“Juteu rãmõi kõ vo tapeiko ywe'e tite e'ã”, e'i mã'ẽ
10
1-2 Ãmõ, kee a'e pejẽ, eretãrãgwerà kõ. Age'e aporegetatà Moisesi kõ rekoawerà rè, tapetekokuwavay peiko. Tãmõ kõ karamoe remẽ Moisesi reve oo remẽ itõkõ Janejare'e oporijauesa kõ ipi. Yva rãtasĩ rupi itõkõ weraa kõ ereko. Ãmõ, pãranã myterà rupi teve itõkõ weraa kõ ereko. Pee oinõoka pãranã myterà rupi ijupe kõ, to'yasa upi oo kupa.a A'evo tãmõ Moisesi reve ekoi mãe kõ karamoe remeve. A'evo ojãmorĩ maevo sõ tite yva rãtasĩ pupe oo kupa. Ãmõ, pãranã pupe ojãmorĩ maevo sõ tite oo kupa. 3 Tekoe'ãma rupi oo kupa remẽ itõkõ Janejare'e ja'umã'ẽ omuroka ijupe kõ ipi.b [Kõ'ẽ jawe jawe a'evo wereko kõ.] 4 A'e Janejare'e remime'ẽgwerà tè itõkõ o'u kupa ipi. Ãmõ remẽ pareti pe wyi tè itõkõ yy omoẽoka ijupe kõ i'ywa kõ rõmõ. A'e pupe pirujẽ Janejare'e remime'ẽgwerà pupe oy'u kupa, ojevo jẽ.c Ajamã'ẽ Kiristu mojikuwaparà rõmõ teãmã pareti. A'e tè oo jane kõ reve. 5 Ajamã'ẽ a'e a'e kõ rè Janejare'e omã'ẽ remẽ, naoryi omãjã ee kõ. Pe'ĩpe'ĩgà mirà kõ rè ory iko. Ãmõ kõ rè naoryi omãjã. Ajawyi itõkõ opa 'a tè tekoe'ãma rupi iko kupa. A'e kõ ryvy kõ mõa'ãrõwã tekoe'ãma rupi okwa kupa remẽ.d6 A'evo Janejare'e wereko kõ janemotekokuwaarà rõmõ, ivo tekoua tijakuwa ipi. Tãmõ kõ itõkõ weko aiwerà rè ywesõ oja'a iko kupa ipi. A'e kõ reruparà mõ rõwã ikõ tijaiko nẽ, a'e pejẽ. Tijajitupi ywe'e tite e'ã nivoi tekoua rè, a'e pejẽ.e
7 Kee ekoi itõkõ karamoe remẽ kupa. Ojarà rã'ãga jimoãtãgwerà itõkõ oinõ imoe'e kupa mijã. Janejare'e ayvu rupi rõwã a'evo ekoi kupa. Jimi'u wasua tesõ itõkõ oinõ ovake kupa ipi, imoe'e rã'ãga kupa, ãwisõ eminõgwerà kõ teipe remẽ. Ojimarai rã'ãga ovake imoe'e kupa ipi. Aekwerà rewarà Janejare'e okusiwaokapa karamoe remeve, eruparà kõ rõmõ tijaiko ywe'e tite e'ã.f 8 Ãmõ, jimomy'aa nikatui Janejare'e pè ipi. Tãmõ kõ ãmõ wãivĩ rè ojimomy'a remẽ, ijatyray opa ãmẽ kupa. 23.000 rõmõ tesõ opa kupa. Aja 'arà peve opa kupa. Ajawyi a'e kõ vo tijaiko e'ã, a'e pejẽ. Eruparà rõmõ tijaiko e'ã ky'y, a'e pejẽ.g 9 Kee e'i ywe'e tite kupa: “Janejare'e janeporijauesa jẽtà ajamã'ẽ. Nijanemomorijau'ãi sijavy javy jẽ ijayvu remẽ”, e'i ywe'e tite ojiupe kupa. Waiwererà rupi ekoi jẽ kupa remẽ, Janejare'e moe oinõ tosu'u su'u kõ. Mõa'ãrõwã oinõ moe. A'e rè moe remisu'ukwerà kõ mõ opa.h A'e kõ reruparà mõ tijaiko e'ã. 10 A'evo paire aekwery vo mijẽ kupa. Ijayvu tè jẽ ywe'e tite Janejare'e pè kupa ipi. Ajawyi wemĩgwai yvapewarà omuu imomaramaoka kõ. Opa ãmẽ kupa. Ajawyi tapeã'ã ywe'e tite e'ã apijarerà ipi, a'e pejẽ.i
11 A'evo 'evo tãmõ kõ karamoe remẽ ekoi. Ajamã'ẽ janemotekokuwaarà rõmõ tè aekwerà okusiwaoka Janejare'e janeupe, a'e kõ vo tijaiko ywe'e tite e'ã age'ewarà kõ rõmõ jane ky'y. Ajawyi apijarerà kõ vo rõwã tijaiko ky'y, a'e pejẽ. 12 Ajawyi kee tapejẽ ywe'e tite e'ã ipi: “Ije ywesõ ajimokasi Jesu rekoa rupi aiko. Ajawyi najavy'ãi”, tapejẽ tite e'ã peiko ipi. [Kee tapejẽ kõrijõ Janejare'e pè ipi: “Emokasi rejupa, Papa, ivo katu taiko”, tapejẽ kõrijõ ijupe ipi.] 13 Ãjãgai rõvijã janerã'ã janerereko ipi, nivoi tijaiko. Ãmõ, japota teãmã janeremimota ai rupi jaiko ipi. Ava jẽ rõwã na'evoi ekoi ipi. Pirujẽ a'evo janerã'ãa janerereko ipi. Ajamã'ẽ Janejare'e janemokasioka jẽ janerereko, [janerako'i ee remẽ]. A'e tè okuwa janerereko katua mõ janerã'ã remẽ. Janemokasioka jẽ janerereko okasia rupi ipi. Janemoane'e jẽ janemokasi janerereko ipi, ãwisõ janerã'ã mã'ẽ tikasi e'ã janeupe ky'y. Kõitokõ kee e'ipa: “Ekasia ywesõ ikasi pepy'a pè penã'ã mã'ẽ wyi ipi”, e'ipa. Temirovija tè Janejare'e. Ajawyi wayvu rupi katu a'evo janererekotà ipi. Nijanereity'ãi janevote tijaiko janekasia rupigà ipi. A'e pè tijajimokasioka ãmẽ ipi.
“Pe'ĩypyte rõmõ ãjãg kõ reve tapeiko e'ã”, e'i mã'ẽj
14 Ajawyi kee a'e pejẽ, ejimorypa katu kõ. Ijarà rã'ãga jimoãtãgwerà kõ wyi tapejireko katu peiko ipi. Tapemoe'e ywe'e tite e'ã ikenẽ. 15 Petekokuwavay wyi aepo a'e pejẽ. Pekuwapa eayvukwerà a'evoa rè. Ajawyi pevote tapekuwa eayvukwerà rupi katu peiko remẽ ikõ peiko nẽ.
16 Jajimoaty jaja'a Jesu mãnõawerà rè mã'ẽ rè poromotekokuwatà ky'y. Uvary aisiriri mã'ẽ ja'utà remẽ, “Papa yvapewarà, nekatuay wete”, eutà imoe'e ipi. Ãmẽ ja'utà ojevo jẽ ãmẽ. A'e si'u remẽ, kee jaa sikuwapa: “Kiristu owykwerà omosãi janerereko katua rõmõ”, ejaa sikuwapa. “A'evo remẽ pe'ĩypyte rõmõ jaiko eeve”, ejaa sikuwapa. A'evo ve meju si'u remẽ, kee jaa sikuwapa teve: “Opirà ome'ẽ janeupewarà mõ”, ejaa sikuwapa. “Kiristu revejẽ jamãnõma”, ejaa tè. “Pe'ĩypyte Kiristu revejẽ jaiko”, ejaa teve.k 17 Ãwisõ janeatyray ipe jane remẽ, pe'ĩypyte rõmõ jaiko, pe'ĩte meju si'u ojeeve rewarà mõ.
18 Isaeu kõ rè tapejipy'amogeta esa, ajawyi. Janejare'e pè wemime'ẽ ãrã ome'ẽ mãe kõ o'u teve ja'umã'ẽ ipi. A'evoa rupi ojevo jẽ Janejare'e revejẽ ekoi kupa. A'evoa rupi teve pe'ĩypyte rõmõ ekoi kupa, Janejare'e reve.
19 Aepo jaa pekuwapa. Ajawyi poromotekokuwatà ijarà rã'ãga jimoãtãgwerà rewarà rè ky'y. Manyvoa rõmõ rõwã teminõgwerà jimoãtãgwerà kõ ipi. Ijupewarà mõ temime'ẽgwerà teve manyvoa rõmõ rõwã teve. 20 Ajamã'ẽ a'evo wereko mãe kõ Janejare'e pè rõwã ome'ẽ. Ãjãg kõ pè tè ome'ẽ. A'evo sõ pereko remẽ, pe'ĩypyte mã'ẽ rõmõ ãjãg reve tè kuwa ãmẽ peiko mijã. Nivoi kuwa a'evo peiko remẽ mijã. 21 Ãjãg rè rõwã jaja'a jajimoaty remẽ ipi. Jesu mãnõawerà moetea tè jajimoaty ipi. Uvary si'u remẽ, a'evoa rupi ojevo jẽ Jesu revejẽwarà kõ rõmõ jaiko. Ajawyi ãjãg kõ pè temime'ẽgwerà tape'u e'ã ikenẽ, a'e pejẽ. Ivo mã'ẽ rõmõ rõwã peiko a'evo peiko remẽ. 22 Kee jaa kuwasi pekuwa mijã. Janerõvijã ywete okãte'ã janere ipi. Ajawyi tijarõarõ ywe'e tite e'ã ipi, a'e pejẽ.
“Tapejavyoka e'ã nipy'a kasi mãe kõ pè”, e'i mã'ẽ
23 Maevo kee e'i tite ãmõ kõ ãmẽ: “Kiristu koty rewarà tè jane. Ajawyi pirujẽ iteetejẽ jaiko kuwa”, e'i tite kupa. Aje maevo sõ tite aepo jaa. Ajamã'ẽ pirujẽ rõwã manyvo jaiko mã'ẽ ikatu janeupe. Pirujẽ rõwã poromokasi ivo tekoua rè ipi.l 24 Pene kõrijõ tè rõwã tapeja'a peiko ipi. Ãmõ kõ py'amokasia rè tapeja'a teve peiko ipi.
25 Ajawyi ja'umã'ẽ pyya rena pewarà ja'umã'ẽ pepyytà iwa remẽ, kee tapejẽ tite e'ã: “Aã ja'umã'ẽ maevo Janejare'e rova rupi katua rõwã ãmẽ. Ijarà rã'ãga jimoãtãgwerà pè temime'ẽgwerà tè aã maevo”, tapejẽ e'ã. Tapepyy te'ĩte. Ãmõ, tapemii te'ĩte iwa. Nimanyvoi pejẽ a'evo peiko remẽ. 26 A'evoa rè kee ojikusiwapa Janejare'e ayvu rõmõ karamoe remeve: “Yvy jarà rõmõ teãmã Janerõvijã ywete ekoi. Pirujẽ yvy pewarà jarà rõmõ teãmã ekoi”, e'i maekwerà.m
27 Ajawyi Jesu noerovijari mãe kõ mõ sõ peneraa ojimiwa kõ pè remẽ, notekokuwai mã'ẽ vo 'ejẽ tapeiko teve ipyri kõ ãmẽ. Pekwa te'ĩte ãmẽ upi. Ivo ve ja'umã'ẽ omoẽ jimiwa pè kupa remẽ, pe'u te'ĩte teve. Ãwĩvo remẽ tè nimanyvo'ãi peupe ãmẽ. 28 Ajamã'ẽ kee e'i sõ pejẽ kupa remẽ, “Ãnĩ! Ijarà rã'ãga pè temime'ẽgwerà tè ãwĩ”, e'i sõ pejẽ kupa remẽ, ãmẽ si nape'u'ãi ãmẽ ja'umã'ẽ. Aepo e'i mãe kõ pè nivoi ja'u remẽ. Ajawyi tape'u e'ã ovake kõ ãmẽ, timanyvo e'ã aepo e'i peupe mãe kõ pè ãmẽ. Ãmẽ tè napepy'amoaioka kõ'ãi. 29 Pejẽ pe'u ipe remẽ nimanyvoi! Ajamã'ẽ ãmõ Jesu koty rewarà kõ rewarà mõ tè tape'u e'ã, a'e pejẽ. Ãmẽ tè kee ne'i tite'ãi kupa: “Ijarà rã'ãga pè temime'ẽgwerà nikatu'ãi a'u remẽ. Ta'u jẽ ajamã'ẽ!” ne'i tite'ãi ãmẽ kupa.
Kee e'i tite kuwa Jesu koty rewarà kõ mõ: “Eupe nimanyvoi a'u remẽ. Akuwa ãmõ kõ ‘nimanyvoi’ ne'i. Ajamã'ẽ ije a'u jẽtà. Napotai a'e kõ pewarà mõ ajireko katu i'ua wyi! 30 ‘Nekatuay wete’, a'epa Janejare'e pè, emime'ẽgwerà tè rewarà mõ. Manyvo rewarà mõ si ãmõ kõ ijayvu ai eupe a'u remẽ, ãwisõ Janejare'e amoe'epa ee remẽ!” e'i tite kuwa.
31 Ajamã'ẽ, [“Aje nimanyvoi”, pejẽ pirujẽ ja'umã'ẽ wa pè remẽ, ikatu Janejare'e pè tapeiko ãmẽ.] Pejimi'utà remẽ, pe'u jẽ ãmẽ. Ivo ve pey'utà remẽ, pe'u jẽ. A'evo Janejare'e pemoe'eokatà ãmẽ. Manyvo peiko remẽ, Janejare'e moe'ea rõmõ tapeiko. 32 Ikatu ikõ peiko Juteu kõ pytery pè nẽ. Ãmõ, Juteu rõwã mãe kõ pytery pè ikõ ikatu peiko nẽ. Ãmõ, pirujẽ Jesu koty rewarà kõ reve teve ikõ ikatu peiko nẽ. Noity ywe'e tite'ãi Jesu rè ojirovijaa penewarà mõ ãmẽ kupa. 33 Evo tapeiko ipi. Ije apota jane kõ py'amokasi ipi. Ere rõwã aja'a ipi. “Manyvo ywesõ ikatu ijupe kõ?” a'e eupe ipi. Apota Kiristu remireko katuarà kõ rõmõ toiko. Ajawyi aepo a'e ijupewarà kõ mõ ipi.