“Waiwererà rè ojimoane'e jẽ mã'ẽ tapemoisyry rã'ĩ pewyi”, e'i mã'ẽ
5
Ipojy mã'ẽ penewarà kee jaa ojenu ije: “Korĩtu wãnà kwaima'e mõ, ãwisõ Jesu koty rewarà teipe remẽ, nivoi jẽ tè ekoi. Oy'yry weraa mã'ẽ tẽ tesõ!” e'i mã'ẽ ojenu ije. Nikatui 'eteay a'evo ekoi remẽ! Noerovijari mãe kõ ipe nãwĩvo ywe'ei ekoi ipi, nivoi epe kupa remẽ. Ajawyi eãgyo tesõ aepo renu remẽ.a 2 Manyvore põkõ pejimoe'e tite sõ? a'e pejẽ. “Nimanyvo'ãi a'evo ekoi remẽ”, pejẽ tite sipõ ee pemãjã! Peãgyoay kuwasi ãwĩ kwaima'e rè pemãjã mijã! Pemosĩoka kuwasi ãwĩ rapijarà ipi mijã! Pemoisyry teve kuwasi pepytery pe wyi mijã! Nivoi 'eteay ãwĩ rapijarà uu pepytery pè pejimoaty Janejare'e moe'e remẽ ekoi! 3 Age'e, ke'ĩrõwã aiko pewyi. Ajawyi, “Nokuwa'ãi teipõ”, pejẽ ywe'e tite põ ije? Ajamã'ẽ e'ãg peneve ekoi. Ajawyi ajimopirai 'ete enu ãmẽ. Ajawyi kee a'e epy'a pè: “Ojavy tesõ sipõ ãwĩ kwaima'e”, a'e ijupewarà mõ. Ajawyi ije ywete sõ pepyri aiko remẽ, eayvukasi kuwa peneminu rõmõ mijã. Amoisyry kuwa ãwĩ pepytery pe wyi mijã. Jesu ayvukasia rupi tè a'evo kuwa aiko. 4-5 Ije najui epe pepyri. Ajamã'ẽ e'ãg peneve ekoi. Janerõvijã Jesu kasia ve peneve ekoi, ijayvu rupi pejimoaty remẽ. Ajawyi nivoi mã'ẽ tapemoisyry ikõ ãwĩ pewyi nẽ, a'e pejẽ. Ãjãgai rõvijã Satanasi po pè tapeity rã'ĩ tojimomorijau iko. Ãwĩvo remẽ kuise'ẽ oitytà maevo waiwererà ky'y. Ivo maevo ekoità ãmẽ ky'y. Ãmẽ kãramõ Janerõvijã Jesu ovãe mijẽ remẽ, wereko jẽtà maevo eraa janerevejẽ yva kyty ky'y.b6 Ejimorypa kõ, kee pejẽ tite: “Orojimotekokuwavay Janejare'e ayvu rè”, pejẽ tite sõ peiko ipi. Ajamã'ẽ nivoi mã'ẽ pemoisyry kuwasi pepytery pe wyi mijã. Nivoia ooupatà pene napemoisyryi sõ remẽ. 7 Ajawyi tapemoisyry amãtejẽ ikõ pewyi nẽ, a'e pejẽ. Awyje janereko pyau rupi jẽsi tapeiko ãmẽ ky'y! Kiristu omãnõma janerekovijarerà pè, janeaiwererà repy rõmõ, ajawyi.c 8 Aje ywete mã'ẽ rupi tapeiko ãmẽ ky'y. Ivo tekoua rupi kõrijõ tè tapeiko ky'y.
“Jesu koty rewarà waiwererà rupi ojimoane'e jẽ mã'ẽ tapeity”, e'i mã'ẽ
9 Kee a'epa itõkõ pejẽ eremikusiwarerà rupi: “Tapejimory e'ã nivoi mãe kõ rè ipi”, a'epa pejẽ. 10 Aepo a'e remẽ, Jesu koty rewarà kõ pewarà mõ tè a'e. Ojimoane'e jẽ sõ waiwererà rè mãe kõ pewarà mõ tè aepo a'e pejẽ. Jesu koty rewarà rõwã mãe kõ pewarà mõ rõwã aepo a'e pejẽ. Jesu koty rewarà rã'ãga kõ pè tè a'e. Manyvo nijareko'ãi pirujẽ nivoi mãe kõ wyi jajisyry ipi. Ãmõ, omoma'e kõ kõrijõ omoe'e mãe kõ wyi. Ãmõ, imona mãe kõ wyi. Ãmõ, ojarà rã'ãga kõrijõ omoe'e mãe kõ wyi. Iteetejẽ noerovijai mãe kõ wyi. Manyvo nija'e'ãi apijarerà kõ wyi jajisyry, ike yvy pè jaiko jẽ remẽ. Maty nijaa'ãi iwyi kõ. [Kãramõ yva pè Janejare'e pyri jaiko remẽ tè katu naiko'ãi apijarerà kõ janepytery pè ky'y.] 11 Ajamã'ẽ kee e'i mãe kõ rè tapejimory e'ã. “Jesu koty rewarà teve ije”, e'i rã'ãga mãe kõ rè. Ajamã'ẽ nivoi ekoi. Ãmõ, omoma'e kõ kõrijõ omoe'e mã'ẽ. Ojarà rã'ãga kõrijõ omoe'e mã'ẽ teve. Ãmõ, poromovyvyrai iko mã'ẽ. Ãmõ, oka'uay iko mã'ẽ. Ãmõ, imona iko mã'ẽ. Apijarerà kõ rè tapejimory e'ã, ojimoane'e jẽ waiwererà rupi iko kupa remẽ, a'e pejẽ. Tapejimi'u e'ã teve ipyri kõ. Tapepoi iwyi kõ.
12-13 Jesu koty rewarà rõwã mãe kõ nivoi ekoi remẽ, “Janejare'e rekoa pejavy ipi”, na'ei ijupe kõ ipi. “Ãwĩvo tapeiko e'ã ky'y”, na'ei teve a'e kõ pè. Janejare'e kõrijõ tè kuwa wemavo kõ ity, toike e'ã wena pè kupa. Ajamã'ẽ Jesu koty rewarà mõ peneirõarà nivoi ekoi remẽ, tapeayvukasi ãmẽ ijupe, a'e pejẽ. “Waiwererà rè ojimoane'e jẽ mã'ẽ tapemoisyry pepytery pe wyi”, a'e pejẽ.d