ tijaiko karuaru mãe rã. 47 Janejare'e tãmõ Atão oinõ ypy remẽ, yvy ku'ikwerà tè oinõ. A'e ipirà rõmõ oinõ. Ajamã'ẽ Atão rekovijarerà yva pe wyi tè uu. [Jesu Kiristu tè a'e.] 48 Janepirà age'ewarà ike yvy pewarà tè, yvy jinõgwerà tè, tãmõ Atão vo. Na'evo'ãi janepirà ipyau mã'ẽ, Kiristu reve ekoi mãe kõ pirà ipyau mã'ẽ. A'e Jesu Kiristu pirà votà tè ky'y. Yva pe wyi uu mã'ẽ pirà votà tè ky'y. 49 Age'e ike janepirà yvy jinõgwerà vo tè pirujẽ. Kãramõ yva pe wyi uu mã'ẽ pirà votà tè janepirà ky'y.
50 Kee a'e tary ve pejẽ, eretãrãgwerà kõ. Janepirà age'ewarà inẽ mã'ẽ tè teãmã. Janepirà mãerã rõmõ rõwã a'e. Ajawyi Janejare'e rena kyty noo'ãi oiko karuaru rõmõ iko. Ajamã'ẽ Janejare'e 'Ãg janepirà ipyau mã'ẽ oinõ janere remẽ tè katu jaiketà ipyri jaiko ãmẽ ky'y.
Janepirà ipyau mã'ẽ rewarà
51 Ajare pejapyaka katu eayvu rè, Janejare'e nomojikuwai mijã maekwerà rè. Jane kõ pirujẽ rõwã opatà Kiristu nonurive remeve. Ipẽgwerà uve jẽtà uu mijẽ remẽ. Ajamã'ẽ uu mijẽ remẽ, pirujẽ Janejare'e janepirà wekovijanõtà py'awarà mõ ãmẽ. 52 Ãwitõ janerea merẽ py'awarà mõ ipi, ãwĩvotà janepy'a wekovijanõ. Py'awarà mõ tè a'evotà janerereko. Jimi'a puku yva pe wyi ojenutà rã'ĩ. A'e ojenu remẽ sitõ Janejare'e omomoeratà okãjãma maekwerà kõ pirujẽ, awyje tokãjã e'ã ky'y. Ãmẽ sõsi janepirà wekovijanõtà ky'y. Janepirà ipyau mã'ẽ oinõtà janere ky'y. Nokãjã'ãi mãe kõ rõmõ jaikotà ãmẽ ky'y.o 53 Age'ewarà janepirà okãjã mãe rã tè pirujẽ. Jakãjã remẽ, janepirà inẽma ipi. Ajamã'ẽ janepirà ipyau mã'ẽ rè nijakãjã'ãi ãmẽ ky'y. 54 Okãjãma mãe kõ ãmõ rupi teve oinõtà tokãjã e'ã ky'y. Wayvu rupi katu a'evookatà janererekooka. Nokãjã'ãi mãe rã rõmõ janereinõtà ky'y. A'evoa rè kee e'ipa Janejare'e ikusiwaokapa karamoe remeve: “Jõvijã wasu rõmõ ajikuwaoka aiko ky'y remẽ, mãnõa amomatà ky'y. Ike yvy pewarà kõ pè nikasi'ãi ky'y”, e'i.p 55 Kee e'i teve itõkõ: “Ajawyi janekãjãa wyi nijakyjei ky'y. Nikasi a'evoa janeupe ky'y”, e'i.q 56 Ipojy ai tè jakãjã mã'ẽ janeupe mijã, janeaiwererà rewarà mõ. Janejare'e ayvu tãmõ Moisesi okusiwa maekwerà rupi janeaiwererà ojikuwa ipe. 57 Ajamã'ẽ Janejare'e ikasiay janeaiwererà ky'a'oa rè. Janemokasiay nivoi tekoua wyi tijaiko. Ajawyi jaiko karuarutà ipyri ky'y, Janerõvijã Jesu Kiristu rè jajirovija ky'y remẽ. A'evoa rã rè simoe'e ywete amãtejẽ Janejare'e ãmẽ jaiko.
58 Ajawyi tapejimokasi jẽ Kiristu rè pejirovija jẽ peiko, a'e pejẽ, eremiau kõ. Tapeity ywe'e tite e'ã a'evoa. Janerõvijã ywete posikoa rupi jẽsi tapeposiko katu jẽ peiko, a'e pejẽ. Napeposiko pãnẽ'ãi Janejare'e kasia rupi ãmẽ. Ãwĩvoa pekuwapa.