Jesu remimonokwerà kõ posikoa repy rewarà
9
Janerõvijã Jesu remimonokwerà rõmõ tè ije aiko. Manyvo aiko mã'ẽ nimanyvoi ije ãmẽ. A'e tè epyteporo emono ãmõ kõ tamotekokuwa wekoa rè. Eupe tè Janerõvijã Jesu ojimoikatu. Ijayvu rupi katu tè aposiko pene aiko pemotekokuwaa rõmõ ipi. Ajawyi tè ikoty rewarà kõ rõmõ pejẽ peiko ky'y. A'evo peiko mã'ẽ rupi eposikoa ojikuwa pejẽ. 2 Maevo ãmõ kõ, “Janerõvijã ywete remimonokwerà rõwã Pauru”, e'i tite ije kupa. Ajamã'ẽ pejẽ ãmẽ ekuwa pekupa. Janerõvijã ywete tè itõkõ epyteporo pemotekokuwaarà rõmõ taiko. A'evoa rupi itõkõ Janerõvijã ywete koty rewarà kõ rõmõ peiko ky'y. A'evo ajikuwa Janerõvijã remimonokwerà rõmõ aiko, pepytery pè aiko remẽ. Pekuwa a'evo aiko remẽ.3 Kee e'i tite emojaiwe kupa: “Janerõvijã ywete remipyteporokwerà ywe'e rõwã Pauru”, e'i tite ije kupa. 4 Kee a'e aepo e'i mãe kõ pè. Ije ywesõ kuwasi erapoi katuay pekupa mijã. [Ajamã'ẽ nerapoi pekupa. Ajamã'ẽ ãmõ kõ rè jẽ ywesõ peja'a peiko.] 5 Ãmõ, ije teve kuwa ererekwarà ve araa raa erupi ipi mijã. [Ajamã'ẽ nuvei ererekwarà.] Ãmõ Jesu remimonokwerà kõ vo kuwa aiko mijã. Peturu a'evo ekoi ipi. Janerõvijã ywete mõmirĩgwerà a'evo teve ipi.a Ajawyi a'evo sõ ije remẽ, ikatu teve kuwa eupe ãmẽ, ererekwarà ve sõ araa remẽ. 6 Ãmõ, apyy te'ĩte teve kuwa karakuri mijã. Ãmõ kõ vo kuwa aiko mijã ije. Ãmõ, Panape ve a'evo kuwa ekoi. [Jesu koty rewarà kõ teve kuwasi oja'a orere mijã, Janejare'e ayvu e'eay rè poromotekokuwa remẽ.] Ajamã'ẽ ije evote aposiko ekarakuri repy rõmõ aiko, tajimomorijau ywe'e e'ã, Panape reve aposiko aiko remẽ.
7 Sota kõ rewarà rè tè amosã'ãgatà tapekuwa sa'u. Sota kõ karakuri opyy oõvijã wyi ipi, oposikoa repykwerà. Tepy e'ãte noposikoi kupa ipi. Ãwĩvo ve koo jarà omono wemĩgwai tojimitã remẽ, moma'eyva'a o'utà emĩgwai oposikoa repy rõmõ. Ãwĩvo ve pui jarà remĩgwai kõ ekoi. Osusury'otà kupa remẽ, wemi'õ rã teve oty'otà kupa ipi. [Ãwĩvo ve ikatu kuwa Jesu remimonokwerà kõ ve ja'umã'ẽ opyy wemimotekokuwawerà kõ wyi remẽ.]
8 Evote rõwã aepo a'e pejẽ. Eremikuwa rõwã aepo a'e. Janejare'e ayvu tãmõ Moisesi okusiwa maekwerà ve aepo e'i. A'e rupi katu tè a'e. 9 Kee e'i itõkõ tãmõ Moisesi ikusiwa karamoe remeve: “Nerima tereapoi oposiko neupe remẽ. Epota tè ojimi'u remẽ. Neupe tè oposiko ipi, ajawyi”, e'i maekwerà.b Aje janerima e'e pè rõwã Janejare'e aepo e'i. 10 Aje, janeupewarà mõ tè aepo e'i. Ãwitõ koo jarà remĩgwai moma'eyva oõtã remẽ, ipẽgwerà o'utà ipi, oposikoa repykwerà rõmõ. Ajawyi wãrõ jẽ to'u ipẽgwerà. Ijarà okuwa jẽ ãmẽ o'u remẽ. 11 Ãwĩvo kuwasi oroiko mijã, pepytery pè. Janejare'e 'Ãg rupi tè oroposiko pepytery pè ipi. Ãwisõ pemotekokuwaarà rõmõ teipe oroposiko remẽ. Ajamã'ẽ ore tè oroposiko oreremimotarà repy rã rè.c 12 Na'evoi ãmõ kõ pereko ajamã'ẽ, Jesu remimonokwerà kõ. A'e kõ wemimotarà e'i pejẽ ipi remẽ itõkõ, peme'ẽ gatu ãmẽ ijupe kõ ipi. Na'evoi ãmẽ ore orerereko pekupa. Epy rè rõwã Janejare'e ayvu e'eay Kiristu rewarà oromojenu pejẽ. Ajamã'ẽ ore ywesõ oroposiko ywete iwyi kõ ipi.
Ãmõ mosikoa rè oroposiko jẽ ipi, orema'e rã kõ repy rã rõmõ. Ajawyi ikõ kee tapejẽ e'ã eupewarà mõ peiko nẽ: “Pauru karakuri repy rõmõ tè Kiristu rewarà omojenu iko jane kõ pè ipi. Ajawyi, napotai ijayvu kõ renu”, tapejẽ e'ã ije.
13 Ãmõ, kee jaa teve itõkõ pekuwapa. Janejare'e moe'ea retã pupe oposiko mãe kõ temime'ẽ pẽgwerà opyy iwa kupa ipi. Janejare'e pè ojuka temime'ẽ rã mãe kõ teve ipẽgwerà opyy oupe kupa ipi, ãmõ kõ ome'ẽ remẽ. A'evoa pekuwapa ipe peiko.d 14 Ãwĩvo ve Janerõvijã ywete kee e'i: “Eayvu e'eay omojenu mãe kõ wemi'õ rã pyy opota remẽ, ikatu emimotekokuwawerà kõ ome'ẽ ijupe remẽ”, e'i Janerõvijã ywete.e
15 A'evo aiko kuwa ãmẽ. Ajamã'ẽ, “Erepykwerà apota”, na'ei aiko pejẽ ipi. Ajawyi rõwã aepo akusiwa pejẽ. Amãnõ taray ipe kuwa pepytery pè aiko mijã. Ajamã'ẽ aepo na'e'ãi kuwa pejẽ mijã. A'e sõ aiko remẽ, kee pejẽ kuwa ije mijã: “Karakuri kõrijõ tè Pauru opota ayvu katu mojenua repy rõmõ”, pejẽ kuwa ije mijã. Nãwĩvoi aiko ajamã'ẽ. Eroryvay kõrijõ tè aiko pepytery pè. 16 Ãmõ kõ amotekokuwa Janejare'e ayvu e'eay rè remẽ, najimoe'ei teve aiko ipi. Kee na'ei ipi: “Ãmõ kõ amotekokuwa ayvu katu rè. Ajawyi ije ywesõ ekatu”, na'ei ipi. Janerõvijã ywete ayvu rupi tè amojenu ajamã'ẽ ipi. Noporomotekokuwai sõ ee aiko remẽ, ije tè evote ajimomorijau kuwa aiko ãmẽ mijã. 17 Evote tesõ aposiko ijayvu katu rè poromotekokuwaa rè aiko remẽ, aje erepy rã aãrõ kuwa. Ajamã'ẽ Janejare'e ayvu rupi tè a'evo aiko ipi. “Eayvu katu rè tè teremo'e kõ”, e'i ije emono. Ajawyi tè a'evo aiko ipi. Ajawyi epy na'ei pejẽ. 18 Mã jẽ rõwã itõkõ erepykwerà rõmõ apyy pewyi ipi. Napotai poromotekokuwaa repykwerà peme'ẽ ije remẽ. “Terepyme'ẽ ikõ pekupa nẽ”, na'ei teve itõkõ pejẽ ipi. “Ni'ei nerepyme'ẽi sõ pekupa remẽ”, na'ei teve itõkõ pejẽ. Ãmõ Janejare'e ayvu e'eay mojenuarà kõ aepo e'i pejẽ. Ije ve kuwa aepo a'e pejẽ mijã. Aepo na'e'ãi ajamã'ẽ ipi. Ajamã'ẽ erory jẽ pene aiko. [Jesu rè peja'apa peiko ky'y. A'evoa rè amã'ẽ remẽ, eroryvay aiko ipi.] Erorya eposikoawerà repykwerà vo 'ejẽ eupe.
19 Naikoi jane mõ erõvijã rõmõ ekoi mã'ẽ. Ajamã'ẽ apota jẽ penemĩgwai rõmõ aiko. Apota pirujẽ poromokasia mõ aiko, ãwisõ tojirovija katu Kiristu rè kupa. Apota ivo emĩgwai kõ rõmõ toiko kupa. 20 Ajawyi Juteu kõ pyterà rupi amojenu aiko remẽ, ivo kõ jẽ ipyterà kõ rupi aiko ipi. “Tojirovija katu Jesu rè kupa”, a'e ijupe kõ ipi. Tãmõ Moisesi remikusiwarerà rerovijaa kasia rupi rõwã aiko ipi. Ajamã'ẽ ipyterà kõ rupi amojenu remẽ, ivo kõ jẽ ikasia rupi aiko ipi. “Kiristu rè tojirovija kupa”, a'e rewarà mõ a'evo aiko. 21 Ãwĩvo ve Juteu rõwã mãe kõ pyterà rupi amojenu aiko remẽ, ivo kõ jẽ teve ipyterà kõ rupi aiko ipi. Moisesi remikusiwarerà rupi rã'ĩ rõwã aiko. Janejare'e ayvu narovijai rewarà mõ rõwã ãwĩvo aiko. Aje Kiristu ayvu rupi tè ãwĩvo aiko. “Kiristu rè tojirovija kupa”, a'e rewarà mõ a'evo aiko ipi.
22 Ivo ve noerovija ywe'ei mãe kõ pyterà rupi aiko remẽ, ekoa kõ rupi ve aiko ipi. Ãmẽ tè amokasiayoka kõtà ãmẽ, Kiristu rè tojirovija kupa. Ãwitõ eremimo'ekwerà kõ ekoi, ãwĩvo aiko ipytery pè kõ ipi. “Tamokasi kõ tojirovija katu Jesu rè kupa”, a'e eupe. Iteetejẽ ekoa kõ rupi aiko ipi, Jesu rè tojirovija kupa ipi. 23 “Pirujẽ ike yvy pewarà kõ pè tamojenu Janejare'e ayvu e'eay Kiristu rewarà erokwa”, a'e ipi. Ajawyi ãwĩvo aiko ipi, ipytery pè kõ. Amojenu remẽ, Janejare'e wenu katuoka kõ eayvu rè. Ije ve erereko katu ipi.
Ojã mã'ẽ rewarà rè tè poromosã'ãga mã'ẽ
24 Jesu Kiristu ayvu rupi katu peiko jẽ remẽ, Janerõvijã ywete “nekatuay wete” e'ità pejẽ. Ãmẽ aepo jaa peenu remẽ, ãmẽ si penoryvaytà ãmẽ enu ky'y.
Ojã mãe kõ rè tè poromosã'ãgatà tapekuwa sa'u. A'e kõ ojã remẽ, pe'ĩte a'e ywesõ ovaiteay ojã mã'ẽ ipi. A'e tè ojãnawerà repykwerà opyy ipi. Ajawyi oryvay iko. Ajawyi a'e ywesõ ojã mã'ẽ vo tapeiko, a'e pejẽ. Pejẽ ywesõ penovaiteay mã'ẽ rõmõ tapeiko maevo sõ tite Janejare'e pè.
25 Kee ojã mã'ẽ ekoi ipi. Nojã te'ĩtei ipi. Kõ'ẽ jawe jawe ojã amãtejẽ ojimokasi enoneve. “Ãmẽ tè ije ywesõtà erovaiteay aiko”, e'ità oupe. Ãmẽ a'e ywesõ ovaiteay rewarà mõ ojãnawerà repykwerà opyytà ãmẽ. Ajamã'ẽ ory ke'ĩatutà tè epykwerà rè. Ajamã'ẽ Jesu ayvu rupi jaiko remẽ, ke'ĩatu tè rõwã Janejare'e remime'ẽ japyytà ãmẽ. Awyje ipyri jaiko karuarua japyytà.
26 Kee e'i teve ojã mãe kõ ipi. Ikãnĩ kãnĩ rõwã ojã kupa ipi, topyy wepykwerà. Ãwĩvo ve ije Jesu rekoa rupi apota aiko. Janejare'e remime'ẽ apyytà ãmẽ. Ãmõ jõvijã kõ ayvu rupi naa'ãi. Jesu ayvu rupi katu oterẽ jẽ aikotà. 27 Ajireko katu aiko ipi, “Jesu rekoa rupi katu taiko”, a'e ipi rewarà mõ. Nivoi sõ aiko remẽ, naory'ãi Janejare'e ere. Napotai ãmõ kõ pè ijayvu amojenu paire, emoisyry owyi emono. Evote kuwa ãmẽ ajimosĩoka aiko ky'y.