Ja'umã'ẽ ojarà rã'ãga jimoãtãgwerà pè temime'ẽgwerà rewarà
8
[Penemikusiwarerà rupi peporanu eupe manyvo jaa ja'umã'ẽ temime'ẽgwerà ijarà rã'ãga jimoãtãgwerà pewarà. A'evoa rè poromogetatà.] “Janeremikuwa a'evoa”, ja'e remẽ, jajimoe'e ywe'e titetà janeremikuwa rè ipi. Ajamã'ẽ ãmõ kõ siauvay remẽ, simokasi kõtà ãmẽ ipi, ãmẽ ywesõ tojimokasiay ivo tekoua rè kupa. 2 Ava mõ sõ, “Ije ywesõ atekokuwa ãmõ kõ wyi”, e'i remẽ, ivo tekoua nokuwai apijarerà ajamã'ẽ. Pe'ĩpe'ĩgà tè okuwa. Tojimotekokuwa jẽ iko. 3 Ajamã'ẽ Janejare'e okuwa wauparà kõ ipi.4 Ajawyi kee a'e pejẽ: Ãmõ kõ, ojarà rã'ãga jimoãtãgwerà pè ja'umã'ẽ oinõ ime'ẽ ipi. [Ajamã'ẽ a'evo paire omosãi to'u kõ ipi.] “Ãmẽ a'evo remẽ manyvo ja'età põkõ?” pejẽ ije. “‘Jimoãtãgwerà pewarà temime'ẽgwerà nisi'u'ãi’, ja'età põkõ?” pejẽtà põkõ ije ãmẽ. Ijarà rã'ãga jimoãtãgwerà kõ, ni'ãi mã'ẽ tè ajamã'ẽ. Janejare'e rõmõ'ĩte i'ã mã'ẽ. Pe'ĩte ekoi. A'e kõrijõ tè manyvo ekoi okasia rupi mã'ẽ. Pe'ĩte ekoi a'evo mã'ẽ. A'evoa sikuwapa. 5 Ajamã'ẽ Janejare'e nokuwai mãe kõ pè uve mõa'ãrõwã “janejarà” e'i tite ijupe mãe kõ, ee oja'a tite kupa mãe kõ. Kejõ pè aepo e'i tite kupa: Yva pewarà kõ rã'ãga kõ. Yvy pewarà kõ rã'ãga kõ teve. A'e a'e kõ omoe'e rã'ãga oõvijã rõmõ kupa. Ajamã'ẽ ãmõ rupi tè ekoi kupa. 6 Janeupe ãmẽ uve pe'ĩte Janejare'e. Janeruu yvapewarà tè a'e. A'e tè janereinõoka pirujẽ. Iteetejẽ janereinõoka mã'ẽ rõmõ ekoi. Ajawyi ijupewarà mõ tè jaiko. Ãmõ, pe'ĩte Janerõvijã ywete rõmõ ekoi mã'ẽ. Jesu Kiristu tè a'e. A'e tè pirujẽ janereinõ mã'ẽ tè. Ajawyi ijupewarà mõ tè jaiko ky'y. 7 Ajamã'ẽ pirujẽ rõwã Jesu koty rewarà kõ otekokuwa aepo jaa rè. Ajamã'ẽ ãmõ kõ ojipokuwa ojarà rã'ãga moe'e tite kupa. Ajawyi ja'umã'ẽ o'utà kupa remẽ, kee e'i tite kupa ipi: “Ãwĩ jimoãtãgwerà pewarà temime'ẽgwerà a'u remẽ, epy'amoaità a'u remẽ”, e'i tite oupe kupa. No'ui ãmẽ kupa. Nipy'a kasi iwa kupa. Ajawyi aepo e'i kupa. 8 Ajare kee a'e pejẽ. Janekatuay Janejare'e pewarà mõ jane. Ja'umã'ẽ rewarà mõ rõwã janekatuay ijupe. Ja'umã'ẽ ja'u remẽ, nimanyvoi Janejare'e pè ãmẽ. Nisi'ui remẽ teve nimanyvoi ijupe.
9 Ajamã'ẽ ja'umã'ẽ si'u remẽ, ivo teipe janeupe mijã. Ajamã'ẽ Jesu rè ojirovija ypy mãe kõ pè, nivoi a'evoa ja'u remẽ. Ajawyi, “Pe'u jẽsi”, tapejẽ e'ã ijupe kõ. Maevo o'u remẽ, ojipy'amopiraità ajaire iko. “Nivoi sipõkõ Janejare'e pè aiko mijã?” e'ità ãmẽ ojipy'amopirai rõmõ iko. Ajawyi tapejavyoka e'ã ijupe kõ, a'e pejẽ. 10 Janeupe nimanyvo'ãi ãwĩ rapijarerà si'u jaiko. Ajamã'ẽ ma'e remẽ peiketà ava mõ retã mõ wyry pè remẽ, ma'e remẽ ojarà rã'ãga pè temime'ẽgwerà ro'okwerà omosãità tape'u a'e pè. Ma'e remẽ Jesu rè ojirovija ypy mãe kõ ve a'e pè tui. A'e kõ omã'ẽtà pene pe'u remẽ. Kee e'ità oupe pene omãjã kupa: “Ãwĩ o'u upa! Eupe nivoi si'u remẽ. Ajamã'ẽ a'u jẽtà ivo ve ãmẽ!” e'i ywe'e titetà. 11 Ajawyi a'e o'u paire, ijãgyoaytà ky'y. Kee e'ità maevo ãmẽ oupe: “Maevo nivoi aiko Janejare'e pè a'u remẽ! Ajawyi maevo Janejare'e emomorijautà”, e'i titetà oupe. Penewarà mõ tè sikaepo a'evo ekoi. Ikatu sa'u kuwa nape'ui ovake remẽ. A'e pewarà mõ teve Kiristu omãnõ. Ajawyi nivoi pejavyoka ijupe remẽ. 12 Ajawyi kee a'e pejẽ. A'e kõ pè ja'umã'ẽ nivoi ja'u remẽ, “Pejo jẽsi tape'u!” tapejẽ e'ã ijupe kõ ãmẽ. Aepo pejẽ ijupe kõ remẽ, pejavyokatà Jesu koty rewarà nipy'a kasi ywe'ei mãe kõ pè. Ajawyi, “Nivoi peiko”, e'ità Kiristu ãmẽ pejẽ. 13 Napotai ãmõ Jesu rè ojirovija ypy mãe kõ pè ajavyoka. Ajawyi ije na'u'ãi kuwa a'evo mã'ẽ, awyje.