“Kee tapeiko peneirõarà mõ pemoai remẽ”, e'i mã'ẽ
6
Ãmõ kee jaa penewarà ojenu ije: “Jesu koty rewarà mõ ovoarà rè nivoia omo'ytà remẽ, noerovijai mãe kõ pè tè omoaiarà weraa tomosã'ãga esa ipi”, e'i mã'ẽ ojenu ije. Nikatu miti a'evo remẽ peiko. Ajawyi kee a'e pejẽ. Janejare'e koty rewarà kõ pè tè toeraa imosã'ãgaoka. A'evoa kõrijõ tè ikatu. 2 Aje kãramõ noerovijai mãe kõ rõwã poromosã'ãgatà ipi. Pejẽ tè poromosã'ãgatà Kiristu koty rewarà mãe kõ rõmõ. Ajawyi age'ewarà poromosã'ãgaa pekuwa kuwa, ãwisõ niwaypei pekuwa mã'ẽ age'ewarà. Napekuwapai sipõ a'evoa? Pekuwapa ipe maevo. 3 Ãmõ, kee jaa tapekuwa. Yvapewarà kõ reko tẽ tesõ simosã'ãgatà kãramõ. Ajawyi, age'ewarà poromosã'ãgaa rè tapetekokuwa peiko ky'y. 4 Ajawyi kee a'e pejẽ, Jesu koty rewarà kõ pè. [Penemimotekoe'e kõ mõ tapepyteporo. A'e kõ rovake taperaa pemoaiarerà nivoi penereko remẽ.] Nikatui Jesu noerovijai mãe kõ rovake peraa remẽ. Pevo tè tapekuwa. 5 Pejimosĩoka kuwasi noerovijai mãe kõ gyty peraa remẽ mijã. Nuvei sipõ Jesu koty rewarà otekokuwavay mãe kõ mõ pepytery pè? 6 Uve! [A'e kõ tè pepyteporo kuwa poromosã'ãgaarà kõ rõmõ toiko kupa mijã. Jesu koty rewarà kõ ojikõ'õ ojee remẽ, a'e kõ tè tomosã'ãga kõ esa ãmẽ. A'e kõ tè te'i teve manyvotà tekoua.] A'evo rõwã peiko ajamã'ẽ. Pejimoai ojee peiko, Jesu koty rewarà kõ rõmõ. Ajaire penõvijã otekokuwa mã'ẽ pè rõwã peraa pemoaiarerà. Janejare'e noerovijari mã'ẽ rovake tè peraa tomosã'ãga esa. Nivoi a'evo remẽ peiko.7 Ãwĩvo peiko remẽ, pejikuwa notekokuwai mãe kõ rõmõ tè peiko ipi. Nikatui poromosã'ãga esa mã'ẽ Jesu noerovijai mã'ẽ pè peraa remẽ. Ikatu sa'u kuwa pemoaiarà pè remẽ, “i'ete” pejẽ kõrijõ remẽ. Ikatu sa'u teve kuwa pemoma'e kõ rè ava mõ imona remẽ, “i'ete” pejẽ kõrijõ remẽ. A'e ywesõ ikatuay kuwa ãmẽ. 8 Ajamã'ẽ pejẽ ywete pevoarà pemoai ereko ipi. Ãmõ, pemona teve imoma'e kõ rè peiko ipi. Ãwisõ Jesu koty rewarà kõ teipe pejẽ remẽ, pejimoai jẽ ajamã'ẽ peiko ipi.
9 Kee jaa pekuwa ipe: “Nivoi mãe kõ nomoẽokai Janejare'e o'arà kyty ipi. Ajawyi omãnõ remẽ, noo'ãi Janejare'e pyri oiko karuaru”, ejaa. Aepo jaa rè tapejimoripe e'ã. Kejõ Janejare'e noereko'ãi opyri mã'ẽ. Ojarà rã'ãga rè oja'a iko mãe kõ. Ojimomy'a iko mãe kõ. Ãmõ, kwaima'e ãmõ kwaima'e rè oiko mãe kõ. Ãmõ, wãivĩ oiko teve ojee iko mãe kõ. 10 Ãmõ, imona iko ipi mãe kõ. Ãmõ, okãte'ã omoma'e kõ rè iko ipi mãe kõ. Ãmõ, oka'uay iko mãe kõ. Ãmõ, poromovyvyrai iko mãe kõ. Ãmõ, poromoripea rupi poromoma'eekyi iko ipi mãe kõ. Wãi wãisõ nomoẽokai Janejare'e o'arà kyty rewarà mõ ipyri noiko karuaru'ãi kupa. 11 A'evo itõkõ peneirõarà kõ mõ ekoi mijã. Ajaire Janejare'e opy'aky'a'opa kõ imoteeoka kõ, oupewarà kõ rõmõ toiko kupa ky'y. O'Ãg rupi a'evo wereko kõ. Janerõvijã Jesu Kiristu ijaiwererà kõ repy rõmõ omãnõ wyi a'evo werekooka kõ.
Janejare'e 'Ãg rena rõmõ jaiko mã'ẽ rewarà
12 Kee e'i titetà ava mõ ipi: “[Jesu Kiristu koty rewarà tè ije.] Ajawyi pirujẽ eremimotarà rupi kõrijõ aiko remẽ, nimanyvo'ãi”, e'i titetà oupewarà mõ ipi. Aepo e'i mã'ẽ pè kee a'età. Pirujẽ tekoua rõwã ikatu janeupe ipi. Namokasioka'ãi eremimotarà inõ e'arà kyty upi taiko ipi.a 13 Ava mõ kee e'i tite kuwa ipi: “Eamyay wyi ajimi'utà”, e'i kuwa. “Ja'umã'ẽ rena teãmã janereykwerà”, e'i kuwa. Ajamã'ẽ kãramõ Janejare'e omomatà janereykwerà, ja'umã'ẽ revejẽ. [Ãwĩvo ve, ãmõ kee e'i tite kuwa: “Wãivĩ mõ rè apota sõ ajimomy'a aiko remẽ, ãwĩvo aikotà ãmẽ”, e'i teve kuwa. Ãwĩvo teãmã jane kõ ipi wyi aepo e'i kuwa. Ajamã'ẽ janereko ypykwerà opa jane.] Ivo e'ãa rõmõ rõwã Janerõvijã janereinõ. Opota wemimota rupi tijaiko. A'evoa rõmõ tè janepirà oinõ. 14 Janejare'e Janerõvijã Jesu omomoera mãnõa wyi okasia rupi. Ãwĩvo vetà jakãjã remẽ, janemomoera tary ve okasia rupi.
15 Kiristu koty rewarà rõmõ jaiko remẽ, aje Kiristu rè jajimo'y mã'ẽ rõmõ tè jaiko ãmẽ. Pe'ĩypyte eeve jaiko. Ajawyi nijajimomy'a'ãi ãmõ kõ rè jaiko ipi. Nivoi Kiristu koty rewarà ojimomy'a remẽ. Pe'ĩypyte rõwã sipõkõ Kiristu reve jaiko mijã. 16 Kee e'i itõkõ Janejare'e ikusiwaokapa teãmã a'evoa rè: “Mõrijõ mãe kõ pe'ĩypyte rõmõ oiko ojee kupa”, e'i mã'ẽ. Ajawyi ava mõ sõ ojimomy'a mã'ẽ rè oiko remẽ, pe'ĩypyte mã'ẽ rõmõ kõrijõ tè eeve ekoità ãmẽ ky'y. Napekuwai sipõ a'evoa mijã? Pekuwa kuwasi mijã.b 17 Ajamã'ẽ Janerõvijã ywete revejẽ jaiko remẽ, pe'ĩypyte rõmõ jaiko eeve. O'Ãg oinõma janepy'a pupe toiko. Ajawyi ipy'a rupi katu jaikotà ãmẽ ky'y. Ajawyi pe'ĩypyte rõmõ jaikotà eeve jaiko ky'y.
18 Ajawyi kee a'e eayvukasi rõmõ. Tapejimomy'a e'ã ikenẽ, a'e pejẽ. A'evoa wyi tapejirokyje ikenẽ. A'evo sõ peiko remẽ, pevote pejimoaiokatà ãmẽ. Iteetejẽ janeaiwererà kõ ipi. Ajamã'ẽ pe'ĩypyte janepirà rewarà. Nivoi jaiko janepirà jamoky'a Janejare'e rovake remẽ. 19 Aje Janejare'e 'Ãg janepirà pupe ojimoenapa iko. Janejare'e tè o'Ãg omuupa janepy'a pupe tojimoena iko. Ajawyi tijajimoky'aoka e'ã janeaiwererà pè jaiko. Aje ywete jane rõwã janepirà jarà ky'y. Janejare'e 'Ãg tè ijarà rõmõ ekoi ky'y. Aepo jaa kuwasi pekuwapa peiko mijã.c 20 Aje ywete Jesu omãnõ peupewarà mõ. Peaiwererà repykarà mõ omãnõ. Epy wete mã'ẽ vo peaiwererà repyka. Ajawyi tapejimoaioka e'ã peiko ipi, a'e pejẽ. Janejare'e moe'ea rõmõ kõrijõ tè tapeiko, i'Ãg rena rõmõ ipi.