3 [Ãmõ, kee pejẽ teve ije: “Ore pa'e. Manyvotà põkõ orojireko paire oroiko?” pejẽ ãmẽ ije.] Ajawyi kee a'e erekwapa mãe kõ pewarà mõ. Ikatu ikõ tapeiko penerekwarà reve peiko nẽ, a'e pejẽ. Penerekwarà opota wee peiko remẽ, tapepota tè ãmẽ. Ojireko mãe kõ rõmõ peiko ãmẽ ky'y. Aepo a'e teve imẽma mãe kõ pè. Pemẽnà opota peneve oiko remẽ, tapepota tè ãmẽ. Ojireko mãe kõ rõmõ ikõ tapeiko ãmẽ ky'y nẽ. 4 Imẽma mãe kõ pè kee a'e. Pemẽma ky'y. Ajawyi penerekoarà rõmõ pemẽnà kõ ekoità ky'y, a'e pejẽ. Ãwĩvo ve erekwapa mãe kõ pè kee a'e. Penerekwapa pejẽ. Ajawyi penerekoarà rõmõ penerekwarà ekoità ky'y, a'e pejẽ. 5 Ajawyi erekwarà, “Noroereko'ãi”, te'i e'ã omẽnà pè ãmẽ. A'evo ve kwaima'e kõ, “Noroereko'ãi”, te'i e'ã werekwarà pè. Kee remẽ kõrijõ tè ojeeve tapeiko e'ã rã'ĩ. Janejare'e pè ojevo jẽ peporegetatà remẽ tè napeiko'ãi rã'ĩ ojee. Ãmẽ tè: “Tijaiko e'ã rã'ĩ ojeeve. Naiko'ãi rã'ĩ age'e”, pejẽtà. A'evo remẽ tè ikatu ãmẽ. Ãmẽ Janejare'e rè kõrijõ tè peja'atà rã'ĩ. Aja paire tè tapejireko mijẽ. Ãmẽ tè ãmõ kõ rè napejitupi'ãi ãmẽ. A'evo remẽ tè [ãjãgai rõvijã] Satanasi nikasi'ãi pemoripea rè ãmẽ ky'y.

6 Kee na'e'ãi ajamã'ẽ pejẽ: “Jane kõ pirujẽ tojireko ky'y”, na'e'ãi pejẽ ajamã'ẽ. “Tojireko e'ã ky'y”, na'e'ãi teve pejẽ. Pepota remẽ kõrijõ tè ikatu pejireko. 7 Ajamã'ẽ ije nererekwai mã'ẽ rõmõ aiko. Apota ãwĩvoa, ajawyi. Ikatu teve kuwa evo peiko remẽ mijã. Ajamã'ẽ janevote janerekoa Janejare'e ome'ẽ maekwerà rupi kõrijõ tè tijaiko ipi. Iteetejẽ pirujẽ Jesu koty rewarà kõ pè ekoa kõ ome'ẽ ipi.

8 Ajamã'ẽ kee a'e nojirekoive mãe kõ pè. Ikatu kuwa napejirekoi remẽ. Ikatu evo peiko remẽ. Ikatu kuwa teve nimẽi mãe kõ nojirekoi remẽ mijã. Ãmõ, ikatu kuwa ve terekwarerà kõ nojirekoi mijẽ ky'y remẽ. 9 Ajamã'ẽ wãivĩ ojimomorijau sõ omẽne'ã tè iko remẽ, tojireko mijẽ ikõ ãmẽ kupa ky'y nẽ. Jitupia nojimokasi'ãi ee ãmẽ. Ajawyi ojireko remẽ ywesõ ikatutà ãmẽ ijupe, nopota ywe'ei ojimomorijau remẽ. Kwaima'e kõ pè ve aepo a'e. A'evo ywesõ ikatu ãmẽ ijupe.

10 [Kee pejẽ teve ije: “Ikatu põ emẽnà wyi apoi? Ajaire Janejare'e rè ywesõ aja'atà aiko. Ikatu põ a'evo remẽ Janejare'e pè?” pejẽ.] A'evoa rè poromotekokuwatà. Evote rõwã a'età pejẽ. Janerõvijã ywete ayvu rupi tè a'età pejẽ. Wãivĩ ojirekopa remẽ, topoi e'ã omẽnà wyi. 11 Ajamã'ẽ opoi sõ omẽnà wyi remẽ, ãmõ kwaima'e reve tojireko e'ã ky'y. Ãmõ, ikatu ojivy mijẽ omẽnerà kyty remẽ. Imẽnà teve topoi e'ã werekwarà wyi, a'e pejẽ.^a

12 [Kee pejẽ teve itõkõ ije: “Jesu koty rewarà rõwã erevewarà. Ajawyi apoità põ iwyi?” pejẽ teve.] Nakuwai Janerõvijã ywete ayvu mõ aepo rewarà rè. Ajawyi ije tè eayvu e'e rupi kõrijõ tè a'età pejẽ. Kee a'e kwaima'e Jesu koty rewarà pè. Jesu koty rewarà rõwã sõ nererekwarà remẽ, terereko jẽ nererekwarà rõmõ, opota jẽ werekopa remẽ, a'e pejẽ. Terepoi e'ã iwyi, a'e pejẽ. 13 Ãwĩvo ve wãivĩ kõ pè a'e, Jesu koty rewarà kõ pè. Jesu koty rewarà rõwã sõ nemẽnà remẽ, terereko jẽ nemẽnà mõ, opota jẽ werekopa remẽ, a'e pejẽ. Terepoi e'ã iwyi ãmẽ. 14 Kee rewarà mõ. Janejare'e noerovijaive mã'ẽ teipe nerevewarà. Ajamã'ẽ Janejare'e ivo mã'ẽ rõmõ wereko nerewarà mõ. Nãwĩvoi sõ remẽ, Janejare'e noerovijai mã'ẽ ãkarã vo kuwa peãkarãgwerà kõ ãmẽ ky'y. Ajamã'ẽ Janejare'e ivo mãe kõ rõmõ wereko kõ nerewarà mõ, a'e pejẽ. 15 Ajamã'ẽ kee a'e teve pejẽ, Jesu koty rewarà kõ rõmõ: Tapepoi e'ã peiko penevewarà wyi, a'e pejẽ. Ajamã'ẽ penevewarà sõ kee e'i neupe remẽ, “Napotai Jesu koty rewarà erevewarà rõmõ”, e'i sõ remẽ, “hoõ” tapejẽ kõrijõ opoi newyi remẽ. Janejare'e opota ikatuay ikoty rewarà kõ rõmõ jaiko mã'ẽ. Ajawyi aepo a'e pejẽ. 16 Ajawyi, terekwarà kõ, tapepyta jẽ pemẽnà kõ reve pepota jẽ kupa remẽ, a'e pejẽ. Penewarà mõ maevo ojirovijatà Jesu rè iko ky'y. Ãwĩvo ve kwaima'e kõ, tapepyta jẽ penerekwarà reve peiko. Penewarà mõ maevo ojirovija tary ve Jesu rè ky'y.

17 Kee a'e pirujẽ pejẽ, manyvo tapeiko. Pejãvijõ jẽ ovo rupi tè penekoa Janejare'e ome'ẽ pejẽ mã'ẽ rupi tapeiko, a'e pejẽ. Tapepy'a katu ãmẽ peiko, a'e pejẽ. Manyvo Janerõvijã ywete omono tapeiko mã'ẽ rupi, tapepy'a katu jẽ ãmẽ peiko, a'e pejẽ. Aepo a'e pirujẽ Jesu koty rewarà kõ pè ipi, taa kõ rupi aa imokasioka kõ remẽ. 18 Agyvo. Juteu kõ pè kee a'e. Juteu kõ rõmõ pejẽ peiko. Ajawyi ojiemosĩpire'o mãe kõ rõmõ peiko teãmã. A'evo peiko teãmã Janejare'e pepyteporo remẽ. Ãwĩvo ve Juteu rõwã mãe kõ pè kee a'e. Juteu rõwã mãe kõ rõmõ peiko teãmã. Ajawyi nojiemosĩpire'oi mãe kõ rõmõ peiko teãmã. A'evo teãmã peiko Janejare'e pepyteporo remẽ. Ajawyi pirujẽ kee a'e pejẽ. Manyvo peiko Janejare'e pepyteporo remẽ, aekwery ve tapeiko jẽ, a'e pejẽ. 19 Janejare'e pè nimanyvoi jajiemosĩpire'o remẽ. Nimanyvoi teve nijajiemosĩpire'oi remẽ. Janejare'e omã'ẽ jane kõ rè remẽ, kee e'i kõrijõ tè: “Ekoty rewarà kõ tè ãwĩ kõ”, e'i kõrijõ janeupewarà mõ ipi. “Eayvu rupi ekoi mãe kõ tè”, e'i kõrijõ janeupewarà mõ. 20 Ajawyi ãwitõ peiko Janejare'e pepyteporo ypy remẽ, aekwery ve peiko.

21 Ãwĩvo ve temĩgwai temipyykwerà rõmõ sõ peiko pejirovija ypy Jesu rè remẽ, aekwery vo jẽ tapeiko. Tapepy'a katu jẽ a'evo peiko remẽ. Ajamã'ẽ ovote penõvijã pemomoioka remẽ, ikatuaytà ãmẽ. Tapenory kõrijõ ãmẽ peiko ipi. Tapepy'a katu pevote penekoa rè ãmẽ ky'y. 22 Jesu koty rewarà rõmõ peiko ky'y remẽ, nivoi mã'ẽ kasia wyi Kiristu pemomoiokapa ky'y. Ajawyi ovote ekoi mã'ẽ vo 'ejẽtà peiko ãmẽ ky'y, temipyykwerà rõmõ tẽ tesõ ipe pejẽ remẽ. Ãwĩvo ve ovote ekoi mã'ẽ rõmõ tẽ tesõ ipe remẽ, Kiristu remĩgwai rõmõ peiko jẽtà ãmẽ ky'y. A'evoa rõmõ tè Janejare'e pepyteporo ipi. 23 Jesu omãnõa rupi janepyypa mãe kõ rõmõ jaiko ky'y. Epy wete mã'ẽ vo tè jane ijupe jaiko ky'y. Ajawyi okãte'ã janere. Ajawyi tapejime'ẽ e'ã tõvijã pè temĩgwai ai rõmõ ky'y, a'e pejẽ.

24 Ajawyi tapepy'a katu jẽ peiko, a'e pejẽ. Janejare'e pepyteporo maekwerà vo jẽ tapeiko ikoty rewarà kõ rõmõ.

25 [Ãmõ kee pejẽ nojirekoive mãe kõ pewarà mõ: “Ikatu põ ojireko remẽ?” pejẽ teve pekusiwa imuroka eupe remẽ.] Ajawyi kee a'e pejẽ. Nakuwai Janerõvijã ayvu mõ a'evoa rè. Ajawyi eayvu kõrijõ tè akusiwatà imono peupe. Ajamã'ẽ Janerõvijã ywete poroporijauesaa rupi emotekokuwavay. Ajawyi poromotekokuwatà. Kee a'e pejẽ. 26 Waypetetà janerekoa Jesu koty rewarà kõ rõmõ age'e remẽ, janemomorijau mãe kõ rewarà mõ. Ajawyi eupe ikatu kuwa nojirekoive mãe kõ nojirekoi remẽ. Waypetetà janemomorijaua wyi aepo a'e pejẽ.^b 27 Ajamã'ẽ pejireko paire tapepoi e'ã ikõ penerekwarà wyi ipi nẽ, a'e pejẽ. Ajamã'ẽ napenerekwaive remẽ, penerekwarà rã ikõ tapeeka e'ã nẽ, a'e pejẽ. 28 Ãmẽ ivo teipe ekoi mã'ẽ ojireko remẽ, ikatute tojireko kupa. Ivo ve wãivĩ nimẽive mãe kõ ojireko remẽ, ikatu teve ãmẽ. Ãmẽ tè Janejare'e rekoa nojavy'ãi ojireko kupa remẽ. Ajamã'ẽ pejireko remẽ ywesõ waypete sa'utà penekoa pejẽ ky'y. Pejipy'amopiraità penevewarà rè peiko ky'y. Peãkarãgwerà kõ rè teve pejipy'amopiraità peiko. Ajawyi eupe ikatu sa'u ava mõ nojirekoi remẽ.

29 Kee a'e teve pejẽ, ejimorypa kõ. Ijatugà tè janereko e'ãma tui upa. Ajawyi uve penerekwarà remẽ, a'e rè ywesõ rõwã tapejipy'amogeta peiko. Ãmõ, peãkarãgwerà kõ rè ywesõ rõwã teve. Ãwitõ nojirekoi mãe kõ Janejare'e rekoa rè ywesõ ojipy'amogeta, tãwĩvo ve peiko. 30 Ajawyi kee a'e pejẽ. Aje Janerõvijã ywete rè ywesõ tijaja'a jaiko, a'e pejẽ. Ajawyi janeãgyo remẽ, janeãgyoa rè ywesõ tijaja'a e'ã jaiko. Ãmõ, janerory remẽ, janerorya rè ywesõ tijaja'a e'ã jaiko. Ãmõ, janemoma'e moatya rè ywesõ tijaja'a e'ã teve jaiko. 31 Moma'e jarà rõmõ jaiko remẽ, janema'e kõ rè ywesõ tijaja'a e'ã. Opa mãerã tè janemoma'e kõ.

32 Napotai pejipy'amopirai peiko. Apota Janerõvijã ywete morya rè ywesõ peja'a peiko mã'ẽ. Ajawyi kee a'e pejẽ. Ikatu kuwa evo peiko mijã. Nererekwai mã'ẽ tè ije. Ãmẽ ywesõ niwaypei Janerõvijã ayvu mojenua rè ywesõ aja'a aiko ipi. Imorya rè ywesõ teve aja'a aiko ipi. 33 Ajamã'ẽ erekwapa mã'ẽ iteetejẽ mã'ẽ rè ojipy'amopirai iko ipi. Werekwarà morya rè ywesõ oja'a iko ipi. 34 Ajawyi Janerõvijã ywete morya rè oja'a ipe remẽ, werekwarà morya rè jẽ ywesõ oja'a iko ipi.

Kee a'e terekwarerà kõ pè. Ãmõ, wãivĩ nimẽive mãe kõ pè teve kee a'e. Janerõvijã ywete remimota rupi ywesõ pepota peiko remẽ, a'e rè ywesõ pejipy'amogeta peiko ipi, a'e pejẽ. A'e rè ywesõ peposiko teve peiko ipi. Niwaypei a'evoa peupewarà mõ, napemẽi rewarà mõ. Napememyrive rewarà mõ. Na'evoi wãivĩ imẽma mãe kõ. A'e kõ omẽnà morya rè ywesõ oja'a kupa ipi.

35 Pemotekokuwaa rõmõ aepo a'e ikusiwa imono peupe, tapejimokasi enu ãmẽ. Napotai ajamã'ẽ eayvukasi peupe. Apota ikatuay peiko ojeeve. Ãmõ, apota Janejare'e rè jẽ ywesõ peja'a peiko mã'ẽ. Ajawyi Janerõvijã ywete remimota rupi ywesõ ikõ tapejimokasi peiko nẽ, a'e pejẽ.

36 Age'e aporegetatà ojimosuru tè rã'ĩ werekwatarà rè mãe kõ pewarà mõ. “Maevo nikatui jajireko remẽ”, pejẽ tite ne. Ma'e. Kee pejẽ tite penerekwatarà pè remẽ, nikatu'ãi ãmẽ: “Maevo Janerõvijã nopota'ãi jajireko”, pejẽ remẽ. Ajamã'ẽ aepo pejẽ paire, pejitupi jẽ ee. Tyvija rupi peiko jẽ ee. Ajamã'ẽ naperekoi. Janejare'e morya rõwã a'evoa. A'evo peiko remẽ penerekwatarà tapereko amãtejẽ ãmẽ. Ikatute ãmẽ. Janejare'e ayvu napejavy'ãi pejireko remẽ. 37 Kee ekoi mã'ẽ i'ete nojirekoi remẽ. Janejare'e rè ywesõ oja'a iko. Ajawyi wãivĩ kõ rè nojitupi omãjã ipi. Werekwatarà rè nojitupi ipi. Ajaire opy'a pè ovote kee e'i: “Ãmẽ ywesõ niwaypei Janejare'e remimota rè aja'a”, e'i oupe mã'ẽ. A'evoa ikatu nojirekoi remẽ. Nojavy'ãi Janejare'e rekoa ãmẽ. 38 Eupe, ikatute ava mõ ojireko remẽ. Ajamã'ẽ nojirekoi remẽ ywesõ ikatuay wete teve eupe.

39 Age'e terekwarà kõ rewarà rè poromotekokuwatà. Oiko jẽ pemẽnà remẽ, tapeiko jẽ eeve peiko. Tapepoi e'ã iwyi. Ajamã'ẽ okãjãma sikaepo pewyi ky'y remẽ, pepota sikaepo pejireko mijẽ remẽ, pemẽnà renawery pè remẽ, pejireko ãmẽ. Ajamã'ẽ, Janerõvijã koty rewarà reve kõrijõ tè ikatu pejireko mijẽ, terekwarerà rõmõ peiko remẽ. 40 Ajamã'ẽ terekwarerà nojirekoi mijẽ remẽ, a'e sõsi oryvaytà. A'evo ekoi remẽ ywesõ si ikatutà ijupewarà mõ. Ojimo'ãgatutà ãmẽ iko ky'y. Aepo ãmẽ eayvu tè. Janejare'e 'Ãg tè maevo emotekokuwa aepo ta'e ajamã'ẽ.