Karakuri moatya Jerusarẽ taa wãnà kõ pewarà rewarà
16
[Kee pejẽ itõkõ eupe ikusiwa: “Ore ve oropota karakuri moaty imonooka Jesu koty rewarà kõ pè, Jerusarẽ taa pè, ipãtavõarà kõ rõmõ”, pejẽ ije.] Ikatuay pekarakuri pẽgwerà peme'ẽ ijupe kõ remẽ. Ajawyi pekarakuri tapemoaty. Kee a'età a'evoa rè pemotekokuwa. Ãwitõ Karasia yvy wãnà kõ pè a'e, ãwĩvo ve a'età pejẽ ãmẽ.a 2 Tapemoaty amãtejẽ ikõ karakuri nẽ. Jimoava 'arà paire upi upi ikõ ta'evo peiko nẽ. Terãrõ e'ã rã'ĩ ikõ pekupa nẽ. Ãmẽ mõa'ãrõwã pekarakuri ky'y remẽ, mõa'ãrõwã sa'u ve pemowaite itetà imokatu ãmẽ. Ãmẽ kejõgà sa'u sõ remẽ, ivo ve kejõgà teve pemowaite itetà imokatu. A'evo pemoatypa amãtejẽ remẽ, nijamoaty'ãi mokope avãe remẽ. 3 Ãmẽ aa pepyri remẽ, kwaima'ekwerà mõ, penemipyteporokwerà kõ, amonotà Jerusarẽ taa kyty, penemime'ẽgwerà toeraa kupa. Ãmẽ kareta eremikusiwarerà amonookatà upi kõ, imojikuwaa rã rõmõ. 4 Ãmẽ ikatu tè sõ moko kyty aa remẽ, a'e kõ ve ootà erupi ãmẽ.Wemikuwa rupi tè Pauru ootà remẽwarà
5 Aa penesa remẽ Masetonia yvy rupi rã'ĩ akwatà. A'e pe wyi aa jẽtà penena kyty.b 6 Apota aiko puku sa'u pepyri aiko mã'ẽ. Apota irõwã mã'ẽ rerokwapa pepytery pè aiko rõmõ. Ãmẽ eopa rè epãtavõ kuwa pekupa, aa jẽ remẽ. 7 Kuise'ẽ warà mõ rõwã aatà rã'ĩ pekoty. Janerõvijã ywete opota remẽ, aiko puku sa'utà pepyri.
8 Ajamã'ẽ apota ike Epesu taa pè Janejare'e moe'ea wasu 'arà rãrõ rã'ĩ. Pẽtekosi 'arà aãrõtà rã'ĩ.c Aja paire tè kuwa aa Masetonia yvy kyty ãmẽ. 9 Ike uve mõa'ãrõwã jane kõ opota Janejare'e ayvu wenutà mãe kõ. Janejare'e oinõ sa'u eposikoa ikewarà kõ rè. Ajawyi ijayvu rè jane kõ amotekokuwa jẽtà rã'ĩ aiko. Ajamã'ẽ uve teve mõa'ãrõwã ãpã kõ ike rupi.d
Timoteu rewarà
10 Ãmõ, kee a'e teve pejẽ tapekuwa. Ãwitõ Janerõvijã ywete ayvu rupi aposiko, ãwĩvo ve Timoteu oposiko iko. Ajawyi oo penesa remẽ, tapemory katu imojimoena pepyri. Tapereko katu teve peneve ereko.e 11 Kõnomĩokyry teipe Timoteu. Ajamã'ẽ taperõarõ e'ã! [Tapepãtavõ moko kyty, ikatu tè toiko.] Ojivytà oo pewyi remẽ ikõ tapepãtavõ jẽ ijopa rè imono nẽ. Ijivya rè oroãrõtà ike, janeretãrã kõ reve.f
12 Kee a'e janeretãrã Aporu pè: “Ikatu neo Korĩtu taa pè a'e pewarà Jesu koty rewarà kõ resa”, a'e py'yi epe ijupe. Ajamã'ẽ age'eve noo'ãi rã'ĩ. “Awyjepa ike eposikoa remẽ tè aatà”, e'i ije.
Kareta moawyjepaa
13 Tapemoa'u jẽ ikõ Jesu vãea rã nẽ. [Tapepy'a katu ikõ ivãea rã rè ipi nẽ.] Tapepoi e'ã ikõ Jesu rè pejirovijaa wyi ipi nẽ. Ojikõ'õ mãe kõ wyi tapekyje e'ã teve ikõ ipi nẽ. Janejare'e rè ikõ tapejimokasi jẽ peiko nẽ. 14 Peposiko peiko remẽ, toporoauvay ikõ peiko ipi nẽ. Ãwĩvo ikõ tapeiko nẽ.
15-16 Pekuwa Sitepana, ipyriwarà kõ reve. A'e kõ ypy itõkõ Kiristu rè ojirovija Akaja yvy pè. A'e kõ itõkõ omokasiay Janejare'e rè ojirovija mãe kõ ereko kõ ipi. Ajawyi a'e kõ pewarà mõ kee a'e pejẽ. Tapemomojy kõ ipi. Ijayvu poromotekokuwa mã'ẽ rupi tapeiko ipi. Ãmõ kõ pewarà mõ aepo a'e teve, Sitepana vo oo oposiko pepytery pè mãe kõ. Ijayvu kõ rupi ikõ tapeiko ipi nẽ, a'e pejẽ.g
17 Eroryvay Sitepana kõ vãea rè. Ãmõ, Potunatu vãea rè. Ãmõ, Akaiku vãea rè. A'e kõ epãtavõ gatu penekovijarerà mõ iko kupa ipi. Amã'ẽ ee kõ remẽ, pejẽ maevo sõ tite peposiko epyri. 18 A'e kõ emokasiay wete emoryoka. Akuwa wekoa rupi pemoe'eoka teve pemory kupa ipi. Ajawyi tijamomojy kõ, a'evo mãe kõ teve.
19 Jesu koty rewarà kõ ike ojimoaty mãe kõ, Asia yvy pewarà kõ, opota ojimory pene aã eremikusiwarerà rupi. Kejõ. Akira. Ãmõ, erekwarà Pirisira. A'e kõ retã wyry pè ojimoaty mãe kõ teve. A'e kõ opota ojimory eremikusiwarerà rupi pene mãe kõ. Janerõvijã ywete koty rewarà kõ rõmõ teve ekoi kupa. Ajawyi penauvay kupa.h 20 Ãmõ, pirujẽ Jesu koty rewarà kõ ikewarà kõ ve opota ojimory pene aã kareta rupi.
Tapejimory katu ikõ ojee Jesu koty rewarà kõ rõmõ ipi nẽ, pejirovãe remẽ upi upi ipi nẽ.
21 Aã pemorya rewarà ije ywete epo pè tè akusiwa ajupa ky'y. Pauru tè ije.
22 Janerõvijã ywete noaui mãe kõ Janejare'e omomorijauvaytà, a'e pejẽ. Ije ãmẽ, “Ejivy ejo, Erõvijã ywete”, a'e Jesu pè kõrijõ aiko. Apota Janerõvijã ywete uu kuise'ẽ.
23 Ãmõ, kee a'e pejẽ. Janerõvijã Jesu ikõ tapenereko katu okatuaya rupi nẽ, a'e pejẽ.
24 Ije poroauvay. Kiristu Jesu revejẽ jaiko wyi pe'ĩypyte rõmõ jaiko. Ãwĩvo tijaiko ipi.
[Awyjepa rã'ĩ.]